Wantuku masiya xTachuwin Dios

¿La xlitatlawat akxni lakapastakkan akxni tinilh Jesús?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿La limapakgsinalh Jesús pi xlakapastakka akxni nilh?

Jesús kalimapakgsilh kstalaninanin pi akxni xlakapastakkgolh pi nilh xtlawakgolh akgtum taway niku kaj xlimaklakaskinkgolh kaxtalanchu chu vino. Kaxtalanchu kilhchanima xmakni chu vino kilhchanima xkgalhni. (Kalikgalhtawakga Lucas 22:19, 20.)

Kaxtalanchu nema Jesús limaklakaskilh ni xkgalhi levadura. Uma xkilhchanima xmakni Jesús nema ni xkgalhi talakgalhin, xlakata kBiblia levadura tamalakxtumikan talakgalhin. Akxni Jesús makamastalh xmakni, nialh talakaskilh namakamastakan animales nema Limapakgsin xla Moisés xwan (Hebreos 10:5, 9, 10). Vino kilhchanima xkgalhni Jesús nema stajtamakgalh xlakata tlan nakinkatapatikanan kintalakgalhinkan. (Kalikgalhtawakga 1 Pedro 1:19; 2:24, chu 3:18.)

2. ¿Tukuya kilhtamaku nalakapastakaw akxni tinilh Jesús?

Jesús nilh akxni xtlawakan Pascua judía, 14 xla nisán. Xkilhtamakujkan judíos tsuku akxni tsankga Chichini. Katsisni 14 xla nisán, Jesús katawayalh Pascua xʼapóstoles. Alistalh wi tuku xasasti lakkaxwililh: akgtum taway xlakata xlilakapastakka akxni nilh. (Kalikgalhtawakga Lucas 22:14, 15.)

Xlakskujnin Dios xala uku na lakapastakkgo akxni tinilh Jesús, wantuku maklakaskilh Dios xlakata nakalakgmaxtu latamanin ktalakgalhin chu klinin (Éxodo 12:5-7, 13, 17). Chuna la Pascua nema xtlawakgo judíos kaj makgtum akgatunu kata xtatlawa, akxni talakapastaka akxni nilh Jesús kaj makgtum tatlawa akgatunu kata akxni tsankganita Chichini, 14 xla nisán la xwi calendario judío nema lichuwinan Biblia. (Kalikgalhtawakga Juan 1:29.)

  3. ¿Tiku wakgo kaxtalanchu chu vino?

Akxni Jesús kamatitaxtinilh copa xla vino kawanilh kstalaninanin: «Wa yuma ntu ntajuma mpukgotnu, wa yuma xasasti talakkaxlan» (1 Corintios 11:25). Uma xasasti talakkaxlan tawi xlakgxokgo nema Dios xkatatlawanit Israel akxni kamaxkilh Limapakgsin xla Moisés. ¿Tuku xkilhchanima xapulana talakkaxlan? Jehová xkawaninit pi xkachikin xlitaxtukgolh israelitas komo liwana xkgalhakgaxmatkgolh xlimapakgsin (Éxodo 19:5, 6). Pero xlakata ni kgalhakgaxmatkgolh, Dios tlawalh xasasti talakkaxlan. (Kalikgalhtawakga Jeremías 31:31.)

Dios katatlawalh uma xasasti talakkaxlan 144,000 latamanin. Xla lhuwa latamanin kalisikulunatlawa umakgolh 144,000. Lhuwa millón lakchixkuwin chu lakpuskatin xlikalanka Katiyatni tlan nalipaxuwakgo latamat nema ni kgalhi xlisputni kparaíso xlakata uma xasasti talakkaxlan. Makgapitsi tiku na makgtapakgsikgo 144,000, skujnanimakgolh Jehová unu kKatiyatni. Kajwatiya xlakan tlan wakgo kaxtalanchu chu vino xlakata na makgtapakgsikgo tiku Jehová katatlawanit talakkaxlan. Xkgalhni Jesús wa tuku tlawa uma talakkaxlan. (Kalikgalhtawakga Lucas 12:32 chu Apocalipsis [Revelación] 14:1, 3.)

4. ¿La kinkamakgtayayan naʼanaw akxni lakapastakkan akxni tinilh Jesús?

Akxni kata kata lakapastakkan akxni tinilh Jesús kinkamakgtayayan lu xlakaskinka naʼakxilhaw tapaxkit nema Dios kinkakgalhiniyan. Xlakata kinkapaxkiyan, makamilh xKgawasa kKatiyatni chu nilh xlakata kintalakgalhinkan. Akxni lakapastakaw akxni tinilh Jesús talakaskin naʼakxilhaw la xlilakaskinka pi Jesús nilh kimpalakatakan chu la tlan masiyaniyaw Jesús chu Jehová pi paxtikatsiniyaw. (Kalikgalhtawakga Juan 3:16 chu 2 Corintios 5:14, 15.)

Komo tlakg katsiputuna xlakata uma, kaʼakxilhti páginas 206 asta 209 xla uma libro, ¿Tuku xlikana masiyay Biblia?, tlawakgonit xtatayananin Jehová.