Akxni nialh katiʼanalh tuku masputunan

KOMO wi tiku nawaniyan pi nialh makgas nialhtu katimasputunalh, ¿tuku xlikgalhtinanti? Max xwanti pi uma kaj tamanaxnat, xlakata katsiyawa pi putum kilhtamaku wi tuku masputunan chu chuna lismaninitaw. O max namakgkatsiya pi kaj akgskgawiputuman.

Maski akxilhaw pi tuku masputunan chuntiya min, tlan nakanajlayaw pi nasputa. Akinin liwana katsiyaw pi ni wa lakchixkuwin katimalakgachokgokgolh. Lakchixkuwin ni katsikgo la tatlawanit kakilhtamaku, chu nila mapakgsikgo tuku tatlawanit. Mapakgsina Salomón, tiku lu lakgapaska xlakata lu skgalala xwanit, uma tuku tsokgli: «Latamanin nila katsikgo tuku Dios tlawanit; maski lu lhuwa naliskujkgo xlakata nakatsikgo, pero nila katsikgo. Maski xwankgolh pi lu lakgskgalalan nila katsikgo» (Eclesiastés 8:17).

Komo latamanin nila machokgokgo akxni wi tuku masputunan, ¿tiku tlan natlawa pi nialh kaʼanalh? Biblia wan pi wa kiMalakatsukinakan. Wa lakkaxwililh la naskujkgo putum tuku anan, la chuchut (Eclesiastés 1:7). Lakchixkuwin nila tlawakgo, Dios lhuwa litliwakga kgalhi. Palakachuwina Jeremías wa xlakata uma: «[¡]Wix kiMalanakan Tiku lakgchan mapakgsinan Jehová! Lu lanka militliwakga litlawanita akgapun chu katiyatni chu milimakgxpatliwakga. Ni anan tuku nila makgantaxtiya» (Jeremías 32:17). Xlakata Dios tlawanit Katiyatni chu tuku litatlawanit, katsi tuku talakaskin xlakata tlan natawilakgokan chu nitu nalipekuankgo (Salmo 37:11; 115:16).

Chuna, ¿la natlawa Dios xlakata nialhtu namasputunan? La uku, lipekua tuku lama nema «litasiya pi kxaʼawatiya kilhtamaku». Jesús wa: «Akxni naʼukxiIhatit nalay yuma nkatuwaj, kakgatakstit mpi wa xta[ma]pakgsin Dios talakatsuwinitta» (Mateo 24:3, NM; Lucas 21:31). Uma Tamapakgsin, xla Dios xalak akgapun, lhuwa tuku nalakgpali kKatiyatni, la akxni wi tuku masputunan. Maski Jehová kgalhi litliwakga xlakata wa natlawa, xKgawasa liyawanit, tiku palakachuwina Daniel tilichuwinalh uma: «Chu maxkika tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgo» (Daniel 7:14).

Jesucristo, xKgawasa Dios, makgamakglhtinanit litliwakga xlakata natlawa pi Katiyatni nialhtu nalipekuankan. Akgtiy mil kata titaxtunit, akxni Jesús xlama kKatiyatni, limasiyalh kaj tsinu pi tlan kamapakgsi la un, chuchut chu atanu. Akxni Jesús chu xʼapóstoles xtajumakgolh ktsu barco kpupunu xalak Galilea, «lipekua tsukulh takgayaway takgayawana, [o mar] tsukulh tanakgatajuy chuchut kputakutnu, asta xtakgalhtsamamaja»  apóstoles lu pekuankgolh xlakata tuku xkaʼakgspulalh, skinikgolh Jesús xkamakgtayalh. ¿Tuku tlawalh? Kajwatiya «wanilh takgayawana: ¡Kaks katawila, chu nialh katakgayawa! Puschi yama un xawa takgayawana kaks tawilakgolh». Kaks lakawankgolh xʼapóstoles chu wankgolh: «¿Pus tu ya litliwakga kgalhiy yuma chixku, pi asta maski wa un, chu takgayawana kgalhakgaxmatkgoy?» (Marcos 4:37-41, Hua Xasasti Talaccaxlan, 1999).

Titaxtulh kilhtamaku, Jesús alh niku wi Dios chu tlakg maxkika litliwakga chu limapakgsin. La uku Mapakgsina kxTamapakgsin Dios, liyawakanit xlakata putum nalakgpali tuku natalakaskin xlakata tlan natawilakgo latamanin chu ni napekuankgo.

Pero na akxilhnitawa, pi xlakata anan lhuwa tiku kgalhiputunkgo tuku xla achatum chu tiku lakgkatsanankgo tlakg malhuwikgo taʼakglhuwit chu tuku masputunan. ¿Tuku nakatlawani xTamapakgsin Dios tiku ni namakgxtakgkgo xtayatkan? Biblia wan pi naminacha «nkakgapun nkimPuchinakan Jesús, nataminkgoy xʼángeles wanti nkgalhikgoy xlitliwakga. Naputaktayachi ntlanka lhkuyat, lakimpi nalitamakgapuspitnikgoy wa ntini lakgapaskgolh Dios, chu na ni kgalhakgaxmatkgoy xatlan xtamakatsinin nkimPuchinakan Jesucristo». Chuna, Jesús “nakamasputuy tiku lakglakgalhimakgolh katuxawat” (2 Tesalonicenses 1:7, 8; Apocalipsis 11:18).

Alistalh uma «xReykan nti laktlanka reyes» wa Jesucristo, nakamapakgsi putum tuku masputunan (Apocalipsis 19:16). Nakuentajtlawa pi tiku nalatamakgo kKatiyatni nitu nalipatinankgo. Xlitliwakga nalikuentajtlawa pi un, sen chu amakgapitsi, la lonkgni chu lhkakna nitu nakatlawani latamanin. Chuna nakgantaxtu tuku Jehová kawaninit xlakskujnin: «Nakkamalakgachaniyan sen akxni xlilat, chu tiyat xlikana namakgalanan, chu kiwi namasta xtawakat» (Levítico 26:4). Latamanin tlan natlawakgo xchikkan chu ni nalakpuwankgo pi wi tuku nalakxtlawa. Biblia wan: «Natlawakgo chiki chu anta natawilakgo chu nachankgo uvas chu nawakgo xtawakat» (Isaías 65:21).

¿Tuku militlawat?

Xlikana, pi chuna la wix chu amakgapitsi anta latamaputunaw kxasasti kkakilhtamaku niku nialhtu namasputunan. ¿Tuku natlawaya xlakata anta nalatapaya? Xlakata «nti ni lakgapaskgo[...] Dios» chu «ni kgalhakgaxmatkgoy xatlan xtamakatsinin» ni anta katilatamakgolh, wa xlakata, lu xlakaskinka nakatsiyaw xtalakaskin Dios chu natatayayaw tuku lakkaxwilinit xlakata kKatiyatni. Jehová lakaskin pi kalakgapaswi chu kakgaxmatwi xalakwan xalaksasti xlakata xTamapakgsin nema liyawanit xKgawasa.

Chu tuku lu makgtayanan wa likgalhtawakgakan Biblia, niku wan tuku natlawakan xlakata anta nalatamakan niku nitu nalipekuankan kxTamapakgsin Dios. Tlan xkawani xTatayananin Jehová kamasiyanikgon tuku wan Biblia. Lu xatapaxuwan namasiyanikgoyan. Chu liwana kakatsi: pi komo naliskuja xlakata tlakg nalakgapasa Dios chu nakgalhakgaxpata, nakgantaxtu kmilatamat tuku wan Proverbios 1:33: «Pero wantiku nakinkgaxmatni tlan natawila chu nitu katimaʼakglhuwilh nitu katilakpuwa pi max wi tuku naʼakgspula».