Kakamakgtayaw tlan nalakgatayakgo taskujut
Kakamakgtayaw tlan nalakgatayakgo taskujut
«Wa [...] nti xakgalhtawakgan, xtachuna xmakgalhtawakgana nawan.» (LUC. 6:40)
1. Akxni Jesús xlama kKatiyatni, ¿la liwana lakkaxwililh la xtawilalh congregación?
AKXNI xmakgalhsputumaja tuku tsokgli Juan, wa: «Anan lhuwa amakgapitsin nkatuwa ntu ntitlawalh Jesús, wa mpalapi paks xtsokgka [...], kpuwan mpi asta max ni anan ntani xtilitawilakgolh nkatuxawat xlilhuwa libro ntu xtatsokgli» (Juan 21:25). Maski Cristo ni makgas latamalh kKatiyatni xlakata nalichuwinan Dios, kalaksakli, kamasiyanilh chu lakkaxwililh tiku xpulalinkgolh taskujut akxni nialh xlatamalh unu. Wa xlakata akxni alh kʼakgapun kkata 33, liwana xlakkaxwilinita la xtawilalh congregación nema lakapala xtalhuwima (Hech. 2:41, 42; 4:4; 6:7).
2, 3. 1) ¿Tuku xlakata lu xlakaskinka pi natalan tiku tamunukgonita kaliskujkgolh xlakata tlan natlawakgo taskujut? 2) ¿Tuku naʼakxilhaw kʼuma artículo?
2 Xlakata tlakg talhuwinit tiku lichuwinankgo Dios, la uku akgtujun millón nema wilakgolh kliwaka akgtum ciento mil congregaciones, wa xlakata lu talakaskin tiku napulalinkgo congregaciones. Talakaskima lhuwa lakgkgolotsin. Tala tiku liskuja xlakata wi tuku nalakgayawakan kcongregación lu «tlan taskujut ntu mpuwaniy natlaway» (1 Tim. 3:1).
3 Ni anan tiku kaj lakapala namakgantaxti tuku taskin xlakata wi tuku nalakgayawakan kcongregación. Ni talakaskin lhuwa naʼankgo kʼescuela o lhuwa tuku katsinikgoya kxlatamatkan. Wata talakaskin pi kamakgantaxtikgolh tuku taskin. Tlakg xlakaskinka wa nakgalhi tayat nema lakaskin Dios, chu ni wa tuku katsini tlawa o tlawanit. ¿La tlan nakamakgtayakan lakchixkuwin xlakata tlan natlawakgo uma taskujut? Cristo wa: «Wa [...] nti xakgalhtawakgan, xtachuna xmakgalhtawakgana nawan» (Luc. 6:40). Kʼuma artículo naʼakxilhaw la Jesús, xaLanka Makgalhtawakgana pulaklhuwa kamasiyanilh kstalaninanin xlakata tlakg xmakglhtinankgolh taskujut, chu na naʼakxilhaw la tlan natlawayaw la Jesús.
«Kiʼamigos kkalimapakuwinitan»
4. ¿La limasiyalh Jesús pi xʼamigo xkaliʼakxilha kstalaninanin?
4 Jesús ni kamaktujulh kstalaninanin wata xʼamigos xkaliʼakxilha. Lhuwa kilhtamaku akxtum xkatatawila chu xkatsi pi xkgalhakgaxmatkgolh. Wa xlakata kawanilh: «Xampi xlipaks ntu kkgaxmatnilh nkinTlat, kkamasiyuninitan» (kalikgalhtawakga Juan 15:15). Xlikana pi lu tlan limakgkatsikgolh akxni kakgalhtilh tuku kgalhskinkgolh: «¿Tukuya kilhtamaku chuna nala, chu tuku xaliʼukxilhtit naʼanan akxni kinkatawila nawan chu akxni talakatsuwinita xlakata nasputa tuku lama kkakilhtamaku?» (Mat. 24:3, 4, NM). Cristo na kawanilh tuku xlakpuwan chu tuku xmakgkatsi. Akgtum liʼakxilhtit, katsisni akxni stawaka kalilh Pedro, Santiago chu Juan kjardín xalak Getsemaní, chu tlawanilh oración Dios chu wanilh tuku xlilipuwama. Max xʼapóstoles ni kgaxmatkgolh tuku wa, pero xkatsikgo pi lu xlakaskinka tuku xlama (Mar. 14:33-38). Na kalakpuwaw la kaks lilakawankgolh tuku atanu xʼakxilhkgonit, akxni xlhakgat timakgaxkgakganalh xlakatinkan (Mar. 9:2-8; 2 Ped. 1:16-18). Xlikana lu tlan xtalalinkgo Jesús chu kamatliwakglhli xlakata alistalh lhuwa taskujut lakgatayakgolh.
5. ¿Tuku tlawakgo lakgkgolotsin xlakata kamakgtayakgo amakgapitsin?
5 Chuna la tlawalh Jesús, lakgkgolotsin nachuna kamakgtayakgo chu tlan katalalinkgo natalan. Akxni lu tlan talalinkgo natalan, chu limaxtukgo kilhtamaku xlakata akxilhkgo pi tlan katawilakgolh. Maski katsikgo pi tuku lu xlakaskinka ni xliwanatkan, pero akxni wi tuku xliwanatkan wankgo. Kalipawankgo xnatalankan chu kamasiyanikgo tuku katsinikgonit kBiblia. Ni lakgmakgankgo tiku siervo ministerial maski lakgawasanku. Wata, katsikgo pi lhuwa tuku tlan tlawakgo chu lu xlakaskinka taskujut nema tlawakgo kcongregación.
«Xaliʼukxilhtit kkamakgaxtakgninitan»
6, 7. ¿Tukuya liʼakxilhtit kamakgxtakgnilh Jesús kstalaninanin chu tuku tlawakgolh xlakan?
6 Maski kstalaninanin Cristo tliwakga xwi xtakanajlakan, xlakapastaknankgo chuna la xkamakgastakkanit chu niku xalanin xwankgonit (Mat. 19:9, 10; Luc. 9:46-48; Juan 4:27). Pero nikxni kalimakgasitsilh lhuwa tastakyaw, nipara kakilhnilh. Wata kawilinilh liʼakxilhtit xlakata tuku xkamasiyani (kalikgalhtawakga Juan 13:15).
7 ¿Tukuya liʼakxilhtit kamakgxtakgnilh Jesús kstalaninanin? (1 Ped. 2:21.) Ni lhuwa tuku xkgalhi wa xlakata tlan xkamakgtaya latamanin (Luc. 9:58). Jesús xkatsi pi wi tiku xmapakgsi, wa xlakata tuku xkamasiyani kxTachuwin Dios xtakilhti (Juan 5:19; 17:14, 17). Tlan xlakgtakalatsuwikan, tlan xlikatsi chu putum tuku tlawalh kaj xlakata xkapaxki (Mat. 19:13-15; Juan 15:12). Lu kamakgtayalh xʼapóstoles liʼakxilhtit nema kamasiyanilh. Kalichuwinaw Santiago. Ni pekualh, ni makgxtakgli Dios chu chuntiya skujnanilh asta akxni makgnika (Hech. 12:1, 2). Juan nachuna tlawalh, la xMakgalhtawakgana tutumpuxam kata nema lichuwinalh Dios (Apo. 1:1, 2, 9).
8. ¿Tukuya liʼakxilhtit kawilinikgo lakgkgolotsin tiku kajku lakgkgawasan chu amakgapitsin natalan?
8 Lakgkgolotsin tiku lu tlan skujkgo, ni tlankajwa kamakgkatsikan, tlan likatsikgo chu kawilinikgo liʼakxilhtit tiku nina linkgo lhuwa kata (1 Ped. 5:2, 3). Xlakata lu lipawankgo Dios, lu tlan la masiyakgo, tlan la linkgo xlatamatkan chu katsikgo la lichuwinankan Dios, tlan limakgkatsikgo pi amakgapitsi natalan na natlawaputunkgo la kawilinikgo liʼakxilhtit (Heb. 13:7).
«Ntimalakgachakgolh Jesús, na timaxkikgolh limapakgsin»
9. ¿Tuku limasiya pi Jesús liwana kamasiyanilh kstalaninanin la xlichuwinankgolh Dios?
9 Akgtiy kata nema lichuwinalh Dios, Jesús tlakg lhuwa lichuwinalh akxni kamalakgachalh kgalhkutiy apóstoles na nalichuwinankgo Dios. Xlikana, pi pulana kawanilh la xtlawakgolh (Mat. 10:5-14). Chu akxni nina xtlawa milagro niku kamawilh lhuwa mil latamanin, kawanilh kstalaninanin la xtakaxtawilakgolh tiku xwilakgolh chu la xmaʼakgpitsika liwat (Luc. 9:12-17). Xlikana, pulana liwana kawanilh la xtlawakgolh. Xlakata Jesús liwana kamasiyanilh, chu espíritu santo kamakgtayalh, tlan alistalh lakkaxwilikgolh la lhuwa lichuwinankgolh Dios nema tsukulh kkata 33.
10, 11. ¿La tsukukan kamakgtayakan tiku aku kgalhtawakgamakgolh?
10 La uku, akxni tsukukan masiyanikan chatum chixku xlakata Dios, wa akxni makglhtinan takgalhtawakga xalak Biblia. Max namin kilhtamaku namakgtayayaw tlakg tlan nakgalhtawakga. Pero chuna la tlakg nakatsitilha xlakata Biblia namasiyanikan tuku tlakg xlakaskinka. Akxni nalismani naʼan ktamakxtumit akgatunu semana, nawaniyaw pi tlakg kamatliwakglhli xtakanajla chu natatsokgtawila Niku Masiyakan xlakata la Lichuwinankan Dios chu kalichuwinalh Dios maski nina tamunu. Akxni tamununita nawan, tlan namakgtayanan akxni nakaxakakan chu akxni wi tuku nakaxtlawakan kPukgalhtawakga xla xTatayananin Jehová. Chu alistalh tlan nawanikan tuku talakaskin namakgantaxti xlakata tlan siervo ministerial nawan.
11 Akxni wi tuku nalakgayawakan kcongregación tiku tamununita, chatum kgolotsin xatapaxuwan nawani chuna la lakkaxwilikanit pi xlitatlawat tuku lakgayawamaka. Na namakgtaya akxni liwana nawani tuku talakaskin pi katlawalh. Komo uma tala nila makgantaxti tuku talakaskin pi katlawalh, kgolotsin tiku tlan likatsi ni lakapala katilakpuwa pi ni la tuku tlawa. Wata nawani la tlakg tlan namakgantaxti, nawanipara tuku talakaskin pi katlawalh. Lakgkgolotsin lu lipaxuwakgo akxni akxilhkgo pi tiku makgtayakgolh chuna tlawa chu xatapaxuwan skuja kcongregación (Hech. 20:35).
«Xaskgalala tiku kgaxmata tastakyaw»
12. ¿Tuku xlakata lu xkamakgtaya xtastakyaw Jesús?
12 Akxni Jesús xkastakyawa xtamakgalhtawakgen, chatunu chatunu xkastakyawa chuna la xtalakaskin. Akgtum liʼakxilhtit, kaj wa kastakyawalh Santiago chu Juan xlakata skinkgolh pi xmincha lhkuyat kʼakgapun chu xkamakgnilh samaritanos tiku ni kamakgamakglhtinalh (Luc. 9:52-55). Chu akxni xtse Santiago chu Juan skinilh Jesús niku xtawilakgolh kxTamapakgsin, akxilhli tiku chuna xlakaskinkgo wa xlakata wa katachuwinalh Santiago chu Juan. Jesús kawanilh: «Wampi wa mpala natawiIayatit kkimpakgstakat, [o pakgkana] chu kkimpakgxuki, ni kila mpala nakmastay, wampi xman wa lakgchan wanti nkaxwilinikgonit nkinTlat» (Mat. 20:20-23). Cristo ni kaj liwana xkawani tuku xlitlawatkan xwanit nema xtalakaskin Dios, xkamasiyani la xlilakapastakkgolh xtastakyaw Dios (Mat. 17:24-27). Xkatsi pi wi tuku nila liwana xtlawakgolh. Xkastakyawa xlakata xlikana xkapaxki (Juan 13:1).
13, 14. 1) ¿Tiku talakaskin nakastakyawakan? 2) Kawanti tuku tlan nawani kgolotsin tiku ni tatliwakglha xtakanajla xlakata namakgtaya.
13 Tiku wi tuku lakgatayaputun kcongregación namin kilhtamaku natalakaskin nawanikan la tlan natlawa chu namaxkikan tastakyaw xalak Biblia. Proverbios 12:15 wan: «Xaskgalala tiku kgaxmata tastakyaw». Chuna wa chatum tala tiku nina lin kata: «Tuku nitlan xakkgalhi wa pi ni xaklitayay tuku nitlan ktlawa. Tastakyaw nema kimaxkilh chatum kgolotsin kimakgtayalh, xakkakxilhli tuku nitlan xaktlawama».
14 Akxni lakgkgolotsin akxilhkgo pi chatum chixku ni lakapala tatliwakglha xtakanajla xlakata ni liwana lin xlatamat, xliwanitkan la nalin xlatamat pero ni nakilhnikgo (Gál. 6:1). Pero, max namin kilhtamaku nastakyawakgo chatum tala xlakata nitlan xtayat. ¿La namakgtaya kgolotsin akxni akxilha pi chatum tala, ni liskuja xlakata lu tlan nataxtuyacha xtaskujut? Nawanikan pi Jesús lu lhuwa lichuwinalh Tamapakgsin chu na limapakgsinalh nakamasiyaniyaw amakgapitsin (Mat. 28:19, 20; Luc. 8:1). ¿Pero tuku tlan natlawakgo komo wi tiku lu xlakaskina litaxtuputun? Lu namakgtaya komo wa akstu natachuwinankgo chuna la tlawalh Jesús, kawanilh kstalaninanin pi lu nitlan tlakg xlakaskinka xlitaxtukgolh (Luc. 22:24-27). ¿La tlan makgtayakan tiku lu tuwa makgkatsi natapati tuku nitlan tlawanika? Natalikgalhtawakgakan parábola nema lichuwinan lakskujni tiku ni tapatilh achatum nema ni lhuwa tumin xlaklinikan, maski uma skujni xla nialh xmatajikanit lhuwa tumin nema xlaklin (Mat. 18:21-35). Akxni naʼakxilhkan pi talakaskin wi tiku nastakyawakan, ni lhuwa kilhtamaku natitaxtu xlakata nastakyawakan (kalikgalhtawakga Proverbios 27:9).
«Kalismani xlakata nalatapaya chuna la lakaskin Dios»
15. ¿La makgtayakgo xfamilia xlakata chatum chixku tlan natlawa tuku lakgayawakan kcongregación?
15 Maski wa lakgkgolotsin tiku kalakgchan namakgtayakgo natalan xlakata wi tuku nakalakgayawakan, amakgapitsi na tlan namakgtayakgo. Akgtum liʼakxilhtit, xfamilia tlan namakgtayakgo xlakata natatliwakglha xtakanajla. Talakaskin pi xpuskat chu xkamanan xatapaxuwan namakgtayakgo tiku kgolotsina litaxtu kcongregación. Xlikana, nikxni tlan nakitaxtuni tuku lakgayawakanit, komo xfamilia ni maxkikgo kilhtamaku xlakata tlan natlawa xtaskujut kcongregación. Akxni xfamilia kgolotsin lu tlan xtalakapastaknikan chu maxkikgo talakaskin xatlat, ni kajwatiya lu xatapaxuwan naskujnani congregación wata putum congregación napaxtikatsinikgo (Pro. 15:20; 31:10, 23).
16. 1) ¿Tuku xlitlawat chatum tala xlakata tlan nalakgayawakan taskujut kcongregación? 2) ¿La limasiya tala pi lakgatayaputun taskujut kcongregación?
16 Maski amakgapitsin tlan namakgtayakgo, pero wa naliskuja tiku matliwakglhputun xtakanajla (kalikgalhtawakga Gálatas 6:5). Pero, ni talakaskin siervo ministerial nawanaw xlakata nakamakgtayayaw amakgapitsin chu lhuwa nalichuwinanaw Dios. Pero kBiblia liwana wan pi tiku wi tuku lakgatayaputun kcongregación, pulana naliskuja namakgantaxti tuku skin xTachuwin Dios (1 Tim. 3:1-13; Tito 1:5-9; 1 Ped. 5:1-3). Xlakata tlan namakgantaxti tuku tlawaputun pulana naʼakxilha tuku tlakg liwana xlitlawat kxtakanajla. Chali chali nalikgalhtawakga Biblia chu akstu nakgalhtawakga, lu nalilakapastaka tuku likgalhtawakgalh, natlawa oración chu lu nalichuwinan Dios. Chuna namakgantaxti tastakyaw nema maxkilh Pablo Timoteo: «Kalismani xlakata nalatapaya chuna la lakaskin Dios» (1 Tim. 4:7, NM).
17, 18. ¿Tuku tlan natlawa tiku ni tatliwakglha xtakanajla xlakata lakpuwan pi nila tuku tlawa chu ni taxtu kxnaku chuna natlawa?
17 Pero ¿komo tala ni liskuja xlakata wi tuku nalakgataya kcongregación xlakata pekuan o lakpuwan pi nila tuku tlawa? Kalilakpuwa xlakata lhuwa tuku tlawakgonit Jehová chu Jesús kimpalakatakan. Xlikana, kinTlatkan xalak akgapun «chali chali kinkamakgtayayan xlakata [...] laktsinka kintakukakan» (Sal. 68:19). Wa Jehová tlan namakgtaya xlakata tlan namakgantaxti taskujut kcongregación. Komo nalilakapastaka pi lu talakaskima lakchixkuwin tiku napulalinkgo taskujut kxkachikin Dios, tala tiku nina siervo ministerial o kgolotsin, lu namakgtaya nalakgatayaputun uma taskujut. Akxni nalilakapastaka umakgolh namakgtaya xlakata naliskuja chu nialh nalakpuwan pi nila tuku tlawa. Nachuna, naskin espíritu santo, xlakata xtatlaw tlan mamakgkatsininan chu machokgoy tuku nitlan tlawaputunaw, tayat nema talakaskin xlakata nialh nalakpuwan pi nila tuku tlawa (Luc. 11:13; Gál. 5:22, 23). Chu lu xlilakapastakat pi Jehová sikulunatlawa tiku liskuja xlakata natatliwakglha xtakanajla chu xlikana makgtayanamputun.
18 Makgapitsi natalan tiku tamunukgonita, ni makgtayanankgo xlakata ni taxtu kxnaku chuna natlawa. Komo ni lakpuwankgo nalakgatayakgo taskujut kcongregación, ¿tuku tlan natlawakgo? Apóstol Pablo tsokgli: «Dios nti nkamatlawiyan kmintapuwan lantla natlawaputunatit, chu lantla lhuwa natlawayatit» (Fili. 2:13). Chuna la akxilhaw, wa Jehová tiku tlawa pi naskujnaniputunaw amakgapitsin, chu tlan nalimatliwakglha xʼespíritu santo putum tiku skujnaniputun Dios (Fili. 4:13). Putum kilhtamaku kiliskinitkan pi natlawayaw chuna la xlilat (Sal. 25:4, 5).
19. ¿Tuku xwamputun pi xtawanit pi nalaksakkan «kgalhtujun kuentajtlawaninanin, chu kgalhtsayan tiku napulalinankgo»?
19 Jehová sikulunatlawa lakgkgolotsin tiku makgtayakgo amakgapitsin xlakata wi tuku nalakgatayakgo alistalh kcongregación. Na kasikulunatlawa tiku mastakgo talakaskin nakamakgtayakan. Biblia wan, Dios natlawa pi naʼanan «kgalhtujun kuentajtlawaninanin, chu kgalhtsayan tiku napulalinankgo» uma kilhchanima lakchixkuwin tiku nakuentajtlawakgo xkachikin Dios (Miq. 5:5). ¡Lu lipaxuwayaw xlakata lhuwa natalan lakchixkuwin kamakgtayamaka chu xatapaxuwan tlakg lakgatayakgo taskujut xlakata limalankikgo Jehová!
¿Tuku xkgalhtinaw?
• ¿La kamakgtayalh Jesús kstalaninanin xlakata tlakg xlakgatayakgolh taskujut?
• ¿La natlawakgo la Cristo lakgkgolotsin, xlakata natalan nalakgatayakgo taskujut kcongregación?
• ¿La makgtayakgo xfamilia xlakata natatliwakglha xtakanajla xatlat?
• ¿La limasiya chatum tala pi lakgatayaputun taskujut kcongregación?
[Takgalhskinin]
[Dibujos xla página 31]
¿La namakgtayayaw tiku makgalhtawakgayaw natatliwakglha xtakanajla?
[Dibujo xla página 32]
¿La limasiyakgo natalan pi lakgatayaputunkgo taskujut kcongregación?
