Tastakyaw xlakata tiku tamakgaxtokgnita chu tiku nina
Tastakyaw xlakata tiku tamakgaxtokgnita chu tiku nina
«Wampi wa yuma kkaliwaniyan [...] lakimpi wa ntu lakatitum nalilatapayatit, chu lakimpi naliʼakgapiniyatit o [naskujniyatit] nkimPuchinakan, ni tu nakasokgaliyan.» (1 COR. 7:35)
1, 2. ¿Tuku xlakata kiliʼakxilhatkan tastakyaw xlakata tiku tamakgaxtokgonita chu tiku nina?
XLAKATA lakchixkuwin chu lakpuskatin tlan latalalinkgo, tawila tapaxuwan, pero na lhuwa taʼakglhuwit chu talipuwan limin. Kstalaninanin Cristo lakaskinkgo pi Jehová kakapulalilh kxlatamatkan chu tlan nakakitaxtuni akxni katalalinkgo lakpuskatin o lakchixkuwin. Pero ni kaj wa xlakata uma lakaskinkgo pi Jehová nakapulalin. Makgapitsi tiku nina tamakgaxtokgkgo paxuwakgo xlakata nina tamakgaxtokgkgo, pero xʼamigos o xfamilia wanikgo pi katamakgaxtokglha. Amakgapitsi tamakgaxtokgputunkgo pero nina tekgskgo tiku xlilat natatamakgaxtokgkgo. Chu tiku kgalhikgoya tiku natatamakgaxtokgkgo na lakaskinkgo nakastakyawakan xlakata tlan nakakitaxtuni akxni natamakgaxtokgkgo. Nachuna, tiku tamakgaxtokgkgonita chu tiku nina, putum xlitayanitkan pi ni natatalakgxtumikgo tiku ni xlilat.
2 Max tamakgaxtokgnitawa o nina, komo natlawayaw tuku nitlan natlawa pi ni napaxuwayaw chu tuku tlakg nitlan nila katitalaliw Jehová. Wa xlakata, talakaskin naʼakxilhaw tastakyaw nema Pablo mastalh xlakata tiku tamakgaxtokgnit chu tiku nina, nema wi kcapítulo 7 kxapulana carta nema kamalakgachanilh corintios. Pablo wa, chu na tsokgwililh, xlakata nakinkamaʼakgpuwantiniyan wa pi «ntu lakatitum» natlawayaw chu naliskujaw “naliʼakganiyaw kimPuchinakan, ni tu nakinkasakgaliyan” (1 Cor. 7:35). Chuna la naʼakxilhtilhayaw umakgolh tastakyaw, kalilakpuwaw la natlawayaw xlakata tlakg naskujnaniyaw Jehová komo tamakgaxtokgnitawa o nina.
Wantuku lu xlakaskinka chatunu chatunu kililaksakatkan
3, 4. 1) ¿Tuku max nitlan nakitaxtu komo wi tiku lu lipuwan pi tiku xalak xfamilia o xʼamigo nina tamakgaxtokga? 2) ¿La kinkamakgtayayan xtastakyaw Pablo xlakata la naʼakxilhaw tamakgaxtokgat?
3 Kxapulana siglo, judíos lu xlakaskinka xakxilhkgo natamakgaxtokgkan, chu xtapuwan pi wa lu tlan. Nachuna la uku, kmakgapitsi kachikinin akxni tiku lina kata chu nina tamakgaxtokga, xparientes chu amigos lipuwankgo chu max asta nawaniputunkgo tuku xlitlawat. Chu asta wi tuku tlawakgo xlakata nalalakgapasa chu nalatatamakgaxtokga. Max asta nawanikgo pi tlakg kalimaxtulh kilhtamaku xlakata natekgsa tiku natatamakgaxtokga o nawanikgo tiku tlan xtatawilalh. Pero akxni tiku chuna tlawa, lu nitlan mamakgkatsinikgo chu tlawa pi nialh tlan nalatalalin.
4 Pablo nikxni wanilh tiku ni xtamakgxtokgnit katamakgaxtokgli o nikxni katamakgaxtokgli (1 Cor. 7:7). Maski lu xpaxuwa kskujnanima Jehová chu nitu xtamakgaxtokgnit nitu xkawani tiku xtamakgaxtokgkgonit. Chatunu chatunu xlikatsit tuku natlawa, komo natamakgaxtokga o ni chu niti namakgtanu.
La lu tlan nalilatama tiku nitu tamakgaxtokgnit
5, 6. ¿Tuku xlakata Pablo wa pi tlakg tlan tiku ni tamakgaxtokga?
5 Tuku katsokgnilh congregación xalak Corinto, Pablo limasiyalh pi wi tuku lu tlan tlawakgo tiku nitu tamakgaxtokgnit (kalikgalhtawakga 1 Corintios 7:8). Maski nitu xtamakgaxtokgnit, nikxni limasiyalh pi tlakg tlan xwanit xlakata nitu xtamakgaxtokgnit chuna la tlawakgo tiku xalak amakgapitsi takanajla. Wantuku lichuwinalh pi tiku nitu tamakgaxtokgkgonit tlakg tlan lichuwinankgo xTamapakgsin Dios.
6 Min kilhtamaku tlan makglhtinankgo makgapitsi taskujut kxkachikin Dios nema nila xtlawakgolh komo xtamakgaxtokgolh. Kalichuwinamparaw Pablo, xla lhuwa taskujut lakgatayalh, «[apóstol] xpalakatakan xaʼakgmakgat chixkuwin» litaxtulh (Rom. 11:13). Akxni likgalhtawakgayaw capítulo 13 asta 20 xla Hechos, tasiya pi lu makgat niku kataʼalh amakgapitsi misioneros, xlichuwinan Dios niku niti axlichuwinan, chu kaniwa xtawilalh congregaciones. Nachuna lhuwa tuku nitlan titaxtulh nema akinin nitu titaxtumaw (2 Cor. 11:23-27, 32, 33). Pero lu tlan xmakgkatsi xlakata lhuwa tiku kstalanikgolh Cristo chu ni xtlawa kuenta la xpatinama (1 Tes. 1:2-7, 9; 2:19). ¿Tlan chuna xtlawalh komo xkgalhilh xpuskat o xkamanan? Max ni.
7. ¿Tuku tlawamakgolh chatiy precursoras xlakata nitu tamakgaxtokgkgonit?
7 Lhuwa natalan tiku ni tamakgaxtokgkgonit lu lhuwa limaxtukgo kilhtamaku xlakata lichuwinankgo Dios. Chuna tlawamakgolh Sara chu Limbania, chatiy precursoras xalak Bolivia, tiku ankgolh kʼakgtum aktsu kachikin niku makgasa niti xʼan lichuwinan Dios. Maski ni anan luz, wankgo pi uma ni lanka taʼakglhuwit: «Xlakata ni anan radio, nipara televisión latamanin lu lakgatikgo kgalhtawakgakgo». Chu latamanin masiyanikgolh natalan makgapitsi likgalhtawakga nema wi tiku xkamaxkinit nema akinin makgpitsiyaw, maski makgasa kamaxkika chuntiya likgalhtawakgakgo. Umakgolh natalan tekgskgo akgatunu chiki niku ankgo tiku kgaxmatputunkgo uma tamakatsin, wa xlakata lhuwa kilhtamaku talakaskin xlakata nakalakgankgo putum latamanin. Wankgo pi chatum puskat kawanilh: «Komo xtatayananin Jehová chinkgolh asta unu uma wampututn pi ¡lu talakatsuwinit lisputni!». Xlakata umakgolh natalan lichuwinankgolh Dios anta, lhuwa tiku tsukukgolh ankgo ktamakxtumit.
8, 9. 1) ¿Tuku xlakapastakma Pablo akxni wa pi lu tlan tiku ni tamakgaxtokgkgonit? 2) ¿Tuku tlan tlawakgo natalan tiku nitu tamakgaxtokgkgonit?
8 Xlikana pi makgapitsi tiku tamakgaxtokgkgonit na lu tlan kakitaxtuni akxni lichuwinankgo Dios. Pero ¿ni xlikana pi makgapitsi tiku nitu tamakgaxtokgonit tlan tlawakgo tuku kalakgayawakan nema lu tuwa namakgkatsikgo tiku tamakgaxtokgkgonit o kgalhikgo xkamanankan? Akxni xlichuwinama pi lu lhuwa lichuwinankgo Dios tiku ni tamakgaxtokgkgonit, Pablo xakxilha pi lu lhuwa taskujut nema xlitatlawat. Wantuku xlakaskin wa pi putum natalan xlipaxuwakgolh xlakata naskujnanikgo Dios.
9 Chatum precursora xalak Estados Unidos tsokgli uma: «Makgapitsi lakpuwankgo pi xlakata napaxuwakgo talakaskin natamakgaxtokgkan. Pero akit kkatsi pi wantuku lu xlikana lipaxuwakan wa pi, tlan natalalinkan Jehová. Xlikana tiku ni tamakgxtokga lhuwa tuku tuwa titaxtu, pero komo liwana maklakaskinkan uma, akgtum lu stlan tamaskiwin», chu na wa pi: «Wata tlakg napaxuwakan. Jehová putum lu kinkapaxkiyan maski nitu tamakgaxtokgnitaw o tamakgaxtokgnitaw». Uma tala lu lipaxuwa xlakata skujnanima Jehová niku lhuwa talakaskin tiku nalichuwinan Dios. Putum tiku nitu tamakgaxtokgkgonit xlitlawatkan uma takgalhskinin: «Xlakata nitu ktamakgaxtokgnit, ¿tlan tlakg lhuwa kilhtamaku xaklichuwinalh Dios?». Max na naʼakxilha pi xlakata nitu tamakgaxtokgnita uma akgtum tamaskiwin nema Dios maxkinitan.
Tiku tamakgaxtokgputumakgolhku
10, 11. ¿Tuku kalimakgtaya Jehová tiku tamakgaxtokgputunkgo pero ni tekgskgo tiku lu tlan skujnanima Jehová?
10 Makgapitsi tiku makgasa ni tamakgaxtokgkgo tsukukgo lakpuwankgo natamakgaxtokgkgo. Xlakata katsikgo pi talakaskin Jehová nakapulalin, skinikgo tamakgtay xlakata tlan natekgskgo tiku natatawilakgo (kalikgalhtawakga 1 Corintios 7:36).
11 Makgapitsi natalan lu tekgsputunkgo tiku xtatamakgaxtokgkgolh wantiku xlikana skujnanima Jehová. ¿Chuna titaxtupat wix? Katlawani lhuwa oración Jehová (Fili. 4:6, 7). Maski makgasa kgalhipat natamakgaxtokga, chuntiya katlawa oración. Liwana kakatsi pi Dios akgatekgsa tuku titaxtupat chu xatapaxuwan namakgtayayan xlakata tlan natayaniya (Heb. 13:6).
12. ¿Tuku xlakata talakaskin pi liwana nalakpuwanaw akxni wi tiku nakinkawaniyan katatamakgaxtokgwi?
12 Makgapitsi natalan tiku putsamakgolh tiku natatamakgaxtokga wi tiku kawani katatamakgaxtokgkgolh pero ni tliwakga wi xtakanajlakan chu makgapitsi nipara xtatayanananin Jehová. Maski lu tuwa makgkatsikgo pi nitu tamakgaxtokgkgonit xlilakapastakatkan pi komo tatatamakgxtokgkgo tiku ni xlilat lu lhuwa talipuwan nakgalhikgo. Max tlan o nitlan nakitaxtuni akxni nawan «tlan» pero nialh la katilakgpalilh tuku wa (1 Cor. 7:27). Wa xlakata nikxni katatamakgaxtokgti tiku ni xlilat max alistalh putum kilhtamaku lu nalipuwana (kalikgalhtawakga 1 Corintios 7:39).
La nalakkaxwilikgo la natawilakgo tiku natamakgaxtokgkgo
13-15. ¿Tuku talakaskin nalakkaxwilikgo akxni nina tamakgaxtokgkgo?
13 Chuna la akxilhwi, Pablo lichuwinalh tuku tlan tlawakgo tiku nitu tamakgaxtokgonit, pero nikxni kalakgmakgalh tiku laksakkgolh natamakgaxtokgkgo. Wata espíritu santo pulalilh chu tsokgli makgapitsi tastakyaw nema kamakgtaya naʼakxilhkgo tukuya taʼakglhuwit anan ktamakgaxtokgat chu la nalakkaxtlawakgo xtamakgaxtokgotkan.
14 Xlikana makgapitsi tiku natamakgaxtokgkgo liwana xlilakapastakparatkan la natawilakgo akxni natamakgaxtokgkgo. Akxni nina tamakgaxtokgkgo max lakpuwankgo pi xlakata lu lapaxki uma nakamakgtaya pi lu tlan natawilakgo. Akxni tamakgaxtokgkgo la akgtum cuento lu lilakgatit chu lakpuwankgo pi nitu natlawa pi ni napaxuwakgo. Komo xlakapastakkgolh la xlilat, xʼakgatekgskgolh, pi naʼanan taʼakglhuwit ktamakgaxtokgat maski lu lhuwa lalakgatikgo pero nila kajwatiya nakamakgtaya nalilakkaxtlawakgo xtaʼakglhuwitkan (kalikgalhtawakga 1 Corintios 7:28). *
15 Lhuwa tiku kajku tamakgaxtokgkgonit lu kaks lilakawankgo chu asta nitlan limakgkatsikgo akxni akxilhkgo pi ni lakxtum akxilhkgo tuku xlakaskinka. Max ni akxtum lakapastaknankgo akxni lichuwinankgo tumin, talakgastan, niku natawilakgo, chu akxni nakalakgapaxialhnankgo xfamiliaskan. Chu max naʼakxilhkgo xtalismanin o tuku nitlan natlawa achatum nema akxni nina xtamakgaxtokgkgo ni xlisitsikgo, chu la uku lu nilakgatikgo chu tlawa pi nitlan nalatalalin. Wa xlakata tlakg tlan nalakkaxtlawakgo putum tuku natalakaskin akxni nina tamakgaxtokgkgo.
16. ¿Tuku xlakata tiku tamakgaxtokgkgonit lu xlakaskinka nalakkaxwilikgo la natlawakgo akxni nakgalhikgo taʼakglhuwit?
16 Xlakata tlan chu xatapaxuwan natawilakgo tiku tamakgaxtokgkgonit talakaskin pi xchatikan nalakkaxtlawakgo akxni nakgalhikgo taʼakglhuwit. Xchatiykan xlilakkaxwilitkan la nakamasiyanikgo xkamanan, la nakakuentajtlawakgo xnatlatni nema linkgoya kata chu ni namastakgo talakaskin pi xtaʼakglhuwitkan natlawa pi nalamakgxtakgkgo. Komo namakgantaxtikgo tastakyaw xalak Biblia tlan nalakkaxtlawakgo xtaʼakglhuwitkan o tlan natitaxtutilhakgo xtalakgaputsitkan chu tuku tlakg tlan, akxtum natawilakgo chu napaxuwakgo (1 Cor. 7:10, 11).
17. ¿Tuku litaʼakglhuwikgo «wantu xala katuxawat» tiku tamakgaxtokgkgonit?
17 Pablo na lichuwinan atanu tuku na titaxtukgo tiku tamakgaxtokgkgonita anta k1 Corintios 7:32-34 (kalikgalhtawakga). Wan pi chixku tiku tamakgaxtokgnit «wa nkuintaj tlaway wantu xala katuxawat» uma kilhchanima, liwat, lhakgat, chiki chu atanu tuku tamaklakaskin. ¿Tuku xlakata lhuwa tuku litaʼakglhuwi? Xlakata xlikuentajtlawat xpuskat chu namakgapaxuwa. Pulana tlan tlakg xlichuwinan Dios, pero la uku tlakg limaxtu kilhtamaku chu litliwakga xlakata nakuentajtlawa xpuskat. Chu nachuna tlawa xapuskat. ¡Lu tlan limakgkatsiyaw xlakata katsiyaw pi kinTlatkan tiku lu xaskgalala katsi pi chuna kilitlawatkan! Jehová katsi pi tiku tamakgaxtokgkgonit xlakaskinka tlakg tlan nalatalalinkgo chu wa xlakata limaklakaskinkgo tlakg kilhtamaku chu litliwakga nema pulana xlimaklakaskinkgo xlakata nalichuwinankgo Dios.
18. ¿Tuku talakaskin nalakgpalikgo tiku tamakgaxtokgkgo xlakata la talalinkgo xʼamigos?
18 Xtachuwin Pablo na wi atanu tuku kinkamasiyaniyan. Komo tiku tamakgaxtokgnit tiyakgo kilhtamaku nema pulana xliskujnikgo Jehová, xlakata nakuentajtlawa tiku tamakgaxtokga, ¿ni xlikana pi na nialha lhuwa kilhtamaku nakatatawila xʼamigos? Kalilakapastakwi uma, ¿tuku xmakgkatsilh chatum puskat komo xchixku makglhuwa xʼalh takgamanan xʼamigos chuna la akxni nina xtamakgaxtokga? ¿Chu la xmakgkatsilh chixku komo xpuskat makglhuwa xʼalh kalakgapaxialhnan xʼamigas? Namakgkatsikgo pi ni xlikana lapaxki chu namakgkatsikgo pi xakstu wilakgolh chu ni katipaxuwakgolh. Pero ni chuna nala komo xchatiykan naliskujkgo xlakata lu tlan nalatalalin chu nalapaxki (Efe. 5:31).
Jehová lakaskin nitu nalixkajwananaw kkilatamatkan
19, 20. 1) ¿Tuku xlakata tiku latamakgaxtokga ni wamputun pi nialh xlikuentajtlawatkan xlakata ni nalaʼakgskgawi? 2) ¿Tuku max nakaʼakgspula tamakgaxtokgat nema lu makgas kilhtamaku ni akxtum tawilakgo?
19 Putum xlakskujni Jehová katsikgo pi xlakaskinka ni natlawayaw talakgxtumit nema ni xlitatlawat. Pero wilakgolh tiku tamakgaxtokgkgo xlakata ni natlawakgo tuku nitlan. Pero liwana kilikatsitkan pi akxni wi tiku tamakgaxtokga ni wamputun pi nialh katitatalakgxtumilh tiku ni xlilat, chuntiyaku xlikuentajtlawat. Makgasa akxni tsokgka Biblia, kachikinin nema xlitamakgstilinit patsaps, kajwatiya xlitamakgtayakgo tiku anta xtawilakgolh. Komo xtaxtukgolh, wi tiku xkatlawanilh tuku nitlan, o max asta xkamakgnilh tiku lixkani xlikatsikgo. Nachuna tiku tamakgaxtokgkgonit ni xlilakatsalatkan chuna la Jehová lakkaxwilinit xlakata tiku tamakgaxtokgkgonit.
20 ¿Tuku ni xlilakatsalatkan? Pablo liwana wa k1 Corintios 7:2-5. Puskat kajwatiya xlitatalakgxtumit xchixku chu nachuna chixku kajwatiya xlitatalakgxtumit xpuskat. Talakaskin pi kalamaxkilh «wantu maklakaskin» xlakata talakgxtumit. Lu nitlan pero makgapitsi ni akxilhkgo tuku maklakaskin xchixku o xpuskat xlakata talakgxtumit xlakata lu lhuwa kilhtamaku ni akxtum latatawila max xlakata taskujut o ni akxtum kilhtamaku akxni tiyakgo vacaciones. ¡Lu xalilakgaputsa komo «xpalakata ni lay natalayatit [akxtum] makgas kilhtamaku», chu max Satanás natlawa pi achatum tiku natatalakgxtumi! Jehová nakasikulunatlawa tiku pulalinkgo familias chu fuerza tlawakgo xlakata makgantaxtikgo chu ni kalipekua wilikgo xtamakgaxtokgotkan (Sal. 37:25).
Wantuku tlan kitaxtu komo kgalhakgaxmatkan xtastakyaw Biblia
21. 1) ¿Tuku xlakata lu tuwa laksakkan komo natamakgaxtokgkan o ni? 2) ¿La kinkamakgtayayan capítulo 7 xapulana carta nema Pablo kamalakgachanilh corintios?
21 Tuwa laksakkan natamakgaxtokgkan o ni natamakgaxtokgkan. Putum akinin lakgalhinanin, chu wa xlakata lhuwa taʼakglhuwit latakgalhikgo latamanin. Wa xlakata asta wantiku Jehová kasikulunatlawa, tiku tamakgaxtokgkgonit o ni, katakgalhikgo taʼakglhuwit amakgapitsi. Wa xlakata, kstalanina Cristo tiku namakgantaxti umakgolh tastakyaw nema wi kcapítulo 7 kxapulana carta nema Pablo kamalakgachanilh corintios, ni katikgalhilh lhuwa taʼakglhuwit «komo chuna natlawa» kxlakatin Dios maski tamakgaxtokgnit o ni (kalikgalhtawakga 1 Corintios 7:37, 38). Xlikana ni anan tuku tlakg xlakaskinka watiya komo Jehová tlan nakinkaʼakxilhan. Komo tlan talalinaw Jehová, putum kilhtamaku nalatamayaw kxasasti kakilhtamaku, niku lakpuskatin chu lakchixkuwin tlan nalatalalinkgo xlakata ni katiʼanalh takglhuwit nema anan uku.
[Notas nema wilakgo kpágina]
^ párr. 14 Kalikgalhtawakga libro El secreto de la felicidad familiar, capítulo 2, párrafos 16 asta 19.
¿Katsiya xtakgalhtin?
• ¿Tuku xlakata nitlan nakawanikan katamakgaxtokgkgolha tiku nitu tamakgaxtokgnit?
• ¿La tlakg tlan nalimaklakaskin xkilhtamaku tiku nitu tamakgaxtokgnit?
• ¿La tlan nalakkaxwilikgo la natawilakgo tiku natamakgaxtokgkgo?
• ¿Tuku xlakata tiku latamakgaxtokga ni wamputun pi nialh xlikuentajtlawatkan xlakata ni nalaʼakgskgawi?
[Takgalhskinin]
[Epígrafe xla página 16]
Kstalaninanin Cristo tiku ni tamakgaxtokgkgonit tlakg paxuwakgo komo tlakg lhuwa lichuwinankgo Dios
[Epígrafe xla página 18]
¿Tuku nalakgpali akxni wi tiku tamakgaxtokga?
