Skujnikan Jehová akgtum lanka tamaskiwin
Skujnikan Jehová akgtum lanka tamaskiwin
«Akit wa tuku nalakgchanan, chu wa tuku namaskiwikana kxlakgstipan xkamanan Israel.» (NÚM. 18:20)
1, 2. 1) ¿Tuku kaʼakgspulalh xfamilia Leví akxni mapitsika Tiyat nema xKawanikanit pi Nakamaxkikan? 2) ¿Tuku kawanilh Jehová levitas?
AKXNI israelitas atsinu ni xʼakgchipakgoy putum Tiyat nema xKawanikanit pi Nakamaxkikan, chalh kilhtamaku nakamapitsinikan. Josué, Eleazar xapuxku sacerdote chu tiku xpulalinkgo familias wa kamapitsinikgolh tiyat israelitas (Núm. 34:13-29). Kamaxkikgolh akgatunu familias, pero nitu kamaxkikgolh levitas (Jos. 14:1-5). ¿Tuku xlakata ni kamaxkikgolh? ¿Kaj ni kamaxkiputunkgolh? ¿O ni xkalakgchan nakamaxkikan?
2 Jehová nitu xkamakgxtakgma levitas. Jehová xwaninit Aarón tiku xkapulalin levitas: «Akit wa tuku nalakgchanan, chu wa tuku namaskiwikana kxlakgstipan xkamanan Israel» (Núm. 18:20). ¡Lu lakwan tachuwin! ¿Tuku xmakgkatsiw komo Jehová nachuna xkinkawanin? Max xtlawaw uma takgalhskinin: «¿Kiminini nakmakglhtinan Dios tiku kgalhi xliputum litliwakga? ¿Maski akinin lakgalhinanin tlan namakglhtinanaw uma talakgalhaman?». Xlikana pi lu xlakaskinka umakgolh takgalhskinin, xlakata kifamiliajkan chu akinin. Kʼuma artículo naʼakxilhaw tuku wamputun namakglhtinanaw Jehová. Alistalh naʼakxilhaw la namakglhtinanaw Jehová, maski kʼakgapun o kKatiyatni nalatamayaw.
Jehová kakuentajtlawa xfamilia Leví
3. ¿Tuku xlakata levitas sacerdotes litaxtukgolh?
3 Akxni Moisés nina xkamaxki Limapakgsin, tiku xpulalinkgo akgatunu familia wa sacerdote xlitaxtukgo. Pero akxni kamaxkika Limapakgsin, kajwatiya levitas xʼamakgolh tlawakgo uma taskujut o xmakgtayanankgolh. ¿Tuku xlakata chuna lalh? Kalakapastakwi pi, akxni Jehová kamakgnilh putum xapuxku lakgkgawasan kʼEgipto, lichuwinalh pi xkalaksaknit xapuxku lakgkgawasan israelitas, uma wamputun pi kajwatiya kskujnikgolh Jehová. Pero alistalh, wa levitas kamaklakaskilh «chu nialh wa xapuxku xkamanankan israelitas». Pero xalak puxku xkamanan israelitas tlakg lhuwa xwankgonit ni xtachuna la levitas, Jehová limapakgsinalh xtaxokgolh tuku xkitsankga (Núm. 3:11-13, 41, 46, 47). Chu uma kilhtamaku levitas tsukukgolh skujnikgo Dios kʼIsrael.
4, 5. 1) ¿La litaxtulh Jehová tamaskiwin nema kamaxkika levitas? 2) ¿La xkakuentajtlawa Dios levitas?
4 Chuna la akxilhwi, levitas ni kamaxkika tiyat; tuku tlakg xtapalh “kamaxkika” wa «[k]sacerdote Jehová» wankgolh (Jos. 18:7). Wa xlakata kawanilh kNúmeros 18:20: «Akit wa tuku nalakgchanan». Pero ¿putum kilhtamaku levitas nitu xʼamakgolh kgalhikgo xlakata ni kamaxkika tiyat? Umakgolh textos limasiyakgo pi ni chuna (kalikgalhtawakga Números 18:19, 21, 24). «Xlakata xtaskujutkan» levitas, familias xalak Israel xkamaxkikgo «putum diezmo nema xmastakgo Israelitas» uma wamputun putum tuku xmakgalakgo chu animales nema xlakachinkgo. Pero levitas na xmastakgo diezmo nema xmakglhtinankgo chu xkamaxkikgo sacerdotes (Núm. 18:25-29). * Sacerdotes na xmakglhtinankgo «putum tuku xmaxkikgo Dios» israelitas anta «kxtemplo». Wa xlakata, sacerdotes tlan xlipawankgolh pi Jehová xkamaxkilh putum tuku xmaklakaskinkgolh.
5 Tasiya pi Limapakgsin na xwan pi putum familias xmaʼakgataxtikgolh atanu diezmo nema xtlajakgo xlakata xkgalhikgolh tuku xwakgolh chu asta tuku xmaklakaskinkgolh ktamakxtumit xaʼakgatunu kata (Deu. 14:22-27). Pero xmin kilhtamaku, akxni xkgalhsputa akgtutu kata chu xkgalhsputat xliʼakgchaxan kata uma tuku xlitalakgapasa ciclo sabático, israelitas xlinkgo uma xlipulaktiy diezmo xlakata xkalimakgtayakgolh tiku nitu xkgalhikgo chu levitas. ¿Tuku xlakata na xlitamakgtayakgo levitas? Xlakata nitu “xkamaxkikanit” kʼIsrael (Deu. 14:28, 29).
6. Xlakata levitas ni kamaxkika tiyat, ¿niku xwilakgolh?
6 Xlakata levitas ni kamaxkika tiyat, ¿niku xwilakgolh? Jehová kakuentajtlawalh chu kamaxkilh makgapitsi kachikinin chu pukuxtu nema lakatsu xwilakgolh. Xkgalhikgo 48 kachikinin chu akgchaxan kachikinin niku tlan xtatsekgkan, anta xtawilakgo akxni ni kskujkgo ktemplo (Núm. 35:6-8). Liwana tasiya pi nitu xkatsankgani akxni xliputum kilhtamaku kskujnikgo Dios. ¿La tlan xlimasiyakgolh pi xliʼakxilhkgo Jehová la tuku xkamaskiwikanit? Akxni xlipawankgolh pi Jehová tlan xkamakgtakgalhli.
7. ¿Tuku xtlawakgolh levitas xlakata Jehová xlitaxtulh la akgtum tamaskiwin?
7 Xmin kilhtamaku makgapitsi israelitas ni xmastakgo diezmo. Maski limapakgsin ni xwan pi xkamalakgaxokgeka, pero tiku nitlan xkakitaxtuni wa levitas chu sacerdotes. Chuna lalh kxkilhtamaku Nehemías. Wa xlakata, levitas tsukukgolh skujkgo kxpukuxtukan chu nialh liwana kskujnikgo Dios (kalikgalhtawakga Nehemías 13:10). Xlakata levitas tlan xkakitaxtunilh xtalakaskin pi putum israelitas xmastakgolh diezmo. Nachuna xtalakaskin pi levitas lu xlipawankgolh Jehová chu tuku xlakaxwilinit xlakata xkakuentajtlawalh.
Wa Jehová tuku makglhtinankgolh levitas la akgtum tamaskiwin
8. ¿Tuku nitlan titaxtulh levita Asaf?
8 Maski putum levitas xmakglhtinakgonit Jehová la akgtum tamaskiwin, makgapitsi xwankgo uma tachuwin: «Jehová wa tiku kilakgchan», chuna xlimasiyakgo pi xkakninanikgo chu lu xlipawankgo Dios (Lam. 3:24). Chatum tiku chuna wa, Asaf tiku tsokgli Salmo 73. Chuna xwanikan tiku na xkapulalin levitas tiku xkilhtlikgo akxni xlama David, max uma tukuwani kilhchanima chatum xalak xfamilia Asaf nema na xkilhtli chu xtsokga takilhtlin (1 Cró. 6:31-43). Maski ni liwana katsiyaw tiku tsokgli uma salmo, pero lichuwinalh pi nitlan xakxilha xlakata tlan xkakitaxtuni tiku nitlan xlikatsikgo. Xlakata lu xkalakgkatsalakani, uma tuku wa: “¿Nitu litaxtu la tanks klatamanit y la nikxni ktlawanit talakgalhin?”. Max nialh xlakapastaka pi skujnikan Jehová akgtum tamaskiwin nema ni anan tuku xtachuna. Pero tatliwakglhpa xtakanajla akxni «tanulh kxtemplo Dios» (Sal. 73:2, 3, 12, 13; 73:17, NM).
9, 10. ¿Tuku xlakata Asaf tlan wa: «Akit wata kiDios naklipawan kanikxniwaj»?
9 Akxni Asaf xwi ktemplo, chuna tsukulh lakapastaka la Jehová. Lhuwa kstalaninanin Cristo nachuna titaxtukgonit la Asaf. Xtachuna la uma levita, nialh xlakaskinka akxilhkgolh taskujut nema xtlawanikgo Dios chu wata lhuwa tuku xkgalhiputunkgo. Pero akxni likgalhtawakgaparakgolh xTachuwin Dios chu amparakgolh ktamakxtumit, lakgpalikgolh la xlakapastakkgo. Asaf akxilhli pi tiku tlawakgo tuku nitlan namin kilhtamaku nakamalakgaxokgekan. Akxni lilakapastakli tasikulunalin nema xmaxkinit Dios, katsilh pi Jehová xʼama kuentajtlawa chu xpulalilh. Wa xlakata Asaf wa: «Na chuna juu nak katiyatni nitu klakaskin, wata wix kmaklakaskinan» (Sal. 73:23, 25). Liwana xkatsi pi maski katuwa tuku xakgspulalh asta maski xtatatlalh o xlipuwa, uma tuku wa: «Akit wata kiDios naklipawan kanikxniwaj» (kalikgalhtawakga Salmo 73:26). ¡Lu tlan limakgkatsilh akxni lakapastakli pi Jehová xʼamigo xwanit chu putum kilhtamaku xʼama lakapastaka taskujut nema xtlawama! (Ecl. 7:1.) Wa xlakata kilhtlilh: «Tlakg naktalakatsuwini Dios, wa kimaxki lipaxaw latamat, porque xla nakimakgtakgalha [o kinkuentajtlawa] y ni kama paxtokga tu nitlan» (Sal. 73:28).
10 Akxni Asaf wa pi Jehová akgtum tamaskiwin nema xmaxkikanit, ni wa xlichuwinama tuku xmakglhtinan xlakata levita xwanit. Wata wa xlichuwinama, pi akgtum talakgalhaman xliʼakxilha kskuja kxtemplo Dios chu tlan xtalalin Jehová (Sant. 2:21-23). Xlakata chuntiya tlan xtalalilh xtalakaskin pi lu xkanajlanilh Jehová chu xlipawa pi tlakg tlan xkitaxtunilh komo xkgalhakgaxmatli. ¿Ni xlikana pi akinin nachuna tlan nakanajlaniyaw?
11. ¿Tuku xlilakgaputsama Jeremías chu la makgtayaka?
11 Jeremías nachuna wa: «Jehová wa tiku kilakgchan». Kaʼakxilhwi tuku xwamputun. Uma palakachuwina xlama kʼAnatot, xkachikinkan levitas lakatsu kJerusalén (Jer. 1:1). Akgtum kilhtamaku lilipuwa akxni akxilhli pi tiku nitlan xlikatsikgo lhuwa tuku xkgalhikgo pero tiku tlan xlikatsikgo nitu xkgalhikgo (Jer. 12:1). Jeremías xkatsi pi Jehová tlawa tuku akgstitum; wa xlakata akxni akxilhli tuku nitlan xlama kJerusalén chu kJudá wanilh tuku xmakgkatsi. ¿Kgalhtilh Jehová? Dios limapakgsilh nalichuwinan tuku nitlan xʼama kaʼakgspula umakgolh kachikin chu Dios tlawalh pi liwana xkgantaxtulh tuku xlichuwinanit: tiku ni kgalhakgaxmatkgolh kamakgnika pero tiku kgalhakgaxmatnankgolh tuku Dios wa «lakgmaxtukgolh xlatamatkan» (Jer. 21:9).
12, 13. 1) ¿Tuku xlakata Jeremías wa: «Jehová wa kilakgchan» chu tuku tlawalh? 2) ¿Tuku xlakata xtalakaskin pi israelitas “xkgalhkgalhikgolh” Jehová?
12 Kʼumakgolh kachikin nialhtu analh chu nialhti xlama. Akxni chuna akxilhli Jeremías xmakgkatsi la komo ni xkatsi niku xʼama, kitaxtulh la komo Jehová xlima niku kapukswa. Xmakgkatsi la komo xninit, xtachuna «la lakchixkuwin tiku makgasa nikgonit» (Lam. 1:1, 16; 3:6). Jerusalén chu Judá kamasputuka xlakata israelitas ni makgxtakgkgolh tuku nitlan xtlawamakgolh chu ni lakgtalakatsuwiparakgolh Jehová. Maski Jeremías makatsininalh tuku xʼama akgspula kachikin chu ni xkuenta tuku akgspulalh, pero lu xlilipuwan. Pero alistalh lakapastakli pi xlakata ni putum kamasputuka kaj xlakata «xtapaxkit Jehová nema ni makgxtakgnan», uma talakgalhaman «chali chali xasasti limasiya». Chu akxni lakapastakli pi lanka talakgalhaman xwanit pi xpalakachuwinan Jehová wa: «Jehová wa kilakgchan» (kalikgalhtawakga Lamentaciones 3:22-24).
13 Akxni Jeremías wa: «Jehová wa kilakgchan», limasiyalh pi lu xlipawan xtalakgalhaman Dios nema makgtayalh xlakata tlan «xkgalhkgalhilh». Putum israelitas xtalakaskin pi nachuna xkgalhkgalhikgolh la Jeremías, xlakata xmakgatsankgakgonit xtiyatkan chu kxkachikinkan, nitu xʼanan chu niti latamalh tutumpuxamakaw kata (Jer. 25:11). Pero kajwatiya Jehová tlan xkamakgtayalh. Titaxtulh tutumpuxamakaw kata, Jehová kamaspitpa israelitas xkachikinkan chu tsukuparakgolh skujnikgo (2 Cró. 36:20-23).
Akgtum tamaskiwin tuku ni kajwatiya levitas xkalakgchan
14, 15. ¿Tiku na liʼakxilhli Jehová la akgtum tamaskiwin chuna la levitas chu tuku xlakata?
14 Ni kajwatiya levitas la Asaf chu Jeremías tlan xkgalhikgo talakgalhaman xlakata naskujnikgo Jehová. Akgtum liʼakxilhtit wa David, akxni nina mapakgsina xalak Israel xwanit, wanilh Jehová: «Kintikukan Dios, wata wix klipawanan, wix [...] lata tu kkgalhi juu nak kakilhtamakuj» (kalikgalhtawakga Salmo 142:1, 5). Akxni David tsokgli uma ni kpumapakgsin xwi, wata xwi kʼakgtum lhuku, o tampixtu xlakata xkatatsekgnima xtalamakgasitsin. Max makgtiy tatsekgli klhuku, makgtum lakatsu kkachikin Adulam chu amakgtum kdesierto xla En-guedí. Max anta tsokgli Salmo 142.
15 Kalakapastakwi pi tiku lu xmakgniputun wa mapakgsina Saúl. Akxni xtsalanima, David tatsekgli klhuku nema tuwa xchaʼankan (1 Sam. 22:1, 4). Xlakata lu lakgamakgat xwilacha, xakstu xlama chu nitu xwilakgolh xʼamigos tiku xmakgtayakgolh, putsalh xtamakgtay Dios (Sal. 142:4).
16, 17. 1) ¿Tuku xlakata David xmakgkatsi pi xakstu xwi? 2) ¿Tuku tamakgtay xkgalhi putum kilhtamaku?
16 Akxni tsokgli Salmo 142 David max xkatsiya pi xmakgnikanit Ahimélec. Ahimélec ni xkatsi pi David kaj xtsalapula, wa xlakata makgtayalh, pero Saúl tiku lu ksitsinit mamakgnininalh nachuna putum xfamilia (1 Sam. 22:11, 18, 19). David lu xlipuwan xlakata xmakgkatsi pi xkuentaj xmakgnikanit uma sacerdote tiku lu tlan xlikatsi. Xmakgkatsi pi wa David xmakgninit. Xlikana pi nachuna xmakgkatsiw komo nachuna xtitaxtuw. Chu tuku tlakg nitlan, xmakgkatsi pi nialhla xtatsekgni Saúl xlakata atsinu ni xmataxtuka.
17 Pero ni kajwatiya uma. Ni makgas kilhtamaku nilh Samuel, tiku xwaninit pi mapakgsina xʼama wan (1 Sam. 25:1). Maski xmakgkatsi pi nialhti xmakgtaya, David putum kilhtamaku xkatsi pi Jehová xmakgtayama. Xlikana pi ni xkgalhi tamaskiwin la levitas, pero Jehová atanu tuku xlilaksaknit: xʼama mapakgsinan kʼIsrael (1 Sam. 16:1, 13). Wa xlakata David xliputum xnaku, o xʼanima tlawanilh oración Dios chu putsalh xtamakgtay. Akinin na tlan chuna nakinkamakgtayayan. Komo naliʼakxilhaw Jehová la akgtum tamaskiwin chu naputsayaw xtamakgtay na nakinkamakgtayayan xlakata xliputum kilatamatkan naskujniyaw.
18. ¿Tuku xlakata wanaw pi lhuwa xlakskujnin Dios tiku nikxni makgxtakgkgolh xliʼakxilhkgo la akgtum tamaskiwin?
18 Kʼuma artículo akxilhwi pi David, levitas chu amakgapitsi israelitas na xliʼakxilhkgo Jehová la akgtum tamaskiwin. Uma wamputun pi xkamaxkinit taskujut chu liwana xmakgantaxtikgo, xlipawankgo pi xʼama kakuentajtlawa. Akinin na tlan nawanaw pi Jehová akgtum tamaskiwin nema kinkalakgchanan. Kʼartículo nema aku mima naʼakxilhaw tuku kilitlawatkan xlakata chuna nakitaxtu.
[Notas nema wilakgo kpágina]
^ párr. 4 Komo tlakg katsiputuna xlakata la Jehová xkakuentajtlawa sacerdotes, kaʼakxilhti libro Perspicacia para comprender las Escrituras, volumen 2, páginas 890 chu 891.
¿La xkgalhtinanti?
• ¿Tuku xlakata levitas tlan xwankgo pi wa Jehová tuku xkamaxkikanit?
• ¿La limasiyakgolh Asaf, Jeremías chu David pi Jehová akgtum tamaskiwin nema kamaxkika?
• ¿Tukuya tayat nakgalhiyaw komo lakaskinaw pi Dios nalitaxtu akgtum tamaskiwin?
[Takgalhskinin]
[Epígrafe xla página 11]
Levitas ni kamaxkika tiyat, tuku tlakg xtapalh xkgalhikgo wa kskujnikgo Jehová
[Epígrafe xla página 10]
¿La xʼama kamaxki Jehová tuku xmaklakaskinkgolh levitas?
[Epígrafe xla página 12]
¿Tuku makgtayalh Asaf xlakata chuntiya xliʼakxilhli Jehová la akgtum tamaskiwin?
