Xaxlikana xlakata Armagedón
Xaxlikana xlakata Armagedón
«Kspiritu akgskgawini [...] na nalakgankgo reyes lantla xlikatlanka nkatuxawat, [...] ntani wanikan hebreo Armagedón.» (Cursivas kilakan; APOCALIPSIS 16:14, 16)
ARMAGEDÓN, na tsokgkan Har–Magedón, xtukuwani akgtum pulataman. Pero ni anan akgtum pulataman nema chuna wanikan.
Wa xlakata, ¿tuku kilhchanima? ¿Chu tuku xlakata akxni lichuwinankan Armagedón lakpuwankan akxni wi tuku nala la akgtum guerra?
Kamastokgkan lakatum niku wanikan Armagedón
Tachuwin xahebreo Har–Magedón wamputun «Sipi xla Meguidó». Maski ni analh akgtum sipi nema chuna xwanikan, pero wi akgtum pulataman nema wanikan Meguidó. Anta wi knoroeste niku xwi xamakgan Israel niku taxtukgoyacha kgantiy tiji. Anta lakatsu lhuwa guerras tlawaka chu wa xlakata Meguidó xkamalakapastaka guerra. *
Pero tuku xlakaskinka xlakata Meguidó ni wa guerras nema anta tatlawalh, wata tuku xlakata tatlawalh guerra. Meguidó na anta xtapakgsi kTiyat nema xKawanikanit Nakamaxkikan israelitas (Éxodo 33:1; Josué 12:7, 21). Jehová kawanilh pi xʼama kalakgmaxtu kxmakan tiku xkatlawaniputun tuku nitlan chu chuna lalh (Deuteronomio 6:18, 19). Anta Meguidó, Jehová kalakgmaxtulh xmakan Jabín mapakgsina xalak Canaán chu Sísara xapuxku ksoldados (Jueces 4:14-16).
Wa xlakata, tachuwin Har–Magedón, o Armagedón, wi tuku lu xlakaskinka kilhchanima. Kilhchanima akxni akgtiy litliwakga nalatalachipa.
Tuku wan Biblia, masiya pi nialh makgas Satanás chu demonios natlawakgo pi mapakgsinanin namastokgkgo xsoldadoskan xlakata namasputuputunkgo xkachikin Dios. Kʼuma guerra lhuwa millón nanikgo chu akxni ama kilhtamaku Dios nakatlaja xtalamakgasitsin (Apocalipsis 19:11-18).
Xlakata Biblia wan pi Dios «xalakgalhamana chu tlan likatsi, ni lakapala sitsi, lhuwa kgalhi tapaxkit nema ni makgxtakgnan», ¿tuku xlakata nakamasputu lhuwa latamanin? (Nehemías 9:17.) Xlakata nakatsiyaw tuku natlawa Dios, talakaskin nakgalhtiyaw akgtutu takgalhskinin: 1) ¿Tiku namatsuki guerra? 2) ¿Tuku xlakata Jehová na namakgtanu? 3) ¿Tuku lu tlan nakitaxtuni Katiyatni chu latamanin?
1. ¿TIKU NAMATSUKI GUERRA?
Guerra xla Armagedón ni wa namatsuki Dios. Wata Dios nakalakgmaxtu tiku tlan likatsikgo akxni tiku nitlan likatsikgo nakatlawaniputunkgo tuku nitlan. Tiku namatsukikgo uma guerra wa «reyes lantla xlikatlanka nkatuxawat», uma wamputun tiku pulalinankgo. ¿Tuku xlakata natlawakgo guerra? Satanás natlawa pi mapakgsinanin chu soldados nakamakgniputunkgo tiku kakninanikgo Jehová Dios (Apocalipsis 16:13, 14; 19:17, 18).
Xlakata la uku kmakgapitsi países lu talichuwinan pi tlan nawanaw tuku lakpuwanaw, nakgalhiyaw takanajla nema nalakaskinaw, akxni wankan pi mapakgsinanin nakaputsastalanikgo o nakamasputuputunkgo akgtum takanajla ni la kanajlakan. Pero makgasa chuna lanita siglo XX, chu la uku nachuna lama. * Maski chuna lanit pulaktiy tuku ni xtachuna nala kʼArmagedón. Pulana, xtalamakgasitsin Dios xlikalanka Katiyatni natlawakgo guerra. Xlipulaktiy, Jehová nakamasputu la nikxni chuna tlawanit (Jeremías 25:32, 33). Biblia limapakuwi uma tuku nala «natalatlawanankgoy akxni ntlanka kilhtamaku xliminat Dios nti mpaks kgalhiy xlitliwakga».
2. ¿TUKU XLAKATA NA NAMAKGTANU JEHOVÁ?
Jehová skini xlakskujnin ni nakatakgalhikgo taʼakglhuwit amakgapitsin chu nakapaxkikgo xtalamakgasitsinkan (Miqueas 4:1-3; Mateo 5:43, 44; 26:52). Wa xlakata, ni katimaklakaskinkgolh limakgnin akxni nakamakgniputunkan. Komo Dios ni namakgtanu, nakamalakgsputukan chu nalitasiya pi Jehová ni paxkinan, ni xaʼakgstitum o ni kgalhi litliwakga. Chu max xtukuwani Jehová namaxkajwaniputunkan. Wa xlakata nikxni katimakgxtakgli xkachikin (Salmo 37:28, 29).
Dios niti malakgsputuputun wa xlakata makatsininama tuku natlawa (2 Pedro 3:9). Lhuwa tuku tatsokgtawilanit Biblia, kinkamalakapastakayan pi wi tuku tlawalh akxni xkatlawaniputunkan tuku nitlan xkachikin (2 Reyes 19:35). Biblia wan pi akxni Satanás chu mapakgsinanin tiku skujnanikgo, nakatlawaniputunkgo tuku nitlan xkachikin, Dios namakgtanupara chu nalimaklakaskin xlitliwakga. Biblia makgasa lichuwinanit pi nakamasputu tiku nitlan likatsikgo (Proverbios 2:21, 22; 2 Tesalonicenses 1:6-9). Akxni nachan kilhtamaku, xtalamakgasitsin nakatsikgo pi talachipamakgolh tiku kgalhi xliputum litliwakga (Ezequiel 38:21-23).
3. ¿TUKU LU TLAN NAKITAXTUNI KATIYATNI CHU LATAMANIN?
Guerra xla Armagedón nalilakgmaxtukan lhuwa millón latamanin chu alistalh naʼanan takaksni kKatiyatni (Apocalipsis 21:3, 4).
Xaʼawatiya libro xla Biblia lichuwinan pi «lhuwa tachixkuwitat» o lhuwa latamanin nalakgtaxtukgo kʼuma guerra (Apocalipsis 7:9, 14). Akxni Dios nakapulalin, tiku nalakgtaxtukgo namakgtayanankgo xlakata kKatiyatni akgtum paraíso nawan chuna la xlakaskin Jehová xapulana.
Pero ¿tukuya kilhtamaku nakamalakgsputuputunkan xkachikin Dios?
[Notas nema wilakgo kpágina]
^ párr. 6 Ni kaks lilakawanaw akxni akgtum pulataman malakapastaknan guerra. Akgtum liʼakxilhtit, kachikin Hiroshima xalak Japón, nema limasputuka akgtum bomba atómica, la uku akxni wankan Hiroshima kamalakapastakni akgtum guerra nuclear.
^ párr. 13 Akxni lhuwa kamakgnikan latamanin, la akxni mapakgsinanin masputuputunkgo makgapitsi latamanin chu takanajla. Akxni xwi unión soviética, kaputsastalanika makgapitsi takanajla xalak URSS. Kaʼakxilhti artículo «Un pueblo pacífico defiende su buen nombre» xla La Atalaya 1 xla mayo kata 2011, tlawakgonit xtatayananin Jehová.
[Dibujo xla página 6]
Makgasa Jehová kamakgtayalh xkachikin chu kamalakgsputulh xtalamakgasitsin
[Dibujo xla página 7]
Jehová nakamakgtayapara xkachikin kʼguerra xla Armagedón
