¿Tiku xlimasiyanitkan xlakata Dios?

«Limakgalhtawakgat, ni wa ntlakg tlan [...] lantla xmakgalhtawakgana; wampi [...] nti xakgalhtawakgan, xtachuna xmakgalhtawakgana nawan.» (LUCAS 6:40)

MAKGAPITSI natlatni makgkatsikgo pi nila kalitachuwinankgo xlakata Dios xkamanankan. Max lakpuwankgo pi ni ankgonit kʼescuela o ni lhuwa katsikgo xlakata takanajla. Wa xlakata, skinikgo chatum pariente o tiku katsini xlakata takanajla nakamasiyani uma tuku lu xlakaskinka.

Pero ¿tiku tlakg tlan nakamasiyani xlakkamanan tuku xaxlikana xlakata takanajla chu la nalinkgo xlatamatkan? Kaʼakxilhwi tastakyaw nema masta Biblia chu wantuku akxilhkgonit lakgskgalalan lakchixkuwin.

Tuku lu xlakaskinka lakgchan natlawa xatlat

Wantuku masiya Biblia: «Cha nchu wixin xanatlatna, ni [...] mpala makgasitsiyatit milakgskgatankan, chi wampi kaj lakatsukuj kaks namamakgxtakgakgoyatit, nitu natlawakgoy, chu na namasiyunikgoyatit ntu xatlan xtachuna lantla xtalakaskin nkimPuchinakan» (Efesios 6:4).

Wantuku akxilhkgonit lakgskgalalan lakchixkuwin: ¿La makgtaya xatlat akxni lu tliwakga wi xtakanajla? Uma tuku talichuwinalh kata 2009: «Akxni chatum chixku tapakgsi kʼakgtum takanajla alistalh tlakg tlan tlat litaxtu. Kxtakanajla masiyanikan la nakatalalin amakgapitsin, chu lhuwa tuku masiyanikan xlakata la  nalin xlatamat» (Fathersʼ Religious Involvement and Early Childhood Behavior [Religiosidad paterna y comportamiento infantil]).

Biblia lu xlakaskinka akxilha la chatum tlat namakgastaka chu namasiyani xkamanan (Proverbios 4:1; Colosenses 3:21; Hebreos 12:9). Pero ¿makgtayananku uma talakapastakni? Kata 2009 Universidad xalak Florida maxtulh akgtum artículo nema lichuwinan la xatlat tlawa pi xkaman nachuna nalikatsikgo la xla. Umakgolh lakgskgalalan lakchixkuwin katsikgolh pi akxni xatlat kamasiyani xkamanan, lakkamanan tlakg tlan makgkatsikgo chu kamakgtayakgo amakgapitsin. Lakgkgawasan tlakg tlan likatsikgo chu laktsuman tlakg tlan lakapastaknankgo. Xlikana, tastakyaw nema masta Biblia chuntiyaku kinkamakgtayayan.

Tuku lu xlakaskinka tlawa xatse

Wantuku masiya Biblia: «Chuntiyaku kakgalhakgaxpatti xlimapakgsin mintse» (Proverbios 1:8).

Wantuku akxilhkgonit lakgskgalalan lakchixkuwin: Maktum libro nema lakputsanani la likatsikgo laktsu kamanan, uma tuku lichuwinalh kkata 2006: «Chatum tse max 65 chu asta 80 por ciento tlakg lhuwa kilhtamaku akxtum tatawilakgo chatunu chatunu xkamanankan nixawa xatlat chu chuna lay klakalhuwa kachikinin» (Handbook of Child Psychology). Xlakata lhuwa kilhtamaku akxtum tatatawilakgo xkamanan, lhuwa tuku masiyani, la chuwinan, tuku tlawa chu la likatsi xtse alistalh nachuna natlawakgo xkamanankan.

Akxni xatlat chu xatse akxtum masiyanikgo tuku xaxlikana xlakata Dios, pulaktiy tuku lu xlakaskinka kamaskiwikgo xkamanan. Xapulana, kamasiyanikgo la tlan natalalinkgo xTlat xalak akgapun, nema nakamakgtaya xliputum xlatamatkan. Xlipulaktiy, akxni akxilhkgo pi xtlat chu xtse akxtum skujkgo xlakata wi tuku namakgantaxtikgo (Colosenses 3:18-20). Maski tlan atanu tiku nakamakgtayakgo natlatni, wa kalakgchan nalitachuwinankgo xkamanankan xlakata Dios chu tastakyaw nema masta, xlakata xatapaxuwan natawila familia.

Wa xlakata ¿la nakamasiyanikgo? Chu ¿la tlakg tlan nakamasiyanikan?