Kakamakgtayaw latamanin “nalakgawankgo kxtalhtatakan”
Kakamakgtayaw latamanin “nalakgawankgo kxtalhtatakan”
«Kilhtamaku wantu kin lilamaw, [...] aya lakgchanit kilhtamaku lantla nalakgawanaw kkintalhtatakan.» (ROM. 13:11, HUA XASASTI TALACCAXLAN, TXS, 1999)
¿TLAN XLICHUWINANTI?
¿Tuku xlakata lu xlakaskinka pi kstalaninanin Cristo skgalalh xlitawilatkan kxtakanajlakan?
¿Tuku xlakata kstalaninanin Cristo liwana nakgaxmatkgo chu naʼakxilhkgo tuku lama?
¿Tuku xlakata tlan nalikatsiyaw akxni lichuwinanaw Dios?
1, 2. ¿Tuku xlakata talakaskin nalakgawankgo kxtalhtatakan latamanin?
KATA kata lhuwa tiku nikgo xlakata lhtatatawilakgo akxni matlawanimakgolh xputlawkan. Amakgapitsi makgatsankgakgo xtaskujutkan xlakata ni sokg takikgo o lhtatatawilakgo xputaskujutkan. Pero tlakg nitlan akxni wi tiku xlajwanan kxtakanajla. Wa uma kilhchani Biblia akxni wan: «Lipaxuw yama wanti skgalalh [wi]» (Apo. 16:14-16, TXS, 1999).
2 La uku xlakata lu talakatsuwinita xalanka xkilhtamaku Jehová, latamanin lu lhtatamakgolh, o ni kuenta tlawamakgolh xtakanajlakan. Asta tiku pulalinkgo nixaxlikana takanajla, wankgo pi tiku katapakgsinikgo lhtatakgonit kxtakanajlakan. ¿Tuku wamputun lhtatakan ktakanajla? ¿Tuku xlakata xlakaskinka pi skgalalh xlitawilatkan xaxlikana kstalaninanin Cristo? ¿La nakamakgtayayaw amakgapitsin nalakgawankgo kxtalhtatakan?
¿TUKU WAMPUTUN LHTATAKAN KTAKANAJLA?
3. ¿Tuku tlawamakgolh tiku lhtatamakgolh kxtakanajlakan?
3 Wantiku lhtatakgo nitu tlawakgo. Pero tiku lhtatamakgolh xtakanajlakan lu lhuwa tuku tlawamakgolh... pero ni xlakata xtakanajlakan. Lhuwa tuku putsakgo, max xlakata xlatamatkan o paxuwaputunkgo, lhuwa kakalakgapaska chu kgalhiputunkgo lhuwa tumin. Lhuwa tuku tlawamakgolh chu nialh kgalhikgo kilhtamaku nakatsinikgo xlakata Dios. Pero wantiku skgalalh wilakgolh kxtakanajlakan liwana katsikgo pi «xlikgatsputnita» kakilhtamaku wilaw, wa xlakata lu liskujkgo natlawakgo xtalakaskin Dios (2 Ped. 3:3, 4; Luc. 21:34-36).
4. ¿Tuku xlakata lu xlakaskinka uma xtastakyaw Pablo: «Ni nalhtataya[w] lantla amakgapitsin»?
4 (Kalikgalhtawakga 1 Tesalonicenses 5:4-8.) Akxni Pablo lichuwinalh «wanti lhtatakgoy», xwamputun pi wilakgolh latamanin tiku ni xlakaskinka akxilhkgo kgalhakgaxmatkan xlakata la Dios lakaskin nalinaw kilatamatkan chu ni kuenta tlawakgo pi talakatsuwima akxni Dios nakamasputu tiku ni kgalhakgaxmatkgo. Wa xlakata apóstol kawanilh kstalaninanin Cristo: «Ni nalhtataya[w] lantla amakgapitsin». Wa xlakata, ni chuna kalikatsiw chu ni kalakapastakwi la tiku ni katsiputunkgo xlakata Dios.
5. ¿Tuku talakapastakni kgalhikgo latamanin tiku lhtatamakgolh kxtakanajlakan?
5 Makgapitsi, wankgo pi ni lama Dios nema namaxkikgo kuenta (Sal. 53:1). Amakgapitsi wankgo pi Dios ni kapaxki latamanin, wa xlakata lakpuwankgo pi ni xlakaskinka nalakgapasputunkgo. Chu amakgapitsin lakpuwankgo pi xlakata tlan natalalinkgo Dios, talakaskin kajwatiya natapakgsikgo kʼakgtum takanajla. Putum umakgolh latamanin lhtatamakgolh kxtakanajlakan ¿La tlan nakamakgtayayaw nakatsikgo tuku xaxlikana?
SKGALALH KILITAWILATKAN
6. ¿Tuku xlakata kstalanina Cristo naliskuja ni naxlajwanan xtakanajla?
6 Xlakata tlan nakamalakastakwaniyaw amakgapitsin akinin skgalalh kilitawilatkan. ¿Tuku wamputun? Anta kxTachuwin Dios tamalakxtumi lhtatakan ktakanajla chu «wantu ntatlaway nkapakglhtutaj», o kapukswa, makgapitsi wa umakgolh, kpaskua niku tlawakan tuku nitlan, takgaman, takgachin, talakgxtumit nema ni xlitatlawat, tlawakan tuku xalimaxana, latalatlawakan chu lalakgsitsinikan (kalikgalhtawakga Romanos 13:11-14). Tuwa ni chuna nalikatsiyaw. Wa xlakata lu talakaskin skgalalh natawilayaw. Akxni tiku matlawanima xputlaw lakpuwan pi ni katilhtatalh, lu katuwa wili xlatamat. ¡Lu xlakaskinka pi kstalanina Cristo nalakapastaka pi komo naxlajwanan xtakanajla lu nitlan katikitaxtunilh!
7. ¿Tuku max nakinkaʼakgspulayan komo nitlan nakalakpuwaniyaw latamanin niku lichuwinanaw Dios?
7 Akgtum liʼakxilhtit, chatum kstalanina Cristo nalakpuwan pi nialh nalichuwinan Dios niku lakgchan, xlakata lakpuwan pi nialh tiku kgaxmatputunkgo xalakwan xalaksasti tamakatsin (Pro. 6:10, 11). Max nalakpuwan: «Komo niti nakgaxmatputun, ¿tuku xlakata naklimakgatsankga kilitliwakga nakalimakgtaya?». Xlikana pi lhuwa lhtatamakgolh kxtakanajlakan, pero namin kilhtamaku natalakgpali tuku tlawakgo chu tuku lakpuwankgo. Na wilakgolh tiku makgamakglhtinankgo tuku wan Biblia. Tlan nakamakgtayayaw komo akinin skgalalh natawilayaw, nalakputsayaw la tanu nakalitachuwinanaw xlakata xTamapakgsin Dios. Skgalalh natawilayaw na kilhchanima lu xlakaskinka naʼakxilhaw nalichuwinanaw Dios.
¿TUKU XLAKATA LU XLAKASKINKA NALICHUWINANAW DIOS?
8. ¿Tuku xlakata lu xlakaskinka nalichuwinanaw Dios?
8 Kalakapastakwi pi maski latamanin ni nakinkakgaxmatniyan, kintaskujutkan makgapaxuwa Jehová chu makgtayanan nakgantaxtu tuku lakapastaknit. Nialh makgas, Dios nakamasputu tiku ni nakgaxmatkgo xalakwan xalaksasti tamakatsin. ¿Tuku pulana naʼakxilha akxni nakamasputu? Komo kgaxmatkgolh tuku kalitachuwinaw xlakata Dios (2 Tes. 1:8, 9). Lu nitlan nalakpuwanaw pi xlakata «nalakastakwanankgoy ninin wanti xalakwan chu ti ni xalakwan», ni xlakaskinka nalichuwinanaw Dios (Hech. 24:15). Biblia masiya pi tiku nakaliʼakxilhkan la «cabras» «xliputum kilhtamaku nakamasputukan». Akxni nalichuwinanaw Dios limasiyayaw pi lu lakgalhamanan, xlakata uma tlawa pi latamanin nalakgpalikgo xtayatkan chu «nalatamakgo putum kilhtamaku» (Mat. 25:32, 41, 46, NM; Rom. 10:13-15). Komo ni xlichuwinaw Dios, ¿la nakgaxmatkgo tuku nakalakgmaxtu?
9. ¿La kinkamakgtayayan akinin chu amakgapitsin akxni lichuwinanaw xalakwan xalaksasti tamakatsin?
9 Akinin na litamakgtayayaw akxni lichuwinanaw xalakwan xalaksasti tamakatsin (kalikgalhtawakga 1 Timoteo 4:16). ¿Akxilhnitawa pi akxni lichuwinanaw Jehová chu xTamapakgsin matliwakglha kintakanajlakan chu la xlilhuwa paxkiyaw Dios? ¿Ni xlikana pi tlawa nakgalhiyaw tayat nema xlikgalhit kstalanina Cristo? ¿Ni xlikana pi lipaxuwayaw akxni lichuwinanaw Dios chu limasiyayaw la kakninaniyaw? Lhuwa natalan tiku kamasiyanikgonit xaxlikana amakgapitsin, akxilhkgonit pi xʼespíritu Dios kamakgtaya nalakgpalikgo xlatamatkan.
KAʼAKXILHWI TUKU LAMA
10, 11. 1) ¿La limasiyakgolh Jesús chu Pablo pi xʼakxilhkgo tuku xlama? 2) ¿Tuku na tlan naʼakxilhaw xlakata tlakg tlan nalichuwinanaw Dios?
10 Pulaklhuwa la tlan natlawayaw pi latamanin nakgaxmatputunkgo xalakwan xalaksasti tamakatsin. Wa xlakata kstalaninanin Cristo liwana xliʼakxilhatkan tuku lama. Jesús wililh liʼakxilhtit. Xlakata ni xkgalhi talakgalhin, akxilhli tuku nitlan xlakpuwama chatum fariseo, chu pi xlikana nitlan xlimakgkatsi tuku xtlawanit chatum puskat, chu akxni putum mastalh tuku xkgalhi chatum puskat tiku xninita xchixku (Luc. 7:37-50; 21:1-4). Uma tlawalh pi tlan nakamakgtaya chatunu chatunu kxtakanajlakan. Ni talakaskin pi akinin ni nakgalhiyaw talakgalhin xlakata naʼakxilhaw tuku lama. Pablo wililh lu tlan liʼakxilhtit, putsalh la tlan nakalitachuwinan xalakwan xalaksasti tamakatsin tiku tanu tanu xalanin xwankgonit chu tanu la xlakpuwankgo (Hech. 17:22, 23, 34; 1 Cor. 9:19-23).
11 Komo naliskujaw naʼakxilhaw tuku lama, chuna la Jesús chu Pablo, max tlan nakatsiyaw la nakalitachuwinanaw Dios latamanin. Akgtum liʼakxilhtit, akxni wi tiku tachuwinanaw kaʼakxilhwi niku xala, tuku katsiputun o la wi xfamilia. Max tlan naʼakxilhaw tuku tlawama chu wa natsukuyaw litachuwinanaw.
12. ¿Tuku xlakata kuenta kilitlawatkan tuku kgalhchuwinanaw akxni lichuwinamaw Dios?
12 Tiku skgalalh wi, ni atanu tuku akxilha. Akxni anaw lichuwinanaw Dios lu nakinkamatliwakglhan natachuwinanaw tiku taʼanaw. Pero kililakapastakatkan pi anitaw tachuwinanaw latamanin (Ecl. 3:1, 7). Wa xlakata kuenta kilitlawatkan pi akxni chuwinanaw ni natlawa pi nialh liwana namakgantaxtiyaw kintaskujutkan. Wata kalichuwinaw tuku kawaniputunaw tiku nakgaxmatputunkgo. Maski celular na makgtayanan akxni lichuwinanaw Dios, kuenta kilitlawatkan xlakata ni nakgalhtinanaw kcelular akxni kalitachuwinamaw Dios latamanin.
LU XLAKASKINKA KAKAʼAKXILHWI TIKU KATACHUWINANAW
13, 14. 1) ¿La nakatsiyaw tuku katsiputunkgo latamanin? 2) ¿Tuku natlawayaw xlakata nakatsiputunkgo xlakata Dios?
13 Kstalaninanin Cristo tiku skgalalh wilakgolh, liwana kgaxmatkgo tuku kawanikgo latamanin. ¿Tuku xkakgalhskiw tiku kalitachuwinanaw Dios xlakata nakinkawanikgoyan tuku lilakgaputsakgo? ¿Max lilipuwama xlakata lhuwa anan takanajla, lu lamakgnimaka o lhuwa tuku nila lakkaxtlawakgo mapakgsinanin? ¿Tlan natlawayaw pi nakatsiputun xlakata Dios akxni nawaniyaw la lu tlan katlawakanit tuku staknankgo, o max nawaniyaw pi lu makgtayanan xtastakyaw Biblia? Oración wa tuku lu xlakaskinka akxilhkgo latamanin maski tiku ni kanajlanikgo Dios. Lhuwa kakgalhskinkan komo kakgaxmatnikan. Amakgapitsin lakpuwankgo komo Dios kgaxmata putum oraciones, o ni kgaxmata, tuku tlan natlawakgo xlakata nakakgaxmatnikan.
14 Tlan liwana nakatsiniyaw la nalichuwinanaw Dios akxni naʼakxilhaw la tlawakgo tiku lu katsinikgo. Kaʼakxilhwi la tlawakgo xlakata latamanin ni naʼakxilhkgo pi lhuwa takgalhskinin katlawanimaka o kaj katsiputunkgo la wi xlatamatkan. Naʼakxilhaw la takgaxmata chu la lakawankgo akxni xlakaskinka akxilhkgo tuku kawanimaka (Pro. 15:13).
TLAN NAKALIKATSINIYAW CHU NAPUTSAYAW LA NAKAMAKGTAYAYAW
15. ¿Tuku xlakata tlan nakalikatsiniyaw latamanin?
15 ¿Lakgatiyaw pi akxni lhtatamaw kaj lakapala nakinkamalakastakwanikanan? Lhuwa sitsikgo akxni chuna kamalakastakwanikan, wa xlakata tlakg tlan ni lakapala nakamalakastakwaniyaw. Na xtachuna akxni wi tiku malakapastakayaw xlakata xtakanajla. Akgtum liʼakxilhtit, akxni sitsi tiku lakgapaxialhnanaw, ¿tuku tlan xtlawaw? Nalakpuwana tuku max makgkatsima, chu napaxtikatsiniya pi wanin tuku tlawama chu ni nasitsiya (Pro. 15:1; 17:14; 2 Tim. 2:24). Akxni tlan kalikatsiniyaw max uma natlawa pi nakgaxmata akxni namimpara atanu xtatayana Jehová.
16, 17. ¿Tuku liwana kiliʼakxilhatkan akxni nalichuwinanaw Dios?
16 Atanu tuku tlan nakitaxtu wa pi max nakinkakgaxmatnikanan maski pulana ni xlakaskinkgo. Wi tiku wankgo «Akit kkgalhi kintakanajla» o «Ni klakgati» kaj xlakata lakpuwankgo pi chuna nialh katitachuwinaw. Pero komo tlan nalikatsiniyaw chu naputsayaw la natlawaniyaw takgalhskinin uma natlawa tlakg nakatsiputun xlakata Dios (kalikgalhtawakga Colosenses 4:6).
17 Komo wi tiku kinkawaniyan pi lhuwa tuku tlawama, tlakg tlan nakamakgxtakgaw. Pero namin kilhtamaku max naʼakxilhaw pi tlan wi tuku nakawaniyaw maski kaj tsinu pero xlakaskinka. Wilakgolh natalan tiku kaj lakapala malakakikgo Biblia, likgalhtawakgakgo akgtum texto chu tlawanikgo akgtum takgalhskinin nema nakgalhtikgo atanu kilhtamaku... chu nipara akgtum minuto limaklakaskinkgo. Uma kamakgtayanit pi latamanin nakatsiputunkgo xlakata Dios chu tlakg lhuwa kilhtamaku katachuwinankgonit. ¿Na tlan chuna xtlawaw akxni kinkakgaxmatnikgoyan?
18. ¿La tlakg tlan nakalitachuwinanaw Dios tiku nakatatanokglhaw?
18 Tlan natlawayaw pi nakatsiputunkgo xlakata Dios tiku chali chali katatanokglhaw, komo liwana katsiyaw tuku nakawaniyaw. Lhuwa natalan linkgo akgtum likgalhtawakga kxmurralhkan. Max na lakapastakkgonit akgtum texto nema tlan nakawanikgo. Chu na tlan nakaskiniyaw tastakyaw tiku pulalin la lichuwinankan Dios kcongregación chu precursores.
KALAKAPASTAKWI LA NAKALITACHUWINANAW DIOS KIFAMILIAJKAN
19. ¿Tuku xlakata chuntiyaku nakamakgtayayaw kifamiliajkan xlakata nakanajlakgo?
19 Xlikana pi lu xlakgatiw pi kifamiliajkan na xkgalhtawakgakgolh (Jos. 2:13; Hech. 10:24, 48; 16:31, 32). Komo xapulana ni kinkakgaxmatnikgoyan max nialh nakatachuwinamputunaw, xlakata max lakpuwanaw pi tuku tlawayaw o wanaw nila lakgpali xtalakapastaknikan. Pero max wi tuku natitaxtukgo nema natlawa pi nalakgpalikgo tuku lakpuwankgo. Chu max la uku tlakg katsiniyaw la nalichuwinanaw tuku xaxlikana chu tlakg tlan nakinkakitaxtuniyan.
20. ¿Tuku xlakata lu xlakaskinka liwana nakatachuwinanaw kifamiliajkan?
20 Na kiliʼakxilhatkan la makgkatsikgo kifamiliajkan (Rom. 2:4). Nachuna nakatachuwinanaw la akxni kalitachuwinanaw Dios atanu latamanin. Ni nakasitsiniyaw chu nakamaxkiyaw kakni. Ni putum kilhtamaku nakalitachuwinanaw kintakanajlakan wata kakalimasiyaniw la kinkamakgtayanitan (Efe. 4:23, 24). Kaʼakxilhkgolh la kinkasikulunatlawanitan Jehová chu kinkamasiyaninitan xlakata tlan natawilayaw (Isa. 48:17). Kaʼakxilhkgolh pi limaw kilatamatkan la kstalaninanin Cristo.
21, 22. Kalichuwinanti tuku masiya pi lu xlakaskinka chuntiya nakamakgtayayaw kifamiliajkan kxtakanajlakan.
21 Nina makgas chatum tala puskat tsokgli: «Putum kilhtamaku kputsa la nakalitachuwinan Dios kgalhkututu kinatalan, xlakata tuku kkawani chu la klin kilatamat. Akgatunu kata katsokgnani xputumkan. Pero liwaka puxamakaw kata kaj kiʼakstu xtatayana Jehová xakwanit».
22 Tala wampara: «Akgtum kilhtamaku ktachuwinalh kteléfono chatum kintala tsumat nema makgat wi. Kiwanilh pi skinilh tiku xpulalin xtakanajla xmasiyanilh xlakata Biblia pero nikxni masiyanilh. Akxni kwanilh pi akit tlan xakmakgtayalh, xla kiwanilh: “Tlan, pero nakwaniyan pi akit nikxni xtatayana Jehová nakwan”. Akxni kmalakgachanilh libro ¿Tuku xlikana masiyay Biblia?, ni lhuwa kilhtamaku xtitaxtu xaktachuwinan. Pero xla nipara xʼakxilhnit libro, alistalh ktachuwinalh kteléfono, kwanilh pi kaj akgkukitsis minuto xakama litakgalhtawakga chu klichuwinaw makgapitsi textos nema limin libro. Akxni makglhuwata xaktachuwinanit, liwaka akgkukitsis minuto kgalhtawakgaputulh. Alistalh, kintala tsukulh kinkilhmini xlakata xaktakgalhtawakgalh, chu xmin kilhtamaku lu tsisa xchuwinan akxni nina xaktaki, chu asta makgtiy xkintachuwinan akgatunu kilhtamaku. Titaxtulh akgtum kata tamunulh chu titaxtupa akgtum kata precursora wa».
23. ¿Tuku xlakata chuntiya nakamakgtayayaw latamanin nalakastakwanankgo kxtakanajlakan?
23 Liwana kilikatsinitkan la nakamakgtayayaw nalakastakwanankgo kxtakanajlakan latamanin. Pero wilakgolh tiku tlan likatsikgo chu kinkakgaxmatnikgoyan. Max puxam mil tamunukgo akgatunu papaʼ chu xtatayana Jehová wankgo. Wa xlakata lu xlakaskinka kaʼakxilhwi tastakyaw nema Pablo maxkilh Arquipo: «Kana wix, namakgantaxtiya ntaskujut wa ntu makgamakglhtinaninita» (Col. 4:17). Artículo nema aku mima nakinkamakgtayayan nakatsiyaw tuku wamputun lu xlakaskinka naʼakxilhaw nalichuwinanaw Dios.
[Takgalhskinin]
[Recuadro xla página 13]
LA TLAN SKGALALH NATAWILAYA
▪ Chuntiya katlawa xtalakaskin Dios
▪ Ni katlawa tuku tatlawa kapukswa
▪ Chuntiya kuenta natlawaya xlakata ni naxlajwanan mintakanajlakan
▪ Kalakpuwanti pi nakgaxmatkgo latamanin tiku kalitachuwinanaw Dios
▪ Kalakputsanani la nalichuwinana Dios
▪ Lu xlakaskinka kaʼakxilhti nalichuwinana Dios
