Takatsi tiku xmapakgsina uma kakilhtamaku

AKGTUM kilhtamaku, Jesús tiwa: «Natamakaxtukan nti xapuxku yunu nkatuxawat [o kakilhtamaku]». Alistalh wa pi uma mapakgsina «xla nitu kgalhiy litliwaka lakimpi tlan nakimakgatlajay wantu kit kimpalakata» chu «sampi putsananikanitta» (Juan 12:31; 14:30; 16:11). ¿Tiku xlichuwinama?

Umakgolh tachuwin xla Jesús limasiya pi «xapuxku yunu nkatuxawat» niwa xkilhchanima xTlat, Jehová Dios. Komo niwa xkilhchanima ¿tiku xkilhchanima? ¿La “xtamakxtuka”? Chu ¿la «putsananikanitta»?

Tasiya tiku «xapuxku yunu nkatuxawat»

Tiku makgninanin lu lakgatikgo lichuwinankgo tuku tlawakgo, chu chuna tlawalh Akgskgawini akxni xmatlawiputun Jesús tuku nitlan, xKgawasa Dios. Pulana masiyanilh putum «xlipaks xtamapakgsin kkatiyatna» chu alistalh wanilh: «Xlipaks nakmaxkiyan yuma limapakgsin, chu xlikaknikan; xampi kit nti nkimakamaxkikanit; na wa ntin chuna kpuwaniy, kmaxkiy, lapi natatsokgostaya nakilakatakilhputaya» (Lucas 4:5-7).

Komo Akgskgawini kaj xlitaxtulh tuku nitlan chuna la lakpuwankgo makgapitsi latamanin, ¿la nawanaw pi xlikana uma tuku tilalh? ¿Kaj akgtum nitlan xtalakapastakni xkgalhi Jesús nema xmatlawiputun tuku nitlan o kaj lhuwa xtalakapastakni nema ni liwana xkatsi akxni aku xtamununit? Chu komo chuna xtiwa, ¿tlan xwanka pi «ni ananiy xla ntalakalhin»? (1 Juan 3:5.) Jesús ni wa pi Akgskgawini ni xkgalhi litliwakga xlakata xkakgchipalh latamanin. Wata Jesús wa «xapuxku yunu nkatuxawat» chu wa pi «makgnina» chu «xaʼakgsanina» (Juan 14:30; 8:44, NM).

Atsinu ni axtakgatsi tutupuxamakaw kata akxni chuna tilalh, apóstol Juan kamalakapastakalh kstalaninanin Cristo pi Akgskgawini lhuwa litliwakga xkgalhi akxni kawanilh pi «xlikatlanka katuxawat wa akgchipananit akgskgawini». Na tiwa pi «wa cha nti akgskgawi xlipaks ntachixkuwitat» (1 Juan 5:19; Apocalipsis [Revelación] 12:9). Chuna, Biblia masiya pi «xapuxku yunu nkatuxawat» chatum espíritu nema nila akxilhkan. Kaʼakxilhwi, ¿la xlilhuwa litliwakga kgalhi xlakata kaʼakgchipa latamanin?

Xmapakgsina kakilhtamaku chu tiku taskujkgo

Akxni Pablo lichuwinalh xtalamakgasitsin kstalaninanin Cristo xlakata takanajla, Pablo liwana masiyalh tiku nipara tsinu kinkaʼakxilhputunan. Pablo tiwa: «Xampi ni wa ntalatlawayaw mpala xman wa [...] nchixku nti nkgalhi xkgalhni, chu xliwa; wampi wa nti ni tasiyu malanankgoy, chu nti nkgalhikgoy ntlanka xlitliwakga, chu laktlanka napuxkun xla kapakglhtuta [o xala kapukswa] ntu anan yunu nkatuxawat, chu lilhuwa ni lakwan espíritu ntu lamakgo nkaʼunin» (Efesios 6:12). Uma wamputun pi ni wa katakgalhiyaw talachipat «nchixku nti nkgalhi xkgalhni, chu xliwa» wata wa «ni lakwan espíritu ntu lamakgo nkaʼunin».

Lhuwa Biblias nema xalaksasti lakxtum wankgo xlakata uma «ni lakwan espíritu ntu lamakgo nkaʼunin» wa kilhchanima tiku lakgtliwakga espíritus tiku lu lixkajnit likatsikgo chu ni kaj wa tuku nitlan anan. Kmakgapitsi Biblias na tamatitaxti uma tachuwin «espíritus tiku tlawakgo guerra tiku lixkajni likatsikgo nema lamakgolh kʼakgapun» (Carta a los Efesios. Comentario para exégesis y traducción) o «xtlawananin guerra, tiku lixkajni likatsi xalak kaʼakgapun» (La Biblia de las Américas). ¿Tuku masiya uma? Pi Akgskgawini ni xakstu malanama kakilhtamaku. Limaklakaskin  makgapitsi ángeles tiku na ni kgalhakgaxmatkgolh Dios chu «makgaxtakkgolh xputawilhkan» kʼakgapun (Judas 6).

Libro xla Daniel kinkamakatsiniyan pi makgasa asta la uku, pi talakkaxtawilakgonit umakgolh «laktlanka napuxkun». Xlakata kamatlawi tuku lakaskinkgo latamanin. Kata 537 akxni nina xmin Jesús, makgapitsi judíos taspitkgolh kJerusalén akxni xkalikanit kBabilonia. Daniel lu xkalipuwama tiku xtachiki, chu akgtutu semana skinilh Dios pi xkatapatilh. Dios malakgachanilh Daniel chatum ángel xlakata namakgtaya, pero xla nila lakapara chalh niku xwi uma palakachuwina. ¿Tuku xlakata? Ángel wanilh Daniel pi «xmapakgsina Persia xmachokgonit puxamatum kilhtamaku» (Daniel 10:2, 13).

¿Tiku uma «xmapakgsina xalak Persia»? Ni wa Ciro mapakgsina xalak Persia, xlakata uma mapakgsina lu xlimasiyanit pi xpaxki Daniel chu xkachikin. Na chuna, nipara chatum mapakgsina xalak katiyatni tlan namalakgachokgo chatum ángel akgtutu semanas. Kalakapastakti pi kaj chatum ángel makgnilh kaj akgtum tsisni 185,000 soldados tiku xalak tliwakga (Isaías 37:36). Uma «mapakgsina» ni atanu, wa tiku taskuja Akgskgawini: wa demonio tiku xlakgayawakanit Persia. Xʼángel Dios wanilh Daniel pi akxni xtaspitpa watiya demonio xkgalhimapa chu nachuna tiku “xmapakgsina Grecia” (Daniel 10:20).

¿Tuku kinkamasiyaniyan uma? Pi ama «laktlanka napuxkun [...] ntu anan yunu nkatuxawat» wa demonios nema ni tasiyakgo, kgalhakgaxmatkgo xpulalinakan Satanás, nema makgpitsikgo la namalanankgo kakilhtamaku. Pero ¿tuku tlawaputunkgo la uku?

Xmapakgsina kakilhtamaku liwana masiya la likatsi

Kxaʼawatiya libro xalak Biblia, apóstol Juan lichuwinan akgtum guerra niku arcángel Miguel na watiya Jesús, katlaja Akgskgawini chu xdemonios chu katamakxtuyacha kʼakgapun. Uma lhuwa tuku nitlan kinkaliminin. «Kgoxotanin wanti lamakgolh nkatuxawat,[...] xampi wa Akgskgawini, kalakgminitan, na lhuwa tlanka tasitsin nkgalhiy, xpalakata mpi katsiy mpi kaj tsinu kilhtamaku nkgalhiy.» (Apocalipsis 12:9, 12.)

¿La limasiyanit Akgskgawini pi lu sitsinit? Nachuna la lakpuwan tiku makgnina tiku lakpuwan: «Komo ni kila niti xla». Xlakata katsikgo pi nialh lhuwa kilhtamaku kgalhikgo, lhuwa tuku nitlan tlawakgo xlakata lu sitsikgonit chu lakgalhiputunkgo Katiyatni chu kamasputuputun latamanin. Atanu tuku maklakaskin Akgskgawini, wa latamanin nema kaʼakgchipanit, uma wamputun laklanka stananin xlakata lhuwa tuku nakamakgtamawakgo latamanin maski ni lakaskinkgo. Wa xlakata sputa tuku xla Katiyatni chu talakgalhi tiyat, nema tlawa pi namin kilhtamaku nialhla katilatamaka Katiyatni (Apocalipsis 11:18; 18:11-17).

Akxni tsukukgolh latamakgo latamanin asta la uku akxilhaw kpolítica chu ktakanajla pi Akgskgawini lu mapakgsinamputun. Libro Apocalipsis kalichuwinan laklanka mapakgsinanin xla política nema litaxtukgo la laklanka animales nema lixkajni xtayatkan tiku Akgskgawini kamaxkinit «ntlanka limapakgsin». Na lichuwinan la takanajla tatalakgxtumikgo políticos chu uma limaxana, tamalakxtumikan la akxni wi tiku akgskgawi xchixku (Apocalipsis 13:2; 17:1, 2). Kalichuwinaw la akxni kamapatinikan latamanin, kamaskujukan chu ni kaxokgonikan, guerras chu talamakgasitsit xlakata atanu tachuwin nema ananit akglhuwa siglos, chu millones latamanin nema nikgonit. ¿Tlan nawanaw pi umakgolh tuku lu lipekua nema ananit akglhuwa siglos kaj xlakata chuna katlawakanit latamanin? O xlakata lhuwa tiku lixkan likatsikgo nema ni tasiyakgo kamatlawi latamanin.

Xaʼawatiya tuku tlawama Akgskgawini

Akxni Jesús lichuwinalh Dios unu Katiyatni litasiyalh pi Satanás chu xdemonios tlan nakamakgnikan. Akxni kstalaninanin Jesús wankgolh la xtamakxtukgonit demonios,  kawanilh: «Xakuʼkxilhma Satanás, xtaktamachi nkakgapun xtachuna [makglipni]» (Lucas 10:18). Wa umakgolh tachuwin, limasiyalh pi lu xlipaxuwalh akxni xtaspitli kʼakgapun xlakata Jesús nawatiya arcángel Miguel xtamakxtucha akgskgawini kʼakgapun, xmapakgsina kakilhtamaku (Apocalipsis12:7-9). Akxni liwana lakputsananikan tuku xʼama kgantaxtu xalak Biblia makgatekgsanan pi uma xʼama kgantaxtu kata 1914 o alistalh. *

Akxni kamakaminka, Akgskgawini katsi pi nialh makgas namalakgsputukan. Chu maski «xlikatlanka katuxawat wa akgchipananit akgskgawini», millones latamanin nitu mastakgonit talakaskin nakaʼakgskgawi maski akgskgawini lu putsa la nakaʼakgchipa. Biblia kamakatsininit tiku Akgskgawini chu tuku lakpuwanit natlawa (2 Corintios 2:11). Umakgolh tachuwin xla apóstol Pablo nema kawanilh xnatalan tiku kstalaninanin Cristo lu kamakgapaxuwalh: «Chu wa Dios wanti nkinkamaxkiyan ntatanksni, namalakgsputuy Satanás, nawili kxtampin mintuwankan [o tantun], na lakapala natlaway» (Romanos 16:20). *

Nialh makgas tsankga akxni Akgskgawini awatiya natlawa tuku lakaskin. Akxni kxtamapakgsin Cristo tiku lu xapaxkina, latamanin natlawakgo pi Katiyatni akgtum paraíso nawan. Latlawanikan tuku nitlan, lamakgasitsit chu tiku paks xla tlawaputun kamasputukanit nawan putum kilhtamaku. Chuna la wan Biblia: «Tuku titaxtunita nialh katitalakapastakli» (Isaías 65:17). ¡Lu lipaxaw nawan akxni nialh katitawilakgolh xmalananin uma kakilhtamaku nema ni tasiyakgo!

[Notas nema wilakgo kpágina]

[Epígrafe xla página 9]

Akxni namapakgsinan lu xapaxkina Cristo, latamanin natlawakgo Katiyatni akgtum paraíso