Kamakgtayanaw xlakata congregación lipaxuw natawila
Kamakgtayanaw xlakata congregación lipaxuw natawila
«Kakamaxkin xtalakgalhaman Malana Jesucristo xlakata tlan tapuwan kgalhiyatit.» (FILI. 4:23, NM)
¿TUKU TLAN NATLAWAYAW XLAKATA TLAN NATAWILA CONGREGACIÓN...
... akxni katawilaw kinatalankan?
... akxni anaw lichuwinanaw Dios?
... akxni katsiyaw pi wi tiku tlawalh akgtum lanka talakgalhin?
1. ¿Tuku xlakata lu tlan kalichuwinanka congregaciones xalak Filipos chu Tiatira?
KXAPULANA siglo kstalaninanin Cristo xalak Filipos ni xkgalhikgo lhuwa tumin, pero xmastakgo tuku xkgalhikgo chu xkalimasiyanikgo pi xkapaxkikgo xnatalan (Fili. 1:3-5, 9; 4:15, 16). Wa xlakata apóstol Pablo chuna limakgalhsputulh carta nema kamalakgachanilh: «Kakamaxkin xtalakgalhaman Malana Jesucristo xlakata tlan tapuwan kgalhiyatit» (Fili. 4:23, NM). Congregación xalak Tiatira nachuna xlikatsikgo. Wa xlakata Jesucristo tiku xwija kʼakgapun kawanilh uma lakwan tachuwin: «Klakgapasa mintatlaw, chu mintapaxkit, chu mintaskujut, chu mintakanajla, chu mintapaxuwanaliyan, chu mintatlaw ntu awatiya tlawanita mpi tlakg kgalhiy xkakni, ni xawa ntu mpulana tlawanita» (Apo. 2:19, 20).
2. ¿Xlakata tlan natawila congregación la makgtayanan kintayatkan?
2 Akgatunu congregación xla xtatayananin Jehová kalilakgapaskan xlakata la likatsikgo. Makgapitsi kalilakgapaskan xlakata paxkinankgo, tlan likatsikgo, chu amakgapitsi lu lichuwinankgo Dios chu lu xlakaskinka akxilhkgo naliskujkgo la precursores o atanu. ¿La tlan namakgtayananaw makxtum natawila congregación chu tlakg natatliwakglha? Nakgalhiyaw tlan tayat (1 Cor. 1:10). Komo tsukuyaw kgalhiyaw nitlan tayat, nitlan tuku nakitaxtu, congregación nialh tliwakga natawila o asta natalan nialhtu nawankgo maski natatlawa laklanka talakgalhin (1 Cor. 5:1; Apo. 3:15, 16). Wa xlakata, ¿tukuya tayat litalakgapasa kincongregacionkan, chu tuku tlan natlawayaw xlakata tlan nalatalalinkgo?
LA NAMAKGTAYANANAW XLAKATA TLAN NATAWILA CONGREGACIÓN
3, 4. ¿La tlan nawaniyaw laktlan tachuwin Jehová kcongregación?
3 David kilhtlinilh Jehová: «Nakpaxkatlikatsiniyan nak ixlakatinkan lhuwa minkamanan, nima natatamakxtumi [...] naktliniyan» (Sal. 35:18). Chuna la David xwani laktlan tachuwin Jehová akxni akxtum xkatawi xlakskujnin Dios. ¿Tuku tlawayaw akinin? Akxni katawilaw kinatalankan ktamakxtumit nema tatlawa akgatunu semana, la akxni likgalhtawakgayaw revista Makatsinina, nalimasiyayaw tlan talakapastakni akxni mastayaw kincomentarioskan chu na limasiyayaw kintakanajlakan. ¿Lanka talakgalhaman akxilhaw namastayaw comentarios? ¿Kgalhtawakgayaw kinchikkan xlakata namastayaw lakwan comentarios? Komo pulalinaw familia, ¿kamakgtayayaw kinkamanankan nalakkaxwilikgo xcomentarios chu kawaniyaw pi ni kaj kalikgalhtawakgolh krevista?
4 Kʼatanu salmo David wa: «Oh kiDios, ixliwakg kinaku klipawanan, kinaku paxawama snun; lipaxaw naktlij, naklitli salmos» (Sal. 57:7). David limasiya pi chuna la kilhtliyaw wa litasiya la xlilhuwa kakninaniyaw Dios. Ktamakxtumit tlan kilhtliniyaw Jehová xliputum kinakujkan o kiʼanimajkan. ¿Wilakgolh takilhtlin nema ni liwana kalakgapasaw? ¿Tuku xlakata ni kilhtliya akxni nakakninaniya Dios kfamilia? Kalakpuwaw chuna la David, tiku tsokgli: «Akit naktlini [Jehová] lata ixliwakg kilatamat, nakpaxkatlikatsini kun salmos tiwalh klamajku» (Sal. 104:33).
5, 6. ¿La nakamakgamakglhtinanaw chu tlan nakalikatsiniyaw kinatalankan, chu akxni chuna tlawayaw la makgtayanan kcongregación?
5 Xlakata naʼanan tapaxkit kcongregación, na talakaskin tlan nakamakglhtinanaw amakgapitsin. Kxaʼawatiya capítulo xla carta nema Pablo kamalakgachanilh Hebreos kamaxki uma tastakyaw: «Niukxni katamakgxtakgnitit nalapaxkiyatit [...] linatalan. Xawa lhuwa lipaxuw kamakgamakglhtinankgotit xlipaks» (Heb. 13:1, 2, Hua Xasasti Talaccaxlan, 1999). Pulaktum la tlan namakgantaxtiyaw uma tastakyaw wa nakawaniyaw superintendentes viajantes chu xlakpuskatin kaminkgolh wayankgo kkinchikkan chu nachuna precursores o atanu. Na tlan nakawaniyaw tiku nilh tiku xtamakgaxtokgkgo, o tiku ni kgalhikgo xtlatkan o xtsekan o amakgapitsi natalan tiku min kilhtamaku tlan naʼankgo wayankgo kkinchikkan o akxni nakakninaniyaw Dios kfamilia.
6 Pablo skinilh Timoteo pi xkamaxkilh xnatalan uma tastakyaw: «Wa ntu ntlan nkatlawakgolh, chu [...] ntu lakwan tatlaw, chu na ni anan talakgkatsan nalimakgtayanankgoy». Chuna «namastokgkgoy [...] wa ntu xla na[min] kilhtamaku» chu «nchu nakgalhikgoy wa ntu xlipan latamat» o ni kgalhi xlisputni (1 Tim. 6:17-19). Uma limasiya pi apóstol xlakaskin lu tlan xkamakgamakglhtinankgolh amakgapitsin. ¿La tlan chuna nalikatsiyaw maski ni lhuwa tumin kgalhiyaw? Tlan nakawaniyaw pi nakalinaw ktamakxtumit o xlakata nalichuwinankgo Dios tiku maklakaskinkgo. Chu komo akinin tlan nakinkalikatsinikanan, ¿tlan nalimasiyayaw pi paxtikatsininanaw chu namakgtayananaw lu tlan natawila congregación? Max tlan namakgtayananaw xlakata gasolina nema tlakg taliwakama. Atanu tuku na tlan natlawayaw xlakata kinatalankan namakgkatsikgo pi kapaxkiyaw wa nalimaxtuyaw kilhtamaku xlakata nakalakgapaxialhnanaw. ¿Tuku kitaxtu akxni tlan kalikatsiniyaw «wa nti makxtum [...]wanitaw ktakanajla»? Pulana tlakg kapaxkiyaw, chu xlipulaktiy tlakg tlan latalalinaw kcongregación (Gál. 6:10).
7. ¿La makgtayanan kcongregación akxni ni wanaw tuku tsekg nakinkawanikgoyan kiʼamigojkan?
7 Pulaktiy tuku matliwakglha la kapaxkiyaw kinatalankan: tlan nalatalalinaw chu ni nawanaw tuku tsekg nakinkawaniyan kiʼamigojkan (kalikgalhtawakga Proverbios 18:24). Xlakata tiku lu tlan latalalin lu lalipawan chu niti wani tuku tsekg waninit xʼamigo. Komo chatum tala kinkawaniyan tuku makgkatsi chu katsi pi tuku nakinkawaniyan niti nawaniyaw, tlakg tlan natalalinaw. Wa xlakata ni kalichuwinaw tuku kinkawanikgoyan kiʼamigoskan chuna namakgtayananaw xlakata congregación la akgtum familia nawan chu naʼanan tapaxkit (Pro. 20:19).
LHUWA KALICHUWINAW DIOS
8. ¿Tuku tastakyaw makglhtinankgolh natalan xalak Laodicea chu tuku xlakata?
8 Jesús kawanilh congregación xalak Laodicea: «Klakgapasa mintatlaw, mpi ni xamixni wix, na ni mpala chichi wix. ¡Wa [...] mpala xamixni xwanti, su chichi xwanti. Pus wa xpalakata mpi kaj skgontsitsi wix, na ni xamixni, na ni mpala chichi, nakkilhtaxtuyan» (Apo. 3:15, 16). Natalan xalak Laodicea, ni lu xatapaxuwan xlichuwinankgo Dios, chu wa xlakata na nitlan xlatalalinkgo. Wa xlakata Jesús kamaxkilh uma lu tlan tastakyaw: «Kastakyawakgo xlipaks wa nti kpaxkikgo; kaʼakgpuwanti, na katalakgaspittaya» o nialh katlawa tuku nitlan tlawapat (Apo. 3:19).
9. ¿La kitaxtu congregación xlakata la skujnaniyaw Dios?
9 Komo lakaskinaw pi congregación xatapaxuwan natawila chu tlan nalatalalinaw, talakaskin lhuwa nalichuwinanaw Dios. Pulaktum tuku xlakata kawilika congregaciones wa pi nakaputsayaw tiku tlan xnakujkan chu nakamasiyaniyaw tuku xaxlikana. Wa xlakata xlakaskinka natlawayaw la Jesús chu xlikana naliskujaw xlakata nakamasiyaniyaw amakgapitsin (Mat. 28:19, 20; Luc. 4:43). Akinin «xtaskujnin Dios», chu akxni tlakg xatapaxuwan lichuwinanaw tlan latalalinaw (1 Cor. 3:9). Chuna la kaʼakxilhaw kinatalankan chu la kapaxkiyaw tlakg tatliwakglha chu nachuna akxni akxilhaw pi tatayakgo chu wankgo pi paxkikgo tuku xla Dios. Akxni “akxtum skujnaniyaw” Dios xlakata nalichuwinanaw, tlawa pi tlakg tlan nalatalalin congregación (kalikgalhtawakga Sofonías 3:9).
10. ¿La kamakgtaya natalan akxni liskujaw xlakata tlakg tlan nalichuwinanaw Dios?
10 Atanu tuku na kamakgtaya amakgapitsin wa la liskujaw xlakata tlakg tlan nalichuwinanaw Dios. Akxni tlakg kaputsayaw latamanin chu na tlawayaw pi tuku nakawaniyaw nachan kxnakujkan, tlakg xatapaxuwan naskujnaniyaw Dios (Mat. 9:36, 37). Chu akxni xatapaxuwan tlawayaw, nachuna namakgkatsikgo tiku kataʼanaw. Kalakpuwaw: ¿tuku xlakata Jesús xchatiyun kamalakgachalh kstalaninanin? (Luc. 10:1.) Xlakata tlakg xatapaxuwan xlichuwinankgolh Dios chu nikaj watiya xlakata xlamatliwakglhkgolh chu xlamasiyanikgolh. Putum akinin lakgatiyaw akxni taʼanaw tiku xatapaxuwan lichuwinan Dios. Chuna la lichuwinankgo Dios kinkamatliwakglhan chu na tlakg lichuwinamputunaw (Rom. 1:12).
NI LIXKAJNI KAKALICHUWINAW CHU NI KAMASTAW TALAKASKIN NATATLAWA TUKU NI NITLAN
11. ¿Tukuya tayat xkgalhikgo israelitas akxni xlama Moisés, chu la kakitaxtunilh?
11 Akxni israelitas kajku makgapitsi semanas akgtum kachikin xwankgonit lu nitlan tsukukgolh lichuwinankgo Jehová chu xpalakachuwinanin (Éxo. 16:1, 2). Wa xlakata ni lhuwa tiku xtaxtukgonit kʼEgipto tanukgolh kTiyat nema xKawanikanit pi Nakamaxkikan. Asta Moisés na ni tanulh xlakata kawanilh tuku ni xlilat akxni nitlan likatsikgolh israelitas (Deu. 32:48-52). ¿Tuku natlawayaw xlakata ni nakinkapasayan uma lixkajni tayat?
12. ¿Tuku natlawayaw xlakata ni nakalichuwinanaw amakgapitsi?
12 Na kuenta tlawayaw ni lixkajni nakalichuwinanaw kinatalankan. Xlakata ni chuna natlawayaw talakaskin nataktujuyaw chu nakamaxkiyaw kakni tiku pulalimakgolh congregación, chu na ni nakatalalinaw tiku nitlan xtayatkan. Komo nalilakgastananaw tuku ni xatlan o lu lhuwa kilhtamaku tatawilayaw tiku kataskujaw o tiku kataʼanaw kʼescuela chu ni kgalhakgaxmatkgo Dios alistalh nitlan nakinkakitaxtuniyan. Wa xlakata, wantuku tlakg tlan wa ni nakatalalinaw tiku nitlan lichuwinankgo amakgapitsi o tiku niti tapakgsiniputunkgo (Pro. 13:20).
13. ¿Tuku nitlan nakatlawani xtakanajlakan natalan akxni wi tiku nitlan kalichuwinan?
13 Akxni nitlan kalichuwinanaw amakgapitsi, tlawa pi naxlajwanan xtakanajlakan natalan xalak congregación, natawila taʼakglhuwit chu nialh tlan nalatalalin. Komo nitlan xlichuwinaw kinatalankan nikaj tlawa pi nitlan namakgkatsikgo, asta akgsaninanin nalitaxtuyaw chu nitlan tuku nakalimawakayaw (Lev. 19:16; 1 Cor. 5:11). Kxapulana siglo, makgapitsin “lakgmakgankgolh limapakgsin, chu na liʼakgsankgolh xtukuwini nti xkgalhikgoy nkakni”, pi nitlan xlichuwinankgo tiku xpulalinkgo congregación (Jud. 8, 16). Dios ni xlakgati uma tuku xtlawamakgolh.
14, 15. 1) ¿Tuku nala kcongregación komo ni nalakkaxtlawakan akxni tatlawa lanka talakgalhin? 2) ¿Tuku kilitlawatkan komo katsiyaw pi wi tiku tlawalh lanka talakgalhin chu nitu wan?
14 Pero ¿tuku natlawayaw komo katsiw pi chatum tala tlawalh akgtum lanka talakgalhin —max lhuwa wa kuchu, akxilha tiku ni lhakganankgonit o nitlan lima xlatamat— chu tsekg tlawama? (Efe. 5:11, 12.) Komo nitu natlawayaw, xʼespíritu santo Dios nialh natawila kcongregación chu max nialh tlan nalatalalin natalan (Gál. 5:19-23). Xlakata tlan nalatalalin kcongregación talakaskin natlawayaw chuna la corintios: ni namastayaw talakaskin pi kcongregación natawilakgo tiku nitlan likatsikgo. ¿Tuku natlawayaw?
15 Pulana lichuwinaw pi lu xlakaskinka ni nawanaw tuku kinkawanikgoyan kiʼamigoskan, tlakg chuna kilitlawatkan akxni chatum tala kinkawaniyan tuku makgkatsi chu tuku lakpuwan. Limasiyayaw pi nipara tsinu paxkinanaw komo nalichuwinanaw. Pero kalakapastakwi pi tiku pulalinkgo congregación kalakgayawakanit nalakkaxtlawakgo akxni wi tiku tlawalh lanka talakgalhin. Wa xlakata talakaskin nakawaniyaw (kalikgalhtawakga Levítico 5:1). Wa xlakata komo katsiyaw pi wi tiku tlawalh lanka talakgalhin, nawaniyaw pi kakaskinilh lakgkgolotsin kamakgtayakgolh (Sant. 5:13-15). Namaxkiyaw tsinu kilhtamaku xlakata nakawani lakgkgolotsin komo ni natlawa akinin nakawaniyaw.
16. ¿La namakgtayanan kcongregación komo nawanaw akxni wi tiku tlawa lanka talakgalhin?
16 Kcongregación kinkamakgtayayan xlakata tlan natawila kintakanajlakan, chu kilikuentajtlawatkan wa xlakata wanaw komo tatlawalh akgtum lanka talakgalhin. Komo tiku lakgalhinalh makgxtakga tuku nitlan tlawama chu makgantaxti tastakyaw, tlan natalalimparakan xlakata nialh katitlawanilh tuku nitlan congregación. Pero komo ni natlawa tastakyaw nema namaxkikgo lakgkgolotsin chu ni lakgpali la lin xlatamat, namaxtukan kcongregación. «Chuna nalilakgsputa» tuku xtlawaputun pi nitlan katawi congregación (kalikgalhtawakga 1 Corintios 5:5). Xlakata tlan natawila congregación, wi tuku kilitlawatkan akxni chuna natalakaskin, nakawaniyaw lakgkgolotsin akxni tatlawama tuku nitlan, chu wa natlawayaw tuku nakamakgtaya kinatalankan.
KAMAKGTAYANAW XLAKATA “MAKXTUM NAKINKATLAWAYAN SPIRITU” SANTO
17, 18. ¿Tuku talakaskin xlakata watiya “akgtum tapuwan nakgalhiyaw”?
17 Xapulana kstalaninanin Cristo makgtayanankgolh xlakata tlan xtawilalh congregación akxni «chuna tlawakgolh la xkamasiyanikgonit apóstoles» (Hech. 2:42, NM). Lu xlakaskinka xʼakxilhkgo la xkapulalinkgo chu tastakyaw xalak Biblia nema xkamaxkikgo lakgkgolotsin. La uku lakgkgolotsin lu kamakgtayakgo tiku litaxtukgo skujni xalipaw chu xaskgalala. Akxni chuna tlawakgo, congregación tamakgtaya chu tatliwakglha xlakata makxtum natawilakgo (1 Cor. 1:10). Nachuna putum kstalaninanin Cristo makgantaxtikgo xtastakyaw Biblia nema masta xkachikin Jehová chu na tlawakgo tuku kawanikgo lakgkgolotsin, chu chuna limasiyakgo pi tlawamakgolh la wan uma texto: «[Kaliskujtit] mpi nitu nakalaktlawaniyan wa ntu makxtum kalitlawanitan spiritu» santo (Efe. 4:3).
18 Wa xlakata, kaliskujwi tlan nalatalalinaw kcongregación. Chuna tlan nakinkawanikanan uma tlan tachuwin: «Kakamaxkin xtalakgalhaman Malana Jesucristo xlakata tlan tapuwan kgalhiyatit» (Fili. 4:23, NM).
[Takgalhskinin]
[Dibujo xla página 24]
Tlan makgtayananaw naʼanan tlan tapuwan akxni mastayaw lu tlan comentarios
[Dibujo xla página 25]
Tlan namakgtayananaw naʼan tlan tapuwan kcongregación akxni liwana nakatsiniyaw takilhtlin
