Skgalalh katawilaw chuna la Jesús
Skgalalh katawilaw chuna la Jesús
«Skgalalh katawilatit, chu katlawatit oración.» (MAT. 26:41, NM)
¿LA XKGALHTINANTI?
¿La litasiya kioracionkan komo skgalalh wilaw o ni?
¿La limasiyayaw pi skgalalh wilaw akxni lichuwinanaw Dios?
¿Tuku xlakata xlakaskinka skgalalh natawilayaw akxni titaxtuyaw taʼakglhuwit, chu la natlawayaw?
1, 2. 1) ¿Tukuya takgalhskinin max natlawayaw xlakata la skgalalh tawi Jesús? 2) ¿Tlan nachuna natlawakgo latamanin la Jesús tiku ni xkgalhi talakgalhin? Kalichuwinanti akgtum liʼakxilhtit.
«KOMO Jesús ni xkgalhi talakgalhin max wi tiku akstu kgalhskinkan, ¿la tlan nachuna skgalalh natawilayaw? Xlakata xla asta tlan xkatsi tuku aku xʼama la maski lhuwa mil kata xtsankga nakgantaxtu. Pero ¿xlikana xtalakaskin pi Jesús skgalalh xtawi?» (Mat. 24:37-39; Heb. 4:15.) Akxni naʼakxilhaw umakgolh takgalhskinin nakinkamakgtayayan nakatsiyaw pi lu xlakaskinka skgalalh natawilayaw.
2 ¿Na tlan natlawayaw la tlawalh tiku ni lakgalhina xwanit maski akinin lakgalhinanin? Tlan, xlakata akxni kinkamasiyaniyan chatum makgalhtawakgana alistalh nachuna tlawayaw. Kalichuwinaw tiku katsiniputun nalimaklakaskin flechas. Akxni natsuku katsini max nipara katitalalh tuku talaputun, wa xlakata tlakg makgatawakga. Xlakata tlakg nakatsini liwana akxilha xmakgalhtawakgana, tiku lu katsini. Akxilha la taya, la wili xmakan chu la kaxwili flechas. Tiku aku katsinima tsinu tsinu katsini chipa arco, chu kuenta tlawa la xlilhuwa unama. Xlakata liwana akxilha la tlawa xmakgalhtawakgana, xlimakglhuwa kimachipi. Nachuna akinin kstalaninanin Cristo liskujaw xlakata tlakg tlan nakgalhakgaxmataw xlimapakgsin Jesús chu tlawayaw chuna la tlawalh.
3. 1) ¿Tuku wa Jesús nema limasiya pi xtalakaskin skgalalh xtawilalh? 2) ¿Tuku naʼakxilhaw kʼuma artículo?
3 ¿Xlikana lu xtalakaskin pi Jesús skgalalh xtawilalh? Xtalakaskin. Kawiliw liʼakxilhtit, akxni atsinu xtsankga namakgnikan, kawanilh kstalaninanin: «Nachuna skgalalh katawilatit». Chu alistalh kawanipa: «Skgalalh katawilatit chu katlawatit oración, xlakata ni natlawaputunatit tuku nitlan» (Mat. 26:38, 41, NM). Jesús putum kilhtamaku skgalalh tawilalh; pero akxni xtitaxtuma uma lu lanka talakgaputsit tlakg xtalakaskin skgalalh xtawilalh chu tlakg xtalakatsuwinilh xTlat xalak kʼakgapun. Chu xkatsi pi kstalaninanin nachuna xlitlawatkan xwanit, chu ni kajwatiya uma kilhtamaku, wata nachuna xlitlawatkan xwanit alistalh. Kaʼakxilhwi tuku xlakata Jesús lakaskin pi skgalalh natawilayaw. Alistalh naʼakxilhaw pulaktutu la tlan nachuna natlawayaw la Jesús.
TUKU XLAKATA JESÚS LAKASKIN SKGALALH NATAWILAYAW
4. ¿Tuku xlakata talakaskin skgalalh natawilayaw?
4 Tlan nawanaw pi Jesús lakaskin skgalalh natawilayaw, xlakata tuku ni katsiyaw chu nachuna xlakata tuku katsiyaw pi aku nala. Akxni xlama kKatiyatni, ¿putum xkatsi tuku aku nala? Ni, Jesús wa: «Wa mpi akxni yama nkilhtamaku nchuna nalay, chu xatu hora nawan tini katsiy, asta ni mpala wa ángeles xala kʼakgapun, chu na ni mpala wa xaKam, wampi xman wa nkinTlat» (Mat. 24:36). Ama kilhtamaku, Jesús, «xaKam», ni xkatsi akxni xʼamaka masputukan uma xalixkajni kakilhtamaku. ¿Chu akinin? ¿Ni xlikana pi na lhuwa tuku ni katsiyaw xlakata tuku aku nala? Akgtum liʼakxilhtit, ni katsiyaw tukuya kilhtamaku Jehová namakamin xKgawasa xlakata namasputu kakilhtamaku. Komo xkatsiw, ¿pi xtalakaskilh skgalalh natawilayaw? Chuna la wa Jesús, lisputni kaj xalan namin, nipara katikatsiw, wa xlakata talakaskin skgalalh natawilayaw (kalikgalhtawakga Mateo 24:43).
5, 6. 1) Xlakata katsiyaw tuku namin chu tuku Dios lakapastaknit natlawa, ¿tuku xlakata talakaskin skgalalh natawilayaw? 2) Xlakata katsiyaw tuku kinkatlawaniputunan Satanás, ¿tuku xlakata tlakg talakaskin skgalalh natawilayaw?
5 Jesús lhuwa tuku xkatsi nema aku xʼama kgantaxtu chu amakgapitsi latamanin nipara tsinu xkatsikgo. Maski akinin ni katsiyaw chuna la Jesús, pero lhuwa tuku kinkamasiyanin xlakata xTamapakgsin Dios chu tuku natlawa nialh makgas. Pero akxni kaʼakxilhaw latamanin, max kʼescuela, kputaskujut o niku kinkalakgchanan nalichuwinanaw Dios, ¿ni xlikana pi lhuwa ni katsikgo tuku xaxlikana xlakata Dios? Wa xlakata skgalalh kilitawilatkan la Jesús, chu naputsayaw la nalichuwinanaw tuku katsiyaw xlakata xTamapakgsin Dios. Uma kilhtamaku lu xlakaskinka ni kaj paxkat kilitlawatkan. Lhuwa tiku kalipekua wi xlatamat (1 Tim. 4:16).
6 Atanu tuku tlawalh pi Jesús skgalalh xtawilalh. Xkatsi pi Satanás xputsama la xtlawalh namakgxtakga Dios chu lhuwa la xmatlawiputun tuku nitlan chu putsastalanilh. Satanás tiku nitlan likatsi na skgalalh xlama, xputsama «akxni tlan» naʼakgchipa (Luc. 4:13, NM). Pero Jesús putum kilhtamaku kuenta tlawalh. Skgalalh xwi xlakata tlan xtayanilh tuku xliʼakxilhka, max akxni xmatlawiputunkan tuku nitlan, akxni nitlan xlikatsinikan o xputsastalanikan. ¿Pi nachuna wilaw akinin? Chuna, xlakata Satanás «xtachuna xatsinksni lapanit, [...] putsama wanti nachipay, naway». Wa xlakata xTachuwin Dios wan: «Lakatitum nalakapastakatit, chu na skgalalh natawilayatit» (1 Ped. 5:8). ¿La tlan chuna natlawayaw?
LA KINKAMAKGTAYAYAN ORACIÓN SKGALALH NATAWILAYAW
7, 8. ¿Tuku tastakyaw mastalh Jesús xlakata oración chu tukuya liʼakxilhtit kinkamakgxtakgnin?
7 Biblia wan pi xlakata skgalalh natawilayaw talakaskin natlawayaw oración (Col. 4:2; 1 Ped. 4:7). Akxni aku xkawaninit xʼapóstoles pi na skgalalh xtawilakgolh, Jesús wa: «Skgalalh katawilatit, chu katlawatit oración, xlakata ni natlawaputunatit tuku nitlan» (Mat. 26:41, NM). ¿Kamaxkika tastakyaw xlakata lu tuwa tuku xtitaxtumakgolh? Ni. Uma tastakyaw wi tuku kinkamasiyaniyan nema nakinkapulalinan chali chali.
8 Jesús lu tlan liʼakxilhtit xlakata la xtlawa oración. Max lakapastakaw akxni tantaskaka tlawanilh oración xTlat. Kalilakapastakwi la titaxtulh (kalikgalhtawakga Lucas 6:12, 13). La uku primavera, Jesús max wi lakatsu kCapernaum, anta niku makgwi. Akxni kakgotanu, an ksipi niku tasiya pupunu xla Galilea. Akxilhma la tsuku tsiswan chu max akxilha lámparas nema pasamakgolh lakgamakgat kCapernaum chu atanu kachikinin nema lakatsu wilakgolh. Chu akxni tsuku tachuwinan Jehová ni anan tuku nalaktlawa pi nialh natlawani oración. Titaxtu minutos chu horas. Tsukukgo mixkgo makgskgot nema xtasiyakgo. Papaʼ tsuku tasiya. Chu animales tsukukgo taxtukgo xlakata nawayankgo. Pero xla ni kuenta tlawa. Kxʼoración max lichuwinama tuku lu xlakaskinka ama tlawa: nakalaksaka kgalhkutiy xʼapóstoles. Kaj kalakpuwaw la wani xTlat putum tuku lakpuwan, tuku lilakgaputsa xlakata chatunu chatunu xʼapóstoles, chu na skini pi kapulalilh chu kamaxkilh liskgalala.
9. ¿Tuku kinkamasiyaniyan xlakata Jesús tantaskaka tlawalh oración?
9 Xliʼakxilhtit Jesús, ¿kinkamasiyaniyan pi lhuwa horas natlawayaw oración? Ni, xlakata Jesús wa uma tuku kawanilh kstalaninanin: «Espíritu lakapala makgtayanan pero makni kgalhi talakgalhin» (Mat. 26:41, NM). Maski chuna, na tlan natlawayaw chuna la Jesús. Akgtum liʼakxilhtit, ¿kgalhskinaw Jehová akxni wi tuku tlawaputunaw nema max na namakgtaxtukgo kifamiliajkan o kinatalankan? Akxni tlawayaw oración, ¿na lichuwinaw tuku lilakgaputsayaw xlakata kinatalankan? ¿Wanaw tuku makgkatsiyaw chu ni kaj watiya watiya tuku wanaw? Jesús na lu xlakaskinka xakxilha akxni xakstu xwi chu xtachuwinan xTlat. Kkakilhtamaku niku lamaw lhuwa tuku natlawa pi nialh nalakapastakaw tuku tlakg xlakaskinka. Pero komo nalimaxtuyaw kilhtamaku natlawaniyaw oración Jehová chu nawaniyaw tuku makgkatsiyaw, skgalalh natawilayaw (Mat. 6:6, 7). Tlakg natalakatsuwiniyaw Jehová, tlan natalalimputunaw, chu ni natlawayaw tuku nalixlajwanan la talalinaw (Sal. 25:14).
LA SKGALALH NATAWILAYAW AKXNI NALICHUWINANAW DIOS
10. ¿Tuku limasiya pi Jesús skgalalh xwi xlakata la tlan xlichuwinalh Dios?
10 Jesús skgalalh tawi xlakata namakgantaxti tuku Dios xlakgayawanit. Xlikana pi anan taskujut niku maski atanu tuku lakapastakmaw nitu la, pero lhuwa taskujut talakaskin kuenta natlawayaw chu skgalalh natawilayaw. Nachuna talakaskin natlawayaw akxni lichuwinanaw Dios. Jesús putum kilhtamaku skgalalh tawilalh xlakata xmasiyalh xatlan tamakatsinin. Akxni, Jesús chu kstalaninanin chankgolh kkachikin nema wanikan Sicar, chu lhuwata xtlawankgonit. Akxni kstalaninanin ankgolh tamawakgo liwat, Jesús tamakgxtakgli lakatsu kpozo xlakata najaxa. Pero skgalalh xwi xlakata nalichuwinan Dios. Chatum puskat samaritana milh tiya chuchut. Jesús max tlan xtilhtatalh o atanu tuku xtlawalh xlakata ni xtachuwinalh puskat pero nichuna tlawalh. Tsukulh litachuwinan Dios chu uma kamakgtayalh lhuwa latamanin xalak kachikin (Juan 4:4-26, 39-42). ¿Tlan nachuna xtlawaw chu tlakg skgalalh natawilayaw xlakata nakalitachuwinanaw tiku katatanokglhaw?
11, 12. 1) ¿Tuku kawanilh Jesús tiku xtlawaputunkgo pi nialh liwana xmakgantaxtilh xtaskujut? 2) ¿La limasiyalh Jesús pi ni xmalakatsali la xtlawa xtaskujut?
11 Makgapitsi xtlawamakgolh pi nialh liwana xtlawalh xtaskujut, maski ni chuna xmatlawiputunkgo. Kalichuwinaw latamanin xalak Capernaum. Akxni akxilhkgolh la kamapaksalh latamanin, lu lakgatikgolh chu nialh xlakaskinkgo kaʼalh. Chu akgatekgsaw tuku xlakata chuna tlawakgolh. Pero xtaskujut Jesús xwanit pi nakalitachuwinan Dios putum «nkgalhnilu xatsankgan nti xala kxkilhtsukut Israel» chu ni kaj Capernaum (Mat. 15:24). Wa xlakata kawanilh: «Na chuna xlakaskinka amakgapitsin [kachikinin] nakan mastay xatlan tamakatsinin xla xtapakgsin Dios; xampi wa yuma nkilimakaminkanit» (Luc. 4:40-44). Liwana tasiya pi Jesús tlakg xlakaskinka xakxilha nalichuwinan Dios chu ni mastalh talakaskin pi wi tuku xmalaktlawilh chuna natlawa.
12 ¿Pi kajwatiya xtlawa taskujut nema xlakgayawakanit chu lakgmakgalh putum tuku tlan xkgalhilh chu xlipaxuwalh? ¿Kaj xlichuwinan Dios chu ni xakxilha tuku maklakaskinkgo familias? Ni. Jesús liwana xlakkaxwilinit xlatamat. Lipaxuwalh latamat chu na katapaxuwalh xʼamigos. Lu xlakaskinka xkaʼakxilha familias, xkatsi tuku xmaklakaskinkgo, taʼakglhuwit nema xkgalhikgo chu na xkapaxki kamanan (kalikgalhtawakga Marcos 10:13-16).
13. ¿La nachuna skgalalh natawilayaw la Jesús chu ni namalakatsaliyaw akxni nalichuwinanaw xTamapakgsin Dios?
13 ¿La tlan natlawayaw la Jesús xlakata skgalalh xwi chu ni namalakatsaliyaw? Ni kamastaw talakaskin uma kakilhtamaku natlawa pi nialh liwana namakgantaxtiyaw kintaskujutkan, nipara kiʼamigoskan, kifamiliajkan tiku max nakinkawanikgoyan kaliw kilatamatkan chuna la amakgapitsin. Chuna la Jesús akxni lichuwinanaw Dios liʼakxilhaw xtachuna liwat, nema matliwakglha kintakanajlakan chu paxuwayaw (Juan 4:34). Pero ni likatsiyaw la ascetas chu ni tlakg lanka kinkamakgkatsikanan. Chuna la kiMakgalhtawakgenakan, xatapaxuwan skujnaniputunaw «Dios tiku xapaxuwana» (1 Tim. 1:11, NM).
LA TLAN SKGALALH NATAWILAYAW AKXNI ANAN TAʼAKGLHUWIT
14. ¿Tuku ni kilitlawatkan akxni titaxtuyaw taʼakglhuwit chu tuku xlakata?
14 Chuna la akxilhwi, akxni Jesús lhuwa talakgaputsit xtitaxtuma kawanilh makgapitsi tastakyaw kstalaninanin xlakata skgalalh xtawilakgolh (kalikgalhtawakga Marcos 14:37). Akxni kgalhiyaw talakgaputsit tlakg talakaskin nachuna natlawayaw la Jesús. Akxni kgalhikgo taʼakglhuwit lhuwa nialh lakapastakkgo uma tuku lu xlakaskinka nema kProverbios makgtiy wan: «Anan kgantum tiji nema tlan kxlakatin chixku, pero alistalh linin kilakawantaya» (Pro. 14:12; 16:25). Komo lipawanaw kiliskgalalakan akxni titaxtuyaw taʼakglhuwit, nitlan nakitaxtuyaw chu kifamiliajkan.
15. ¿Tuku max natlawaputun chatum tlat akxni nila kamaxki tuku lakaskinkgo xfamilia?
15 Chatum tlat max tuwa namakgkatsi nakamaxkikgo tuku lakaskinkgo «wanti xala kxchik» (1 Tim. 5:8). Wa xlakata max namakglhtinamputum akgtum taskujut niku nialh nakgalhi lhuwa kilhtamaku xlakata naʼan ktamakxtumit, nakatakakninani Dios xfamilia chu nalichuwinan Dios. Xatlat max nalakpuwan pi tlan tuku tlawama o xalakatitum, pero uma max natlawa pi nialh tlan natalalin Jehová. Tlakg tlan natlawayaw tuku wa Salomón kProverbios 3:5, 6: «Kalipawanti Jehová xliputum minaku, chu ni wa mintalakapastakni kalipawanti. Chu xliputum mintiji kuentajkatlawani, chu xla namatsaja mintiji».
16. 1) ¿Tukuya liʼakxilhtit kinkawilinin Jesús xlakata la lipawalh xliskgalala Jehová chu ni wa xliskgalala? 2) ¿La tlawakgo tiku pulalinkgo familias chuna la tlawalh Jesús akxni tuwa titaxtumakgolh?
16 Akxni Jesús titaxtulh tuwa taʼakglhuwit, nikxni lipawalh xliskgalala. ¡Kaj kalakpuwanti! Chixku tiku tlakg skgalala nema latamalh katiyatni ni lipawalh xliskgalala. Akgtum liʼakxilhtit, akxni Satanás xmatlawiputun tuku nitlan, Jesús makglhuwa chuna kgalhtilh: «Ntatsokgnit» (Mat. 4:4, 7, 10). Wata limaklakaskilh xliskgalala xTlat xlakata ni xmatlawika tuku nitlan chu chuna limasiyalh pi ni tlankajwa xwanit, chu Satanás chu ni chuna likatsi. ¿Nachuna tlawayaw la Jesús? Tiku pulalinkgo familia chu skgalalh tawilakgo la Jesús mastakgo talakaskin pi nakapulalin xTachuwin Dios, chu tlakg chuna tlawakgo akxni titaxtukgo taʼakglhuwit. Chuna tlawamakgolh lhuwa mil kstalaninanin Cristo xlikalanka kakilhtamaku. Pulana wilikgo tuku xla xTamapakgsin Dios chu xaxlikana takanajla, chu ni wa tuku maklakaskinkgo. Chuna tlakg kuenta tlawakgo xfamiliajkan. Jehová sikulunatlawa xtaskujutkan xlakata tlan namaxkikgo tuku maklakaskinkgo xfamiliajkan, chuna la wan xTachuwin (Mat. 6:33).
17. ¿Tuku namakgtayayan skgalalh natawilaya la Jesús?
17 Xlikana, Jesús kinkawilinin lu xatlan liʼakxilhtit la skgalalh natawilayaw, nema lu kinkamakgtayayan chu asta max nalakgmaxtu kilatamatkan. Satanás lakaskin kataxlajwanilh kintakanajlakan, chu chuna tsinu tsinu nialh katikakninaniputuw Jehová chu asta max namakgxtakgaw (1 Tes. 5:6). Ni kamakgapaxuwaw Satanás. Skgalalh katawilaw la Jesús: katlawaw oración, lu nalichuwinanaw Dios chu nalipawanaw akxni titaxtumaw taʼakglhuwit. Chuna tlan chu lipaxaw nalatamayaw maski xlisputni kilhtamaku wilaw. Liwana kilikatsitkan pi akxni Malana namasputu uma kakilhtamaku, nakinkamanokglhoyan pi skgalalh wilaw chu tlawamaw xtalakaskin xTlat. ¡Lu napaxuwa Jehová akxni nakinkamaxkiyan tuku kinkalakgchanan xlakata kgalhakgaxmatwi! (Apo. 16:15.)
[Takgalhskinin]
[Dibujo xla página 16]
Jesús litachuwinalh Dios puskat kpozo. ¿Tuku tlawayaw xlakata chali chali nalichuwinanaw Dios?
[Dibujo xla página 17]
Akxni kuentajtlawayaw xtakanajla kifamiliajkan litasiya pi skgalalh wilaw
