XaKgawasa kinkamasiyaniputunan la likatsi xaTlat
XaKgawasa kinkamasiyaniputunan la likatsi xaTlat
«Niti lu wa katsi lantla xla xtalakapastakni Dios, kaj xman nkit kakatsi [...] chu kaj xman wa tlan nalakgapasa wati kit nakmalakgapasniputun.» (LUC. 10:22; HUA XASASTI TALACCAXLAN, 1999)
¿LA XKGALHTINANTI?
¿Tuku xlakata Jesús tlakg tlan xmasiyalh la likatsi xTlat?
¿La masiyalh Jesús la likatsi xTlat?
¿La tlan natlawayaw chuna la Jesús akxni namasiyayaw la likatsi xaTlat?
1, 2. ¿Tukuya takgalhskinin tlawakgo lhuwa latamanin chu tuku xlakata?
¿TIKU Dios? Lhuwa tiku katsiputunkgo xtakgalhtin uma takgalhskinin. Akgtum liʼakxilhtit, maski lhuwa tiku wankgo pi kstalaninanin Cristo, kanajlakgo pi Dios akgtum Trinidad, chu lhuwa wankgo pi uma tamasiy nila takgatekgsa o tamakgachakgxi. Chatum tiku pulalin takanajla tsokgli pi tamasiy xla Trinidad nila liwana maʼakgatekgsninankan xlakata latamanin wi tuku nila akgatekgskgo. Nachuna, atsinu ni putum tiku kanajlanikgo evolución ni kanajlakgo pi Dios lama. Wankgo pi putum tuku lu stlan tatlawanit kaj xalan tawilakgolh. Pero Charles Darwin ni wa pi ni lama Dios wata wa: «Klakpuwan pi tuku lu xlikana wa pi latamanin nila liwana akgatekgskgo xlakata Dios».
2 Maski katuwa tuku kanajlakgo, min kilhtamaku latamanin akstu kakgalhskinkan komo lama Dios. Pero lhuwa nialh putsakgo xlakata ni tekgskgo akgtum tlan takgalhtin. Xlikana, Satanás «malakgatsikgonit xtapuwankan wanti ni kanajlakgoy» (2 Cor. 4:4). Wa xlakata nitu katsikgo chu ni liwana katsikgo xlakata xaTlat, xMalakatsukina kakilhtamaku (Isa. 45:18).
3. 1) ¿Tiku kinkamasiyaninitan la likatsi Malakatsukina? 2) ¿Tukuya takgalhskinin namastayaw xtakgalhtin?
3 Lu xlakaskinka pi latamanin nakatsikgo tuku xaxlikana xlakata Dios. ¿Tuku xlakata? Xlakata kajwatiya nalakgtaxtukgo «wanti xmapakuwilh xtukuwini [Jehová]» (Rom. 10:13). Xlakata tlan namapakuwiyaw uma tukuwani talakaskin lhuwa tuku nakatsiyaw xlakata la likatsi Jehová, chuna la kamasiyanilh Jesucristo kstalaninanin, kamasiyanilh la xlikatsi xTlat (kalikgalhtawakga Lucas 10:22). ¿Tuku xlakata wa tiku tlakg tlan masiyalh? ¿La tlawalh? Chu ¿la nachuna natlawayaw akxni kamakgtayayaw latamanin nakatsikgo la likatsi xaTlat? Kaʼakxilhwi uma akgtutu takgalhskinin.
JESUCRISTO WA TIKU TLAKG TLAN MASIYALH LA LIKATSI XTLAT
4, 5. ¿Tuku xlakata Jesús tiku tlakg tlan xmasiyalh la likatsi xTlat?
4 Jesús tlakg katsi xlakata namasiya la likatsi xaTlat. ¿Tuku xlakata? Xlakata wa tiku pulana tlawaka, chu akxni nina xmin unu kKatiyatni xlama kʼakgapun, chu xlitaxtu «nchatum xkam» Dios (Juan 1:14; 3:18). ¡Akgtum lu lanka talakgalhaman! Akxni ninajtu xʼanan, xaKgawasa lu tlan xtalalina xTlat chu xakxilha la xlikatsi chu tuku xtlawa. Tlat chu xaKgawasa akglhuwa millón kata latachuwinalh chu lu lapaxkikgolh (Juan 5:20; 14:31). ¡Xakgawasa lu liwana xkatsi la xlikatsi xTlat! (Kalikgalhtawakga Colosenses 1:15-17.)
5 Dios liyawalh xKgawasa pi napalakachuwinan wa xlakata lilakgapaskan «xTachuwin Dios» (Apo. 19:13). Wa xlakata Jesús tiku tlakg tlan xmasiyalh la likatsi xaTlat. Akxni Juan tsokgli Evangelio kinkawaniyan pi «nTachuwin» «[x]wi kxpaxtun xaTlat» (Juan 1:1, 18). Uma tachuwin kilhchanima akgtum xamakgan talismanin pi akxni xwayankan xtawilakgo chuna la tlan xlalakakxilhkgolh chu chuna tlan liwana xkgalhchuwinankgolh. Nachuna xlakata lu tlan latalalin xaKgawasa chu xaTlat tlan liwana xkgalhchuwinankgo.
6, 7. ¿La tlawakgolh xaTlat chu xaKgawasa xlakata lu tlan xlatalalilh?
6 Akxni tlakg tlan xlatalalin xaTlat «lu paxkilh [xaKgawasa] chali chali» (kalikgalhtawakga Proverbios 8:22, 23, 30, 31). Chuna la titaxtulh kilhtamaku, chu akxni akxtum kskujkgo xaKgawasa nachuna tsukulh likatsi la xaTlat. Akxni xakxilha la xkalikatsini Jehová chatunu chatunu xʼángeles nema xkatlawatilhama, tlakg xpaxki xtayat Dios.
7 Akxni Satanás xlimasiyaputun pi Jehová ni lakgchan namapakgsinan, xaKgawasa akxilhli xTlat la limasiyalh xtapaxkit, pi tlawa tuku xalakatitum, pi kgalhi liskgalala chu litliwakga xlakata la lakkaxtlawalh uma lu tuwa taʼakglhuwit. Tuku akxilhli makgtayalh na tlan xtayanilh taʼakglhuwit nema xʼama kgalhi akxni xmilh kKatiyatni (Juan 5:19).
8. ¿La kinkamakgtayakgoyan tuku wankgo Evangelios naʼakgatekgsaw xtayat xaTlat?
8 Xlakata lu tlan la xtalalin Jehová, xaKgawasa tlan kinkawanin la likatsi xaTlat. Xlakata tlakg tlan nalakgapasaw xaTlat, liwana kalakputsananiw xtachuwin chu tuku tlawalh xKgawasa. Kawiliw liʼakxilhtit, lu nila xkatsiw tuku wamputun tapaxkit komo kajwatiya xlikgalhtawakgaw uma tachuwin kdiccionario. Pero akxni lilakapastakaw tuku lichuwinankgo Evangelios xlakata la Jesús lichuwinalh Dios chu la xkalikatsini latamanin, akgatekgsaw tuku wamputun «Dios tapaxkit» (1 Juan 4:8, 16). Nachuna xlakata amakgapitsi xtayat Dios nema Cristo kakgalhinilh kstalaninanin.
JESÚS KINKAMASIYANIN LA LIKATSI XATLAT
9. 1) ¿La pulaktiy kamasiyanilh Jesús kstalaninanin xlakata la likatsi xTlat? 2) Kalichuwinanti liʼakxilhtit nema maklakaskilh Jesús xlakata xlimasiyalh la likatsi xTlat.
9 ¿La kamasiyanilh Jesús kstalaninanin xlakata la xlikatsi xTlat chu na tlan xkatsiw akinin? Pulaktiy tuku tlawalh: xlakata tuku xmasiya chu tuku xtlawa. Pulana kalichuwinaw tuku masiyalh, akxilhaw pi lu xʼakgatekgsa la lakpuwan, la makgkatsi chu la xlikatsi Jehová. Akgtum liʼakxilhtit, tamalakxtumilh xTlat la chatum lu xapaxkina xkuentajtlawana borregos tiku an putsa tantum borrego nema xtsankganit chu akxni tekgsa, «lipaxuway wantu ntakgsli, nixawa wa xatatipuxamakunajatsa wantu ni xtsankganit». ¿Tuku xlimasiyaputun Cristo uma parábola? Uma tuku wa: «Pus na chuna ni xtalakaskin minTlatkan nti wi nkʼakgapun natsankgay na yuma nchatum laktsu kaman» (Mat. 18:12-14). ¿Chu tuku kinkamasiyaniyan? Pi maski min kilhtamaku lakpuwanaw pi nitu litaxtuyaw o niti kinkalakapastakan, kinTlatkan xalak akgapun kinkapaxkiyan, xlakata litaxtuyaw la «laktsu kaman».
10. ¿La limasiyalh tuku tlawalh Jesús xlakata la likatsi xaTlat?
10 Xlipulaktiy la Jesús kamasiyanilh kstalaninanin la likatsi xTlat, wa tuku xtlawa. Wa xlakata akxni apóstol Felipe skinilh xmasiyanilh xTlat, Jesús kgalhtilh: «Wanti nkiʼukxilhnitta, ukxilhnitta xaTlat» (Juan 14:8, 9). Kaʼakxilhwi pulaklhuwa niku Cristo masiyalh la xlikatsi Dios. Akxni chatum chixku «nti xkgalhiy lepra» tasaskinilh xmapaksalh, Jesús xamalh chu wanilh: «Klakaskin; kapaksti». Uma chixku tiku xtatatla, akxilhli pi wa Jehová maxkilh litliwakga xlakata Jesús xmapaksalh (Luc. 5:12, 13). Chu akxni nilh Lázaro, kstalaninanin akxilhkgolh la xaTlat lakgalhamanan akxni Jesús «lipikua makgkatsilh kxnaku» chu alistalh «tsukulh tasay». Maski xkatsi pi xʼama malakastakwani, lilipuwa akxni akxilhli pi xfamilia chu xʼamigos Lázaro lu xtasamakgolh (Juan 11:32-35, 40-43). Putum akinin wi tuku tlakg lakgatiyaw nema tatsokgnit kBiblia xlakata tuku tlawalh Jesús nema limasiya pi Dios xalakgalhamana.
11. 1) ¿Tuku limasiyalh Jesús xlakata xTlat akxni katamakxtulh tiku kstanankgo ktemplo? 2) ¿Tuku xlakata lu tlan limakgkatsiyaw uma?
11 Nachuna, ¿tuku kinkamasiyaniyan akxni Cristo katamakxtulh ktemplo tiku kstakgo wakax chu borregos? Kalilakapastakwi uma: tiyalh kgantum lazo, kamakganilh xtuminkan chu kamaʼakgpuspitnilh xmesaskan tiku xlakgpalikgo tumin (Juan 2:13-17). Uma tuku tlawalh, kstalaninanin lilakapastakkgolh tuku mapakgsina David xwanit: «Xliwakg kinaku klakgkatsan min[chik]» (Sal. 69:9). Akxni ni pekualh uma tuku tlawalh, Jesús limasiyalh pi lu xtataya xaxlikana takanajla. ¿Akxilhaw uma tuku tlawalh Jesús pi limasiyalh la likatsi xTlat? Tuku lichuwinaw kinkamalakapastakayan pi Dios ni kaj kgalhi lhuwa litliwakga xlakata namasputu tuku nitlan unu kKatiyatni wata na lu masputuputun. Tuku tlawalh Jesús kinkamasiyaniyan la makgkatsi la uku xaTlat akxni akxilha putum tuku nitlan lama kKatiyatni. ¡Lu tlan limakgkatsiyaw akxni lilakapastakaw uma akxni wi tuku nitlan kinkatlawanikanan!
12, 13. ¿Tuku kinkamasiyaniyan xlakata Jehová chuna la Jesús kalikatsinilh kstalaninanin?
12 Tekgsaw atanu liʼakxilhtit, akxni akxilhaw la Jesús kalikatsinilh kstalaninanin. Makglhuwa xlitaʼakglhuwikgo xlakata tiku tlakg xapuxku xwanit (Mar. 9:33-35; 10:43; Luc. 9:46). Xlakata lhuwa kilhtamaku xtawi xTlat, Jesús liwana xkatsi la xlakpuwan xTlat xlakata tiku tlankajwa makgkatsikan (2 Sam. 22:28; Sal. 138:6). Nachuna xʼakxilhnit la Satanás limasiyalh pi lankajwa xwanit, xakstu xpaxkikan, chu lu xkgalhiputun limapakgsin chu litliwakga. Wa xlakata, Cristo nitlan makgkatsilh akxni akxilhli pi kstalaninanin tiku lhuwa xkamasiyaninit tlankajwa xkamakgkatsikan, chu asta tiku xkalaksaknit xlakata xʼapóstoles xwankgolh. Chu xlakan limasiyakgolh uma nitlan tayat asta akxni atsinu xtsankga namakgnikan Jesús (Luc. 22:24-27). Pero chuntiyaku xatapaxuwan kastakyawalh, xkatsi pi chuna la xtitaxtulh kilhtamaku nialh tlankajwa xwankgolh chuna la xla (Fili. 2:5-8).
13 ¿Akxilhaw la likatsi xaTlat akxni Jesús kastakyawalh kstalaninanin? ¿Akxilhaw pi tuku wa chu tlawalh Cristo nachuna likatsi xaTlat, tiku ni kamakgxtakga xlakskujnin maski makglhuwa nitlan tuku tlawakgo? Akxni lilakapastakaw la lu tlan likatsi Dios, ¿ni xlikana pi waniputunaw pi nitlan limakgkatsiyaw tuku nitlan tlawanitaw?
XAKGAWASA LU XMASIYAPUN LA LIKATSI XATLAT
14. ¿La limasiyalh Jesús pi lu xmasiyaputun tiku xaTlat?
14 Lhuwa mapakgsinanin kaʼakgchipakgo tiku kamapakgsikgo xlakata ni kamaxkikgo talakaskin wi tuku na nakatsikgo. Pero Jesús, masiyalh lhuwa tuku xkatsi xlakata xTlat, kamasiyanilh putum tuku xtalakaskin xkatsikgolh xlakata Dios (kalikgalhtawakga Mateo 11:27). Nachuna chatum kstalanina wa pi «xKam Dios, na kinkamaxkinitan ntalakapastakna, lakimpi nalakgapasa wa nti lu wa talulokgtat» uma wamputun tuku xaxlikana xlakata Jehová (1 Juan 5:20). ¿Tuku wamputun uma? Pi kamaxkilh liskgalala xlakata tlan xʼakgatekgskgolh tuku xkawani xlakata xTlat. Ni tlawalh pi nila xlakgapaska Jehová, ni masiyalh pi Dios akgtum Trinidad.
15. ¿Tuku xlakata Jesús ni masiyalh putum tuku xkatsi xlakata xTlat?
15 ¿Masiyalh Jesús putum tuku xkatsi xlakata xTlat? Ni, xlakata wi lhuwa tuku ni lichuwinalh (kalikgalhtawakga Juan 16:12). ¿Tuku xlakata? Jesús wa tuku xlakata akxni kawanilh kstalaninanin: «Ni la nchu akgatakgsatit» la uku. Pero kawanilh pi lhuwa tuku xʼamaka kamasiyanikan akxni xchilh «yama spiritu» santo, nema xʼama “kamakgatanksa xlipaks ntu ntalulokgtat” (Juan 16:7, 13). Chuna la chatum tlat tiku tlan likatsi wi tuku ni wanikgo xkamanankan, wata kawanikgo akxni laklankata chu tlantiya naʼakgatekgskgo, Cristo wi tuku ni kawanilh kstalaninanin xlakata xTlat xlakata ninaj tliwakga xwi xtakanajlakan chu nila xʼakgatekgskgolh. Limasiyalh pi xalakgalhamana xlakata xkatsi tuku nila xʼakgatekgskgo chu tuku tlan.
KATLAWAW LA JESÚS, KAKAMASINIW AMAKGAPITSIN XLAKATA JEHOVÁ
16, 17. ¿Tuku xlakata akinin tlakg tlan namasiyayaw la likatsi Dios?
16 Akxni wi tiku lakgapasaw chu lu paxkiyaw xlakata lu tlan likatsi, ¿ni xlikana pi lhuwa lichuwinanaw? Wa uma tuku tlawalh Jesús akxni xlama kKatiyatni: lichuwinalh xTlat (Juan 17:25, 26). ¿Tlan nachuna natlawayaw akxni nakawaniyaw amakgapitsin la likatsi Jehová?
17 La akxilhnitawa, Jesús wa tiku tlakg tlan xlakgapasa xTlat chu lu xmasiyaputun tuku xkatsi. Asta kamaxkilh liskgalala kstalaninanin xlakata xʼakgatekgskgolh tuku tuwa xlakata Dios. Xlakata Cristo masiyalh la likatsi Jehová akinin paxkiyaw nixawa amakgapitsi latamanin xala uku, chu lu paxtikatsiniyaw tuku kinkamasiyanin chu tuku tlawalh kinkamasiyaniyan la likatsi xTlat. Asta tlan nawanaw pi lakgapasaw kiMalakatsukinakan (Jer. 9:24; 1 Cor. 1:31). Chu xlakata liskujwi natalakatsuwiniyaw Jehová, xla na kinkatalakatsuwiniyan (Sant. 4:8). Chu akinin tlakg tlan nakamasiyaniyaw latamanin tuku katsiyaw. ¿La tlan natlawayaw?
18, 19. ¿La tlan namasiyayaw la likatsi xaTlat? Kawanti tuku xlakata.
18 Lu xlakaskinka natlawayaw chuna la Cristo, nalimasiyayaw tuku wanaw chu tuku tlawayaw la likatsi xaTlat. Kalakapastakwi pi lhuwa tiku katachuwinanaw ni katsikgo tiku Dios. Ni xaxlikana takanajla max tlawanit pi tanu tuku lakpuwankgo xlakata Dios. Pero akinin tlan nakamasiyaniyaw tuku katsiyaw xlakata xtukuwani Dios, tuku lakapastaknit natlawa xpalakata latamanin chu tuku masiya Biblia xlakata la likatsi. Na tlan nakalitachuwinanaw kinatalankan xlakata tuku likgalhtawakgayaw kBiblia nema limasiya la likatsi Dios nema pulana nichuna xʼakxilhnitaw. Akxni chuna natlawayaw xlakan na nalitatliwakglhkgo.
19 ¿Chu la namasiyayaw la likatsi xaTlat xlakata tuku tlawayaw chuna la tlawalh Jesús? Akxni amakgapitsin akxilhkgo pi tuku tlawayaw limasiyayaw pi paxkinanaw la Cristo, na talakatsuwiniputunkgo xaTlat chu xaKgawasa (Efe. 5:1, 2). Apóstol Pablo kinkawaniyan: «Kaʼukxilhtit lantla kit klama, xtachuna lantla kit kukxilhtima, chu ktlawama lantla tilatamalh [...] Jesús» (1 Cor. 11:1). Kgalhiyaw lanka talakgalhaman pi tlan nalimasiyayaw kintayatkan la likatsi Jehová. Wa xlakata chuna katlawaw la Jesús chu kakawaniw amakgapitsin la likatsi xaTlat.
[Takgalhskinin]
