Xaxlikana tlan nalakgpali milatamat

MAX kgaxpatnita o masiyanikanita taʼakgsanin xlakata Dios nema akxilhwi kʼumakgolh artículos. Maski chuna, max ni lakgpaliputuna tuku kanajlaya, xlakata makgasa chuna masiyanikanita.

Lhuwa chuna makgkatsikgo. Makgapitsi takanajla ni kawanikgo latamanin pi katamalakxtumikgolh tuku masiyakgo chu tuku wan Biblia. Amakgapitsi tatayakgo tuku nixaxlikana chu wankgo pi Biblia lu tuwa akgatekgskan, chu ni tsokgkanit xlakata putum naʼakgatekgsaw. Pero, lhuwa kstalaninanin Jesús na ni lu lhuwa xkgalhtawakgakgonit, pero xʼakgatekgskgo tuku xkamasiyani (Hechos 4:13).

Wix max, na ni lakputsananiputuna mintakanajla xlakata lakpuwana pi natasiya pi ni lu kanajlaya. Pero ¿tlan xwa komo Dios xkinkasitsinin xlakata lakputsananimaw Biblia chu xlakata xkatsiputu tuku lakaskin natlawayaw? Ni. Biblia kinkawaniyan pi Dios lakaskin chatunu chatunu kalakputsananiw. Anta kRomanos 12:2 wan: «Lakimpi chuna naliʼakgatakgsatit xanima xatlan, chu lilakgatit, chu xalakatanks xtalakaskin Dios».

Akxni nakatsiya xaxlikana xlakata Dios ni kajwatiya skgalala nawana, wata tlan kitaxtu asta tlakg tlan nalatapaya (Juan 8:32). Chuna titaxtulh Deanne tiku lichuwinaw niku litsuku uma revista. La uku, tuku kanajla kxTachuwin Dios takilhtinit. Deanne wan: «Ni xakkatsi pi Biblia liwana maʼakgatekgsninan asta akxni ktsukulh likgalhtawakga. La uku klakgapasa Jehová chu kkatsi pi lama, chu chatum Tlat xapaxkina. La uku kkatsi tuku xlakata klama».

Max wix nawana: «Akit klikgalhtawakgalha Biblia chu ni lu kimakgtayalh». Komo chuna, nitu kapuwanti. Xlakata masiyanikanita tuku ni xaxlikana xlakata Dios, akxni naʼakgatekgsputuna Biblia, kitaxtu la namalakgnuputuna rompecabezas chu naʼakxilhtilhaya akgtum dibujo nema ni wa tuku malakgnupat. Max makgapitsi tlan namalakgnuya, pero lu nitlan nalimakgkatsiya akxni naʼakxilha pi ni xtachuna la dibujo nema maxkikanita. Pero komo kgalhiya xaxlikana dibujo, putum tlan natalakgnukgo.

¿Katsiputuna xaxlikana xlakata Dios? Kakawani xtatayananin Jehová xalak minkachikin o kakatsokgnani tiku tlawakgolh uma revista xlakata namakgalhtawakgakgoyan (kpágina 4 natekgsa tukuya dirección tlan natsokgnana).

[Tuku wan página 9]

«Chuna naliʼakgatakgsatit xanima xatlan, chu lilakgatit, chu xalakatanks xtalakaskin Dios.» (ROMANOS 12:2)