Kakamatliwakglhniw xtakanajlakan lakchixkuwin
Kakamatliwakglhniw xtakanajlakan lakchixkuwin
“Lanchu naputsayatit yama chixkuwin, ni xawa skiti, o tamakgnin.” (LUC. 5:10)
1, 2. 1) ¿Tuku tlawakgolh lhuwa lakchixkuwin akxni Jesús kalitachuwinalh Dios? 2) ¿Tuku naʼakxilhaw kʼuma artículo?
AKXNI xlichuwinampulakgo Dios kʼGalilea, Jesús chu xtamakgalhtawakgen tajukgolh kbarca chu ankgolh niku tlan xakstu xtawilakgolh. Pero lhuwa tiku kastalanikgolh. Xʼankgo «akgkitsis milh chixkuwin, wampi ni xtakuintajtlawakgoka[n], lakchajan, chu laktsu kaman» (Mat. 14:21). Atanu kilhtamaku, lhuwa lakgtalakatsuwikgolh Jesús xlakata xkamakuchika chu xkgaxmatputunkgo xtachuwin. Xminkgonit «akgtati milh chixkuwin wampi ni xtakuintajtlawakgokan lakchajan, chu laktsu kaman» (Mat. 15:38). Lhuwa lakchixkuwin lakgminkgolh Jesús chu xkatsiputunkgo tuku xkamasiyani. Jesús xlakaskin pi lhuwa tlakg xkatsiputunkgolh. ¿Tuku xlakata chuna wanaw? Xlakata akxni Jesús xkamakgtayanita xtamakgalhtawakgen xchipakgolh lhuwa skiti, wanilh Simón: “Lanchu naputsayatit yama chixkuwin, ni xawa skiti” (Luc. 5:10). Uma limasiyalh, pi kstalaninanin xʼamakgolh putsakgo chu xtekgskgolh latamanin. Chu anta xʼamakgolh tekgskgo lhuwa lakchixkuwin.
2 La uku chu makgasa, anan lhuwa lakchixkuwin tiku tlan makgamakglhtinankgo xtamakatsin Biblia nema lichuwinanaw chu tlakg katsiputunkgo (Mat. 5:3). Pero, lhuwa kaj antiya tamakgxtakgkgo chu nialh katsiputunkgo xlakata Dios. ¿La tlan nakamakgtayayaw? Xlikana pi Jesús ni wa pi kaj lakchixkuwin naputsayaw, pero kalitachuwinalh tuku xkatsiputunkgo. Chuna la tlawalh Jesús, na tlan nakamakgtayayaw tlan natlawakgo tuku lu tuwa makgkatsikgo. Kaʼakxilhwi pulaktutu tuku tuwa makgkatsikgo la uku: 1) xlakata xliputsatkan tuku nalitamakgtakgalhkgo, 2) pekuankgo xlakata tuku nawankgo amakgapitsin chu 3) lakpuwankgo pi nila wi tuku natlawakgo.
Xliputsatkan tuku nalitamakgtakgalhkgo
3, 4. 1) ¿Tuku tlakg xlakaskinka akxilhkgo lhuwa lakchixkuwin? 2) ¿Tuku xlakata makgapitsi lakchixkuwin pulana wilikgo xtaskujutkan nixawa Dios?
3 Chatum tsokgna wanilh Jesús: «Makgalhtawakgana, nakstalaniyan nkani kawa ntani napina». Pero akxni Cristo wanilh pi «Xkam nchixku, ni kgalhiy xla ntani naʼakxtikatnan» max nialh chuna lakpuwa. Max uma tsokgna nialh lakgatilh pi ni xkatsi niku xʼama wayan o lhtata, xlakata kBiblia ni wan pi na kstalanina Cristo litaxtulh (Mat. 8:19, 20).
4 Lhuwa lakchixkuwin pulana wilikgo tuku namaklakaskinkgo nixawa tuku xla Dios. Wata tlakg xlakaskinka akxilhkgo lhuwa nakgalhtawakgakgo chu nakgalhikgo taskujut niku lhuwa kaxokgonikan. Lakpuwankgo pi natlajakgo tumin tlakg xlakaskinka chu makgtayanan nixawa nalikgalhtawakgakgo xTachuwin Dios chu tlan natalalinkgo. Max lakgatikgo tuku masiya Biblia, pero tuku «litakgatsankgakgoy katuwa wantu wi xala katuxawat lantla nakgalhikgoy lhuwa tumin» tlawa nialh nakatsiputunkgo xlakata Dios (Mar. 4:18, 19, Hua Xasasti Talaccaxlan, TXS, 1999). Kaʼakxilhwi la kamakgtayalh Jesús xtamakgalhtawakgen xlakata pulana nawilikgo tuku tlakg xlakaskinka.
5, 6. ¿Tuku kamakgtayalh Andrés, Pedro, Santiago chu Juan nalakkaxwilikgo tuku tlakg xlakaskinka xʼakxilhkgolh xlakata xlichuwinankgolh Dios o xtaskujutkan?
5 Andrés chu Simón Pedro linatalan xwankgonit chu xkgalhikgo akgtum negocio niku kstakan skiti, nachuna xkgalhikgo xnegociojkan Juan chu Santiago chu Zebedeo tiku xtlatkan xwanit. Max lu tlan xtlajakgo, xlakata xkgalhikgo xlakskujnikan (Mar. 1:16-20). Pero, akxni Andrés chu Juan lakgapaskgolh Jesús, xlakata Juan Tiku xMununan kamalakgapasnilh, liwana katsikgolh pi xtekgskgonit Mesías. Andrés makatsinilh Simón Pedro, chu max nachuna Juan alh makatsini Santiago (Juan 1:29, 35-41). Titaxtulh papaʼ, xkgalhtatikan taʼankgolh Jesús lichuwinankgo Dios kʼGalilea, kʼJudea chu kʼSamaria, pero taspitparakgolh xlakata nachipakgo skiti. Xlakgatikgo tuku xla Dios, pero ni wa tuku tlakg xlakaskinka xʼakxilhkgo.
6 Titaxtulh kilhtamaku, Jesús wanilh Pedro chu Andrés pi kstalanikgolh chu “xputsakgolh yama chixkuwin, ni xawa skiti”. ¿Tuku tlawakgolh xlakan? «Makgaxtakgkgolh tunkan xtsalhkan, [o xredkan], stalanikgolh». Santiago chu Juan nachuna tlawakgolh: «Tunkan makgaxtakgkgolh mputakutnu, chu xtlatkan, stalanikgolh» Jesús (Mat. 4:18-22). ¿Tuku kamakgtayalh nalakpuwankgo putum kilhtamaku naskujnikgo Dios? ¿Kaj lakapala chuna laksakkgolh natlawakgo xlakata lu lakgatikgolh tuku kawanika? Ni. Akglhuwa papaʼ xkgaxmatkgonit la xmasiya Jesús, xʼakxilhkgonit la xtlawa milagros, pi lu xtlawa tuku xalakatitum chu la lhuwa tiku xkanajlakgo tuku xkamasiyani. Lu xtatliwakglhnit xtakanajlakan chu xlipawankgo Jehová.
7. ¿La kamakgtayayaw tiku kamakgalhtawakgayaw lu nalipawankgo pi Jehová nakakuentajtlawa?
7 Chuna la Jesús, ¿la kamakgtayayaw tiku kamakgalhtawakgayaw tlakg nalipawankgo Jehová? (Pro. 3:5, 6.) Pulaktum chuna la nakamasiyaniyaw. Akxni wi tuku liwana kamaʼakgatekgsniyaw, nakawaniyaw pi Dios xatapaxuwan nakinkasikulanaliyan komo pulana nawiliyaw xTamapakgsin (kalikgalhtawakga Malaquías 3:10 chu Mateo 6:33). Maski tlan nakamasiyaniyaw textos kBiblia niku wan pi Dios kuenta tlawa xkachikin na lu nakamakgtaya nakawaniyaw tuku akinin titaxtuw. Xlakata na nalipawankgo Jehová, tlan nakawaniyaw la akxilhnitaw pi Jehová kinkamakgtayanitan kkilatamatkan. Na tlan nakalitachuwinanaw la Jehová kamakgtayanit kinatalankan nema talichuwinan kkilikgalhtawakgakan. *
8. 1) ¿Tuku xlakata xlakaskinka pi tiku kamakgalhtawakgayaw “kaliʼakxilhkgolh xlakata nakatsikgo la xlitlan likatsi” Dios? 2) ¿La kamakgtayayaw tiku kamakgalhtawakgayaw akstu naʼakxilhkgo pi Jehová lu tlan likatsi?
8 Ni kaj watiya katilitatliwakglhli xtakanajla tiku makgalhtawakgayaw komo kaj nalikgalhtawakga chu nakgaxmata xlakata tiku kasikulanatlawanit Dios. Talakaskin pi na namakgkatsi la lu tlan likatsi Jehová. Chuna la wa salmista: «Kalikxilhtit xlakata nakatsiyatit la ixlitlan katsi Kintikukan, lipaxaw lama ti wa lipawan» (Sal. 34:8). ¿La makgtayayaw tiku makgalhtawakgayaw naʼakxilha pi Jehová tlan likatsi? Kalakpuwaw pi lu tuwa titaxtuma xlakata ni kgalhi tumin, makgxtakgputun akgtum nitlan talismanin xlakata kxkuli chu na nialh kgamanamputun xlakata natlaja tumin o nialh waputun kuchu (Pro. 23:20, 21; 2 Cor. 7:1; 1 Tim. 6:10). Kilimasiyanitkan pi akxni natlawa oración naskini Dios kamakgtayalh xlakata nialh natlawa tuku nitlan tlawaputun. Chuna namakgtayayaw akstu naʼakxilha pi Dios tlan likatsi. Na lu xlakaskinka nawaniyaw pi pulana nawili tuku xla Dios akxni nalimaxtu kilhtamaku akgatunu semana xlakata nalikgalhtawakga Biblia, nalikgalhtawakga tuku namatitaxtikan ktamakxtumit chu naʼan ktamakxtumit. Akxni naʼakxilha pi Jehová sikulunatlawa tuku tlawa, tlakg natatliwakglha xtakanajla.
Pekuankgo xlakata tuku nawankan
9, 10. 1) ¿Tuku xlakata Nicodemo chu José xalak Arimatea tsekg xkanajlanikgo Cristo? 2) ¿Tuku xlakata makgapitsi lakchixkuwin ni stalaniputunkgo Cristo?
9 Xlakata pekuanikgo tuku nawankgo amakgapitsin, lhuwa lakchixkuwin ni liwana stalaniputunkgo Cristo. Chuna la Nicodemo chu José xalak Arimatea. Xchatiykan tsekg xlikatsikgo pi xkanajlanikgo Jesús, xlakata xpekuanikgo tuku xwankgolh o xkatlawanikgolh judíos (Juan 3:1, 2; 19:38). Chu ni kaj lu xapekua xwankgonit. Xlakata tiku xpulalinkgo xtakanajlakan judíos, lu ksitsinikgo Jesús chu tiku xwan pi xkanajlani Jesús xtamakxtukgo kxpukgalhtawakgakan (Juan 9:22).
10 Kmakgapitsi kachikinin nachuna titaxtukgo. Komo chatum chixku nawan pi katsiputun tuku xla Dios, xlakata Biblia o akgtum takanajla, likgalhkgamanankgo tiku kataskuja, xʼamigos o xparientes. Kʼatanu kachikinin, max nitlan tuku kaʼakgspula maski kaj nawankgo pi lakgpaliputunkgo xtakanajla. Tlakg tuwa titaxtu tiku lisoldado skuja, kpolítica o skujnima xkachikin. Akgtum liʼakxilhtit, chatum chixku xalak Alemania wa: «Wixin xTatayananin Jehová, tuku lichuwinanatit xlakata Biblia xaxlikana. Pero komo xTatayana Jehová naklitaxtu la uku, chali putum nakatsikgokan. ¿Tuku nalakpuwankgo tiku kkataskuja, tiku lakatsu kkatawi chu niku makgtapakgsi kifamilia? Lu nitlan ktilimakgkatsilh».
11. ¿La kamakgtayalh Jesús kstalaninanin xlakata ni napekuanikgo latamanin?
11 Maski xʼapóstoles Jesús ni xapekua xwankgonit, putum liskujkgolh xlakata ni xpekuanikgolh latamanin (Mar. 14:50, 66-72). ¿La kamakgtayalh Cristo xlakata tlakg xtatliwakglhli xtakanajlakan maski nitlan tuku xkatlawanika? Kawanilh tuku nitlan xʼamakgolh lipatinankgo. Pulana kawanilh pi xlakata kstalaninanin xwankgolh xʼamaka kalikgalhkgamanankan: “Akgtsiyaj nalatapayatit akxni nakaxkajnikgoyan nchixkuwin, chu akxni nakalakgmakgankgoyan, [...] chu akxni naxkajnikgoy mintukuwinikan xtachuna mpala ni tlan chixkuwin wixin nkaj xpalakata Xkam nchixku” (Luc. 6:22). Nachuna, kawanilh pi Dios xʼama kamatliwakglha komo kskinikgolh tamakgtay (Luc. 12:4-12). Pero, na kawanilh tiku aku xtsukukgonit kanajlanikgo pi lu tlan xtalalinkgolh kstalaninanin (Mar. 10:29, 30).
12. ¿La tlan nakamakgtayayaw tiku aku tsukumakgolh kgalhtawakgakgo xlakata ni nakapekuanikgo latamanin?
12 Akinin nachuna kilimakgtayatkan tiku kamakgalhtawakgayaw ni nakapekuanikgo latamanin. Xlikana, lu nakamakgtaya ni napekuankgo komo pulana nakatsikgo la nalakkaxtlawakgo taʼakglhuwit nema max nakgalhikgo (Juan 15:19). Tlan nakamasiyaniyaw, la tlan nakgalhtinankgo takgalhskinin nema nakatlawanikgo tiku kataskujkgo o atanu latamanin. Na lu tlan nakatalalinaw chu nakamalakgapasniyaw atanu natalan, tiku na kgalhikgo watiya taʼakglhuwit. Na nakawaniyaw pi makglhuwa katlawakgolh oración chu kawanikgolh Dios tuku makgkatsikgo. Chuna tlan natalakatsuwinikgo Jehová chu naʼakxilhkgo la akgtum chiwix niku nalitatsekgkgo (kalikgalhtawakga Salmo 94:21-23 chu Santiago 4:8).
Lakpuwankgo pi nila wi tuku natlawakgo
13. ¿Tuku xlakata ni tatliwakglha xtakanajlakan lakchixkuwin akxni lakpuwankgo pi nila wi tuku natlawakgo?
13 Wilakgolh lakchixkuwin tiku ni makgtanuputunkgo kʼakgtum takanajla xlakata nila liwana kgalhtawakgakgo, nila liwana chuwinankgo o maxanankgo. Makgapitsi na nila lichuwinankgo tuku lakpuwankgo chu tuku kanajlakgo kxlakatin amakgapitsin. Max lilakgachanikgo akxni lakpuwankgo pi xlikgalhtawakgatkan, xlimastatkan xtakgalhtinkan ktamakxtumit o nalichuwinankgo xtakanajlakan. Chuna wa chatum tala: «Akxni aktsujku xakwanit, lakapala xaktalakatsuwi kʼakgtum malakcha [o puwilhta], kaj xaktlawa pi xaktlakga timbre chu tsekg xaktsala, xaklakaskin pi niti xkiʼakxilhli o xkinkgaxmatnilh», chu uma tuku wampa: «Akxni xaklakpuwan pi kiliʼanat xwanit kʼakgatunu chiki asta xkimakgatatatla».
14. ¿Tuku xlakata kstalaninanin Cristo, nila makuchikgolh aktsu kgawasa nema xlaktanunit demonio?
14 Kalakpuwaw la nitlan makgkatsikgolh kstalaninanin Cristo, akxni nila makuchikgolh chatum aktsu kgawasa tiku xlaktanunit demonio. Xtlat uma kgawasa, lakgalh Jesús chu wanilh: «Kinkgawasa wanti ankgalhin laktlaway nitlan un, chu lu wa lipekua lantla mapatiniy. Lakgachunin anta tapuyacha klhkuyat, usu kchuchut tajuyacha. Kit lu wa liyaja ktiliminikgolh milimakgalhtawakgat wampi xlakan ni lay matlanikgoy». Cristo maxtunilh demonio chu mapaksalh ama kgawasa. Alistalh xtamakgalhtawakgen kgalhskinkgolh xMakgalhtawakganakan: «¿Tu xpalakata kin ni lay ktlakgaxtuw yama kspiritu akgskgawini?». Chu Jesús kawanilh: «Wixin ni kgalhiyatit litliwakga kmintakanajlakan [...]. Kit xlikana tu kkawaniyan pi lapi xtsukutit kgalhiyatit mintakanajlakan kana kaj xtachuna aktsu xatalhtsi mostaza, kaj xman nama xwanitit yuma kgastin: “Katakganu anta lantla wila, chu kapit tawilaya alakatanu”, xlikana xla pi xtakganulh. Chu ni pala pulaktum xtawi wantu wixin ni lay xtlawatit lapi xlikana xlipawantit Dios» (Mat. 17:14-20, TXS, 1999). Xlikana, lu talakaskin nakanajlaniyaw Jehová xlakata tlan natayaniyaw makgapitsi taʼakglhuwit nema xtachuna laklanka sipi. Tiku nialh lipawan Jehová chu xakstu lakkaxtlawaputun xtaʼakglhuwit, nila lakkaxtlawa chu asta tsuku lakpuwan pi nila tuku tlawa.
15, 16. ¿La tlan nakamakgtayayaw tiku kamakgalhtawakgayaw nialh nalakpuwankgo pi nila tuku tlawakgo?
15 Xlakata nakamakgtayayaw nialh nalakpuwankgo pi nila tuku tlawakgo tiku kamakgalhtawakgayaw, nakawaniyaw pi kalipawankgolh Jehová chu ni xakstukan kakalipawanka. Wa uma tuku wa Pedro: «Kataktujutit kxalitliwakga xmakan Dios, lakimpi wa nakamatlankiyan akxni xkilhtamaku nawan. Anta kxmakan Dios nkamakgaxtakgtit xlipaks [mintaʼakglhuwitkan]» (1 Ped. 5:6, 7). Xlakata tlan chuna natlawakgo kilimasiyanitkan la namatliwakglhkgo xtakanajlakan. Tiku tliwakga wi xtakanajla lu xlakaskinka akxilha tuku xla Dios, paxki Biblia chu masiya kxlatamat «xtatlaw espíritu» santo (Gal. 5:22, 23, NM). Makglhuwa tlawa oración (Fili. 4:6, 7). Chu skini Jehová kamatliwakglhli xlakata tlan natayani taʼakglhuwit nema titaxtuma chu namakgantaxti tuku lakgayawakan (kalikgalhtawakga 2 Timoteo 1:7, 8).
16 Makgapitsi tiku kamakgalhtawakgayaw talakaskin nakatsinikgo tlakg liwana nakgalhtawakgakgo, nachuwinankgo o namastakgo taʼakgchuwin xlakatin amakgapitsin. Makgapitsi lakpuwankgo pi ni kaminini naskujnikgo Dios xlakata max nitlan tuku tlawakgolh akxni nina xlakgapaskgo Jehová. Max chuna titaxtumakgolh, chu max kaj lakaskinkgo xatapaxuwan nakamakgtayayaw. Chuna la wa Jesús: «Wa nti ntlan lamakgo, ni lakaskinkgoy makuchina, wampi xmanwa wa ti ntatatlakgoy» (Mat. 9:12).
Lhuwa lakchixkuwin kakaputsaw
17, 18. 1) ¿La tlan nakatekgsaw chu nakalitachuwinanaw Dios lhuwa lakchixkuwin? 2) ¿Tuku naʼakxilhaw kʼartículo nema aku mima?
17 Lu xlikana lakaskinaw pi lhuwa lakchixkuwin natekgskgo tuku nakamakgtaya kxtakanajlakan: wa xtamakatsin Biblia (2 Tim. 3:16, 17). Pero ¿la tlan nakatekgsaw lakchixkuwin akxni anaw lichuwinanaw Dios? Naʼanaw akxni wilakgolh kxchikkan, akxni tsiswamaja, kakgotanunu sábado chu domingo o akxni wi tuku maxkikan kakni kxkachikin chu jaxkgo. Komo tlan, kakgalhskininaw komo wi xatlat. Chuntiya kakalitachuwinaw Dios niku nakatatanokglhaw lakchixkuwin chu niku skujaw chu na kakatachuwinaw xlakchixkuwin kinatalankan.
18 Putum kakalitachuwinaw Dios, chu liwana kakatsiw pi tiku tlan kgalhikgo xnakujkan, o anima nakgaxmatkgo tuku xaxlikana. Xatapaxuwan kakamakgtayaw tiku lu xlikana katsiputunkgo xlakata Dios. Pero ¿tuku tlan nawanaw xlakata lakchixkuwin tiku tamunukgonita? ¿La tlan namakgtayananaw xlakata lhuwa lakchixkuwin nakalakgayawakan taskujut xkachikin Dios? Wa uma tuku naʼakxilhaw kʼartículo nema aku mima.
[Nota nema wi kpágina]
^ párr. 7 Tlan nakalitachuwinanaw nema wilakgolh kʼAnuario de los testigos de Jehová chu kLa Atalaya chu ¡Despertad!
¿La xkgalhtinaw?
• ¿La nakamakgtayakan lakchixkuwin xlakata pulana nawilikgo tuku xla Dios?
• ¿La nakamakgtayayaw tiku kamakgalhtawakgemaw natayanikgo tuku nitlan nakamatlawiputunkan?
• ¿Tuku nakamakgtaya lakchixkuwin ni nalakpuwankgo pi nila tuku tlawakgo?
[Takgalhskinin]
[Dibujo xla página 25]
¿Putsayaw la tlan nakatekgsaw lakchixkuwin chu nakalitachuwinanaw Dios?
[Dibujo xla página 26]
¿La kamakgtayayaw tiku kamakgalhtawakgayaw natayanikgo tuku tuwa titaxtukgo?
