Wantuku masiya xTachuwin Dios

¿La natalakatsuwiniyaw Dios?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Kgaxmata Dios putum oraciones?

Jehová kawani putum tiku tanu tanu kachikinin wilakgolh katlawanikgolh oración (Salmo 65:2). Pero ni putum oraciones kgaxmata. Akxni israelitas xtlawakgo tuku nitlan, Dios ni xkakgaxmatni (Isaías 1:15). Nachuna, oraciones nema tlawa chixku tiku lixkajni likatsini xpuskat Dios max ni nakgaxmatni (1 Pedro 3:7). Pero Dios kakgaxmatni xʼoracionkan tiku tlawakgonit laklanka talakgalhin chu makgxtakgkgonit nitlan xtayatkan. (Kalikgalhtawakga 2 Crónicas 33:9-13.)

2. ¿La natlawayaw oración?

Oración akgtum lanka talakgalhaman na likakninanikan Dios, chu kajwatiya Jehová kilitlawanitkan oración (Mateo 4:10; 6:9). Xlakata akinin makglakgalhinanin, kxtukuwani Jesús kilitlawanitkan oración xlakata wa tiji nema tlan litalakatsuwiniyaw Dios (Juan 14:6). Nachuna Jehová ni lakaskin watiya watiya nawaniyaw oraciones o kaj tatsokgnit, lakaskin nawaniyaw tuku wi kkinakujkan o anima. (Kalikgalhtawakga Mateo 6:7 chu Filipenses 4:6, 7.)

Wa kiMalakatsukinakan kgaxmata oraciones asta maski ni takgaxmata (1 Samuel 1:12, 13). Chu kinkawaniyan pi putum kilhtamaku natlawaniyaw oración, la akxni lakgaxkgakgayaw, akxni sputa kilhtamaku, akxni wayanaw chu akxni kgalhiyaw taʼakglhuwit. (Kalikgalhtawakga Salmo 55:22 chu Mateo 15:36.)

3. ¿Tuku xlakata tamakxtumikgo kstalaninanin Cristo?

Tuwa talakatsuwinikan Dios xlakata lamaw kakilhtamaku niku ni kakninanikan chu likgalhkgamanankgo tuku Jehová wanit pi natlawa unu Katiyatni (2 Timoteo 3:1, 4; 2 Pedro 3:3, 13). Wa xlakata lakaskinaw pi natalan nakinkamatliwakglhkgoyan. (Kalikgalhtawakga Hebreos 10:24, 25.)

Tlan natalakatsuwiniyaw Dios akxni nakatalalinaw tiku paxkikgo. Tamakxtumit xla xtatayananin Jehová kamatliwakglha xtakanajlakan. (Kalikgalhtawakga Romanos 1:11, 12.)

  4. ¿La tlan natalakatsuwiniya Dios?

Tlan nalitalakatsuwiniya Dios akxni nalilakapastaka tuku katsininita kBiblia. Kalilakpuwanti tuku Jehová tlawa, xlimapakgsin chu tuku natlawa. Akxni nalilakpuwana uma chu natlawaya oración tlakg napaxtikatsiniya xliskgalala chu tapaxkit nema kinkakgalhiniyan. (Kalikgalhtawakga Josué 1:8 chu Salmo 1:1-3.)

Komo nakanajlaniya chu lipawana Dios tlan natalakatsuwiniya. Pero takanajla xtachuna la chatum lataman tiku lakaskin tuku naway. Nachuna takanajla xlakaskinka namatliwakglhkan chuna tlawayaw akxni liwana lakputsananiyaw niku takilhti kintakanajlakan. (Kalikgalhtawakga 1 Tesalonicenses 5:21 chu Hebreos 11:1, 6.)

5. ¿Tuku tlan nakitaxtuniyan komo natalakatsuwiniya Dios?

Jehová kapaxki tiku paxkikgo. Kamakgtaya akxni wi tuku nalakxtlawaputun xtakanajlakan chu takgalhkgalhin nema kgalhikgo, pi xliputum kilhtamaku nalatamakgo kKatiyatni (Salmo 91:1, 2, 7-10). Kinkawaniyan tukuya tayat nitlan, xlakata max nalitatatlayaw chu wan la napaxuwayaw, na kinkamasiyaniyan tukuya latamat tlakg xatlan. (Kalikgalhtawakga Salmo 73:27, 28 chu Santiago 4:4, 8.)

Komo tlakg katsiputuna xlakata uma, kaʼakxilhti capítulo 17 xla libro ¿Tuku xlikana masiya Biblia?, nema tlawakgonit xtatayananin Jehova.