Xʼespíritu Dios kapulalilh kxapulana siglo chu la uku
Xʼespíritu Dios kapulalilh kxapulana siglo chu la uku
«Xlipaks yuma, watiya akgtum Spiritu nti nchuna ntlaway.» (1 COR. 12:11)
1. ¿Tuku naʼakxilhaw kʼuma artículo?
PENTECOSTÉS. ¡Uma tachuwin lu xlakaskinka tuku malakapastaknan! (Hech. 2:1-4.) Wi tuku lu xlakaskinka lalh kxapulana siglo, akxni Dios mastalh espíritu santo chu ama kilhtamaku talakgpalilh la tsukulh kapulalin Dios xlakskujnin. Kʼartículo nema titaxtulh akxilhwi pi akxni nina xʼanan kstalaninanin Cristo, xʼespíritu Jehová kamakgtayalh lhuwa tiku ni xmakgxtakgkgo xlakata xtlawakgolh lu laktuwa taskujut. Pero kxapulana siglo talakgpalilh tuku xtlawa espíritu santo. ¿Tuku xlakata? ¿Chu la tlan litamakgtayayaw xʼespíritu Dios la uku? Kaʼakxilhwi.
«Kxmakan nkimPuchinakan ktamakgaxtakga»
2. ¿La xakxilhnita María, pi kskuja xʼespíritu santo Dios?
2 María na anta xwi niku xtamakgstokgkgonit kstalaninanin Cristo, kxlikilhmakti akgtum chiki kJerusalén akxni Dios makamilh espíritu santo nema xwanit pi xʼama masta (Hech. 1:13, 14). Pero María ni kajku xlimakgtum xakxilhma la kskuja xlitliwakga Dios. Max xtitaxtunita puxamakaw kata, akxni nina xtamakgaxtokga, Jehová limaklakaskilh «Spiritu Santo» xlakata xwililh kxpan xlatamat xKgawasa xalak akgapun (Mat. 1:20).
3, 4. ¿Tuku tlan talakapastakni xkgalhi María chu la tlan nachuna natlawayaw?
3 ¿Tuku xlakata wa María maxkika uma lanka tasikulunalin? Katsiyaw tuku xlakata akxni akxilhaw tuku kgalhtinalh akxni ángel wanilh tuku Dios xlakaskin xtlawalh: «Kxmakan nkimPuchinakan ktamakgaxtakga, chuna nkakinkgantaxtunilh, wa lantla wanita mintachuwin» (Luc. 1:38). Akxni chuna kgalhtinalh María limasiyalh tuku Dios xkatsiya: pi lu tlan xtalakapastakni xkgalhi chu lu xatapaxuwan tlawalh tuku Dios xlakaskin. Ni lilakgaputsalh tuku nalakpuwankgo xtalakatsu akxni xakxilhkgolh pi xʼama kgalhi kskgata, o tuku xʼama lakpuwan tiku xʼama tatamakgaxtokga. María wanilh ángel pi xlakskujni Dios xlitaxtu, chuna limasiyalh pi lu xlipawan xMalana, Jehová.
4 Min kilhtamaku nachuna kinkalakgayawakanan akgtum taskujut o tuwa makgkatsiyaw akxni skujnaniyaw Jehová. Akxni chuna titaxtumaw tlan natlawayaw uma takgalhskinin: «¿Lu klipawan Jehová pi nakimakgtaya xlakata naktlawa chuna la lakaskin? ¿Klimasiya pi ktlawaputun tuku nakiskini?». Liwana katsiyaw pi Jehová nakinkamaxkiyan xʼespíritu komo xliputum kilatamatkan lipawanaw, makgamakglhtinanaw pi wa kimapakgsinakan chu tlawayaw tuku lakaskin (Hech. 5:32).
Espíritu santo makgtayalh Pedro
5. ¿La xmakgtayanit Pedro espíritu santo akxni nina xchan Pentecostés kata 33?
5 Chuna la María, apóstol Pedro na xakxilhnita la xmakgtayanit espíritu santo akxni nina xchan Pentecostés xla kata 33. Kawiliw akgtum liʼakxilhtit, Jesús xmaxkinit litliwakga Pedro chu amakgapitsi apóstoles xlakata tlan xkamaxtukgolh demonios (Mar. 3:14-16). Chu maski Biblia ni lhuwa lichuwinan xlakata uma, kinkawaniyan pi Pedro chuna tlawalh. Xlitliwakga Dios na litasiyalh akxni uma apóstol, tlawalh xakgspun chuchut xla pupunu kʼGalilea, akxni Jesús wanilh pi xlakgalh (kalikgalhtawakga Mateo 14:25-29). Chuna, Pedro tlan xtlawa milagros xlakata xmakgtaya espíritu santo. Pero espíritu santo tanu la xʼama tsuku makgtaya Pedro chu amakgapitsi kstalaninanin Cristo.
6. Xlakata espíritu santo makgtayalh, ¿tuku tlawalh Pedro kPentecostés chu alistalh?
6 Akxni xtlawamaka paskua xla Pentecostés, espíritu santo makgtayalh Pedro chu amakgapitsi kstalaninanin Cristo pi tlan xchuwinankgolh xtachuwinkan tiku xʼankgonit kJerusalén. Chu Pedro tlan tsukulh chuwinan xlakatin lhuwa tiku xtamakgstokgkgonit (Hech. 2:14-36). Pedro tiku kaj lakapala xchuwinan chu xpekuan, maxkika litliwakga xlakata xlichuwinalh Dios maski nitlan tuku xkatlawaniputunkan chu xkaputsastalanimaka (Hech. 4:18-20, 31). Nachuna espíritu santo maʼakgatekgsnilh tuku ni liwana xkatsi (Hech. 5:8, 9). Chu asta makgtayalh xlakata tlan xmalakastakwanilh tiku xninita (Hech. 9:40).
7. ¿Tukuya xtamasiy Jesús liwana akgatekgsli Pedro akxni lilaksakka espíritu santo?
7 Akxni nina xchan Pentecostés, Pedro xʼakgatekgsnita tuku xwamputun lhuwa xtamasiy Jesús (Mat. 16:16, 17; Juan 6:68). Pero lhuwaku tuku ni liwana xʼakgatekgsa, makgapitsi wa uma, la lakastakwanalh Cristo xliʼakgtutu kilhtamaku chu chatum espíritu wa chu xlakata pi kʼakgapun xʼama tawila xTamapakgsin (Juan 20:6-10; Hech. 1:6). Na ni liwana xʼakgatekgsa pi makgapitsi latamanin espíritus xʼamakgolh wankgo chu xʼamakgolh tamapakgsinankgo Jesús kʼakgapun. Pedro akgatekgsli putum xtamasiy Jesús akxni limunuka espíritu santo chu laksakka naʼan kʼakgapun.
8. ¿Tuku katsikgo tiku kalaksakkanit naʼankgo kʼakgapun chu «amakgapitsi borregos»?
8 Akxni kstalaninanin Jesús makglhtinankgolh espíritu santo tlakg liwana akgatekgskgolh tuku xla Dios. Xlakata Dios kamalakpuwanilh tsokgkgolh Tatsokgni xaGriego xla kstalaninanin Cristo, niku talichuwinalh pulaklhuwa tuku lakpuwanit natlawa Jehová nema lu lilakgatit (Efe. 3:8-11, 18). ¡Lu lhuwa litamakgtayayaw tuku tlawakgolh! La uku tiku kalaksakkanit xlakata naʼankgo kʼakgapun chu «amakgapitsi borregos» akxtum tuku kinkamasiyanikanan (Juan 10:16, NM). ¿Limasiyayaw pi lu paxtikatsiniyaw espíritu santo xlakata tlawa pi tlakg liwana nataʼakgtekgsa xTachuwin Dios?
Pablo maxkika lhuwa espíritu santo
9. ¿Tuku tlan tlawalh Pablo xlakata makgtayalh espíritu santo?
9 Max xtitaxtunita akgtum kata akxni xtlawakanit paskua xla Pentecostés, tiku na makglhtinalh espíritu santo: wa Saulo, tiku alistalh lilakgapaska apóstol Pablo. Pulaklhuwa la makgtayalh espíritu santo, chu makgapitsi asta la uku litamakgtayayaw. Kalichuwinaw pulaktum, espíritu santo malakpuwanilh natsokga makkutati libros xalak Biblia. Chu chuna la Pedro, espíritu na makgtayalh tlakg liwana naʼakgatekgsa xlakata latamat nema ni kgalhi xlisputni chu ni lakla kʼakgapun, chu tsokgwililh tuku liwana xʼakgatekgsnit. Na makgtayalh xlakata xkamapaksalh tiku xtatatlakgo, xkamaxtulh demonios chu xkamalakastakwanilh tiku xnikgonita. Pero espíritu na makgtayalh xlakata xtlawalh akgtum taskujut nema tlakg xlakaskinka, nema asta la uku Dios chuntiya kinkamatliwakglhman xlakata natlawayaw, maski nialh xtachuna la makgtayalh Pablo.
10. ¿La makgtayalh Pablo espíritu santo xlakata liwana xlichuwinalh Dios?
10 Anta kChipre, Pablo makglhtinalh lhuwa espíritu santo chu ni pekualh akxni wanilh tuku nitlan xtlawama chatum skgoyona. Mapakgsina xalak Chipre, liwana kgaxmatnilh tuku Pablo xlichuwinama. Kaks «xlilakawanit ntamasiyun xla kimPuchinakan» Jehová (Hech. 13:8-12). Apóstol liwana xkatsi pi lu xlakaskinka xkgalhilh espíritu santo xlakata tlan xlichuwinalh tuku xaxlikana (Mat. 10:20). Wa xlakata alistalh kaskinilh natalan xalak Éfeso pi akxni xtlawakgolh oración kskinkgolh “namaxkikan ntachuwin akxni nachuwinan” (Efe. 6:18-20).
11. ¿La pulalilh Pablo espíritu santo?
11 Pero maski espíritu santo makgtayalh xlakata Pablo xlichuwinalh Dios kmakgapitsi kachikinin, na milh kilhtamaku wi niku ni maxkilh talakaskin. Espíritu santo na putum kilhtamaku pulalilh niku xlichuwinantapuli Dios kʼalakatanu kachikinin (Hech. 13:2; kalikgalhtawakga Hechos 16:6-10). La uku Jehová chuntiyaku maklakaskima xlitliwakga xlakata natalichuwinan xtukuwani. Chuna la Pablo, akinin liskujaw xlakata ni napekuanaw chu xatapaxuwan nalichuwinanaw tuku xaxlikana. Xlikana pi espíritu santo ni kinkapulalinan chuna la Pablo, pero liwana katsiyaw pi kinkapulalinan xlakata nakamakatsiniyaw tiku xlikatsitkan xaxlikana takanajla (Juan 6:44).
“Pulaklhuwa tuku tlawa”
12-14. ¿Kaj pulaktum la kamakgtaya espíritu santo putum xlakskujni Dios? Kawanti tuku xlakata chuna wana.
12 Xlikana, tiku tamakamastaninitawa Dios litatliwakglhaw akxni lakapastakaw la Jehová kasikulunatlawalh kstalaninanin Cristo nema xkalaksakkanit naʼankgo kʼakgapun kxapulana siglo. Kaʼakxilhwi tuku Pablo malakpuwanilh Dios akxni kamalakgachanilh xcarta tiku xalak Corinto, nema xlichuwinan xlakata tlawakan milagros: «[Pulaklhuwa] lantla ntapapitsinit ntalakgalhaman, [...] watiya akgtum Spiritu wanti mastay. Chu na [pulaklhuwa] wa ntaskujut, wampi xmana watiya nchatum wa nkimPuchinakan wanti naskujnaniyaw. Chu na [pulaklhuwa] tapapitsinit litlawat; wampi watiya Dios wanti xlipaks tlaway xlakata xlipaks» (1 Cor. 12:4-6, 11). Chuna la akxilhaw, akxni wi tuku natalakaskin natamakgantaxti, espíritu santo tlan tanu tanu nakamakgtaya chatunu chatunu xlakskujni Dios. Chu kamakgtaya «ni xalhuwa borregos» xla Cristo chu «amakgapitsi borregos» (Luc. 12:32, NM; Juan 10:16, NM). Pero ni putum natalan xalak congregación lakxtum kamakgtaya.
13 Kawiliw akgtum liʼakxilhtit, lakgkgolotsin xalak congregación kalilaksakkan espíritu santo (Hech. 20:28). Pero ni putum tiku naʼankgo kʼakgapun lakgkgolotsin litaxtukgo. Uma kinkamasiyaniyan pi xʼespíritu santo Dios tanu tanu la kamakgtaya natalan xalak congregación.
14 Jehová limaklakaskin espíritu santo xlakata namakgkatsikgo pi “xlakgskgatan Dios nawankgo”, chu kalaksakkanit. Watiya uma espíritu santo limalakastakwanilh xapuxku xKgawasa chu maxkilh latamat nema ni kgalhi xlisputni kʼakgapun (kalikgalhtawakga Romanos 8:11, 15). Na watiya espíritu nema litlawalh putum tuku anan (Gén. 1:1-3). Chu na watiya espíritu nema limakgtayalh Bezalel xlakata xtlawalh tabernáculo, chu Sansón xlakata xlitlawalh tuku nila tamakanajla chu Pedro tlan xtlawalh xakgspun chuchut. Pero nakinkapulalinan xʼespíritu santo Dios ni watiya wamputun akxni espíritu laksaka tiku naʼan kʼakgapun. Akxni espíritu laksaka tiku naʼan kʼakgapun uma na wa tuku lu xlakaskinka tlawa espíritu santo. Chu wa Jehová tiku wan tiku naʼan kʼakgapun chu tiku ni.
15. ¿Xliputum kilhtamaku nalimaklakaskin Dios xʼespíritu xlakata nakalilaksaka tiku naʼankgo kʼakgapun? Kawanti tuku xlakata chuna wana.
15 Chuna la akxilhaw, Jehová akglhuwata mil kata limaklakaskima xlitliwakga xlakata nakamakgtaya xlakskujni tiku ni makgxtakgkgo. Tsukuka lilaksakkan espíritu santo lakpuskatin chu lakchixkuwin kPentecostés xla kata 33, pero nachan kilhtamaku akxni uma nasputa. Pero Dios chuntiyaku nalimaklakaskin xʼespíritu xlakata nakalimakgtaya xlakskujnin natlawakgo Xtalakaskin xliputum kilhtamaku.
16. ¿Tuku tlawamakgolh kstalaninanin Cristo xlakata kamakgtaya espíritu santo?
16 ¿Tuku tlawamakgolh xlakskujnin Dios xlakata kalimakgtayama xʼespíritu? Apocalipsis 22:17 kinkawaniyan tuku tlawamakgolh: «Wa Spiritu, chu ntsumat litatawilat wankgoy: “Katat”. Chi nchu wanti nkgaxmata, kawaj: “Katat”. Chu wanti nkgalhputiy, kamilh, na wanti lakaskin, kawalh nchuchut xla latamat ntu nkaj litlan mastakan». Xlakata espíritu kamakgtaya, kstalaninanin Cristo kawanikgo «wanti lakaskin» kawalh chuchut xla latamat nema masta Jehová. Tiku pulalinkgo uma taskujut wa tiku kalaksakkanit chu tiku litaxtukgo amakgapitsi borregos na kamakgtayakgo. Akxtum skujkgo xlakata espíritu kapulalima. Maski kgalhkgalhimakgolh nalatamakgo kʼakgapun o kKatiyatni, litamunukgonit «kxtukuwini xaTlat, chu kxtukuwini xaKam, chu kxtukuwini Spiritu Santo» (Mat. 28:19). Chu mastakgo talakaskin nakapulalin chu nakgalhikgo lu tlan tayat (Gál. 5:22, 23). Umakgolh natalan mastakgo talakaskin pi espíritu nakamakgtaya lu tlan nalinkgo xlatamatkan chuna la lakaskin Dios (2 Cor. 7:1; Apo. 7:9, 14).
Chuntiya kaskiw espíritu santo
17. ¿La likatsiyaw pi kgalhiyaw xʼespíritu Dios?
17 Jehová putum kinkamaxkiyan «lanka litliwakga, ni kilakan» nema nakinkamakgtayayan ni namakgxtakgaw Jehová chu namakglhtinanaw tasikulunalin, maski kgalhimaw nalatamayaw kʼakgapun o kKatiyatni (2 Cor. 4:7). Min kilhtamaku kinkalikgalhkgamanankanan xlakata chuntiyaku lichuwinanaw xalakwan xalaksasti tamakatsin xlakata Dios. Kalakapastakwi pi «kinkalikgalhkgamanankanan xpalakata xtukuwani Cristo». Pero komo chuntiya lichuwinanaw Dios, napaxuwayaw chu namakgkatsiyaw pi «xʼespíritu Dios, [kinkatawilan]» (1 Ped. 4:14, NM).
18, 19. ¿La nakinkalimakgtayayan Jehová xʼespíritu, chu tuku lakpuwanitaw natlawayaw?
18 Komo xlikana naskinaw, nakinkamaxkikanan espíritu santo, nema nakinkamakgtayayan tlakg liwana naskujnaniyaw Jehová xliputum kilatamatkan. Biblia liwana wan: «Xlakata Dios chuna lakaskilh, chu tlawama pi wixin natlawaputunatit chu natlawayatit». Wa xlakata xlakaskinka chuntiya “kaliskujwi xatapekua chu talhpipit xlakata nalakgtaxtuyaw”. ¿La tlan chuna natlawayaw? Kalimaklakaskiw lu tlan tamaskiwin, espíritu santo chu kaliskujwi xlakata «tliwakga kachipaw tachuwin xla latamat» chu nikxni kamakgxtakgwi (Fili. 2:12, 13, 16, NM).
19 Komo lu lipawanaw espíritu santo, liwana namakgantaxtiyaw putum taskujut nema nakinkamaxkikanan kcongregación, chu naliskujaw xlakata tlakg tlan natlawayaw chu naskiniyaw Jehová kakinkamakgtayan (Sant. 1:5). Nakinkamakgtayayan naʼakgatekgsaw xTachuwin, natayaniyaw taʼakglhuwit nema nakgalhiyaw chu nalichuwinanaw xalakwan xalaksasti. Akxni naskiniyaw Dios kakinkamaxkin xʼespíritu kalakapastakwi uma tastakyaw: «Kaskintit, na nakamaxkikanatit; kaputsatit, na natakgsatit; kachuwinantit, na nakamalakkinikanatit» (Luc. 11:9, 13). Chuna, chuntiya kaskiniw Jehová, pi chuna la tlawanit putum kilhtamaku nema titaxtunita, chuntiya kakinkamaxkin xʼespíritu xlakata nakinkapulalinan.
¿Tlan xkgalhtinanti?
• ¿Tuku tlawalh María nema nachuna kilitlawatkan xlakata namakglhtinanaw tasikulunalin?
• ¿La pulalilh Pablo xʼespíritu santo Dios?
• ¿La kinkapulalinan espíritu santo la uku?
[Takgalhskinin]
[Dibujo xla página 26]
Espíritu santo makgtayalh Pablo xlakata xkatlajalh demonios
[Dibujo xla página 28]
Dios putum kamaxki xʼespíritu santo, wantiku nalatamakgo kKatiyatni o kʼakgapun
