¿Tiku mapakgsi kakilhtamaku?

MAX nikxni alakgapasa tiku pulalin tiku makgninankgo. Pero uma ni wamputun pi nitu lamakgolh umakgolh makgninanin, ¿ni chuna? Umakgolh lu katsinikgo la tatsekgkgo, makgapitsi asta lu katsinikgo la pulalinkgo natlawakgo tuku nitlan maski kpulachin tanumakgolh. Pero, periódicos lu kinkamalakapastakakgoyan la lu nitlan kitaxtu xlakata tuku tlawakgo, la akxni latalachipa tiku stakgo droga, la lakkaxwilikgonit xlakata liskujkgo tiku nastakgo xmaknikan chu kakgalhankan chu kastakan latamanin. Ni kaʼakxilhaw, pero tuku tlawakgo tasiya pi lamakgolh.

Nachuna, maski ni akxilhaw Akgskgawini, Biblia wan pi xlikana lama. Chuna la tiku pulalin tiku makgninankgo lhuwa takgsanin limaklakaskin xlakata namakgantaxti tuku lakkaxwilinit. Biblia wan pi Satanás «xʼángel xkgakganat litaxtuy» (2 Tesalonicenses 2:9, 10; 2 Corintios 11:14). Xlakata tuku nitlan anama tasiya pi lama. Pero ¿tuku xlakata lhuwa latamanin lu tuwa kanajlakgo pi lama Akgskgawini? Xlakata lhuwa nixaxlikana tamasiy nema tamalakgatuminit. Pulana kaʼakxilhwi makgapitsi, alistalh naʼakxilhaw tuku wan Biblia xlakata uma tiku nila taʼakxilha pero lixkajni xtayat.

◼ «Akgskgawini nitu lama, Dios tiku xapaxkina ni xtlawalh tiku chuna xtayat.» Chuna la wan Biblia, Dios tlan likatsi chu nikxni tlawa tuku nitlan, komo xtlawalh tiku lu nitlan likatsi chu lixkajni xtayat xkitaxtulh pi ni xapaxkina. Pero Biblia, niniku wan pi tlawalh Satanás. Wata wan la likatsi Jehová: «Xla la akgtum lanka Chiwix, lu tlan putum tuku tlawanit, xlakata putum tuku tlawa xaʼakgstitum. Dios tiku ni makgxtakgnan, wantiku ni tlawa tuku ni xaʼakgstitum; xla xaʼakgstitum chu ni tlawa tuku ni xalakatitum» (Deuteronomio 32:4; Salmo 5:4).

Pero komo ni Dios tlawalh, ¿niku mincha Akgskgawini? Xlakata nakatsiyaw niku mincha, pulana kaʼakxilhwi komo tiku ni kgalhi talakgalhin tlan tlawa tuku nitlan. Dios ni la robots katlawalh latamanin chu ángeles, katlawalh chuna la tlan xakstukan nalaksakkgo tuku natlawakgo. Chuna chatum lataman nema kgalhi tapuwan tlan laksaka tuku natlawa, wantuku tlan o tuku nitlan. Xlikana, chatum ángel o chatum lataman tiku tlawa tuku xlilat chu tlan nalichuwinankan tuku tlawalh pero kaj akxni akstu laksaka tuku tlawama.

Chuna la akxilhaw Dios kamaxki talakaskin ángeles chu latamanin akstu kalaksakkgolh tuku natlawakgo wa xlakata Dios nila nakamalakgachokgo komo natlawaputunkgo tuku nitlan, komo chuna tlawaputunkgo. Wa xlakata tiku ni kgalhi talakgalhin tlan nalaksaka natlawa tuku ni tlan komo wa lakgati chuna la tlawalh Akgskgawini. Uma tuku wa Jesús xpalakata Satanás «ni tamakgxtakgli kxaxlikana» (Juan 8:44, NM). Umakgolh tachuwin masiyakgo pi wantiku Akgskgawini litaxtulh chatum xatlan ángel xwanit, chu pulana xwi «kxaxlikana». * Pero, ¿tuku xlakata Dios kamaxkilh talakaskin xakstukan nalaksakgo tuku natlawaputunkgo? Xlakata kapaxki chu katsi pi tlan nalaksakkgo tuku tlan (kaʼakxilhti recuadro «Chatum tiku ni kgalhi talakgalhin tlan, ¿tlawa tuku nitlan?», kpágina 6).

 ◼ «Akgskgawini skujnani Dios.» Chuna lakpuwankgo makgapitsi tiku likgalhtawakgakgo kBiblia libro xla Job. Chatum tiku liskuja xlakata lakputsanani Biblia wan pi, akxni kBiblia wan pi Akgskgawini xkitaspitma xlakata «kilatapulilh kkatiyatni» xkilhchanima chuna la xtlawakgo tiku kskgalakgo putum kachikin anta kPersia, chu xmakatsinikgo mapakgsina tuku xʼakxilhkgo (Job 1:7). Pero kalakpuwaw, komo Akgskgawini xlitaxtulh tiku Dios limaklakaskin xlakata naskgala kKatiyatni, ¿pi xtalakaskin pi Dios xkgalhskilh niku kilalh? Nachuna, anta klibro xla Job, nitu lichuwinan akgskgawini la tiku tlan talalin Dios, wata masiya pi xtalamakgasitsin Dios. ¿Tuku likatsiyaw? Xlakata uma tatsokgni lichuwinan pi Satanás «Lakatayana» (Job 1:6). Pero ¿niku mincha talakapastakni pi Akgskgawini skujnanima Dios?

Kxapulana siglo klibros xalak Biblia nema Dios ni matsokgninalh la Libro de los jubileos chu la Regla de la comunidad xla lakchixkuwin xla Qumrán, lichuwinan pi Dios chu Akgskgawina akxtum kskujkgo pero na xkgalhakgaxmata Dios. Chu uma talakapastakni lu makgas kilhtamaku chuna xtakanajla. Klibro nema wanikan El Príncipe de las Tinieblas, xla historiador Jeffrey B. Russell, wan pi Martín Lutero tiku protestante xwanit xlakpuwan pi wa Akgskgawini litaxtu la «tuku limaklakaskin Dios la akgtum tijera nema liʼakgsitkan laktsu kiwi o tuku likawaxa niku nachan kxanat». Russell wan pi uma tuku «limaklakaskin  Dios xlakata nalikawaxa, lipaxuwa akxni kamalakgsputu tuwan», pero xlakata tapakgsini Dios tiku kgalhi putum litliwakga, akgskgawini makgantaxti xtalakaskin Dios. Uma tamasiy nema na kanajlalh Juan Calvino lu ni lakgatikgolh makgapitsi kanajlanin tiku xaʼakgstitum lakapastaknankgo. Xlakata lu tuwa xmakgkatsikgo nakanajlakgo pi Dios masta talakaskin kaʼanalh tuku nitlan, tlakg tuwa xkanajlakgolh pi wa Dios tiku xtlawalh tuku nitlan (Santiago 1:13). La uku xlakata uma tamasiy, chu amakgapitsi tuku lu nitlan lanit katiyatni ksiglo XX, tlawa pi lhuwa latamanin ni nakanajlakgo pi lama Dios chu Akgskgawini.

◼ «Akgskgawini kaj wa tuku nitlan anan.» Komo chuna xwa, lu tuwa xakgatekgska o xmakgachakgxika makgapitsi textos xalak Biblia. Kalichuwinaw xlakata Job 2:3-6. ¿Tiku xtachuwinama Dios? ¿Xtachuwinama tuku nitlan xtayat nema xkgalhi Job? ¿O Dios xakstu xtachuwinamaka? Nachuna, Dios kajku xwanit pi Job lu tlan xtayat xkgalhi, ¿tuku xlakata xmastalh talakaskin pi xliʼakxilika komo Job ni xmakgxtakli Dios? Komo chuna xlimawakaka Dios xwamputulh pi lu lixkajni xtayat, chu ni xlitaxtulh wantiku «nikxni tlawa tu nitlan» (Salmo 92:15). Pero Dios ni para tsinu “tlawanilh tuku nitlan” Job. Xlikana pi Akgskgawini ni kaj wa tuku nitlan anan o kaj wa tuku nitlan kgalhi Dios. Wata, Akgskgawini chatum espíritu nema xtalamakgasitsin Dios litaxtulh.

¿Tiku xlikana mapakgsi kakilhtamaku?

La uku lhuwa latamanin lakpuwankgo pi tixtaxtunita kilhtamaku akxni xkanajlanikan Akgskgawini. Pero xlakata ni anan talakgalhaman kkakilhtamaku, tasiya pi lama Akgskgawini. Xlakata lhuwa tiku wankgo pi nitu lama, lhuwa tiku ni kanajlanikgo Dios chu xlimapakgsin xlakata la nalinaw kilatamatkan.

Uma tuku titsokgli poeta Charles-Pierre Baudelaire tiku latamalh ksiglo XIX, «wantuku tlakg katsini tlawa akgskgawini, wa pi nakanajlayaw pi nitu lama». Akxni ni nakatsikan pi lama Akgskgawini, tlawa pi nalakpuwankan pi lama Dios o ni. Nachuna komo Satanás ni xlatamalh uma xkitaxtulh pi putum tuku nitlan anan wa Dios xkuenta. ¡Wa uma tuku Akgskgawini lakaskin nakanajlakan!

Chuna la tlawa tiku pulalinkgo tiku makgninankgo, Akgskgawini wi tuku xlakata ni lakaskin nakatsikan pi lama. ¿Tuku xlakata? Biblia masta xtakgalhtin: «Xmalana katuxawat malakgatsikgonit xtapuwankan wanti ni kanajlakgoy, lakimpi ni namakgaxkgakgananikgoy xmakgaxkgakganat xatlan tamakatsinin ntu lichuwinan xlikakni nCristo wa nti xaliʼukxilhtit wa lantla Dios» (2 Corintios 4:4).

Xlakata uma, tawila takgalhskinin: ¿Nitu katitlawalh Dios xlakata namalakgachokgo uma tiku lu lixkajni likatsi chu lhuwa tuku nitlan tlawama chu kamakgapatinama latamanin? Kaʼakxilhwi xatakgalhtin kʼartículo nema aku mima.

[Notas nema wilakgo kpágina]

[Epígrafe xla página 5]

¿Akgskgawini wa xlakskujni Dios, o xtalamakgasitsin?

[Epígrafe xla página 6]

¿Tlan lakgalhina nawan chatum tiku ni lakgalhina?

Akxni Dios katlawalh ángeles chu latamanin maski ni xkgalhikgo talakgalhin ni xwamputun pi putum xtlawakgolh tuku xtlawaputunkgolh. Adán ni lakgalhina xwanit. Pero maski chuna xwanit, xtalakaskin nakgalhakgaxmata tuku Dios xlakkaxwilinit. Akgtum liʼakxilhtit, komo xwalh tiyat, chiwix o kiwi wi tuku nitlan xakgspulalh. Nachuna, komo lhkan xʼalh niku kapulhman xlikana pi wi tuku nitlan xakgspulalh chu asta xnilh.

Nachuna, nipara chatum ángel o lataman nema ni kgalhi talakgalhin tlan nalakatsala la Dios lakkaxwilinit nalinaw kilatamatkan, komo nalakatsala wi tuku naʼakgspula. Uma wamputun pi chatum ángel o lataman xlakata kamaxkikanit talakaskin akstu nalaksakkgo tuku natlawakgo komo nitlan xlimaklakaskinkgolh uma xʼakgtsankgakgolh o xlakgalhinankgolh (Génesis 1:29; Mateo 4:4).