Abrahán chixku tiku xtaktuju

Abrahán wi kxtampin xchik xlakata ni na tala chichini. Lakgamakgat akxilha pi mimakgo kgalhtutu lakchixkuwin. * Tunkun kalakgalh, tlan kamakgamakglhtinalh chu kawanilh pi kajaxkgolh kxchik. Maski kamaxkilh «aktsu kaxtalanchu», kamatlawinanilh tuku xwakgolh, kaxtalanchu tuku aku xtlawakanit, mantequilla, leche chu tlakg xatlan liwa. Uma liwat ni kaj masiya pi liwana kamakgamakglhtinalh, wata na limasiya pi xtaktuju chuna la naʼakxilhaw alistalh (Génesis 18:1-8).

¿TUKU WAMPUTUN TAKTUJUKAN? Uma tayat ni xtachuna tiku tlankajwa chu tlanka limakgkatsikan xlakata tuku kgalhi. Tiku taktuju makgkatsi pi putum latamanin wi tuku tlakg katsikgo (Filipenses 2:3). Nachuna, makgamakglhtinan xtastakyaw amakgapitsin chu tlawa taskujut tuku xlitlawat chatum skujni.

¿LA LIMASIYALH ABRAHÁN UMA TAYAT? Lipaxuw kaskujnilh amakgapitsi. Chuna la lichuwinaw xapulana, akxni kaʼakxilhli kgalhtutu lakchixkuwin tlawalh tuku xtalakaskin xlakata tlan xkamakgamakglhtinalh. Xpuskat Abrahán tunkun kakaxtlawanilh liwat. Abrahán ni kajwatiya kamakgamakglhtinalh chu katawayalh, wata alh laksaka tantum animal xlakata xmakgnilh chu wa xliwakgolh. Ni wa kskujnin tiku kamatlawilh uma taskujut, wata wa tlawalh Abrahán. Xla ni xlimaxanan akxni xkaskujni amakgapitsi.

Makgamakglhtinalh tastakyaw nema maxkika. Anta kBiblia ni lhuwa lichuwinan niku Sara chu Abrahán latachuwinan. Maski chuna, makgtiy talichuwinan pi Abrahán tlawalh tuku Sara wanilh pi tlan xtlawalh (Génesis 16:2; 21:8-14). Chu maski akgtum tastakyaw nema wanilh «nitlan xʼakilha».  Pero akxni Jehová wanilh pi uma tastakyaw tlan xwanit, Abrahán chuna tlawalh.

¿TUKU KINKAMASIYANIYAN XLIʼAKXILHTIT? Komo akinin taktujuyaw nakamakgtayayaw amakgapitsi. Tlan namakgkatsiyaw komo chuna natlawayaw.

Chuna la makglhtinanaw tastakyaw nema kinkamaxkikanan limasiya komo taktujuyaw o ni taktujuyaw. Tuku tlakg tlan natlawayaw, namakglhtinanaw uma tastakyaw chu ni nalakgmakganaw kaj xlakata ni wa kintalakapastaknikan (Proverbios 15:22). Tiku tlakg kamakgtaya uma tastakyaw wa tiku pulalinkgo akgtum taskujut. Chatum supervisor wanikan John wan: «Kilhtamaku kimasiyaninit pi xatlan puxku tlawa pi amakgapitsin tlan nawanikgo tuku lakpuwankgo». Na wampara: «Talakaskin nataktujuyaw akxni tiku kinkataskujan nakinkawaniyan la tlakg tlan natlawayaw taskujut. Wa xlakata ni tiku, nipara puxku, putum katsini».

Komo lakaskinaw pi Jehová tlan nakinkaʼakxilhan la akxilhli Abrahán, kamakgamakglhtinaw tastakyaw nema kinkamaxkikgoyan amakgapitsin chu katlawaw taskujut tuku amakgapitsi limaxanankgo. Kalakapastakwi pi «Dios nipara tsinu kaʼakxilhputun wanti tlanka makgkatsikan wampi xla lhuwa lakgalhamankgo wanti yama xalaksmalhwan [o tataktujukgo]» (1 Pedro 5:5, Hua Xasasti Talaccaxlan, 1999).

[Nota nema wi kpágina]