Jehová kinkakuentajtlawayan xlakata nalakgtaxtuyaw
Jehová kinkakuentajtlawayan xlakata nalakgtaxtuyaw
«Litamakinitaw xlitliwakga Dios xpalakata kintakanajlakan nalilakgchanaw akgaputaxtut wa ntu ntakaxwilinit natasiyuy akxni nachin yuma awatiya kilhtamaku.» (1 PED. 1:4, 5)
¿LA XKGALHTINAW?
¿La tlawalh Jehová xlakata natanuyaw kxaxlikana takanajla?
¿La mastayaw talakaskin nakinkalipulalinan xtastakyaw Jehová?
¿La kinkamatliwakglhan Jehová?
1, 2. 1) ¿Tuku likatsiyaw pi Jehová nakinkamakgtayayan xlakata ni namakgxtakgaw? 2) ¿La xlilhuwa kinkalakgapasan Jehová?
«WAMPI wa nti ntliwakglh natawilay kxtakanajlani asta kxlikgatsputni, wa yuma naʼakgaputaxtuy.» (Mat. 24:13.) Jesús limasiyalh pi xlakata tlan nalakgtaxtuyaw akxni xTlat namasputu xkakilhtamaku Satanás talakaskin ni namakgxtakgaw asta akxni namin lisputni. Pero ni wamputun pi Jehová lakaskin natayaniyaw kaj xlakata kilitliwakgakan chu kiliskgalalakan. Biblia wan: «Dios ni makgxtakgnan, chu ni katimastalh talakaskin tlakg nakamatlawiputunkanatit tuku nila natayaniyatit, wata akxni nachin tuku nitlan na nakamakgtayayan xlakata tlan natayaniyatit» (1 Cor. 10:13, NM). ¿Tuku wamputun uma tachuwin?
2 Jehová liwana kinkalakgapasan, katsi tukuya taʼakglhuwit titaxtuyaw, la likatsiyaw chu la xlilhuwa tayaniyaw, wa xlakata katsi pi akxni masta talakaskin wi tuku natitaxtuyaw, tlan natayaniyaw. Pero ¿xlikana kinkalakgapasan? Lu kinkalakgapasan. Biblia masiya pi liwana kinkalakgapasan kinchatunukan. Putum katsi la linaw kilatamatkan chu tuku lismaninitaw. Chu asta katsi tuku lakpuwanaw chu tuku tlawaputunaw (kalikgalhtawakga Salmo 139:1-6).
3, 4. 1) ¿La limasiya tuku titaxtulh David pi Jehová kinkaʼakxilhman chatunu chatunu? 2) ¿Tuku lu xlakaskinka taskujut tlawama Jehová la uku?
3 ¿Ni xlikana pi kaks lilakawanaw akxni akxilhaw pi Dios lu kalakgkatsan latamanin nema kaj nitu litaxtukgo? Na chuna kgalhskininalh David chu wanilh Jehová: «Akxni akit kakxilha ama akgapun y lata tu katlawanita, papaʼ y lhuwa staku nima ana kawilinita, akit kwan: “Dios, ¿tuku kilakgxtukan akin lakchixkuwin xlakata wix nakilalipuwanaj?”» (Sal. 8:3, 4). Max akxni tlawalh uma takgalhskinin, xlilakapastakma tuku xla titaxtulh. Maski xaʼawatiya xkgawasa Jesé xwanit, Jehová xliʼakxilha «chatum chixku nema xmakgapaxuwa xnaku» chu xlilaksaknit xlakata «nialh kstalanilh xborregos» chu «xpulalilh [x]kachikin Israel» (1 Sam. 13:14; 2 Sam. 7:8). ¡La max makgkatsilh David akxni akxilhli pi xMalakatsukina kakilhtamaku xakxilha tuku xlilakapastaka chatum aktsu xkuentajtlawana borregos!
4 Nachuna kaks lilakawanaw akxni katsiyaw pi Jehová lu kinkakuentajtlawayan. Xla limaklakaskin xaxlikana takanajla xlakata nakamamakgstokga tiku kaliʼakxilha «putum tuku tlakg xatlan anan kputum kkachikinin» chu kamakgtaya xlakata chuntiya naskujnanikgo (Ageo 2:7). Xlakata nakatsiyaw la Jehová kinkamakgtayayan ni namakgxtakgaw, kaʼakxilhwi la tlawa xlakata latamanin namakgtanukgo kxaxlikana takanajla.
DIOS TLAWALH KATALAKATSUWINIW XKGAWASA
5. ¿La tlawa Jehová xlakata latamanin natalakatsuwinikgo xKgawasa? Kalichuwinanti akgtum liʼakxilhtit.
5 Jesús wa: «Tini la nkilakgmin, lapi ni wa xaTlat nti nkimalakgachalh, ni xkiliminilh» (Juan 6:44). Uma limasiya pi xlakata tlan kstalaninanin Cristo nawanaw talakaskin pi Dios nakinkamakgtayayan. Pero ¿la tlawa Jehová xlakata natalakatsuwinikgo xKgawasa tiku xamansos xtachuna borregos? Akxni anaw lichuwinanaw Dios chu akxni limaklakaskin xʼespíritu santo. Akgtum liʼakxilhtit, akxni Pablo chu tiku xkataʼankgo titaxtukgolh kFilipos, tatanokglhkgolh chatum puskat tiku xwanikan Lidia chu litachuwinankgolh xalakwan xalaksasti. Biblia wan: «Wa xnaku malakkinilh [Dios], lakimpi nakanajlaniy wa ntu xwan mPablo». Chuna la akxilhaw, Dios maxkilh xʼespíritu xlakata naʼakgatekgsa o namakgachakgxi tuku xwanimaka, chu wa xlakata tamunulh chu na tamunukgolh xfamilia (Hech. 16:13-15).
6. ¿Tuku tlawalh Dios xlakata namakgtanuyaw kxaxlikana takanajla?
6 ¿Pi kajwatiya Lidia chuna akgspulalh? Ni. Komo tamakamastaninitawa Jehová, xla tlawanit natanuyaw kxaxlikana takanajla chuna la Lidia. Chuna la kinTlatkan xalak akgapun akxilhli tlan tayat nema xkgalhi Lidia, na akxilhnit tlan tayat nema kgalhiyaw. Akxni tsukuw kgaxmataw xalakwan xalaksasti Jehová kinkalimakgtayan xʼespíritu santo xlakata naʼakgatekgsaw (1 Cor. 2:11, 12). Chuna la xlilatamayaw tuku xkatsinitilhamaw chu xtlawayaw xtalakaskin, akxilhwi la xkinkasikulunatlawayan. Akxni makamastaniw kilatamatkan lu lipaxuwalh. Akxni tsuku skujniyaw asta la uku putum kilhtamaku lu kinkamakgtayaman kinchatunukan.
7. ¿La likatsiyaw pi Jehová nakinkamakgtayayan xlakata nikxni namakgxtakgaw?
7 Akxni Jehová kinkamakgtayayan natsukuyaw skujnaniyaw ni kinkamakgxtakgan. Katsi pi chuna la ni kiakstukan tanuw kxaxlikana takanajla, na nila kiakstukan natawilayaw kxaxlikana takanajla. Apóstol Pedro kawanilh kstalaninanin Cristo tiku xkalaksakkanit: «Litamakinitaw xlitliwakga Dios xpalakata kintakanajlakan nalilakgchanaw akgaputaxtut wa ntu ntakaxwilinit natasiyuy akxni nachin yuma awatiya kilhtamaku» (1 Ped. 1:4, 5). Uma na kawanikan putum kstalaninanin Cristo, chu putum akinin kilikuentajtlawatkan. ¿Tuku xlakata? Xlakata putum akinin lakaskinaw xtamakgtay Dios xlakata nikxni namakgxtakgaw.
DIOS KINKAMAKGTAYAYAN XLAKATA NI NATLAWAYAW TUKU NITLAN
8. ¿Tuku xlakata kilikuentajtlawatkan xlakata ni tlawayaw tuku nitlan?
8 Xlakata kgalhiyaw lhuwa taʼakglhuwit chu talakgalhin max uma natlawa pi nialh kuenta natlawayaw kintakanajlakan. Uma max nakinkamatlawiyan tuku nitlan maski nichuna tlawaputunaw (kalikgalhtawakga Gálatas 6:1). Kaʼakxilhwi la Jehová kinkamakgtayayan xlakata tuku titaxtulh David.
9, 10. ¿Tuku tlawalh Jehová xlakata David ni xtlawalh tuku nitlan chu la kinkamakgtayayan la uku?
9 Akxni mapakgsina Saúl xputsastalanima David, xla machokgolh xtasitsi chu ni malakgaxokgolh uma nitlan mapakgsina (1 Sam. 24:2-7). Pero ni lhuwa kilhtamaku titaxtulh, atsinu xtlawa tuku nitlan. Xlakata ksoldados chu xla lhuwa xmaklakaskinkgo liwat, skinikgolh chatum israelita tiku xwanikan Nabal. Akxni Nabal lixkajni tuku kawanilh, David lu sitsilh chu xʼama kamakgni putum tiku xwilakgolh xchik Nabal. Nipara lakapastakli pi komo chuna xtlawalh, Dios makgnina xʼama liʼakxilha. Kaj xlakata Abigail xpuskat Nabal makgtanulh, David ni tlawalh uma tuku nitlan. Katsilh pi Dios xmalakgachanit wa xlakata wanilh: «¡Katasikulunatlawalh Jehová xDios Israel, tiku malakgachan natana kimpaxtokga! Chu lu tlan pi liwana lakapastakti, chu lu tlan pi tlawa ni nakmakgninan chu kimakan nakilakgmaxtu» (1 Sam. 25:9-13, 21, 22, 32, 33).
10 ¿Tuku kinkamasiyaniyan uma? Jehová limaklakaskilh Abigail xlakata David ni xtlawalh tuku nitlan. Chu la uku chuntiyaku limaklakaskin latamanin xlakata nakinkamakgtayakgoyan. Pero ni kililakpuwanatkan pi putum kilhtamaku akxni wi tuku nitlan tlawaputunaw wi tiku namalakgacha xlakata ni natlawayaw. Na ni nalakpuwanaw pi katsiyaw tuku natlawa akxni wi tuku titaxtuyaw o tuku namasta talakaskin o ni masta talakaskin xlakata nakgantaxtu xtalakaskin (Ecl. 11:5). Pero liwana katsiyaw pi Jehová katsi tuku titaxtuyaw chu kinkamakgtayayan xlakata nikxni namakgxtakgaw. Xla kinkawaniyan: «Nakmamakgachakgxiniyan laktlan talakapastakni, y nakmasiniyan tijia latani natlawana; kanikxniwa nakwaniyan tu militlawat nawan» (Sal. 32:8). Pero ¿la kinkastakyawayan Jehová? ¿La tlan nalitamakgtayayaw uma? ¿Chu tuku xlakata katsiyaw pi Jehová pulalin xkachikin la uku? Kaʼakxilhwi takgalhtin nema masta libro xla Apocalipsis.
DIOS KINKALIMAKGTAYAYAN XTASTAKYAW
11. ¿La xlilhuwa katsi Jehová tuku lama kʼakgatunu congregación?
11 Uma tuku maʼakxilhnika Juan nema talichuwinan kcapítulo 2 chu 3 xla Apocalipsis, Jesucristo tiku xmalankikanita kalakputsanani akgtujun congregaciones xalak Asia Menor. Uma tuku talichuwinan limasiya pi Cristo ni kaj tsinu akxilhma tuku lama, liwana akxilha tuku titaxtumakgolh congregaciones. Chu min kilhtamaku asta lichuwinan makgapitsi latamanin chu komo talakaskin kamatliwakglha o kastakyawa. ¿Tuku kinkamasiyaniyan uma? Uma kgantaxtulh kkata 1914. Akgtujun congregaciones nema talichuwinan kilhchanima tiku kalaksakkanit naʼankgo kʼakgapun chu tastakyaw na litamakgtayakgo putum congregaciones nema wilakgolh xlikalanka Katiyatni. Wa xlakata tlan kanajlayaw pi Jehová limaklakaskima xKgawasa xlakata napulalin xkachikin. ¿Tuku kilitlawatkan xlakata namastayaw talakaskin nakinkapulalinan?
12. ¿La mastayaw talakaskin pi Jehová nakinkapulalinan?
12 Pulaktum la namastayaw talakaskin nakinkapulalinan Jehová, wa nalikgalhtawakgayaw Biblia. Dios kinkalimaxkiyan lhuwa tastakyaw, klikgalhtawakga nema tlawakgo skujni xalipaw chu xaskgalala (Mat. 24:45). Komo liwana litamakgtayaputunaw, talakaskin nalimaxtuyaw kilhtamaku xlakata nalikgalhtawakgayaw chu nalilatamayaw. Akxni kiakstukan kgalhtawakgayaw, wa tuku Jehová limaklakaskin xlakata nalikuentajtlawa xlakskujnin chu «ni naʼakchakgx[kgo]» (Jud. 24). ¿Minit kilhtamaku akxni wi tuku likgalhtawakga chu makgkatsi pi wix tsokgnikanti? Komo chuna kaʼakxilhti pi wa Jehová stakyawaman. Xtachuna la akxni chatum amigo wi tuku nawaniyan xlakata skgalalh natawilaya. Nachuna, Jehová tlan nalimaklakaskin xʼespíritu xlakata nakinkamaʼakxilhan chu nakamaʼakxilha amakgapitsin pi talakaskin nalakgpaliyaw kintayatkan chu la likatsiyaw. Komo mastayaw talakaskin nakinkapulalinan xʼespíritu, namastayaw talakaskin pi Jehová nakinkapulalinan kkilatamatkan (kalikgalhtawakga Salmo 139:23, 24). Wa xlakata, kaʼakxilhwi la lakkaxwilinitaw nakgalhtawakgayaw.
13. ¿Tuku xlakata talakaskin naʼakxilhaw la lakkaxwilinitaw nakgalhtawakgayaw?
13 Komo kkilatamatkan lhuwa lakgastananaw, ni nakinkaʼakchaniyan kilhtamaku xlakata nakgalhtawakgayaw. Chatum tala wa: «Tlan lakapala atanu tuku natlawayaw chu nialh nakgalhtawakgayaw. La uku lhuwa tuku tlan lilakgastananaw chu ni tapalaxla. Tlan akxilhaw ktelevisión, computadora chu kteléfono. Kaniwa niku tlan nalakgastananaw». Komo ni kuenta tlawayaw, tsinu tsinu nialh nakgalhtawakgayaw chu alistalh nipara tsinu nakgalhtawakgayaw (Efe. 5:15-17). Tlan natlawayaw uma takgalhskinin: «¿Klimaxtu kilhtamaku xlakata tlakg liwana naklikgalhtawakga xTachuwin Dios? ¿O kaj kkgalhtawakga akxni wi tuku kilakgchan ktamakxtumit?». Komo chuna tlawamaw, max natalakaskin tlakg liwana namaklakaskinaw kilhtamaku akxni kakninaniyaw Dios kfamilia, o akxni kiakstukan kgalhtawakgayaw xlakata nalitamakgtayayaw putum liskgalala nema Jehová kinkamaxkiyan xlakata tlan nalilakgtaxtuyaw (Pro. 2:1-5).
DIOS KINKAMATLIWAKGLHAN
14. ¿La limasiya Biblia pi Jehová akxilha tuku makgkatsiyaw?
14 David lhuwa taʼakglhuwit titaxtulh (1 Sam. 30:3-6). Tachuwin nema tsokgli David limasiya pi Jehová xkatsi la xmakgkatsi (kalikgalhtawakga Salmo 34:18 chu 56:8). Chu nachuna katsi la makgkatsiyaw. Akxni wi tuku lu lilakgaputsayaw chu «talakgaputsaxnima[...] [ki]nakujkan» o «talilakgaputsa» wilaw, Jehová tawila kkimpaxtunkan. Uma lu tlan limakgkatsiyaw, chuna la David akxni kilhtlilh: «Kpaxawa porque snun kilakgalhamanita. Porque wix kilakatani la xakakxtakgajnamaj, y la ixlakgaputsama kinakuj» (Sal. 31:7). Dios ni kaj katsi pi kgalhiyaw taʼakglhuwit, wata na kinkamatliwakglhan chu tlan kinkamamakgkatsiniyan. Chu pulaktum tuku limaklakaskin wa tamakxtumit.
15. ¿Tuku kinkamasiyaniyan tuku titaxtulh Asaf?
15 Tuku titaxtulh Asaf limasiya pi lu tlan kitaxtu akxni anaw ktamakxtumit. Uma sacerdote lhuwa tuku nitlan xʼakxilhnit chu lakpuwa pi kakninanikan Jehová nitu litaxtu chu xlajwanalh xtakanajla. Asaf wa tuku xmakgkatsi: «Kinaku xakmakgkatsi lambara ixkilhtukunimakaj». Wa xlakata atsinu ni xmakgxtakga Jehová. Pero ¿tuku makgtayalh liwana nalakapastakpara? Xla wa: «Akxni ktanulh xtemplo Dios». Akxni akxtum xkatawi xnatalan liwana tsukulh lakapastaknan. Katsilh pi maski tiku nitlan xlikatsikgo tlan xwilakgolh ni lhuwa kilhtamaku chuna xʼamakgolh tawilakgo chu Jehová putum xʼama lakkaxwili (Sal. 73:2, 13-22). La uku nachuna wilaw. Max nitlan limakgkatsiyaw xlakata titaxtuyaw tuku nitlan, kkakilhtamaku nema mapakgsi Satanás. Pero akxni katatamakxtumiyaw kinatalankan tlan makgkatsiyaw chu xatapaxuwan skujnaniyaw Jehová.
16. ¿La kinkamakgtayayan tuku titaxtulh Ana?
16 Pero ¿komo wi tuku titaxtuw kcongregación nema tlawa pi nila naʼanaw ktamakxtumit? Max limaxananaw xlakata makgxtakgwi tuku xlakgayaw kcongregación. O max takgalhiw taʼakglhuwit chatum tala. Komo chuna titaxtumaw nakinkamakgtayayan tuku tlawalh Ana (kalikgalhtawakga 1 Samuel 1:4-8). Kalilakapastakwi pi lu xlilakgaputsa taʼakglhuwit nema xtakgalhi Peniná, tiku na xpuskat xchixku xwanit. Chu tlakg nitlan xmakgkatsi akxni putum familia xʼankgo akgatunu kata kSiló xlakata xmaxkikgolh tamakamastan Jehová. Ana lu nitlan xlimakgkatsi, «xtasa chu ni xwayan». Pero maski chuna xtitaxtuma chuntiya lu lanka xtapalh xakxilha nakakninani Jehová, Dios akxilhli pi ni xmakgxtakga chu sikulunatlawalh (1 Sam. 1:11, 20).
17, 18. 1) ¿La kinkamatliwakglhan tamakxtumit kcongregación? 2) ¿La makgkatsiya akxni lilakapastaka la Jehová kinkakuentajtlawayan xlakata nalakgtaxtuyaw?
17 Akinin kstalaninanin Cristo tlan natlawayaw la Ana. Talakaskin putum kilhtamaku naʼanaw ktamakxtumit xlakata katsiyaw pi anta makglhtinanaw litliwakga nema maklakaskinaw (Heb. 10:24, 25). Xlakata kinkapaxkikgoyan chu tlan katalalinaw natalan lu tlan limakgkatsiyaw. Max wi tuku wankan ktaʼakgchuwin o akgtum comentario nema tlan nakinkamakgtayayan. Max chatum tala nakinkakgaxmatniyan o wi tuku nakinkawaniyan nema nakinkamatliwakglhan akxni nina tsuku tamakxtumit o akxni kgalhsputnita (Pro. 15:23; 17:17). Na max tlan nalimakgkatsiyaw akxni akxtum nakilhtliniyaw Jehová. Chu akxni “snun akgatuyuyaw kintapuwankan”, tlakg lakaskinaw wi tuku nakinkamatliwakglhan chu tekgsaw tamakgtay ktamakxtumit. Anta ktamakxtumit Jehová «maxki tapaxawan kilistakni[kan]» chu kinkamatliwakglhan xlakata ni namakgxtakgaw (Sal. 94:18, 19).
18 Xlakata katsiyaw pi xatapaxuwan kinkakuentajtlawayan na makgkatsiyaw la Asaf tiku kilhtlinilh: «Wix kimpakgachipa nak kimpakgkanaj. Kun mintakgastakyaw kimaxkitilhaya tlan talakapastakni» (Sal. 73:23, 24). ¡Lu paxtikatsiniyaw pi Jehová kinkakuentajtlawayan xlakata nalakgtaxtuyaw!
[Takgalhskinin]
[Dibujo xla página 29]
Jehová tlawanit pi natanuya kxaxlikana takanajla
[Dibujo xla página 30]
Xtastakyaw Dios kaj kilitlankan
[Dibujo xla página 31]
Akxni wi tiku kinkamatliwakglhan kinkamakgtayayan
