¿Xlakaskinka nakatsiyaw tiku Jesús?

«Nalakgapasatit ntalulokgtat [o tuku xaxlikana], chu na wa ntalulokgtat, nakamalakgtaxtiyan.» (JUAN 8:32)

BIBLIA kinkamasiyaniyan tuku xaxlikana chu kinkalakgmaxtuyan knixaxlikana takanajla, nema masiya tuku ni xaxlikana xlakata Jesús. Pero ¿xlakaskinka tuku kanajlayaw? Chuna. Jehová xlakaskinka akxilha. Jesús na xlakaskinka akxilha. Chu akinin na xlakaskinka kiliʼakxilhatkan.

● ¿Tuku xlakata Jehová xlakaskinka akxilha? Xlakata «Dios tapaxkit» (1 Juan 4:8). Xla lakaskin pi putum kilhtamaku lipaxuw nalatamayaw. Chuna la wan Juan 3:16, «lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliankgalhin». Dios malakgachalh xKgawasa xlakata nakinkalakgmaxtuyan. Chuna kinkamaxkiyan talakaskin nalatamayaw unu kkatiyatni akxni akgtum Paraíso nawan, chuna la xapulana xlakapastaknit (Génesis 1:28). Dios kamaxkiputun latamat nema ni kgalhi xlisputni putum tiku nakatsinikgo xaxlikana xlakata xKgawasa chu nalinkgo xlatamatkan chuna la katsinimakgolh (Romanos 6:23).

● ¿Tuku xlakata Jesús xlakaskinka akxilha? Jesús na kapaxki latamanin, chuna masiyalh akxni makamastalh xlatamat kimpalakatakan (Juan 15:13). Xla xkatsi pi kajwatiya chuna tlan xlakgtaxtuw (Juan 14:6). ¡Wa xlakata lakaskin pi tlakg lhuwa tiku nalitamakgtayakgo xtamakamastan! Wa xlakata kawanilh kstalaninanin pi xlichuwinankgolh xtalakaskin Dios kaniwa niku xtawilakgolh (Mateo 24:14; 28:19, 20).

● ¿Tuku xlakata xlakaskinka kiliʼakxilhatkan? Kalilakapastakti tuku tlakg xlakaskinka akxilha, max mi familia chu ni natatatlaya. ¿Ni xlikana pi wix katapaxuwaputuna mifamilia chu ni tatatlaputuna? Xpalakata Jesús, Jehová kinkawaniyan pi kimputumkan tlan nikxni natatatlayaw chu nakgalhiyaw latamat nema ni kgalhi xlisputni kxasasti kakilhtamaku niku nialh naʼanan tajatat chu tapatin (Salmo 37:11, 29; Apocalipsis [Revelación] 21:3, 4). ¿Xlakgati nalatapaya anta? Komo chuna wi tuku militlawat.

¿Lakapastaka xapulana versículo nema limin uma artículo? «Nalakgapasatit ntalulokgtat, chu na wa ntalulokgtat, nakamalakgtaxtiyan.» Xaxlikana xlakata Jesús chu la namakgtayanan nakgantaxtu xtalakaskin Dios kinkalakgmaxtuyan: ktalakgalhin chu klinin. Pero talakaskin nalakgapasaw tuku xaxlikana. ¿Tlakg xkatsiputu xlakata Jesús chu la wix chu mi familia tlan nalitamakgtayaya akxni nakatsiya tuku xaxlikana xlakata xla? Xtatayananin Jehová xatapaxuwan namakgtayakgoyan.