Tuku katsiputunkgo tiku likgalhtawakgakgo

¿Tuku naktlawa akxni nakkgalhi takgalhskinin xlakata tuku ni kʼakgatekgsa kBiblia o naklakaskin tamakgatay xlakata wi tuku klitakglhuwima?

Proverbios 2:1-5 kinkawaniyan pi chuntiya kaputsaw tuku «lu lhuwa kxtapalh nema tsekg wi» xlakata takatsin chu xlakata tlan nalaksakkan tuku tlan chu tuku nitlan. Uma wamputun pi fuerza natlawayaw xlakata natekgsaw xtakgalhtin kintakgalhskininkan xalak Biblia chu xlakata tuku litaʼakglhuwiyaw. ¿La natlawayaw?

Libro Benefíciese de la Escuela del Ministerio Teocrático kpáginas 33 asta 38 limin capítulo «La investigación eficaz», niku masiya la nalimaklakaskinkan tuku kinkamaxkinitan «skujni xalipaw chu xaskgalala» (Mat. 24:45, NM). Kpágina 36 masiya la nalimaklakaskinkan Índice de las publicaciones Watch Tower, nema tanu tanu kata, katlawakanit niku limin lista xlakata lhuwa temas chu na limin niku na tlan naputsakan textos xlakata tuku putsamaw. Uma namakgtayayan xlakata tlan natekgsa tanu tanu tachuwin nema naputsaya o tanu tanu versículos chu chuna naputsaya klikgalhtawakga nema max kgalhiya. Kalimaxtu kilhtamaku xlakata natekgsa xtakgalhtin mintakgalhskinin o akgtum tastakyaw. Kalakapastakti pi tekgsputumpat tuku «lu lhuwa kxtapalh nema tsekg wi», chu talakaskin lu naliskuja chu nalimaxtuya kilhtamaku.

Xlikana pi likgalhtawakga nema kgalhiyaw ni lichuwinankgo putum versículos chu putum temas xlakata tuku katsiputunaw. Asta akxni lichuwinankgo akgtum texto ni wa lichuwinan xlakata tuku katsiputunaw. Nachuna min kilhtamaku wi tuku ni akgatekgsaw, xlakata Biblia ni lichuwinan pulaktu pulaktu tuku katsiputunaw. Wa xlakata, ni putum takgalhskinin lakapala tekgsaw xtakgalhtin. Akxni ni tekgsaw akgtum takgalhtin, nitlan kiʼakstukan nalakkaxwiliyaw xtakgalhtin uma takgalhskinin xlakata nina takatsi xtakgalhtin. Nitu litaxtu komo nalitaʼakglhuwiyaw tuku kaj «tlawa nalakputsananiyaw», nema nitu masiya xlakata Dios chu ni litatliwakglha kintakanajlakan (1 Tim. 1:4, NM; 2 Tim. 2:23; Tito 3:9). Tiku Pulalinkgo niku Tatlawa Taskujut xla xTatayananin Jehová xlikalanka Katiyatni chu nipara amakgapitsi sucursales, namastakgo xtakgalhtin tuku nitu a talichuwinan kkilikgalhtawakgakan. Kapaxtikatsiniw pi xTachuwin Dios kinkawaniyan tlakg xlakaskinka kilikatsitkan la tlan nalinaw kilatamatkan. Akxni Biblia ni putum lichuwinan tuku akinin lakaskinaw, kinkamakgtayayan tlakg xlikana nalipawanaw tiku Matsokgninalh (kaʼakxilhti páginas 185 chu 186 xla libro Acerquémonos a Jehová).

Akxni liwana putsata xtakgalhtin chu ni tekgsti tuku xkatsiputuna. ¿Tuku militlawat? Tlan nakgalhskina chatum kgolotsin o chatum kstalanina Cristo tiku tliwakga wi xtakanajla xalak mincongregación. Umakgolh natalan lu katsikgo xlakata Biblia chu la xlilatamat kstalanina Cristo. Lu namakgtayakgoyan komo kgalhiya taʼakglhuwit o max wi tuku lakpuwampat natlawaya, xlakata liwana katsikgo la wi milatamat. Nachuna chuntiya kawani Jehová kmiʼoración tuku lilakgaputsapat. Kaskinti kamakgtayan espíritu santo, xlakata «Jehová masta liskgalala [...] chu tlan nalaksakaw tuku tlan chu tuku nitlan» (Pro. 2:6; Luc. 11:13).