Wantuku masiya xTachuwin Dios

¿Tuku xlakata Dios kgalhi akgtum kachikin?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku xlakata Dios lakkaxwililh pi israelitas akgtum kachikin xwankgolh?

Dios lakkaxwililh xkamanan Abrahán xlakata akgtum kachikin xwankgolh chu kamaxkilh limapakgsin. Uma kachikin nema limapakuwilh Israel, xtalakaskin xtatayakgolh xaxlikana takanajla chu xmakgantaxtikgolh xTachuwin (Salmo 147:19, 20). Xlakata uma, lhuwa latamanin xlikalanka Katiyatni tlan kakitaxtuni. (Kalikgalhtawakga Génesis 22:18.)

Dios kalaksakli israelitas xlakata xtatayananin xwankgolh. Xtalakaskin pi xkgalhakgaxmatkgolh xlimapakgsin chu akxni chuna xtlawakgo lu tlan xtawilakgo (Deuteronomio 4:6). Akxni likgalhtawakgayaw xlakata israelitas tlakg lakgapasaw xaxlikana Dios. (Kalikgalhtawakga Isaías 43:10, 12.)

2. ¿Tuku xlakata talakkaxtawilakgonit xaxlikana kstalaninanin Cristo?

Akxni israelitas akgtum kachikin xatalaksakni xwanit nialh tlan talalinkgolh Dios, Jehová wililh xlakgxokgo congregación xla kstalaninanin Cristo (Mateo 21:43; 23:37, 38). Makgasa wa israelitas xtatayananin Jehová xwankgonit, la uku wa xaxlikana kstalaninanin Cristo. (Kalikgalhtawakga Hechos 15:14, 17.)

Jesús lakkaxwililh pi kstalaninanin xlichuwinankgolh Jehová chu xkamasiyanikgolh latamanin xlikalanka Katiyatni (Mateo 10:7, 11; 24:14; 28:19, 20). La uku lakgatum Katiyatni lichuwinamaka Dios. Jehová tlawama pi lhuwa millón latamanin nema tanu tanu xcolorkan namakgtapakgsikgo kxaxlikana takanajla (Apocalipsis [Revelación] 7:9, 10). Xlakata makgtapakgsikgo kʼuma kachikin lamatliwakglha chu lamakgtaya. Putum watiya tuku kgalhtawakgakgo akxni ankgo ktamakxtumit. (Kalikgalhtawakga Hebreos 10:24, 25.)

  3. ¿La lakatsukukgolh xtatayananin Jehová xala uku?

Xtatayananin Jehová lakatsukukgolh kkata 1870. Makgapitsi tiku xkalilakgapaskan xlikgalhtawakgananin Biblia tsukulh tekgsparakgo tuku xaxlikana masiya Biblia nema makgasa nialh xlakapastakkan. Xkatsikgo pi Jesús xlakkaxwilinit congregación xlakata xlichuwinankgolh Dios. Wa xlakata tsukukgolh lichuwinankgo xlakata xTamapakgsin Dios. Kkata 1931 kawilinika tukuwani xtatayananin Jehová. (Kalikgalhtawakga Hechos 1:8; 2:1, 4, chu 5:42.)

4. ¿La talakkaxtawilakgonit xtatayananin Jehová?

Ksiglo I, congregaciones xla kstalaninanin Cristo lu litamakgtayakgolh pi lakgkgolotsin tiku xkapulalinkgo, xliʼakxilhkgo Jesús la Xakgxakga congregación (Hechos 16:4, 5). Nachuna la uku xtatayananin Jehová na liʼakxilhkgo Jesús pi wa xpulalinakan (Mateo 23:9, 10). La uku na wilakgolh Lakgkgolotsin tiku Pulalinkgo xTatayananin Jehová, umakgolh kstalaninanin Cristo lu katsinikgo limaklakaskinkgo Biblia xlakata nakamatliwakglhkgo chu nakapulalinkgo liwaka cien mil congregaciones. Akgatunu congregación wilakgolh lakgkgolotsin, tiku xatapaxuwan pulalinkgo xkachikin Dios. (Kalikgalhtawakga 1 Pedro 5:2, 3.)

Xtatayananin Jehová talakkaxtawilakgonit xlakata nalichuwinankgo xTamapakgsin Dios chu na makgalhtawakganankgo xlikalanka Katiyatni. Wa xlakata matitaxtikgo likgalhtawakga kʼatanu tachuwin, na tlawakgolh chu makgpitsikgo kliwaka akgkitsis ciento tachuwin. Chuna la apóstoles lichuwinankgo Dios kʼakgatunu chiki (Hechos 20:20). Kamasiyanikgo xlakata Biblia tiku xlikana katsiputunkgo tuku xaxlikana. Xlakata makgapaxuwaputunkgo Dios chu kamakgtayaputunkgo amakgapitsin, uma kachikin lu paxuwakgo. (Kalikgalhtawakga Salmo 33:12 chu Hechos 20:35.)

Komo tlakg katsiputuna xlakata uma, kaʼakxilhti capítulo 19 xla uma libro, ¿Tuku xlikana masiyay Biblia?, tlawakgonit xtatayananin Jehová.