Armagedón: ¿tuku wamputun?

«Makxtum tiwilikgolh reyes lakatum ntani wanikan hebreo Armagedón.» (APOCALIPSIS [REVELACIÓN] 16:16)

¿TUKU lakpuwa wix akxni wankan tachuwin Armagedón? Max lakpuwana pi wi tuku masputunan. Maski uma tachuwin kaj makgtum tatsokgnit kBiblia, ktelevisión chu amakgapitsi tuku limakatsininankan chu tiku pulalinkgo takanajla lu lichuwinankgo.

¿Watiya tuku lakpuwankgo latamanin xlakata Armagedón chu tuku masiya Biblia? Lu xlakaskinka nakatsiyaw xtakgalhtin. ¿Tuku xlakata? Xlakata akxni nakatsiya xaxlikana, nialh napekuana, xatapaxuwan nakgalhkgalhiya tuku aku namin chu nalakgpaliya tuku lakpuwana xlakata Dios.

Kaʼakxilhti pulaktutu tuku tlakg lakpuwankgo xlakata Armagedón chu katamalakxtupi tuku xlikana masiya Biblia.

  1. ARMAGEDÓN WA TUKU LATAMANIN NALIMASPUTUNANKGO.

Periodistas chu tiku lakputsanankgo maklakaskinkgo tachuwin Armagedón akxni lichuwinankgo pi latamanin wi tuku nalimasputunankgo kKatiyatni. Akgtum liʼakxilhtit, maklakaskinka akxni lichuwinankgolh akgtiy laklanka guerras xlikalanka Katiyatni. Akxni xtitaxtunita uma guerras, latamanin xlakpuwankgo pi Estados Unidos chu Unión Soviética xlalimakgnikgolh bombas atómicas. Ktelevisión chu amakgapitsi tuku limakatsininankan wankgolh pi uma guerra wanikan «armagedón nuclear». Tiku lakputsananikgo Katiyatni wankgo pi xlakata talakgalhima max kaj lakapala natalakgpali la wi Katiyatni chu namin «armagedón climático».

¿Tuku wamputun uma? Latamanin wa tiku lakkaxwilimakgolh tuku naʼanan kKatiyatni chu putum tuku staknan. Komo mapakgsinanin ni nalakkaxtlawakgo, Katiyatni lu nitlan tuku nalani.

¿Tuku masiya Biblia? Dios ni katimastalh talakaskin pi latamanin namasputukgo Katiyatni. Biblia liwana wan pi Jehová * ni tlawalh Katiyatni «xlakata nitu nalilakan», wata tlawalh «xlakata anta nalatamakan» (Isaías 45:18). Dios ni katimastalh talakaskin pi latamanin namasputukgo Katiyatni wata “nakamasputuy tiku lakglakgalhimakgolh katuxawat” (Apocalipsis 11:18).

2. ARMAGEDÓN TUKU KAJ XALAN NAMALAKGSPUTUNAN.

Min kilhtamaku periodistas limaklakaskinkgo tachuwin Armagedón xtachuna la akxni kaj xalan namasputunan. Akgtum liʼakxilhtit, kkata 2010 lichuwinanka «“Armagedón” kHaití». Xkilhchanima lhuwa tapatin, tiku nikgolh chu tuku lakgsputli xlakata tachikilh tiyat kʼuma kachikin. Reporteros chu tiku tlawakgo películas limaklakaskinkgo tachuwin Armagedón akxni lichuwinankgo tuku nitlan lalh makgasa, chu tuku lakpuwankgo pi aku nala. Akgtum liʼakxilhtit, maklakaskinkgo Armagedón akxni wankgo pi asteroide namasputu Katiyatni.

¿Tuku wamputun uma? Armagedón wa tuku kaj lakapala putum kamakgni maski tiku nitu tlawanit. Akinin nila tuku natlawayaw xlakata nalakgtaxtuyaw.

¿Tuku masiya Biblia? Armagedón ni wa tuku putum kamakgni maski nitu tlawakgonit. Kaj wa nakamasputu tiku lixkajni likatsikgo. Biblia wan pi nialh makgas «tiku lixkajni likatsi nialh katitawilalh, naputsaya niku xwi nialhtu wi nawan» (Salmo 37:10, NM).

3. DIOS NAMASPUTU KATIYATNI KʼARMAGEDÓN.

Lhuwa tiku pulalinkgo takanajla lakpuwankgo pi nalatalachipa tuku tlan chu tuku ni xatlan nema namasputukgo Katiyatni. Akxni Princeton Survey Research Associates kakgalhskinkgolh xalak Estados Unidos, wa pi 40% tiku kakgalhskinka lakpuwankgo pi Katiyatni nalakgsputa «kʼguerra Armagedón».

¿Tuku wamputun uma? Latamanin ni katlawaka xlakata nalatamakgo kKatiyatni putum kilhtamaku, chu Katiyatni na ni tlawaka  xlakata putum kilhtamaku natawila. Dios kinkatlawan pi akxni nachan kilhtamaku naniyaw.

¿Tuku masiya Biblia? Liwana masiya pi «akxni tlawalh katiyatni, tliwekglh matutilh xlakata nikxni natalaksija» (Salmo 104:5). Xlakata latamanin, Biblia wan: «Xalaktankswa, ixlakan nawan ama lipaxaw pulataman [...] kanikxniwa natalatama ana» (Salmo 37:29).

Liwana tasiya pi tuku lakpuwankgo latamanin xlakata Armagedón, ni wa tuku masiya Biblia. Wa xlakata, ¿tuku wamputun Armagedón?

[Nota nema wi kpágina]