¿Tukuya kilhtamaku namin guerra xla Armagedón?

«Ktiukxilhli [...] lhuwa tachixkuwitat, wa ntu ntini la xputlakgay, makgapitsin lantla xala kxlipaks ntiyat ntu anan, chu lantla ni ntipalit kilhtsukut anan, chu nti xalanin xlikatlanka nkatuxawat, chu ni ntipalit xtachuwinkan nkgalhikgoy [...] paks wa wanti mpaxuwanaliyankgonit ntlanka tapatin.» (APOCALIPSIS 7:9, 14)

TALAKKAXWILINITA niku natatlawa guerra xla Armagedón. ¿Tuku xlakata chuna wanaw?

La uku lhuwa millón latamanin tiku skujnanikgo Jehová chu limakgolh xlatamatkan chuna la wan Biblia. Xalak tanu tanu kachikinin, tanu tanu xlakatsukutkan, xtachuwinkan chu xlakata Dios kapulalima putum lapaxkikgo. Xtatayananin Jehová chuna lapaxkikgo (Juan 13:35).

Nialh makgas Satanás nakamamakxtumi tiku tatayakgo chu nakatalachipaputunkgo xkachikin Dios tiku ni taʼakglhuwikgo chu tasiya pi niti katilakgmaxtulh (Ezequiel 38:8-12; Apocalipsis [Revelación] 16:13, 14, 16). ¿Tuku xlakata chuna wanaw? Biblia liwana lichuwinan tuku nala nema nalikatsiyaw tukuya kilhtamaku nala guerra xla Armagedón, chu lhuwa kgantaxtumaja la uku.

Wantuku xlichuwinankanit kgantaxtumaja

Kstalaninanin Jesús kgalhskininankgolh la xkatsikgolh latamanin akxni xtsukulh «xaʼawatiya kilhtamaku» (Mateo 24:3, NM). Akxni lichuwinalh kilhtamaku nema aku xʼama min, Jesús wa: «Kachikinin natsukuy lalakatakikgoy, natlawakgoy guerra, chu laktlanka tiyat nalamakgasitsiy, chu natlawakgoy guerra. Xawa lhuwa lipekua nalay ntatsinkstat, chu lakaxtum natachikiy tiyat». Chu na wa: «Kajku lu wa kilhtsukumaj nawan lantla namin xlilhuwa takatsanajwat» (Mateo 24:7, 8, Hua Xasasti Talaccaxlan, TXS, 1999). Apóstol Pablo limapakuwilh uma kilhtamaku «lhuwa skalajwa [o tuwa] namin kilhtamaku» (2 Timoteo 3:1, TXS, 1999). ¿Ni xlikana pi tuku xlichuwinanit Biblia kgantaxtuma la uku?

Pero ¿tuku xlakata lu tuwa xʼama wan xaʼawatiya kilhtamaku? Apóstol Juan wa tuku  xlakata akxni wa pi «tsinu kilhtamaku nkgalhiy» xlakata Satanás chu xdemonios tlan xtlawakgolh tuku nitlan kKatiyatni. Nachuna, lichuwinalh pi Satanás «lhuwa tlanka tasitsin nkgalhiy» (Apocalipsis 12:7-12). ¿Chu ni xlikana pi latamanin lu lixkajni likatsikgo chu lu sitsikgo xlikalanka kilhtamaku?

Jesús na wa pi kʼuma xatuwa kilhtamaku xʼama tatlawa akgtum lu tlan taskujut: «Xlikatlanka nkatuxawat yuma xatlan tamakatsin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin; akxniku nchu nachin xlikgatsputni» (Mateo 24:14). Xtatayananin Jehová lichuwinamakgolh xalakwan xalaksasti tamakatsin xlakata xTamapakgsin Dios kliwaka 235 países chu kgalhikgo likgalhtawakga kliwaka akgkitsis ciento tanu tanu tachuwin. Tlawakgo revistas nema takilhtikgonit kBiblia, Makatsinina chu ¡Despertad!, chu uma nema tlakg tamakgpitsima xlikalanka Katiyatni. Na matitaxtikanit Biblia kʼakgtum ciento tachuwin. Taskujut nema tatlawa kaj xatapaxuwan tlawakan chu tumin nema maklakaskinkan na kaj xatapaxuwan maskiwinankan. Xlakata lu lhuwa lichuwinamaka Dios, ¿kgantaxtuma tuku xwanit Jesús pi xʼama la?

Biblia na lichuwinan tuku xʼama la nema nalitsuku guerra xla Jehová chu xtalamakgasitsin. Kaʼakxilhwi pulaktutu tuku lichuwinankanit pi nala nema aku nakgantaxtu.

Tuku lichuwinankanit pi nala nema nialh makgas nakgantaxtu

Xapulana tuku xwankanit pi nala. Biblia wan pi mapakgsinanin xalak kKatiyatni nawankgo uma tachuwin «ntakaksni [o tlan wilaw], nitu ntamakpuwan anan». Max nalakpuwankgo pi lakkaxtlawamakgolha taʼakglhuwit nema kgalhikgo latamanin. Pero tuku nala alistalh nalitasiya pi ni xlikana tuku wankgo (1 Tesalonicenses 5:1-3).

Xlipulaktiy tuku xwankanit pi nala. Makgapitsi mapakgsinanin namasputuputunkgo putum takanajla. Anta kBiblia katamalakxtumikan uma mapakgsinanin la xalak lipekua lapanit; chu ni xaxlikana takanajla nema anankgo xlikalanka kakilhtamaku, la chatum puskat tiku kgewi lapanit (Apocalipsis 17:3, 15-18). Akxni uma lapanit nakamalakgsputukgo putum nixaxlikana takanajla nema wankgo pi palakachuwinankgo Dios, maski ni katsikgo namakgantaxtikgo xtalakaskin Dios.

Apóstol Juan chuna lichuwinan tuku nala: «Chu nkgankaw akgalokgot ntu ukxilhnita animal [o lapanit], wa yuma naxkajnikgoy mpuskat [tiku stay xmakni], na kaxtum natlaway namalakgsputukgoy, chu na namapuxtunikgoy; na naxkaktinikgoy xliwa nawakgoy chu na klhkuyat nalhkuyukgoy. Xampi mamakgkatsinikgonit Dios kxnakukan lakimpi natlawakgo» (Apocalipsis 17:16, 17).

Xlipulaktutu tuku xwankanit pi nala. Akxni namasputu ni xaxlikana takanajla, Satanás natlawa pi mapakgsinanin na namalakgsputuputunkgo xtatayananin Jehová (Apocalipsis 7:14; Mateo 24:21).

¿Tuku natlawaya wix?

Komo nina kgalhtawakgapat Biblia, max ni katikanajla pi chuna nala. Pero wi tuku xlakata tlan kanajlayaw pi chuna nala nialh makgas. Pulaklhuwa tuku lichuwinanit Biblia kgantaxtuma la uku chu uma limasiya pi putum nakgantaxtu. *

¿Tuku tlawa pi xtatayananin Jehová nakanajlakgo pi “ntlanka xkilhtamaku Dios nti mpaks kgalhiy litliwakga” lakatsu wi chu tuku xlakata ni pekuanikgo? ¿Tuku xlakata ni limaxtuya kilhtamaku xlakata nakatsiya uma? Kakaskini kamasiyanikgon tuku wan Biblia pi kilitlawatkan xlakata Jehová na nakinkamakgtayayan (Apocalipsis 16:14). Tuku nakatsiya tlan nalakgpali la akxilha kilhtamaku nema aku namin.

[Nota nema wi kpágina]

[Tuku wan página 8]

¿Makgantaxtimakgolh tuku wan Biblia la lichuwinankgo Dios xtatayananin Jehová?