Ni kaʼakxilhwi tuku makgxtakgwi kinkgenkan

«Tini chatum mpala ti matsukiy xlilakwaxnat, natalakgaspita kxkgan, mpala chuna xmininilh naskuja kxtapakgsin Dios.» (LUC. 9:62)

¿LA XKGALHTINANTI?

¿Tuku xlakata kililakapastakatkan xpuskat Lot?

¿Tuku pulaktutu nialh nalakapastakaw?

¿La nachuna natlawayaw la xkachikin Jehová?

1. ¿Tukuya tastakyaw mastalh Jesús chu tuku takgalhskinin anan?

«KALILAKAPASTAKTIT xpuskat Lot.» (Luc 17:32.) Atsinu nina chan akgtiy mil kata akxni Jesús mastalh uma lu xlakaskinka tastakyaw, nema la uku tlakg xlakaskinka. ¿Tuku xkilhchanima? Judíos tiku xkgaxmatmakgolh liwana xkatsikgo tuku xkawaniputun. Xkatsikgo xlakata Lot: akxni xkatataxtuma xfamilia kSodoma, xpuskat ni kgalhakgaxmatninalh, talakgaspitayalh chu xachiwix matsat wa (kalikgalhtawakga Génesis 19:17, 26).

2. ¿Tuku xlakata talakgaspittayalh xpuskat Lot chu la kitaxtunilh?

² ¿Tuku xlakata talakgaspitayalh xpuskat Lot? Max kaj xakxilhputun tuku xlama, max ni xkanajla pi chuna xʼama la, o xlakapastakma tuku makgxtakgli kʼuma kachikin (Luc. 17:31). Maski ni liwana katsiyaw, pero lu nitlan kitaxtunilh. ¡Na nilh akxni nikgolh tiku xalak Sodoma chu Gomorra! Wa xlakata Jesús wa: «Kalilakapastaktit xpuskat Lot».

3. ¿La limasiyalh Jesús pi lu xlakaskinka ni natalakgaspittayayaw?

³ La uku kstalaninanin Cristo, na lu xlakaskinka ni natalakgaspittayakgo. Jesús lichuwinalh uma akxni chatum chixku kgalhskilh komo tlan pulana xʼalh kaʼakxilha xfamilia, chu alistalh kstalanina xwa. Jesús wanilh: «Tini chatum mpala ti matsukiy xlilakwaxnat, natalakgaspita kxkgan, mpala chuna xmininilh naskuja kxtapakgsin Dios» (Luc. 9:62). ¿Lu nitlan la kgalhtilh o lhuwa tuku kskinima Jesús? Ni. Jesús xkatsi pi uma tuku kskima chixku, kaj ni xmakgantaxtiputun xtaskujut, wa xlakata tamalakxtumilh chatum chanana tiku «talakgaspita kxkgan». Maski kaj tsinu nalakaʼan o asta namakgxtakga  xʼarado; tiku chuna tlawa ni liwana tlawama xtaskujut chu nitlan kitaxtuni.

4. ¿Tuku tlakg xlakaskinka naʼakxilhaw?

⁴ Lu xlakaskinka pi ni nalakapastakaw tuku xkgalhiyaw makgasa, wata naʼakxilhaw tuku kgalhiyaw la uku. Biblia liwana wan: «Milakgastapu, chuntiya nalakaʼan klakatin, chuna, milakgastapu wa naʼakxilha tuku wi kmilakatin» (Pro. 4:25).

5. ¿Tuku xlakata ni nalakapastakaw tuku xkgalhiyaw makgasa?

⁵ Wi tuku xlakata lu xlakaskinka pi kstalaninanin Cristo ni nalakapastakaw tuku xkgalhiyaw makgasa. ¿Tuku xlakata? Xlakata lamaw «xaʼawatiya kilhtamaku» (2 Tim. 3:1, NM). Tuku nialh makgas namasputukan ni kaj akgtiy laklanka kachikinin, wata putum uma xalixkajni kakilhtamaku. ¿Tuku kilitlawatkan xlakata ni natlawayaw la xpuskat Lot? Pulana naʼakxilhaw tuku xkgalhiyaw makgasa nema natlawa pi natalakgaspittayayaw (2 Cor. 2:11). Wa xlakata, kaʼakxilhwi umakgolh chu tuku nakinkamakgtayayan nialh nakalakapastakaw.

LA XWILAW MAKGASA

6. ¿Tuku xlakata ni nalipawanaw kintalakapastaknikan?

⁶ Tuku lu nitlan wa akxni lu lakapastakaw la xwilaw makgasa. Akxni lu lakpuwanaw la xwilaw makgasa, kintalakapastaknikan nakinkaʼakgskgawiyan chu natlawa pi namalakatsaliyaw la tlan xwilaw chu ni nalakpuwanaw taʼakglhuwit nema xkgalhiyaw. Komo chuntiya nalakapastakaw, natlawa pi nalilipuwanaw xlakata tuku makgxtakgwi. Pero Biblia wan: «Nikxni kakgalhskininanti tuku xlakata tlakg tlan xwanit kilhtamaku nema titaxtulha. Lakgskgalalan ni tlawakgo uma takgalhskinin» (Ecl. 7:10, Nueva Versión Internacional). Pero ¿tuku xlakata lu nitlan nalakapastakaw la xwilaw makgasa?

7-9. 1) ¿Tuku kaʼakgspulalh israelitas kʼEgipto? 2) ¿Tuku xlakata tlan xpaxuwakgolh? 3) ¿Tuku litaʼakglhuwikgolh israelitas?

⁷ Kalakapastakwi tuku kaʼakgspulalh israelitas akxni xlama Moisés. Maski egipcios pulana lu tlan xkalikatsinikgo israelitas, pero akxni nilh José «tlawaka pi wi tiku xkamapakgsilh kluxatuwa taskujut kaj xlakata lu xkalimakgalipuwanka kxtaskujutkan» (Éxo. 1:11). Faraón mapakgsinalh pi xkamakgnika xlakgskgatan israelitas, xlakata xkachikin Dios ni xlhuwankgolh (Éxo. 1:15, 16, 22). Lu nitlan tuku xtitaxtumakgolh wa xlakata Jehová wanilh Moisés: «Kakxilhnit la kamapatinimaka kinkachikin nema wi kʼEgipto, chu kkgaxmatnit la kinkilhminikgo xlakata lu kamaskujumaka; xlakata kkatsi la patinamakgolh» (Éxo. 3:7).

⁸ Kalakpuwaw la max israelitas lu paxuwakgolh akxni kalakgmaxtuka niku lu xkamaskujumaka. Kalakapastakwi tuku akxilhkgolh. Pulana, Jehová maklakaskilh xlitliwakga chu kamakamilh pulakkaw tuku nitlan faraón chu xkachikin (kalikgalhtawakga Éxodo 6:1, 6, 7). Xlipulaktiy, egipcios ni kaj mastakgolh talakaskin pi israelitas xtaxtukgolh, wata kaskinikgolh pi xʼankgolh chu asta lhuwa kamaxkikgolh oro chu plata. Biblia wan pi israelitas «kamakglhtikgolh  egipcios» lhuwa tuku xtapalh xkgalhikgo (Éxo. 12:33-36). Alistalh, akxilhkgolh la faraón chu ksoldados nikgolh kXaspinini pupunu (Éxo. 14:30, 31). Xlikana pi uma tuku akxilhkgolh lu kamatliwakglhli xtakanajlakan.

⁹ Wa xlakata, nila kanajlayaw pi akxni nina makgas xkalakgmaxtukanit, israelitas tsukukgolh taʼakglhuwikgo. ¿Tuku xlakata? ¡Kaj xlakata liwat! Nialh xlakgatikgo tuku xkamaxkima Jehová, wa xlakata wankgolh: «¡Lu klakapastakaw skiti, o tamakgni nema xakwayaw kʼEgipto, pepinos chu sandías chu puerros chu cebollas chu axux! Pero la uku kilatamatkan lu skaknit. Kilakgastaputakan kaj wa akxilha maná» (Núm. 11:5, 6). Nialh xlakapastakkgo pi kaj skujni xlitaxtukgonit chu xtaspitputumparakgo kʼEgipto (Núm. 14:2-4). Pero xlakata lu xlakapastakmakgolh tuku xmakgxtakgkgonit Jehová nialh tlan kaʼakxilhli (Núm. 11:10).

10. ¿Tuku kinkamasiyaniyan tuku kaʼakgspulalh israelitas?

¹⁰ ¿Tuku kinkamasiyaniyan uma? Akxni titaxtuyaw taʼakglhuwit, ni lu nalakapastakaw tuku lakpuwanaw pi tlan xkgalhiyaw makgasa, max akxni nina xkgalhtawakgayaw. Xlikana pi tlan nalakapastakaw tuku tlawanitaw, xlakata wi tuku nakatsiniyaw chu nalipaxuwayaw tuku tlan tlawaw. Pero xlakaskinka pi nalakapastakaw chuna la xwanit. Komo ni chuna natlawayaw, max ni napaxuwayaw chuna la wilaw la uku chu nalatamaputumparayaw la xlamaw makgasa (kalikgalhtawakga 2 Pedro 2:20-22).

TUKU MAKGXTAKGWI MAKGASA

11. ¿La akxilhkgo makgapitsi natalan tuku makgxtakgkgolh makgasa?

¹¹ Lu nitlan, pero makgapitsi natalan akxilhkgo pi tuku makgxtakgkgolh makgasa la lhuwa tuku makgatsankgakgolh. Max wix tlan lhuwa xtikgalhtawakga, xlakata lu xtilakgapaskanti, lhuwa tumin xtikgalhi, pero ni wa tuku putsa. Lhuwa natalan max lu tlan taskujut xkgalhikgo niku tlan xkaxokgonikan, tlakgnanin xwankgonit, makgalhtawakgenanin o atletas, pero makgxtakgkgolh. Chu akxilhkgo pi nina min lisputni. Wa xlakata max lakpuwankgo: «¡La uku lhuwa tuku xaktikgalhilh komo ni xaktimakgxtakgli tuku xakkgalhi!».

12. ¿La xakxilha Pablo tuku xmakgxtakgnit?

¹² Apóstol Pablo lhuwa tuku makgxtakgli akxni kstalanina Cristo wa (Fili. 3:4-6). ¿Lilipuwa xlakata chuna tlawalh? Xla wan: «Xlipaks yuma wa ntu ntatlaja nkinkitaxtunilh, kaj limakgatsankgan kliʼukxilhnit xpalakata xtapaxkit nCristo. Wampi [...] kpuwan mpi xalimakgatsankgan xlipaks nkatuwaj, xpalakata wa ntu lhuwa kgalhi xlakgasi lakatanks xlilakgapaskan nCristo Jesús nkimPuchinakan. Wa xpalakata xtapaxkit nti klimakgatsankganit xlipaks, na kaj xtachuna palhma, * nchu kliʼukxilha, lakimpi naktlajay naklikgalhi nCristo» (Fili. 3:7, 8). Chuna la niti lakapastaka  palhma [o basura] nema makgankan, Pablo nikxni nitlan limakgkatsilh tuku xmakgxtakgnit kkakilhtamaku. Nialhtu xtapalh xakxilha.

13, 14. ¿La nachuna natlawayaw la Pablo?

¹³ Komo akxilhaw pi tsukumaw lakapastakaw tuku «tlan xtitlawaw» makgasa, nachuna katlawaw la Pablo. ¿La natlawayaw? Lu nalipaxuwayaw tuku kgalhiyaw. Lhuwa xtapalh akxilhaw tlan talalinaw Jehová chu xlakata nikxni makgxtakgnitaw (Heb. 6:10). Nachuna, tuku anan kkakilhtamaku nila tamalakxtumiyaw tasikulunalin xla kintakanajlakan nema kgalhiyaw uku chu nema aku namin (kalikgalhtawakga Marcos 10:28-30).

¹⁴ ¿La tlan chuntiyaku ni namakgxtakgaw Dios? Kversículos nema alistalh wilakgolh, Pablo wan tuku xmakgtaya: «Kpatsankgay wantu ntamakgaxtakga kkgan, na wa kliakgaʼaniy wa ntu ntsankgay ntlakg kalakan» (Fili. 3:13). Pablo lichuwinalh uma pulaktiy tuku lu xlakaskinka. Pulana, nialh nalakapastakaw tuku makgxtakgwi makgasa, ni kaj paxkat natlawayaw kinkilhtamakujkan chu kilitliwakgakan. Xlipulaktiy, nalilakapastakaw «wantu ntsankgay» xlakata namakglhtinanaw tuku kinkawanikanitan, la tiku kgosnamakgolh, o tatsalanamana, chu atsinu katsankgani, talakaskin tlakg nakgosnankgo.

15. ¿La kinkamakgtayayan nalilakapastakaw makgapitsi xlakskujni Dios?

¹⁵ Xlakskujnin Dios xalamakgasa chu xala uku, na kinkamakgtayakgoyan ni natalakgaspittayayaw xlakata tuku makgxtakgwi makgasa. Kalilakapastakwi Abrahán chu Sara, tiku makgxtakgkgolh lu tlan la xwilakgolh kʼUr. Biblia wan: «Lapi xlakapastaklakankgolh yama ntani ntitaxtukgolh, [...] xlikana xkgalhikgoy nkilhtamaku xtapuspitkgolh» (Heb. 11:13-15). Pero nichuna tlawakgolh. Atanu tiku nachuna tlawalh wa Moisés. Akxni xapulana taxtulh kʼEgipto lhuwa tuku makgxtakgli ni xawa tuku makgxtakgkgolh makgapitsi israelitas. Biblia ni wan pi xlakapastaka tuku xmakgxtakgnit. Wata «tlakg xlakaskinka xakxilha nalikgalhkgamanankan xpalakata Cristo nixawa tuku lu lanka xtapalh xʼanan kʼEgipto». ¿Tuku xlakata? Xlakata «xʼakxilhma talakgalhaman nema xʼama makglhtinan» (Heb. 11:26, NM).

TUKU NITLAN TITAXTUW

16. ¿Tuku nitlan nakitaxtu komo chuntiya nalakapastakaw tuku kinkaʼakgspulan makgasa?

¹⁶ Xlikana pi ni putum tuku tlawaw kkilatamatkan lipaxuwayaw akxni lakapastakaw. Max chuntiya lakapastakaw talakgalhin nema tlawaw makgasa (Sal. 51:3). Max chuntiya sitsinitaw xlakata wi tiku kinkastakyawan (Heb. 12:11). O lakpuwanaw pi nitlan tuku kinkatlawanikan chu chuntiya lakapastakmaw (Sal. 55:2). Komo chuna titaxtumaw, ¿tuku tlan natlawayaw xlakata nialh nalakapastakaw tuku kinkaʼakgspulan makgasa? Kaʼakxilhwi pulaktutu.

17. 1) ¿Tuku xlakata Pablo xwan «kit nti ntlakg xaktuju lantla xlipaks amakgapitsin ksantujlanin Dios»? 2) ¿Tuku xtlawa Pablo xlakata chuntiya kskujnanilh Dios maski xtlawanit tuku nitlan?

¹⁷ Tuku nitlan tlawaw. Pablo xwan,  «kit nti ntlakg xaktuju lantla xlipaks amakgapitsin ksantujlanin Dios» (Efe. 3:8). Chu xla wan tuku xlakata chuna xmakgkatsi: «Xampi ktitalatlawalh xkanajlanin Dios» (1 Cor. 15:9). Kalakpuwaw la max xmakgkatsi akxni xtatanokglha tala tiku pulana lu nitlan tuku xtlawaninit. Pero ni mastalh talakaskin pi tuku nitlan xtlawanit, nialh xmaxkilh talakaskin naskujnani Dios. Wata xlakapastaka lhuwa talakgalhaman nema xmakinit Dios (1 Tim. 1:12-16). Chu xlimasiya pi lu xpaxtikatsini akxni xatapaxuwan xlichuwinan Dios. Pablo nialh xlakapastaka talakgalhin nema xtlawanit. ¿Na tlan chuna natlawayaw? Komo nalakapastakaw xtalakgalhaman Jehová chu ni namastayaw talakaskin pi lu nalilipuwanaw tuku nialhla lakkaxtlawayaw, tlakg tlan naskujnaniyaw Jehová.

18. 1) ¿Tuku nakinkaʼakgspulayan akxni chuntiya nitlan limakgkatsiyaw xlakata kinkastakyawakan? 2) ¿La tlan nakgalhakgaxmataw xtastakyaw Salomón xlakata tastakyaw?

¹⁸ Akxni kinkastakyawakanan. ¿Kinkastakyawakan makgasa? Akxni chuntiyaku lakapastakaw, nikaj nakinkamakgalipuwanan wata na kinkamaxlajwaniyan (Heb. 12:5). Komo pulana makglhtinaw tastakyaw pero alistalh nitu tlawayaw xtachuna kitaxtu la ni makgamakglhtinaw, chu ni mastamaw talakaskin pi nakinkamakgtayayan. Tlakg tlan nakgaxmataw xtastakyaw Salomón: «Kachipa tastakyaw chu ni kamakgxtakgti. Kamaki, xlakata xla mi latamat» (Pro. 4:13). Chuna natlawayaw la tiku lu katsinikgo matlawanikgo putlaw, akxni akxilhkgo tuku wan letrero: kuenta tlawakgo, tlawakgo tuku anta wan chu chuntiya matlawanikgo xputlawkan (Pro. 4:26, 27; kalikgalhtawakga Hebreos 12:12, 13).

19. ¿La tlan nachuna nakanajlayaw la Habacuc chu Jeremías?

¹⁹ Tuku nitlan kinkatlawanikanan. Komo wi tuku nitlan kinkatlawanikanitan o chuna lakpuwanaw, max namakgkatsiyaw la Habacuc, tiku wanilh Jehová tuku xlakata xmastama talakaskin kaʼanalh tuku nitlan (Hab. 1:2, 3). ¿Tuku natlawayaw komo nachuna nalakpuwanaw? Lu xlakaskinka natlawayaw la Habacuc tiku wa: «Naklipaxuwa Jehová, nalipaxuwa Dios tiku kilakgmaxtu» (Hab. 3:18). Nachuna tlawalh Jeremías, akxni wa «nakkgalhkgalhinan». Lu kalipawaw pi Jehová tiku tlawa tuku xalakatitum, nalakkaxtlawa tuku nitlan (Lam. 3:19-24).

20. ¿La makgantaxtikgo kstalaninanin Cristo tastakyaw: «Kalilakapastaktit xpuskat Lot»?

²⁰ Lamaw lu xlakaskinka kilhtamaku. Tuku akxilhmaw la uku, nialh katiʼakxilhparaw chu lhuwaku tuku aku naʼakxilhaw. Lu xlakaskinka pi chuna natlawayaw la lakkaxwilitilhama xkachikin Jehová. ¿La natlawayaw? Nakgalhakgaxmataw tastakyaw xalak Biblia niku wan pi naʼakxilhaw tuku wi kilakatinkan, chu ni natalakgaspittayayaw. Komo chuna natlawayaw kgalhakgaxmatmaw xtastakyaw Jesús: «Kalilakapastaktit xpuskat Lot».

[Nota nema wi kpágina]

[Takgalhskinin]