¿Tuku xlakata kilikgalhakgaxmatatkan xtastakyaw Biblia?
¿Tuku xlakata kilikgalhakgaxmatatkan xtastakyaw Biblia?
TASTAKYAW xalak Biblia xlakata talakgxtumit, ¿ni kinkamakgtayayan chu lhuwa tuku ni kinkamaxkiyan talakaskin natlawayaw? Ni. Tiku makgantaxtikgo ni kgalhikgo taʼakglhuwit la umakgolh...
▪ ... tajatat nema kachipa tiku tanu tanu tatalakgxtumi
▪ ... tiku kgalhi kskgata maski ni xlakaskin
▪ ... talipuwan akxni lakxtlawakan tamakgaxtokgat
▪ ... nitlan limakgkatsikgo kxtalakapastaknikan
▪ ... wankgo pi nialhtu litaxtukgo
Jehová Dios * kiMalakatsukinakan lakaskin nalipaxuwayaw putum tuku kinkamaxkinitan. Isaías 48:17 wan pi tuku Dios kinkamasiyaniyan kaj xlakata tlan natawilayaw. Wa xlakata, tiku makgantaxtikgo xtastakyaw Biblia uma tuku lipaxuwakgo...
▪ ... tlan talalinkgo Dios
▪ ... tlan tawila xtalakapastaknikan
▪ ... tlakg tlan talalinkgo tiku tamakgaxtokgkgo
▪ ... tlan kalichuwinankan
▪ ... tlakg paxuwakgo
¿Chu komo ni limaw kilatamatkan chuna la lakaskin Dios? ¿Tlan nalakgpaliyaw kilatamatkan? ¿Nakinkaliwaniyan Dios tuku max tlawaw pulana?
Kalilakapastakwi kstalaninanin Cristo kxapulana siglo. Makgapitsi, xtlawakgonit talakgxtumit nema ni xlilat, xʼakgskgawikgo xlakpuskatinkan o xlakchixkuwinkan chu xtatalakgxtumikgo xtachixku, pero lakgpalikgolh xlatamatkan chu Dios katapatilh (1 Corintios 6:9-11). La uku, xlikalanka katiyatni lhuwa miles tiku na lakgpalikgonit xlatamatkan. Putum umakgolh latamanin lakkaxwilikgonit nalinkgo xlatamatkan chuna la wan Biblia xlakata talakgxtumit chu makgxtakgkgonit nitlan tayat nema xkgalhikgo. Nachuna Sara tiku lichuwinaw pulana, akxilhkgonit pi lu tlan kakitaxtunima.
«Tunkun skayaj kmakgkatsilh»
Sara katsilh pi xlakata xlima xlatamat chuna la xlakaskin chu niti xwani tuku xlitlawat, ni liminilh tapaxuwan chuna la xlakaskin. Sara wan: «Kintalakapastakni nialhtu xmakgkatsi. Pero xakmaxanan, xakpekuan xlakata xakkgalhilh skgata o xkimpasalh tajatat. Pero chuntiya xakkanajlani Dios chu xakkatsi pi chuna la xaklin kilatamat xaklimakgalipuwan. Nitlan xakmakgkatsi xlakata lixkajni xaklima kilatamat».
Titaxtulh kilhtamaku, Sara kgalhilh litliwakga xlakata nalakgpali xlatamat. Kalakgalh xnatlatni tiku xtatayananin Jehová, na kalakgalh lakgkgolotsin xalak congregación Sara wan: «Lu klipaxuwalh akxni lu tlan chu xatapaxuwan kimakgamakglhtinankgolh kintlat chu kintse chu lakgkgolotsin. Tunkun skayaj kmakgkatsilh».
La uku Sara kgalhi chatiy kamanan. Xla wan: «Akit kkalitachuwinan kinkamanan tuku ktlawalh. Klakaskin kakatsikgolh tuku nitlan kmakgkatsilh xlakata ni kkgalhakgaxmatli xtastakyaw Biblia xlakata talakgxtumit chu kakatsikgolh tuku tlan kitaxtu akxni kgalhakgaxmataw. Xlikana kkanajla pi Dios wilinit limapakgsin xlakata ni lakaskin napatinanaw».
Putum tlan nalipaxuwayaw komo namakgantaxtiyaw xtastakyaw Jehová. Chu Biblia wan pi «wakg ixlimapakgsin» chu «tu limapakgsinan Dios, staranka, y kamalakawani lakchixkuwin nak ixlatamatkan». Nachuna kinkawaniyan pi lanka «taskgaw [...]makglhtinan» tiku kgalhakgaxmatnankgo (Salmo 19:8, 11). *
[Notas nema wilakgo kpágina]
^ párr. 8 Biblia wan pi Jehová wa xtukuwani Dios.
^ párr. 20 Komo tlakg katsiputuna xlakata xtastakyaw Dios, kakawani xtatayananin Jehová xalak minkachikin. Na tlan nakaskiniya kalakgapaxialhnankgon chu kakatsokgnani kdirección nema wi kpágina 4 o kʼInternet: www.watchtower.org/tot.
[Tuku wan página 8]
Tiku ni kgalhakgaxmatkgo xlimapakgsin Dios lhuwa kamakgapatinankgo amakgapitsin
[Tuku wan página 9]
Tiku kgalhakgaxmatkgo xlimapakgsin Dios tlan tawila xtalakapastaknikan chu tlan talalinkgo tiku tamakgaxtokgkgo
