¿La nakamasiyaniyaw? La tlakg tlan kamasiyanikan

«Umakgolh tachuwin nema klimapakgsiman la uku natamakgxtakga kminaku; chu namasiyaniya minkamanan chu nalitachuwinana akxni natawila kminchik chu akxni lapat ktiji chu akxni pimpata lhtataya chu akxni natakiya.» (DEUTERONOMIO 6:6, 7)

XATLAT chu xatse max lu tuwa makgkatsikgo nakamasiyanikgo xkamanankan. Chu akxni putsakgo tastakyaw, lhuwa tastakyaw kamaxkikan xlakata la nakamakgastakkgo, uma tlawa pi nialh katsikgo tuku nakamasiyanikgo. Nachuna xparienteskan chu xʼamigos kawanikgo tuku xlitlawatkan chu na wilakgolh libros, revistas chu kʼInternet lhuwa tastakyaw nema mastakgo chu asta ni lakxtum tuku wankgo.

Pero, kBiblia ni kajwatiya masta lakwan tastakyaw xlakata tuku tlan kamasiyanikan kamanan, na masiya la xlitatlawat. Chuna la wan texto nema litsuku uma artículo, talakaskin pi xanatlatni naputsakgo la natlawakgo xlakata nakalitachuwinankgo Dios chali chali. Kʼuma artículo naʼakxilhaw pulaktati tastakyaw xalak Biblia nema kamakgtayanit lu lhuwa natlatni.

1. Kamaklakaskintit tuku tlawanit Dios. Apóstol Pablo tsokgli: «Xampi asta lantla nkilhtsukunit nkatuxawat, wa nkatuwa ntu ni tasiyuy xla xpalakata, mpi ni anan xtamaktat xlitliwakga, chu lantla xla [...]Dios, lu wa lakatanks litakatsi wa xpalakata ntu ntlawanit» (Romanos 1:20). Xatlat nakamasiyanikgo xkamanankan pi Dios xlikana lama, akxni nakamasinikgo tuku tlawanit chu nakawanikgo kalilakapastakgolh tukuya xtayat Dios limasiya tuku tlawanit.

Jesús chuna tlawalh akxni kamasiyanilh xtamakgalhtawakgen. Akgtum liʼakxilhtit akxni wa: «Kaʼukxilhtit laktsu [animales nema kgoskgo] xala kʼakgapun, ni chananankgoy, na ni xkganankgoy, na ni mpala makikgoy xlananatkan kxpumakikan; sa cha mpi wa minTlatkan xala kʼakgapun mawikgoy. ¿Tu xaliwaka lhuwa xtapalh wixin ni xawa xlakan?» (Mateo 6:26). Chuna, Jesús kamasiyanilh kstalaninanin pi Jehová kinkapaxkiyan chu kinkalakgalhamanan na tlawalh pi xlilakapastakkgolh la Dios kalimasiyani xkamanan umakgolh tayat.

Mapakgsina Salomón na wi tuku lu xlakaskinka masiyalh akxni lichuwinalh la Dios kamaxkilh liskgalala laktsu chan. «Lhkitit kaʼakxilhti niku wilakgolh chan; kaʼakxilhti xtiji chu skgalala kawanti. Maski ni kgalhi comandante, tiku nawani tuku natlawa nipara mapakgsina, mastokgwili tuku naway kverano;  chu makiy tuku nawa akxni makgalanankan.» (Proverbios 6:6-8.) Chuna, uma skgalala mapakgsina ni tuwa la masiyalh pi lu xlakaskinka nalakkaxwiliyaw tuku natlawayaw nema tlan chu naliskujaw xlakata namakgantaxtiyaw.

¿Wixin xalak tlat la tlan natlawayatit la Jesús chu Salomón akxni nakamasiyaniyatit mi lakkamanan? Pulana, kakakgalhskintit tukuya laktsu kiwi chu animales lu lakgatikgo. Xlipulaktiy, kaputsatit xlikgalhtawakga nema lichuwinan xlakata uma laktsu kiwi chu animales. Chu xlipulaktutu, kalichuwinantit tuku kamasiyani uma xlakata Dios.

2. Nachuna katlawatit la Jesús, xkgaxmata tuku xwankgo tiku xkatachuwinan. Xliputum tiku latamakgolh, ni anan atanu tiku lu xlakaskinka tuku lichuwinan la Jesús. Pero, Jesús xkatlawani takgalhskinin xlakata xkatsiputun tuku xlakpuwankgo chu tuku xmakgkatsikgo tiku xkgaxmatnikgo (Mateo 17:24, 25; Marcos 8:27-29). Nachuna xlitlawatkan natlatni, lhuwa tuku lu xlakaskinka nakamasiyanikgo xkamanankan, pero xlakata tlan nakitaxtu, natlawakgo la Jesús chu nakakgalhskinkgo tuku lakpuwankgo.

Pero ¿tuku natlawayatit komo kamanan xalaktsakatni o tuwa makgkatsikgo namakgantaxtikgo tuku katsinimakgolh? Kaʼakxilhtit la kalikatsinilh Jesús xʼapóstoles. Xmin kilhtamaku xlakilhni chu ni xʼakgatekgskgo tuku xlakata ni tlankajwa xlikatsikgolh. Pero Jesús ni lakapala sitsilh makglhuwa kawanilh pi ni tlankajwa xlikatsikgolh (Marcos 9:33, 34; Lucas 9:46-48; 22:24, 25). Natlatni tiku nachuna tlawakgo la Jesús ni kakilhnikgo xkamanankan chu komo talakaskin watiya tuku kawanikgo asta akxni xlakan akxilhkgo pi lu xlakaskinka tuku kamasiyanimaka. *

3. Wixin kawilitit xaliʼakxilhtit. Natlatni lu tlan komo natlawakgo tuku apóstol Pablo kawanilh natalan xalak Roma: «Pus wa mpala pi wix nti masiyunikgoya amakgapitsin, ¿tu wan ni akstu masiyunikana? Wix nti liʼakgchuwinana ni nakgalhanankan, ¿[...] kgalhanana?» (Romanos 2:21).

Lu tlan tuku Pablo kamalakpuwanilh, xlakata kamanan tlakg akxilhkgo tuku tlawakgo xnatlatnikan ni xawa tuku wankgo. Natlatni tiku chuna tlawakgo, xkamanankan max tlakg nakakgalhakgaxmatkgo.

4. Kakamasiyanitit akxni laktsujku. Timoteo lu tlan xlichuwinankgo tiku xlakgapaskgo chu alistalh taʼalh apóstol Pablo xlakata nalichuwinankgo Dios alakatanu país (Hechos 16:1, 2). Uma makgtayalh xlakata akxni “aktsinajku xwanit” xmasiyanikanit «xtatsokgnun Dios». Xtse chu xnana, o xtsiyuna ni kajwatiya xlikgalhtawakganikgo tuku wan xtachuwin Dios, wata xmakgtayakgo naʼakgatekgsa tuku xaxlikana masiya xTachuwin Dios (2 Timoteo 1:5; 3:14, 15).

Tuku nakamakgtaya

Xtatayananin Jehová tlawakgonit maklhuwa libros xlakata nakamasiyanikan lakkamanan tuku xaxlikana xlakata Dios. Makgapitsi katlawakanit xlakata tiku lu laktsinajku chu amakgapitsi xlakata tiku laklankata tlan natachuwinankgo xnatlatnikan. *

Xlikana, xlakata tlan nakalitachuwinanaw Dios kamanan, talakaskin pulana nakatsiyaw la nakakgalhtiyaw laktuwa takgalhskinin nema tlawakgo. Akgtum liʼakxilhtit, ¿tuku xkawani komo minkamanan xkgalhskinkgon tuku xlakata Dios masta talakaskin kaʼanalh tapatin, tuku natlawa xlakata kKatiyatni o niku wilakgolh tiku nikgonitta? Xtatayananin Jehová xatapaxuwan namasiyanikgoyan xtakgalhtin umakgolh takgalhskinin chu amakgapitsi, xlakata wix chu mifamilia tlan natalakatsuwiniyatit Dios (Santiago 4:8).

[Notas nema wilakgo kpágina]