¿Tuku nakamasiyanikan?

«Xlipaks yuma ntatsokgnun, paks ntimapuwanikgolh Dios lantla natsokgkgoy [...], chu na lu wa tlan nalimakgalhtawakganankan, chu nalimakgatanksninankan, chu nalistakyawanankan.» (2 TIMOTEO 3:16)

LAKKAMANAN xlikatsitkan xlakata Dios. ¿Chu niku tlan nakatsinikgo? Anta klibro nema tlakg maxkikan kakni xlikalanka Katiyatni, Biblia.

Biblia xtachuna la maktum carta nema Dios kinkamakamininitan, anta wan la likatsi chu kawani xkamanan la nalinkgo xlatamatkan tiku lakgkgawasanku chu tiku laklankata. Uku nalichuwinanaw makgapitsi tuku kinkamasiyaniyan chu tuku xlikatsitkan laktsu kamanan.

 Chuna la limasiyakgo umakgolh textos, Biblia kamasiyani laktsu kamanan xlakata akxni nastakkgo, nakamaxkikgo kakni amakgapitsin chu tlan nalikatsikgo. Pero ¿tiku talakaskin nakamasiyani?

¿Tuku lakaskin Dios nakatsiyaw?

◼ Wantuku masiya Biblia: «Wix Dios y Jehová mintukuwani. Wata wix Dios xala talhman, ti tamapakgsinan nak ixlitilanka katiyatni» (Salmo 83:18).

Tuku katsiniyaw: Dios ni kaj akgtum litliwakga, xlikana lama chu kgalhi xtukuwani.

◼ Wantuku masiya Biblia: «Putum naku Jehová kalakputsananima, chu akgatekgsma putum talakapastakni. Komo wix naputsaya, namasta talakaskin natekgsa» (1 Crónicas 28:9).

Tuku katsiniyaw: Jehová putum kinkapaxkiyan, chu nakapaxki laktsu kamanan (Salmo 10:14; 146:9). Lakaskin nalakgapasaw.

◼ Wantuku masiya Biblia: «Ni namakgalipuwanatit [...] tiku ni kgalhi xtse chu xtlat. Komo chuna xtlawa, xla nakintasaskini, nakkgaxmata tuku naskin» (Éxodo 22:22-24).

Tuku katsiniyaw: Jehová kgaxmata putum oraciones asta nema tlawakgo laktsu kamanan. Tlan nawaniyaw tuku lakapastakaw chu tuku makgkatsiyaw.

◼ Wantuku masiya Biblia: «Makglhuwa xliʼakxilhkgo Dios chu xmakgalipuwankgo xaSanto xalak Israel» (Salmo 78:41, NM).

Tuku katsiniyaw: Wantuku wanaw chu tlawayaw tlan namakgalipuwan o namakgapaxuwa Jehová, wa xlakata liwana kalakapastakwi tuku nawanaw chu natlawayaw.

 ¿La nakalikatsiniyaw tiku ni xtachuna tasiyakgo la akinin?

◼ Wantuku masiya Biblia: «Dios, ni [laksakpaxkinan] [...]; wampi kaxani kawa xala, wanti mpikuaniy Dios, chu na wantu xlilat ntu ntlaway, tlan tlaway» o makgamakglhtinan (Hechos 10:34, 35).

Tuku katsiniyaw: Xlakata Dios kamakgamakglhtinan putum latamanin, akinin ni nakalaksakpaxkiyaw tiku tanu xcolorkan o ni la akinin tasiyakgo.

◼ Wantuku masiya Biblia: «Na xaliankgalhin skgalalh natawilayatit lantla lakatitum, chu na takakswan nalikgalhtikoyatit nchatunu wa nti xkakgalhaskin wa xatu xpalakata likgalhiyatit ntakgalhkgalhitin» (1 Pedro 3:15).

Tuku katsiniyaw: Akxni nalichuwinanaw kintakanajlakan nalimasiyayaw pi xlikana kanajlayaw, pero ni nasitsiyaw. Nachuna nakamaxkiyaw kakni tiku ni kanajlakgo chuna la akinin.

¿La nakalikatsiniyaw amakgapitsin xalak kifamiliajkan?

◼ Wantuku masiya Biblia: «Wixin kaman, xlipaks kalakgachixkuwitit mintlatkan; xampi wa yuma, chuna lakgatiy nkimpuchinakan» (Colosenses 3:20).

Tuku katsiniyaw: Kamanan tiku kgalhakgaxmatnankgo ni kajwatiya masiyakgo pi paxkikgo xnatlatnikan, na litasiya pi makgapaxuwaputunkgo Dios.

◼ Wantuku masiya Biblia: «Kalapaxuwanalipinitit, chu na nalamatsankgananiyatit, [o nalatapatiyatit] nchatunu amakgapitsin lapi wi nti lamakgasitsiyatit; xtachuna lantla nkamatsankgananin [...] [Jehová], na chuna wixin nkatlawatit» (Colosenses 3:13).

Tuku katsiniyaw: Max namin kilhtamaku kifamiliajkan o atanu nitlan nakinkamamakgkatsiniyan. Kilikatsinitkan nakatapatiyaw, komo lakaskinaw pi Dios nakinkatapatiyan (Mateo 6:14, 15).

¿Tuku xlakata ni naʼakgsaninanaw chu tlan nalikatsiyaw?

◼ Wantuku masiya Biblia: «Kalimakgxtakgtit ntakgsanin, chu tu [xaxlikana] nkatalalixakgatlitit nchatunu amakgapitsin wa nti lakatsu litawilakgotit» (Efesios 4:25).

Tuku katsiniyaw: Akxni wanaw tuku xaxlikana nachuna tlawayaw la Dios chu makgapaxuwayaw. Pero komo lismaninitaw akgsaninanaw chuna tlawamaw la xtalamakgasitsin Dios, Akgskgawini tiku «xmakilhtsukina taʼakgsanin» (Juan 8:44, NM; Tito 1:2).

◼ Wantuku masiya Biblia: «Nkatuwa wantu xlakaskintit nakatlawanikgoyan nchixkuwin, nachuna wixin natlawanikgoyatit» (Mateo 7:12).

Tuku katsiniyaw: Kiliʼakxilhatkan tuku makgkatsikgo, tuku lakpuwankgo chu tuku maklakaskinkgo kifamiliajkan chu amakgapitsin. Komo naliskujaw xlakata nakaʼakgatekgsniyaw chu tlan nakalikatsiniyaw, amakgapitsin tlan nakinkalikatsinikgoyan (1 Pedro 3:8; Lucas 6:38).