¿Kilitalichuwinatkan xlakata Dios lakkamanan?

«Kajwatiya kgalhiyaw takanajla nema tlawa pi ni na nalaʼakxilhputunaw, pero ni kinkamakgtayayan nalapaxkiyaw.» (JONATHAN SWIFT, TSOKGNA XALAK IRLANDA)

MASKI uma talakapastakni tsokgka ksiglo XVIII, lhuwa latamanin xala uku nachuna lakpuwankgo. Kmakgapitsi kachikinin wilakgolh tiku lakpuwankgo pi xatlat ni xlimasiyanitkan xlakata Dios xkamanan. Wankgo pi lakkamanan tiku stakkgo kfamilias niku kanajlanikan Dios nitlan kakitaxtuni.

¿Tuku lakpuwana wix? ¿Tukuya talakapastakni nema wi unu, lakpuwana pi xlikana?

● Ni kakamaxkika talakaskin xatlat chu xatse nakatalichuwinankgo xlakata Dios xkamanan.

● Natlatni tlan nakatalichuwinankgo takanajla asta akxni xkamanan nastakkgo.

● Akxni kamanan laktsinajku, natlatni xlimasiyanitkan xtakanajla. Pero akxni stakkgo, nakawanikgo pi xakstukan kaʼakxilhkgolh komo xaxlikana xtakanajla.

● Lakkamanan na watiya nakanajlakgo chuna la xnatlatni chu nitu nakgalhskininankgo.

¿Katlawani tuku nitlan lakkamanan takanajla?

Nipara chatum tlat tlawaniputum tuku nitlan xkamanan. Pero ¿xlikana tiku lakpuwankgo pi nitlan nakamasiyanikan kamanan xlakata Dios? Lakgskgalalan lakchixkuwin lhuwata kata likgalhtawakgamakgolh la xtakanajlakan xnatlatnikan wi tuku kamatlawi. Chu ¿tuku tekgskgolh?

Tekgskgolh pi takanajla ni katlawani tuku nitlan, wata kamakgtaya kamanan tlan nastakkgo. Maktum revista nema wanikan Social Science Research, kata 2008 uma tuku lichuwinalh «litasiyanit pi takanajla kamakgtaya lu tlan natalalinkgo kamanan xnatlatni». * Na wampa: «Takanajla chu katsinikan xlakata Dios lu xlakaskinka kxlatamat kamanan chu kamakgtaya lu tlan nalatalalin familia». Kaʼakxilhwi pi na xtalakxtum tuku lichuwinalh Jesús: «Xatapaxuwan latamakgo tiku katsikgo pi lakaskinkgo tuku xla Dios» (Mateo 5:3, NM).

¿Pi tlan tiku lakpuwankgo pi akxni laklankata nakalitachuwinankan xlakata Dios chu takanajla? Tiku chuna lakpuwankgo, ni katsikgo pi akxni kamanan laktsujku lhuwa tuku katsinikgo. Wi tuku xlilaksakatkan natlatni: nakamasiyanikgo xkamanankan la nalinkgo xlatamatkan chu takanajla nema xlakan lakpuwankgo pi tlan, o kajwatiya nakatsinikgo tuku wankgo amakgapitsin.

¿Tuku nakamakgtaya?

Chuna la titaxtunita kilhtamaku litasiyanit pi takanajla tlawa nalaksakpaxkinankan chu ni nakaʼakxilhputunkan amakgapitsin. Wa xlakata, ¿tuku tlan natlawakgo natlatni xlakata xkamanan ni chuna nakaʼakgspula la wan Jonathan Swift? ¿Tukuya takanajla nakamasiyanikgo nema natlawa pi nakapaxkikgo amakgapitsin?

Wantuku nakamakgtaya wa xtakgalhtin umakgolh takgalhskinin: 1) ¿tuku nakamasiyanikan?; 2) ¿tiku nakamasiyani?, chu 3) ¿la tlakg tlan la kamasiyanikan?

[Notas nema wilakgo kpágina]