Tuku katsiputunkgo tiku likgalhtawakgakgo

¿Tuku xlakata Biblia wan: «Lhuwa xtapalh akxilha Jehová akxni nikgo tiku nikxni makgxtakgkgo»?

▪ Xlikana Jehová lu xlakaskinka akxilha xlatamat putum skujnin tiku nikxni makgxtakgkgo. Pero, tachuwin nema Dios tlawalh natsokgkan kSalmo 116:15, NM, ni kaj kilhchani akxni niy chatum lataman.

Akgtum taʼakgchuwin nema mastakan akxni tiku niy, ni nalikgalhtawakgakan uma versículo, maski tiku nilh nikxni makgxtakgli Jehová. ¿Tuku xlakata? Xlakata tlakg lhuwa tuku kilhchanima. Tuku salmista xwamputun wa pi Jehová lhuwa makgatsankganan akxni nikgo putum xlakskujni tiku nikxni makgxtakgkgo chu ni katimastalh talakaskin chuna nala (kaʼakxilhti Salmo 72:14 chu 116:8).

Xlikana uma versículo kinkawaniyan pi Dios ni katimastalh talakaskin namasputukan putum xlakskujnin tiku nikxni makgxtakgkgo. Chuna limasiya tuku titaxtumaw uku. Xlakata kinkatlawanikaninitan tuku nitlan, kinkaputsastalanikanitan chu tayaninitaw litasiya pi Dios kinkakuentajtlawayan xlakata ni nakinkamasputukanan.

Jehová kgalhi lhuwa litliwakga, chu xtalakaskin xlikana nakgantaxtu. Wa xlakata, nikxni katimastalh talakaskin namasputukan putum xkachikin. Komo chuna xlalh, xlakpuwanka pi tiku ni akxilhputunkgo Dios tlakg lakgtliwakgan ni xawa xla chu uma ni xlikana. Komo chuna xlalh ni xkgantaxtulh tuku Dios lakkaxwilinit pi kxlikalanka Katiyatni xlitatsamalh tiku ni makgxtakgkgo Dios (Isa. 45:18; 55:10, 11). Ktemplo xaʼespiritual ni xʼanalh tiku xkakninanikgolh Jehová chu tiku xmasantujlikgolh xlikalanka Katiyatni. Nachuna ni xʼanalh latamanin tiku «xasasti tiyat» xlitaxtukgolh, uma wamputun latamanin tiku tlan likatsikgo chu nalatamakgo kkatiyatni akxni natawila «xasasti akgapun» (Apo. 21:1). Komo ni xkgalhilh tiku natapakgsinikgo unu kkatiyatni, Tamapakgsin xaʼAkgtum milh Kata xla Cristo nila xtawilalh (Apo. 20:4, 5). ¡Putum uma nema lichuwinamaw nikxni chuna nala!

Nachuna komo Jehová xmastalh talakaskin xmalakgsputuka xkachikin unu kKatiyatni, nialh xlipawanka xlimapakgsin chu xtukuwani. Nialh xlitasiyalh pi wa lakgchan namapakgsinan xlikalanka kakilhtamaku. Xlakata xlakaskinka akxilhkan chu xasanto xtukuwani, nikxni katimastalh talakaskin chuna kalalh. Kalakpuwanti uma: «xlakata putum tuku tlawa xaʼakgstitum», wa xlakata liwana katsiyaw pi Dios nakuentajtlawa putum kskujnin tiku nikxni makgxtakgkgo (Deu. 32:4; Gén. 18:25). Uma makgtaya tuku wan Biblia: «Jehová ni katimakgxtakgli xkachikin xlakata xtukuwani lanka» (1 Sam. 12:22). Xlikana «Dios, ni ama kakgxtakgwili ti talipawan, ni kamakgxtakgma ixkamanan» (Sal. 94:14).

¡Lu tlan limakgkatsiyaw pi xkachikin Dios nikxni namalakgsputukan unu kKatiyatni! Wa xlakata, nikxni kamakgxtakgwi Jehová chu kalipawaw uma tuku xla kinkawaniyan: «Paks tuku nalitalachipaputunkana, nitu katilitlawanikgon, chu maski katuwa tuku nawankan akxni naputsananikana, nalimasiyaya pi nixlikana. Wa uma tuku nakamaxkikan xlakskujnin Jehová, chu tuku xaʼakgstitum akit kkamaxki» (Isa. 54:17).

[Tuku wan página 12]

Dios nikxni katimastalh talakaskin namasputukan xkachikin