¿Tiku xwanit Abrahán?
¿Tiku xwanit Abrahán?
JUDÍOS, musulmanes chu tiku wankgo pi kstalaninanin Cristo lu xlakaskinka akxilhkgo Abrahán. * Makgapitsin lilakgapaskgo uma pulalina «chatum tiku lu lichuwinankan kxTachuwin Dios». Makgapitsi akxilhkgo la «lu tlan liʼakxilhtit xla takanajla». Chu Biblia limapakuwi «xtlatkan [...] xlipaks nkanajlanin» (Romanos 4:11).
Pero ¿tuku xlakata lu tlan lichuwinankan? Xlakata kaj xakstu lilakgapaskan kBiblia la xʼamigo Dios... chu ni kaj makgtum chuna wanikan, wata makgtutu (2 Crónicas 20:7, nota; Isaías 41:8; Santiago 2:23).
Pero maski chuna, Abrahán nachuna xwanit la akinin. Xla na kgalhilh lhuwa taʼakglhuwit chuna la akinin. Pero, katsinilh la nalakkaxtlawa. ¿Katsiputuna tuku makgtayalh? Pulana kaʼakxilhwi tuku wan Biblia xlakata uma xatlan kskujni Dios.
Tuku xkanajlakan niku lakachilh
Abrahán lakachilh kata 2018 akxni nina aʼxmin Jesús chu stakli klanka kachikin kʼUr niku xʼanan lhuwa tumin (Génesis 11:27-31). Kʼuma kachikin lhuwa xkakninanikan ídolos. Max asta Taré tiku xtlat Abrahán xwanit, max na xkakninani ídolos (Josué 24:2). Pero Abrahán, ni kakninanilh imágenes nema ni kgalhikgo latamat, xla kajwatiya kakninanilh Jehová. *
¿Tuku xlakata skujnaniputulh Dios? Abrahán lakachilh akgtum ciento atipuxamakaw kata akxni nina xni Sem, xkgawasa Noé, max lalakgapasli chu max akxtum xlatamakgo. Komo chuna, max kgolotsin Sem wanilh la lakgtaxtulh akxni tilalh munkaklat chu max malakapastakalh la xlilakaskinka nakakninanikan Jehová, Dios tiku xkalakgmaxtunit.
Max wa Sem masiyanilh Abrahán xlakata xaxlikana Dios o atanu la lakgapasli, tuku tlakg xlakaskinka wa pi tuku katsinilh lakgchalh kxnaku. Chu akxni Jehová, «xputsana naku» o anima, akxilhli lakwan xtayat makgtayalh xlakata tlakg xkgalhilh tlan tayat (Proverbios 17:3; 2 Crónicas 16:9).
Xlatamat
Abrahán tlan chu xatapaxuwan latamalh, lakgachunin titaxtulh tuku tuwa chu putum kilhtamaku wi tuku xlitlawat xwanit. Kalakapastakwi makgapitsi tuku titaxtulh.
▪ Akxni xlama kʼUr, Dios wanilh pi xʼalh alakatanu kachikinin. Abrahán chu xpuskat ni xkatsikgo la xʼama kakitaxtuni anta: ni xkatsikgo niku xʼamakgolh chu ni xkatsikgo tuku xlakata Dios xkaskinima pi xmakgxtakgkgolh xkachikinkan. Pero kgalhakgaxmatkgolh chu lhuwa kata latamakgolh kchiki nema xlitlawakan xuwa kxtiyat Canaán chu kaj xmakgtawilakgo kʼama kachikin (Hechos 7:2, 3; Hebreos 11:8, 9, 13).
▪ Akxni Abrahán chu Sara nina xkgalhikgo kamanan, Jehová kawanilh pi xkamanan akgtum lanka kachikin xʼama wan chu wa pi putum familias xalak Katiyatni xʼama tasikulunatlawakgo xlakata Abrahán (Génesis 11:30; 12:1-3). Titaxtulh kilhtamaku Jehová wanipa Abrahán pi xkamanan lhuwa xʼama wankgo la staku xalak akgapun (Génesis 15:5, 6).
▪ Abrahán xkgalhi 99 kata chu Sara atsinu nina xchan 90 kata akxni Jehová kawanilh pi xʼamakgolh kgalhikgo chatum kgawasa. Xtasiya pi nila xkgantaxtulh chuna la akxilhkgo latamanin. Pero ni makgas kilhtamaku titaxtulh, Abrahán chu Sara akxilhkgolh pi Jehová «makgantaxti putum tuku lakaskin» (Génesis 18:14). Titaxtulh akgtum kata, akxni Abrahán xkgalhi 100 kata, lakachilh Isaac (Génesis 17:21; 21:1-5). Dios wa pi putum latamanin tlan xʼama kitaxtuni xlakata uma kgawasa.
▪ Titaxtulh kilhtamaku, Jehová skinilh Abrahán tuku nikxni chuna kskininit: wanilh pi xmakamaxkilh xkgawasa nema lu xpaxki, maski Isaac nina xtamakgaxtokgnit chu ni xkgalhi xkamanan. Maski Abrahán lu nitlan xlimakgkatsi xlakata xʼama makgatsankga xkgawasa, kgalhakgaxmatputulh Dios chu xʼama makamasta. Lu xkanajla pi Dios tlan xmalakastakwanilh xlakata xmakgantaxtilh tuku xlichuwinanit (Hebreos 11:19). Pero akxni xʼama makgni xkgawasa, Dios wanilh pi ni xmakgnilh. Alistalh, Jehová wanilh pi lu tlan tuku xtlawanit xlakata xkgalhakgaxmatnit maski lu tuwa chu wanipa tuku xwaninit pi namaxki (Génesis 22:1-18).
▪ Chuna wan Biblia Abrahán nilh akxni xkgalhi 175 kata, «liwana kgololh, chu tlan xlimakgkatsi tuku tlawalh kxlatamat» (Génesis 25:7, 8). Chuna kgantaxtulh tuku xwaninit Jehová pi lhuwa kilhtamaku xʼama latama chu akxni xnilh nitu xlilakgaputsalh (Génesis 15:15).
Tuku kinkamakgxtakgnin
Abrahán ni xtachuna la makgapitsin tiku wankgo pi kanajlanikgo Dios o atanu tiku talichuwinan pi latamalh makgasa. Asta la uku lakapastakkan, chu Abrahán lu tlan liʼakxilhtit kinkamakgxtakgnin (Hebreos 11:8-10, 17-19). Kʼatanu artículo nalichuwinanaw lakwan tayat nema xkgalhi. Pulana kalichuwinaw nema tlakg lilakgapaskan: xtakanajla.
[Notas nema wilakgo kpágina]
^ párr. 2 Pulana, xwanikan Abrán, chu xpuskat, Sarai. Pero, Dios lakgpalinilh xtukuwani Abrán chu wilinilh Abrahán, uma wamputun «xTlat lhuwa latamanin», chu Sarai wilinilh Sara, wamputun «Princesa» (Génesis 17:5, 15). Chuna nakalimapakuwiyaw kʼuma artículo xlakata ni lu lhuwa letras natawila.
^ párr. 6 Biblia masiya pi xtukuwani Dios wa Jehová.
[Recuadro xla página 4]
Chatum tiku lu xlakaskinka lichuwinankan kBiblia
Xapulana akgkaw capítulos xla Génesis lichuwinankgo xlatamatkan lakchixkuwin tiku xkanajlanikgo Dios la Abel, Enoc chu Noé. Pero akgkukitsis capítulos nema minkgo alistalh tlakg lichuwinankgo xlatamat chatum chixku: Abrahán.
Makgapitsi tachuwin nema tlakg xlakaskinka lichuwinan Biblia limaklakaskinkan akxni lichuwinankan kxlatamat Abrahán. Wa umakgolh:
▪ Génesis 15:1 wa xapulana niku lichuwinankan Dios la akgtum escudo nema kamakgtaya xlakskujnin (kaʼakxilhti Deuteronomio 33:29; Salmo 115:9; Proverbios 30:5).
▪ Génesis 15:6 xapulana niku lichuwinankan pi kanajlanikan Dios.
▪ Génesis 20:7 xapulana niku wanikan palakachuwina chatum chixku.
▪ Génesis 22:2 xapulana niku lichuwinankan xtapaxkit chatum tlat.
