Katalakatsuwini Dios

«Wix Jehová, [...] kilakgapasa»

«NITU anan tuku tlakg lilipuwan chatum lataman wa pi namakgkatsi pi niti paxki o niti akgatekgsni chu niti makgachakgxini.» * ¿Milh kilhtamaku chuna makgkatsi? ¿Chu niti akxilha la makgkatsiya? Komo chuna titaxtupat, lu namakgtayayan nakatsiya pi Jehová ni xtachuna la latamanin. Xla lu xlakaskinka kaʼakxilha xlakskujnin chu putum akxilha tuku tuwa titaxtumakgolh. Chuna limasiyalh tuku wa David nema wi kSalmo 139, Traducción del Nuevo Mundo.

David liwana xkatsi pi Dios xlakaskinka xakxilha. Wa xlakata wa: «Wix Jehová, liwana kilakputsananinita, chu kilakgapasa» (versículo 1). ¡Lu tlan tachuwin chuna la wa! Verbo hebreo “lakputsanankan” tamatitaxti kxatotonaco chu na kilhchanima akxni kawaxkan xlakata putsakan lakswan chiwix (Job 28:3), putsananikan tiyat (Jueces 18:2) akxni mapakgsinanin lakkaxtlawakgo taʼakglhuwit (Deuteronomio 13:14). Jehová liwana kinkalakgapasan chuna la akxni putum lakputsa latamat. Tachuwin «kilakputsananinita» uma tuku wa David kinkamalakpuwaniyan pi Dios chatunu chatunu kaʼakxilhma xlakskujnin. Liwana kalakputsanani xlakata chatunu chatunu nakalakgapasa.

David tlakg liwana kinkawaniyan xlakata la Dios lakputsanan akxni wan: «Wix katsiya akxni ktawila chu akxni ktaki. Chu katsiya tuku klakapastakma maski makgat wila» (versículo 2). Jehová kinkaʼakxilhan «maski makgat» wilacha kʼakgapun. Jehová kinkaʼakxilhan la akxni aku masputuw kintaskujutkan nema max lhuwa horas kinkalinin chu akxni takiyaw xlakata namatsukiparayaw atanu kilhtamaku. Na katsi tuku lakpuwanaw, tuku tlawaputunaw chu tuku xlakata tlawayaw tuku tlawayaw. ¿Xpekuani Dios David xlakata xkatsi pi liwana xakxilhma? Ni, wata xlakaskin pi chuntiya xakxilhli (versículos 23 chu 24). ¿Tuku xlakata?

Xlakata Jehová tlan xtalakapastakni akxni kalakputsanani xlakskujnin. ¿Tuku lakpuwan akxni kalakputsanani? Anta kversículo 3, David lichuwinan: «Akxni wi niku kan chu niku klhtata wix lhkanita, chu lu liwana lakgapasa putum tuku ktlawa». Chali chali Jehová akxilha putum tuku tlawayaw: tuku nitlan tlawayaw chu wantuku tlan. Chu ¿tuku tlakg tlawani kuenta: wantuku tlan, o wantuku nitlan? Tachuwin “lhkakan” xahebreo nema matitaxtikan kxatotonaco na wamputun «laktsikinankan» o «lhkgan makankan talhaman», chuna la tlawa tiku chananan akxni laktinkxa tuku makgalanit xlakata namakgani xpalhma chu kaj tuku xatlan natamakgxtakga. Pero tachuwin xahebreo «liwana lakgapaskan» nema matitaxtikan kxatotonaco na wamputun «tuku lu lhuwa xtapalh akxilha». Putum uma masiya pi akxni Jehová lakputsanani tuku wankgo chu tuku tlawakgo chali chali xlakskujnin, kajwatiya lu xlakaskinka akxilha tuku tlan tlawakgo, xlakata katsi pi lu liskujmakgolh namakgapaxuwakgo.

Salmo 139 kinkamasiyaniyan pi Jehová lu kapaxki xlakskujnin. Chali chali kalakputsanani chu lakaskin pi tlan katawilakgolh. Wa xlakata akxilha tukuya taʼakglhuwit kgalhikgo, chu akgatekgsa pi nitlan limakgkatsikgo xtaʼakglhuwitkan nema titaxtumakgolh. ¿Nixlikana pi lu tlan naskujnaniya Dios tiku chuna lu xapaxkina? Na kalakpuwanti tuku wan Biblia: Jehová ni «katipatsankgalh paks ntu ntlawanitantit, chu mintaskujutkan xla tapaxkit wa ntu wixin masiyunitantit kxtukuwini» (Hebreos 6:10).

[Notas nema wilakgo kpágina]