Kalipawaw Jehová tiku masta «xlipaks ntakgtsiyajni»
Kalipawaw Jehová tiku masta «xlipaks ntakgtsiyajni»
«Paxkatsinilh Dios, wa cha xtlat nkimPuchinakan Jesucristo, chu xmakilhtsukina talakgalhaman, chu xmastana xlipaks ntakgtsiyajni.» (2 COR. 1:3)
1. ¿Tuku maklakaskinaw putum kilhtamaku?
AKXNI aku lakachinaw, lu lakaskinaw wi tiku nakinkakuentajtlawayan chu tlan nakinkamamakgkatsiniyan. Chu lakapala katsiniyaw la naskinaw tamakgtay, tsukuyaw tasayaw xlakata nakinkachaxkanan chu nakinkamawikanan. Chuna la titaxtu kilhtamaku chuntiyaku lakaskinaw wi tiku nakinkamatliwakglhan chu nakinkamakgtayayan akxni wi tuku tuwa titaxtumaw.
2. ¿Tuku wan kBiblia pi Jehová xlikana natlawa xpalakata tiku lipawankgo?
2 Makglhuwa kifamiliajkan chu kiʼamigoskan kinkamatliwakglhkgoyan akxni lipuwamaw. Pero min kilhtamaku lu tuwa tuku titaxtumaw chu nipara kiʼamigoskan tlan kinkamakgtayakgoyan. Pero kajwatiya Dios tiku tlan nakinkamakgtayayan maski lu tuwa tuku titaxtumaw. Anta kxTachuwin wa uma tuku kinkawaniyan: «Jehová lakatsu katawi putum tiku putsakgo [...] chu nakgaxmata akxni skinikgo xtamakgtay» (Sal. 145:18, 19, NM). Chu na kinkawaniyan pi «[Jehová] snun kalakgalhaman ti laktankswa [...]lin ixlatamatkan, y xla aks kakgaxmata akxni takilhanij» (Sal. 34:15). Pero komo lakaskinaw nakinkamakgtayayan chu nakinkakuentajtlawayan, talakaskin nalipawanaw. Chuna limasiyalh David kʼakgtum salmo: «Jehová nakamakgtaya tiku makgalipuwamaka, chu xlikana nakamakgtaya akxni nakgalhikgo talipuwan. Tiku lakgapaskgo mintukuwani nalipawankgoyan, xlakata ni katikamakgxtakgti tiku putsakgoyan, oh Jehová» (Sal. 9:9, 10, NM).
3. ¿Tukuya liʼakxilhtit limaklakaskilh Jesús xlakata nalimasiya la xlilhuwa kinkapaxkiyan Jehová?
3 Jehová lu kapaxki xlakskujni. Chu Jesús chuna limasiyalh akxni wa: «¿Tu tankitsis laktsu [tsiktsi], okgxtuy centavo listakan? Pus maski chuna, ni tantum laktsu [tsiktsi] mpala tapatsankganit kxlakatin Dios. Asta maski wa [minchixitkan] kmiʼakgxakgakan, paks taputlakganit. Wa ana yuma xpalakata, ni tipikuanatit; tlakg xaliwaka wixin nkgalhiyatit milakgasikan, ni xawa lhuwa laktsu [tsiktsi]» (Luc. 12:6, 7). Nachuna Jehová limaklakaskilh palakachuwina Jeremías xlakata xkawanilh israelitas: «Lu kpaxkinitan xliputum kilhtamaku. Wa xlakata tapaxkit nema ni makgxtakgnan klimalakatsuwinitan» (Jer. 31:3).
4. ¿Tuku xlakata tlan nalipawanaw tuku Jehová wanit pi natlawa?
4 Akxni lhuwa talipuwan titaxtumaw, lu tlan limakgkatsiyaw akxni lipawanaw Jehová chu tuku wanit pi natlawa. Akinin kililakapastakatkan la Josué tiku wa: «Wixin liwana katsiyatit xliputum minakujkan chu xliputum milatamatkan pi putum xalakwan tachuwin wantuku wanit Jehová miDioskan paks kgantaxtunit. Putum makgantaxtilh mimpalakatakan» (Jos. 23:14). Maski titaxtumaw lu lanka taʼakglhuwit, liwana kilikanajlatkan pi «Dios ni makgxtakgnan» chu nikxni nakinkamakgxtakgan komo liwana naskujnaniyaw (kalikgalhtawakga 1 Corintios 10:13, NM).
5. ¿Tuku kinkamakgtayayan nakamakgtsiyajaw amakgapitsin?
5 Pablo tsokgli pi Jehová «xmastana xlipaks ntakgtsiyajni». Tachuwin takgtsiyajni wamputun: «Wantuku lu tlan mamakgkatsini chatum tiku lu patinama, o tuku lilakgaputsama». Wa uma tuku tlawa kinTlatikan xalak akgapun (kalikgalhtawakga 2 Corintios 1:3, 4). Nituku chu nitiku tlan natlawa pi ni nakamakgtaya tiku liputum xnaku, o anima lipaxki. Chu kgalhi putum tuku talakaskin xlakata nakamakgtaya. Xlakata kinkamakgtayayan, akinin na tlan kamakgtayayaw kinatalankan akxni titaxtumakgolh “xlipaks xtalakgaputsitkan lakimpi na chuna nchu nkin, limakgtsiyajkgoyaw watiya ntakgtsiyajni wantu nkin nkinkalimakgtsiyajnitan Dios”. ¡Lu tlan la lichuwinan Pablo xlakata la Jehová tlan kamatliwakglha tiku patinamakgolh!
Tamakgtay nema kinkamaxkikanan akxni patinamaw
6. ¿Tuku max natlawa pi nakinkamakgalipuwanan?
6 Lhuwa tiku titaxtukgo talakgaputsit nema tlawa pi nalakaskinkgo wi tiku kakamakgtsiyajli. Max akxni niy tiku lu xpaxkikgo, max tiku xtamakgaxtokgkgo o chatum xkgawasa. Pero na lu nitlan makgkatisiyaw akxni tiku kinkalakgmakganan xlakata ni chuna kincolorkan la amakgapitsi o kintachuwinkan, na lipuwanaw akxni max tatatlayaw, kgolonitawa, nitu kgalhiyaw tumin, chu taʼakglhuwit xlakata tamakgaxtokgat o xlakata tlakg nitlan tuku anama kkakilhtamaku.
7. 1) ¿Tuku lakaskinaw akxni lu lakgaputsayaw? 2) ¿Tuku tlan tlawa Jehová xpalakata “naku nema snun lakgaputsa”?
7 Akxni lu tuwa tuku titaxtuyaw tlakg lakaskinaw pi wi tiku kakinkamakgtsiyajni. Kalichuwinaw la kinkamakgtayakanan xlakata natayaniyaw talipuwan nema xla kinakujkan, kintalakapastaknikan chu tuku makgkatsiyaw, chu xlakata ni lu natatatlayaw chu tlan natawila kintakanajlakan. Pulana kalichuwinaw naku. Biblia wan pi min kilhtamaku “naku snun lakgaputsa” (Sal. 51:17). Pero na masiya pi Jehová kamapaksama xlakskujnin tiku lipuwamakgolh chu tlan kamamakgkatsini (Sal. 147:3). Akxni lu tuwa tuku titaxtumaw nakinkamatliwakglhan, komo kanajlayaw pi nakinkamakgtayayan akxni tlawaniyaw oración chu komo namakgantaxtiyaw xlimapakgsin (kalikgalhtawakga 1 Juan 3:19-22 chu 5:14, 15).
8. ¿La kinkamakgtayayan Jehová xlakata ni lu nalipuwanaw?
8 Xlakata titaxtuyaw lhuwa talakgaputsit kintalakapastaknikan, nitlan limakgkatsiyaw. Maklakaskinaw nakinkamatliwakglhkanan chu nakinkamakgtayakanan xlakata kiʼakstukan max nila natitaxtuyaw uma talakgaputsit. Na nakinkamakgtayakanan chuna la salmista, xla kilhtlilh: «Akxni lu lhuwa talakapastakni xaklitaʼakglhuwima, tlan klimakgkatsilh xlakata wix tlan kimamakgkatsini» (Sal. 94:19, NM). Pablo tsokgli: «Nitu xatu ntu ntililakgaputsayatit; chi wampi wata paks kamasiyutit kxlakatin Dios wantu lakaskinatit kmiʼoraciónkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit. Chu wa xkatsit xtatanksni Dios, wa ntu lakatsalaniy xlipaks kintapuwankan, naskgala minakujkan, chu mintapuwankan lantla nkanajlaniyatit nCristo Jesús» (Fili. 4:6, 7). Xlikana pi akxni likgalhtawakgakan Biblia chu lilakapastakkan tuku likgalhtawakgakan lu makgtayanan xlakata ni lu nalipuwankan (2 Tim. 3:15-17).
9. ¿La natayaniyaw akxni lakpuwanaw pi nitu la tlawayaw?
9 Akxni lu nitlan makgkatsiyaw, max nakinkatlajaputunan talakapastakni nema limakgkatsiyaw pi nitu la tlawayaw. Max nalakpuwanaw pi nila makgantaxtiyaw akgtum xlimapakgsin Jehová o wi tuku nakinkalakgayawakanan kcongregación. Akxni chuna titaxtuyaw, Jehová na kinkamakgtayayan chu kinkamakgtsiyajan. Kaʼakxilhwi pi akxni Josué liyawaka napulalin israelitas akxni xʼamakgolh talachipakgo lu lakgtliwakga kachikinin, Moisés uma tuku kawanilh: «Kapaxuwatit chu tliwakga kawantit. Ni kapekuantit chu ni lhpipakg kalatit kxlakatinkan, xlakata miDios tiku kapulaliman. Nikxni lhtuj katimakgxtakgni» (Deu. 31:6). Xlakata Jehová makgtayalh, Josué tlan katamaknulh kTiyat nema xKawanikanit pi Nakamaxkikan kachikinin nema Jehová xlaksaknit chu katlakgolh xtalamakgasitsin. Xtitaxtunit akglhuwa kata, Moisés xʼakxilhnit la Jehová xmakgtayanit kxaSpinini pupunu (Éxo. 14:13, 14, 29-31).
10. ¿Tuku tamakgtay kgalhiyaw akxni litatatlayaw xlakata lhuwa tuku litaʼakglhuwiyaw?
10 Wantuku litaʼakglhuwiyaw kkilatamatkan na litatatlayaw. Xlikana pi tlan kinkakitaxtuniyan akxni kuentajtlawayaw tuku wayaw, tlan lhtatayaw chu tlawayaw ejercicio chu ni lixkajni natawilayaw. Chu na lu makgtayanan xatapaxuwan nalinaw kilatamatkan chuna la wan Biblia. Akxni titaxtuyaw tuku lu litaʼakglhuwiyaw kililakapastakatkan xliʼakxilhtit Pablo, chu uma tuku tsokgli: «Lhuwa tuku kinkalimakgalipuwankanan, pero ni kinkaʼakgchipakanan chuna la nialhla xtatsuwiw; kaks lilakawanaw, pero ni makgkatsiyaw pi nialh la tuku tatlawa; kinkaputsastalanikanan, pero kinkamaxkikanan tamakgtay; kinkatlajakanan pero ni kinkamasputukanan» (2 Cor. 4:8, 9, NM).
11. ¿Tuku nakinkamakgtayayan ni naxlajwanan kintakanajlakan?
11 Nachuna, wantuku titaxtuyaw nalaktlawaputun kintakanajlakan. Chu akxni chuna la, kinTlatikan xalak akgapun na nakinkamakgtayayan. Anta kxTachuwin kinkawaniyan: «Kintikukan Dios kamatliwekglha ixkamanan ti tapatastaj [o lhtojkgo], y kamaki ti kaʼakgchipawilikanit» (Sal. 145:14). ¿Tuku nakinkamakgtayayan natayaniyaw akxni xlajwanama kintakanajlakan? Nakaskiniyaw lakgkgolotsin xalak congregación kakinkamakgtayakgon (Sant. 5:14, 15). Atanu tuku na nakinkamakgtayayan akxni wi tuku laktlawaputun kintakanajlakan wa putum kilhtamaku nalakapastakaw latamat nema ni kgalhi xlisputni nema nakinkamaxkikanan (Juan 17:3).
Tiku nikxni makgxtakgkgolh Dios chu kamakgtayalh
12. ¿La tlan mamakgkatsinilh Jehová Abrahán?
12 Chatum salmista tiku Dios matsokgnilh uma tuku wanilh Jehová: «Tu wix kimalaknuni, akit wa klipawanit, y kkgalhima hasta nakimaxkiya tu kiwani. Mintachiwin kimakgtsija akxni klakgaputsamaj, [...] porque kiwani xlakata nakimaxki latamat, xlakata ni naknij» (Sal. 119:49, 50). La uku kgalhiyaw xTachuwin Dios, nema wilakgolh lhuwa liʼakxilhtit tiku Jehová kamatliwakglhli. Kalichuwinaw Abrahán. Xlikana max pi lu nitlan limakgkatsilh akxni katsilh pi Sodoma chu Gomorra xʼamaka kamalakgsputukan. Wa xlakata kgalhskilh Jehová: «¿Xlikana nakatamasputuya tiku tlan likatsi chu tiku nitlan likatsi?». Dios tlan mamakgkatsinilh akxni wanilh pi ni xmalakgsputulh Sodoma komo xtekgsli tipuxumakaw latamanin tiku xʼakgstitum. Pero Abrahán amakgkitsis kgalhskininampa. Pulana limatsukilh tipuxamakitsis, chu alistalh tipuxum, puxumakaw, puxum chu kgalhkaw tiku xkatekgska. Jehová kgaxmatnilh chu ni sitsilh chu wanilh pi komo xtekgsli kgalhkaw tiku tlan likatsi, ni xmalakgsputulh. Nipara kgalhkaw tiku tlan xlikatsikgo, pero ni kamakgnilh Lot chu xlaktsuman (Gén. 18:22-32; 19:15, 16, 26).
13. ¿La limasiyalh Ana pi xlipawan Jehová?
13 Na kalichuwinaw Ana, xpuskat Elqaná. Ana lu nitlan xmakgkatsi pi nila xkgalhi kamanan. Xlakata chuna xtitaxtuma, tlawanilh oración Jehová chu sacerdote Elí wanilh: «Wa xDios Israel kamaxkin tuku wix skinipat». Xlikana pi tlan mamakgkatsinika, «nixkni tasiyapa kxlakan pi xlakaputsama» (1 Sam. 1:8, 17, 18). Lu xkatsi pi Jehová kgaxmatnilh chu wa limakgxtakgli katlawalh la tlan xlakpuwa. Ni xkatsi tuku natlawa Jehová, pero lu tlan xmakgkatsi. Alistalh katsilh pi Jehová tlan tlawalh tuku skinilh xlakata katsilh pi xʼama kgalhi skgata, chu limapakuwilh Samuel (1 Sam. 1:20).
14. ¿Tuku xlakata David xlakaskin namakgtayakan, chu tiku skinilh namakgtaya?
14 Atanu tiku Jehová na lu tlan mamakgkatsinilh wa David. Jehová «akxilha tuku wi knaku», chu xkatsi pi David lu tlan xlikatsi chu lu xkakninani akxni laksakli xlakata mapakgsina xlitaxtulh kʼIsrael (1 Sam. 16:7; 2 Sam. 5:10). Pero akxni xmapakgsinamaja, tlawalh lanka talakgalhin xlakata tatalakgxtumilh Bat-seba tiku xkgalhiya xchixku chu xlakata xmatsekgputun xtalakgalhin mamakgnininalh xchixku. Xlakata nitlan xlimakgkatsi pi lanka talakgalhin xtlawanit, skinilh Jehová: «Kakilakgkatsanti, porque wix snun lakgalhamanana; kmakgskinan kaxapa lixkajnit kintatlakatni [o talakgalhin] nima kktlawanit, porque wix lanka mintalakgalhaman[...] kimpecado chali chali klakapastakma» (Sal. 51:1-3). Xlakata lu nitlan xlimakgkatsi tuku xtlawanit, uma xlakskujni Dios tapatika. Pero lu nitlan tuku kitaxtulh alistalh xlakata xlakgalhinanit (2 Sam. 12:9-12). Pero maski lhuwa tuku nitlan xtitaxtuma, makgkatsilh pi Jehová Dios xalak akgapun xmakgtayama.
15. ¿Tukuya tamakgtay makglhtinalh Jesús akxni xʼamakaja makgnikan?
15 Akxni Jesús xlama kKatiyatni, na lhuwa tuku xatuwa titaxtulh nema Jehová mastalh talakaskin xtitaxtulh. Pero uma chixku tiku ni xkgalhi talakgalhin lu tayanilh, nikxni makgxtakgli Jehová chu chuna limasiyalh pi lu xlipawan xTlat chu limasiyalh pi minini namapakgsinan. Akxni atsinu xtsankga xʼamakaja stawakan chu makgnikan, tlawanilh Jehová oración chu wanilh: «Wampi ni wa nkintalakaskin nkatatlawalh, wampi wantu mila». Chu tunkun milh matliwakglha chatum ángel (Luc. 22:42, 43). Chuna Jehová, matliwakglhli xlakata xmaklakaskima ama kilhtamaku.
16. ¿La kinkamakgtayayan Jehová komo nakinkamakgniptunkanan xlakata kintakanajlakan?
16 Nachuna, tlan namakglhtinanaw xtamakgtay Jehová komo ni namakgxtakgaw, nakinkamakgtayayan asta akxni max kalipekua nawiliyaw kilatamatkan xlakata tatayayaw kintakanajlakan. Chu nachuna kinkamatliwakglhan xlakata katsiyaw pi naʼanan talakastakwanat. Linin, xaʼawatiya talamakgasitsin “nalaktlawakan” (1 Cor. 15:26). ¡Lu lakaskinaw kachalha ama kilhtamaku! Dios nakamalakastakwani putum tiku kxtalakapastakni wilakgolh xtukuwani, xlakskujnin tiku nikxni makgxtakgkgolh chu lhuwa amakgapitsi latamanin (Juan 5:28, 29; Hech. 24:15). Xlakata lu lipawanaw tuku Jehová wanit pi natlawa, kinkamatliwakglhan chu tlakg kinkamatliwakglhan akxni kinkaputsastalanikanan.
17. ¿La kinkamakgtayayan Jehová akxni niy tiku lu xpaxkiyaw?
17 Jehová liwana kinkawaninitan pi wantiku jaxmakgolh chu kamaknukanit o kaʼakgtapukanit namimparakgo kKatiyatni, chu nialh katipatinankgolh la patinanaw uku. Na kinkamasiyaniyan pi xlakskujnin tiku xalak «lhuwa tachixkuwitat» o lhuwa latamanin nalakgtaxtukgo akxni namasputukan uma kakilhtamaku xalixkajni chu namakgamakglhtinankgo tiku nakamalakastakwanikan kxasasti kakilhtamaku chu nakamasiyanikgo tuku xaxlikana (Apo. 7:9, 10). ¡Lu lanka talakgalhaman!
Jehová kinkalikuentajtlawayan xlitliwakga
18, 19. ¿La kamatliwakglhnit Jehová xlakskujnin akxni kaputsastalanika?
18 Moisés lakatanks kawanilh israelitas kʼakgtum takilhtlin: «Dios akgtum putatsekgni xala makgasa, chu xmakxpan xliputum kilhtamaku makgtayanan» (Deu. 33:27). Palakachuwina Samuel kawanilh alistalh: «Ni kamakgxtakgtit Jehová, chu wa Jehová naskujnaniyatit xliputum minakujkan. [...] Jehová ni katimakgxtakgli xkachikin xlakata xtukuwani lanka» (1 Sam. 12:20-22). Chuna la akxilhaw, komo nikxni namakgxtakgaw Dios xla nikxni kintikamakgxtakgni. Putum kilhtamaku nakinkamakgtayayan akxni nalakaskinaw.
19 Umakgolh xaʼawatiya kilhtamaku nema lu xalixkajni, Jehová chuntiya kamatliwakglhma chu tlan kamamakgkatsini xkachikin. Liwaka akgtum siglo, miles tiku kstalaninanin Cristo kaputsastalanikanit chu katamaknukanit kpulachin xlakata xtakanajlakan. Putum tuku titaxtukgo litasiya pi Dios kakuentajtlawama akxni titaxtumakgolh taʼakglhuwit. Kalichuwinaw chatum kintalakan tiku xala Unión Soviética xalamakgasa, xtamaknukanit kpulachin puxamatutu kata xlakata xtakanajla, pero putum kilhtamaku nema anta xwi wi tiku xlini tamakgtay xlakata xtakanajla chu tlan xmamakgkatsini chu xmatliwakglha. Uma tala wa: «Putum amakgolh kata klipawa Jehová chu Jehová kimatliwakglhi» (kalikgalhtawakga 1 Pedro 5:6, 7).
20. ¿Tuku likatsiyaw pi Jehová nikxni kintikamakgxtakgni?
20 Ni katsiyaw tuku natitaxtuyaw. Maski ni katsiyaw tuku natitaxtuyaw nema xatuwa, lu tlan komo nalakapastakaw umakgolh tachuwin xla salmista: «Dios, ni ama kakgxtakgwili ti [...]lipawan» (Sal. 94:14). Pero ni kajwatiya talakaskin tlan nakinkamamakgkatsinikanan. Na kgalhiyaw talakgalhaman pi tlan nakamamakgkatsiniyaw amakgapitsin. Chuna la naʼakxilhaw kʼatanu artículo, tlan nakamakgtayayaw tiku patinamakgolh kʼuma kakilhtamaku niku anan lhuwa taʼakglhuwit.
¿Tuku xkgalhtinaw?
• ¿Tukuya taʼakglhuwit tlawa pi lu nalipuwanaw?
• ¿La tlan kamamakgkatsini Jehová xlakskujnin?
• ¿Tuku kinkamatliwakglhan akxni kinkamakgniputunkanan?
[Takgalhskinin]
[Epígrafe xla página 23]
LA NATAYANIYAW AKXNI NATITAXTUYAW TAʼAKGLHUWIT XLAKATA
▪ naku Sal. 147:3; 1 Juan 3:19-22; 5:14, 15
▪ talakapastakni Sal. 94:19; Fili. 4:6, 7
▪ akxni makgkatsiyaw pi nitu la tlawayaw Éxo. 14:13, 14; Deu. 31:6
▪ tajatat 2 Cor. 4:8, 9
▪ takanajla Sal. 145:14; Sant. 5:14, 15
