Jehová katsi lakgmaxtu xkachikin

«Katsiy [Jehová] lantla malakgtaxtikgoy [...] nti maxkikgoy nkakni.» (2 PED. 2:9)

¿TUKU XLAKATA LIWANA KATSIYAW PI CHUNA NAKGANTAXTU?

Jehová katsi tukuya kilhtamaku nakgantaxtu tuku lakapastaknit natlawa.

Jehová nalimaklakaskin xlitliwakga xlakata nalakgmaxtu xkachikin.

Jehová katsi la nakgantaxtutilha tuku tlakg xlakaskinka.

1. ¿Tuku nala akxni namin «lanka takatsanajwat»?

 AKXNI Dios namalakgsputu xkakilhtamaku Satanás, kaj lakapala natlawa (1 Tes. 5:2, 3). Akxni namin «xalanka xkilhtamaku Jehová», kakilhtamaku lu nitlan natawila (Sof. 1:14-17). Naʼanan lhuwa taʼakglhuwit chu lhuwa tuku nakinkatsankganiyan. Naʼanan talipuwan «lantla niʼukxniku alay xtachuna, asta akxni Dios timalakatsukilh katuxawat» (kalikgalhtawakga Mateo 24:21, 22).

2, 3. 1) ¿Tuku natitaxtukgo xkachikin Dios akxni namin «lanka takatsanajwat»? 2) ¿Tuku nakinkamatliwakglhan xlakata natayaniyaw taʼakglhuwit nema aku namin?

² Akxni natalakatsuwitilha «lanka takatsanajwat», «Gog xalak kxtiyat Magog» nalimaklakaskin putum tuku kgalhi xlakata nakatalachipa xkachikin Jehová. Nalimaklakaskin «lu lhuwa soldados [...] xtachuna la puklhni xlakata naʼakgtlapakgo kachikin» (Eze. 38:2, 14-16). Ama kilhtamaku ni kintikamakgtayakgon tuku lakkaxwilikgonit latamanin. Kaj Dios tlan nakinkalakgmaxtuyan. ¿Tuku natlawayaw akxni nakinkamalakgsputuputunkanan?

³ Putum xlakskujnin Jehová tlan xtlawaw uma takgalhskinin: «¿Xlikana kkanajla pi Dios nakinkalakgmaxtuyan akxni namin lanka talakgaputsit?». Kalilakapastakwi xtachuwin apóstol Pedro: «Katsiy [Jehová] lantla malakgtaxtikgoy [...] nti maxkikgoy nkakni, chu na katsiy ni napatsankgay namapatinikgoy yama nkalawaj chixkuwin akxni nkilhtamaku naputsanan» (2 Ped. 2:9). Komo lilakapastakaw la Dios kalakgmaxtulh xkachikin makgasa tlan nitu nalipekuanaw tuku aku namin. Kalichuwinaw pulaktutu liʼakxilhtit nema nakinkamakgtayayan nakanajlayaw pi Jehová kgalhi litliwakga xlakata nakalakgmaxtu xkachikin.

LAKGTAXTUKGOLH AKXNI MILH MUNKAKLAT

4. ¿Tuku xtalakaskin natlawakan akxni nina xmin Munkaklat?

⁴ Pulana kalilakapastakwi Munkaklat. Lu xlakaskinka xwanit nalakkaxwilikan tukuya kilhtamaku xʼama kgantaxtu  xtalakaskin Dios. Akxni nina xmin lanka sen, xʼama tatlawa akgtum lanka taskujut, arca chu anta xkatamaknuka animales. Jehová ni kgalhkgalhilh asta xtlawakgoka arca chu alistalh xlakkaxwilh tukuya kilhtamaku xʼama tlawa lhuwa kasenalh. Ni xʼama lakgpali kilhtamaku kaj xlakata nina xtlawakgoka arca. Anta kʼGénesis limasiya pi akxni Dios nina xlimapakgsi Noé katlawalh akgtum arca, xlakkaxwilinita tukuya kilhtamaku namin Munkaklat. ¿La likatsiyaw?

5. ¿Tuku limasiyalh tuku tatsokgnit kʼGénesis 6:3, chu tukuya kilhtamaku tatlawalh?

⁵ Biblia wan pi Jehová lakkaxwililh kʼakgapun tuku tatsokgnit kʼGénesis: 6:3: «Ni xliputum kilhtamaku nakgalhikgo kiʼespíritu latamanin, xlakata kaj liwa litatlawakgonit. Wa xlakata, kaj akgtum ciento akgpuxam kata nalatamakgo». ¿Xlichuwinama la xlilhuwa kilhtamaku xʼamakgolh latamakgo latamanin? Ni. Wata xlakkaxwilima tukuya kilhtamaku xʼama malakgsputu tuku nitlan xʼanan kKatiyatni. a Xlakata Munkaklat milh kkata 2370 akxni nina xmin Jesús, uma likatsiyaw pi Dios lakkaxwililh kilhtamaku akxni namin munkaklat kkata 2490. Akxni ama kilhtamaku Noé xkgalhiya 480 kata (Gén. 7:6). Chu titaxtulh puxam kata, kkata 2470, Noé tsukulh kgalhi xkamanan (Gén. 5: 32). Xtsankga akgtum ciento kata xlakata namin Munkaklat, chu Jehová ninajtu xwaninit Noé pi wi tuku lu xlakaskinka xʼama tlawa xlakata xlakgtaxtukgolh latamanin. ¿La xlilhuwa kilhtamaku titaxtulh xlakata xwanilh?

6. ¿Tukuya kilhtamaku wanika Noé pi xtlawalh arca?

⁶ Uma limasiya pi Noé ni tunkun katsilh tuku xʼama tlawa Dios, wata katsilh asta akxni nialh lhuwa kata xtsankga namin munkaklat. ¿Tuku xlakata chuna wanaw? Anta kʼGénesis, wan pi akxni Dios skinilh Noé katlawalh arca, xkamanan laklankata xwankgonit chu xtamakgaxtokgkgonit. Jehová wanilh: «Ktatlawaman akgtum talakkaxlan, chu militanut kʼarca wix chu minkamanan chu mimpuskat chu xlakpuskatin min kamanan» (Gén. 6:9-18). Wa xlakata akxni Noé wanikan pi xtlawalh arca xtsankga max tipuxum o tipuxamakaw kata xlakata xmilh Munkaklat.

7. 1) ¿La limasiyakgolh Noé chu xfamilia pi xkanajlakgo? 2) ¿La xlilhuwa kilhtamaku xtsankga akxni Dios wanilh Noé pi xʼama min Munkaklat?

⁷ Akxni xtlawamakgolh arca Noé chu xfamilia max xkakgalhskinkan la xʼama kgantaxtu xtalakaskin Dios chu tukuya kilhtamaku xʼama min Munkaklat. Pero maski ni xkatsikgo chuntiyaku tlawakgolh arca. Biblia wan: «Noé tsukulh tlawa chuna la xwaninit Dios. Tlawalh chuna la xwanikanit» (Gén. 6:22). Chu akxni xtsankga kaj akgtujun kilhtamaku, nema tlan xkalitamaknulh animales kʼarca, Jehová wanilh tukuya kilhtamaku xʼama min Munkaklat. Chuna putum tatlawalh «akxni Noé xkgalhi akgchaxan ciento kata, xliʼakgtiy papaʼ, xliʼakgkutujun kilhtamaku xla uma papaʼ» kilhtamaku akxni «akgapun talakkilh» (Gén. 7:1-5, 11).

8. ¿La kinkamakgtayayan tuku tatsokgnit xlakata Munkaklat nalipawanaw pi Jehová katsi tukuya kilhtamaku nakalakgmaxtu xlakskujnin?

⁸ Tuku talichuwinan xlakata Munkaklat ni kaj limasiya pi Jehová xMalana Kilhtamaku, na limasiya pi Lakgmaxtuna. Tlakg talakatsuwinit lisputni, chu liwana katsiyaw pi putum tuku lakkaxwilinit nakgantaxtu, watiya «nkilhtamaku nchuna nalay, chu xatu hora» la lakkaxwilinit (Mat. 24:36; kalikgalhtawakga Habacuc 2:3).

KALAKGMAXTUKA KXASPININI PUPUNU

9, 10. ¿La limaklakaskilh Jehová xkachikin xlakata tlan xlimasputulh soldados xalak Egipto?

⁹ La uku akxilhnitawa pi Jehová liwana lakkaxwili tukuya kilhtamaku namakgantaxti tuku lakapastaknit natlawa. Xliʼakgtiy liʼakxilhtit nakinkamasiyaniyan tuku xlakata tlan nakanajlayaw pi Dios nalakgmaxtu xkachikin: nalimaklakaskin xlitliwakga xlakata xlikana namakgantaxti xtalakaskin. Jehová tlan kalakgmaxtu xlakskujni, chu asta min kilhtamaku kalimaklakaskin xlakata nakaliʼakgchipa xtalamakgasitsin. Chuna lalh akxni  kalakgmaxtulh israelitas tiku kaj lakskujnin xlitaxtukgo kʼEgipto.

¹⁰ Max akgtutu millón israelitas taxtukgolh kʼEgipto. Jehová wanilh Moisés pi xkalilh niku Faraón xlakpuwa pi xtsankgakgonit chu ni xkatsikgo niku xʼamakgolh (kalikgalhtawakga Éxodo 14:1-4). Faraón ni tayanilh, kanajlalh pi xʼakgtsankgakgonit tiku xlakskujnin xwankgonit, xkaʼakgchipaputun xkilhtun xaSpinini pupunu niku xtasiya pi nila niku tlan xtsalakgolh (Éxo. 14:5-10). Pero ni kalipekua xwilakgolh. ¿Tuku xlakata? Xlakata Dios xʼama makgtaya xkachikin.

11, 12. 1) ¿La kamakgtayalh Jehová xkachikin? 2) ¿Tuku lalh xlakata Dios makgtayalh xkachikin chu tuku kinkamasiyaniyan Jehová xlakata tuku tlawalh?

¹¹ «Akgtum lanka puklhni» nema xkapulalima israelitas, ama kilhtamaku tawilalh kxchakgenkan, chuna xsoldados Faraón nila katalachipakgolh israelitas chu kapukswa tawilakgolh. Pero niku xwilakgolh israelitas xkaxkgakganan (kalikgalhtawakga Éxodo 14:19, 20). Alistalh, Jehová limaklakaskin akgtum lu tliwakga un xlakata namapitsi pupunu chu uma tlawalh pi «xtampun pupunu skakli». Max tsinu tamakgapalilh, xlakata Biblia wan: «Alistalh xkamanan Israel tlan tlawankgolh kxlakʼitat pupunu niku kaskakni xwanit». Ksoldados Faraón chu xputlaw nema xlitlawa guerra tlakg lakapala xtlawankgo nixawa israelitas. Pero nila kamataxtukkgolh xlakata Jehová xkamakgtayama. Asta «tlawalh pi egipcios nialh xkatsikgo tuku natlawakgo. Chu kamaktinilh tuku xlitlawankgo xputlawkan, wa xlakata nila xmatlawanikgo xputlawkan» (Éxo. 14:21-25).

¹² Akxni israelitas xwilakgolh kxakilhtutu pupunu, Moisés mapakgsika: «Kalimakapi milixtokgo kxkgalhni pupunu, xlakata chuchut nakaʼaktamayacha egipcios chu xputlawkan nema litlawakgo guerra chu xsoldados». Maski xtsalaniputunkgo chuchut nema xʼama kaʼaktama, «Jehová kamamokgosli egipcios, kamalakgachakgolh kxitat kpupunu». Nila tsalakgolh: «Nipara chatum lakgtaxtulh» (Éxo. 14:26-28). Chuna, Dios limasiyalh pi kgalhi litliwakga xlakata nakalakgmaxtu xkachikin akxni wi tuku nitlan katlawaniputunkan.

LAKGTAXTUKGOLH AKXNI MALAKGSPUTUKA JERUSALÉN

13. ¿Tuku kawanilh Jesús kstalaninanin chu tuku max xkatsiputunkgo?

¹³ Jehová liwana katsi la nakgantaxtutilha tuku lakapastaknit natlawa. Uma lu xlakaskinka chuna la limasiya xliʼakgtutu liʼakxilhtit nema nalichuwinanaw: akxni makgstiliwilika Jerusalén kxapulana siglo. Jehová limaklakaskilh xKgawasa xlakata xkawanilh tuku natlawakgo kstalaninanin xalak Jerusalén chu Judea, xlakata tlan xlakgtaxtukgolh akxni xmalakgsputuka Jerusalén kkata 70. Jesús wa: «Akxni xukxilhtit lixkajnit malakgsputuna; wa yuma ntu ntilichuwinalh xpalakachuwina Dios Daniel mpi anta natayay lakatum ntani lu[...] xasantujlani ktemplo. [...] Pus wa nchu nti wilakgolh nawan kxatiyat Judea, katsalakgolh, kalaksipijni nkaʼankgolh» (Mat. 24:15, 16). ¿Pero la xkatsikgolh kstalaninanin Cristo pi xkgantaxtuma tuku xwankanit pi nala?

14. ¿La liwana takatsilh tuku xwamputun Jesús xlakata tuku tsukulh la kJerusalén?

¹⁴ Tuku xkgantaxtutilhama litakatsilh tuku xwamputun Jesús. Kkata 66, soldados xalak Roma nema xkapulalima Cestio Galo chankgolh kJerusalén xlakata xkamakaksakgolh judíos tiku nialh xtapakgsiniputunkgo romanos. Tiku nialh xtapakgsiniputunkgo romanos, xkawanikan celotes, kitatsekgkgolh kxpulakni  xpatsaps templo, chu romanos xmalakaniputunkgo patsaps. Kstalaninanin Cristo tiku skgalalh xwilakgolh katsikgolh pi wi tuku xkilhchanima uma tuku xlama: «Lixkajnit malakgsputuna» (soldados xalak Roma tiku xliminkgo xʼídolos) chankgolh «ntani lu[...] xasantujlani» (templo xalak Jerusalén). Xchanit kilhtamaku xlakata kstalaninanin Cristo «katsalakgolh, kalaksipijni». Pero xlakata Jerusalén xmakgstiliwilikanit, ¿la xʼamakgolh taxtukgo? Kaj lakapala wi tuku xʼama la.

15, 16. 1) ¿Tuku kalimapakgsilh Jesús kstalaninanin, chu tuku xlakata xtalakaskin pi xmakgantaxtikgolh? 2) ¿Tuku kilitlawatkan xlakata nalakgtaxtuyaw?

¹⁵ Ni takatsi tuku xlakata, Cestio Galo chu xsoldados ankgolh chu celotes kaputsastalanikgolh. Akxni tiku xlatalachipamakgolh taxtukgolh kJerusalén, kstalaninanin Cristo tsalataxtukgolh. Jesús liwana xkawaninit pi xmakgxtakgkgolh putum tuku xkgalhikgolh chu lakapala xtsalakgolh (kalikgalhtawakga Mateo 24:17, 18). ¿Tuku xlakata xtalakaskin lakapala xtsalakgolh? Xlakata kaj nilhuwa kilhtamaku titaxtulh celotes taspitparakgolh chu fuerza tlawakgolh pi tiku xalak Jerusalén chu Judea na xkatatayakgolh. Chu xlakata pulaklhuwa xkgalhiputunkgo limapakgsin uma tlawalh pi xʼanalh lhuwa taʼakglhuwit kJerusalén. Tiku tamakgaxtakgkgolh nialh la lakapala xtaxtukgo chu asta akxni chimparakgolh romanos kata 70 nialhti tlan taxtulh (Luc. 19:43). Tiku tamakgapalakgolh ni la taxtukgolh. Pero kstalaninanin Cristo tiku xkgalhakgaxmatkgonit chu xtsalakgonit kkasipijni, lakgtaxtukgolh. Akxilhkgolh pi Jehová tlan kalakgmaxtu xlakskujnin. ¿Tuku kinkamasiyaniyan uma?

¹⁶ Akxni namin lanka takatsanajwat, nakgataxtutilha tuku lichuwinanit Biblia pi nala, kstalaninanin Cristo kilikgalhakgaxmatatkan nawan tuku Dios kinkawaninitan kxTachuwin chu xkachikin. Tlan nawanaw pi kilikgalhakgaxmatatkan xtastakyaw Jesús: “Katsalatit, kalaksipijni”. Maski na watiya tuku natlawayaw, nina katsiyaw la natsalayaw. b Pero liwana katsiyaw pi Jehová nakinkawaniyan tuku kilitlawatkan akxni nachan kilhtamaku. Xlakata nalakgtaxtuyaw talakaskin nakgalhakgaxmataw, kilitlawatkan uma takgalhskinin: «¿La kakxilha limapakgsin nema Jehová kamaxki xlakskujnin? ¿Tunkun kkgalhakgaxmata o ni tunkun ktlawaputun?» (Sant. 3:17).

DIOS KINKAMATLIWAKGLHAN XLAKATA TUKU AKU NAMIN

17. ¿Tuku lichuwinalh Habacuc xlakata akxni Gog nakamasputuputun xkachikin Dios?

¹⁷ Kalichuwinamparaw akxni Gog natlawa guerra, nema pulana lichuwinaw. Pulaktu tuku na lichuwinalh palakachuwina Habacuc wa uma: «Kkgaxmatli, chu kimpan tsukulh talakgwilha; akxni kkagaxmatli kinkilhpin tsukulh lhpipi; nialh tliwakga wankgolh kilukut; chu tuku xaktitaxtuma klilakgaputsalh, chu nitu kwa kkgalhkgalhilh akxni namin tuku lu nitlan, akxni [Jehová namin xlakata nakatalachipa kachikin] [uma wamputun tiku talachipanamakgolh], xlakata nakatalachipa» (Hab. 3:16). Chuna, akxni palakachuwina katsilh tuku xʼama la akxni xkatalachipaka xkachikin Dios, asta pakatsalh, tsukulh kilhpipi, chu xlajwanalh. Tuku makgkatsilh Habacuc liʼakgatekgsaw o makgachakgxiya pi lu tuwa tuku natitaxtuyaw akxni Gog nakinkamalakgsputuputunan. Pero chuna la palakachuwina nalipawanaw Jehová, pi akxni namin xalanka xkilhtamaku xla nalakgmaxtu xkachikin (Hab. 3:18, 19).

18. 1) ¿Tuku xlakata ni kilipekuanitkan lisputni nema talakatsuwima? 2) ¿Tuku naʼakxilhaw kʼatanu artículo?

¹⁸ Uma akgtutu liʼakxilhtit nema lichuwinaw liwana limasiya pi Jehová katsi la nakalakgmaxtu xkachikin. Tuku lakapastaknit natlawa xlikana nakgantaxtu, natlajanan. Pero komo na makgtaxtuputunaw akxni natlajanan Dios, talakaskin ni namakgatsankgananiyaw asta akxni namin lisputni. Pero ¿la kinkamakgtayayan Jehová la uku xlakata ni namakgxtakgaw? Wa uma tuku nalichuwinanaw kʼartículo nema aku mima.

[Notas nema wilakgo kpágina]

[Takgalhskinin]