¿Xlakaskinka akxilha tamakgaxtokgat nema Dios lakkaxwilinit?
¿Xlakaskinka akxilha tamakgaxtokgat nema Dios lakkaxwilinit?
«Jehová kakamaxkin akgtum tamaskiwin chu xlikana katekgstit niku tlan najaxatit, chatunu chatunu kxchik minchixkukan.» (RUT 1:9)
KAPUTSA TAKGALHTIN:
¿Tuku xlakata tlan nawanaw pi xlakskujnin Dios xala makgasa lu xlakaskinka akxilhkgolh tamakgaxtokgat?
¿Tuku xlakata tlan wanaw pi Jehová xlakaskinka akxilha akxni akinin nalaksakaw tiku natatamakgaxtokgaw?
¿Tukuya tastakyaw xla tamakgaxtokgat nema masta Biblia wix namaklakaskina?
1. ¿Tuku tlawalh Adán akxni Jehová maxkilh xpuskat?
«UMA lu xlikana kilukut chu kiliwa. Nawanikan Puskat, xlakata lakmaxtuka chixku.» (Gén. 2:23.) ¡Lu paxuwalh Adán, xapulana chixku, xlakata maxkika xpuskat! Wa xlakata tuku alistalh wa takgaxmatli la akgtum poesía. Jehová tlawalh pi Adán liwana lhtatalh chu tlawanilh chatum stlan puskat nema xlitatlawanit xtapalukut chu Adán limapakuwilh Eva. Alistalh Dios xatapaxuwan kamamakgaxtokgli. Xlakata Eva litlawaka xtapalukut Adán, tlakg tlan xlatalalinkgo nixawa tiku tamakgaxtokgkgonit la uku.
2. ¿Tuku xlakata lalakgatikgo chixku chu puskat?
2 Jehová lu skgalala, tlawalh pi latamanin xlapaxkikgolh, chuna chixku chu puskat lalakgatikgo. Maktum enciclopedia wan: «Chixku chu puskat tiku tamakgaxtokgkgo talakaskin pi putum kilhtamaku nalalakgatikgo chu nalatalakgxtumikgo» (The World Book Encyclopedia). Chuna tlawakgonit lhuwa tiku skujnikgo Jehová.
PAXTIKATSINIKGOLH TAMAKGAXTOKGAT NEMA DIOS LAKKAXWILINIT
3. ¿La tekgsli Isaac xpuskat?
3 Abrahán lu xlakaskinka akxilhli tamakgaxtokgat, wa xlakata malakgachalh kMesopotamia skujni tiku tlakg lhuwa kata xkgalhi xlakata xputsalh chatum puskat tiku xkakninanilh Dios chu xtatamakgaxtokgli Isaac. Oración nema tlawalh uma skujni kgaxmatka. Rebeca xpuskat Isaac wa chu lu xlakaskinka tuku tlawalh xlakata xkgantaxtulh tuku Dios xwaninit Abrahán xlakata xkamanan (Gén. 22:18; 24:12-14, 67). Pero uma ni wamputun pi tlan wi tiku nakaputsanani tiku natatamakgaxtokgkgo amakgapitsin. La uku chatunu chatunu laksaka tiku natatamakgaxtokga. Chu maski Dios ni laksaka tiku natatamakgaxtokgkgo latamanin, kamaxki tastakyaw kstalaninanin Cristo xlakata tamakgaxtokgat chu la nalinkgo xlatamatkan komo xlakan skinikgo chu mastakgo talakaskin kapulalilh xʼespíritu (Gál. 5:18, 25).
4, 5. ¿Tuku xlakata katsiyaw pi sulamita chu xkuentajtlawana borrego xlapaxkikgo?
4 Chatum lu stlan tsumat sulamita xala makgasa ni mastalh talakaskin pi xʼamigas xwanikgolh pi tlan xlitaxtulh achatum xpuskat mapakgsina Salomón. Kawanilh: «Laktsuman xalak Jerusalén, liwana kkawaninitan, pi ni katlawatit nakpaxkinan, kaj kamastatit talakaskin xakstu nakpaxkinan» (Cant. de Cant. 8:4). Sulamita chu chatum xkuentajtlawana borregos xlapaxkikgo. Xla wa: «Akit la akgtum azafrán xala niku kaxtum xkilhtum pupunu, la akgtum lirio xala niku kaxtum». Pero xkuentajtlawana borrego wanilh: «La akgtum lirio nema staka niku anan lhuwa lhtukun, chuna tasiya tsumat tiku kpaxki akxni wi niku wilakgo amakgapitsi laktsuman» (Cant. de Cant. 2:1, 2). Liwana tasiya pi lu xlapaxkikgo.
5 Xlakata sulamita chu xkuentajtlawana borrego lu xpaxkikgo Dios, uma xkamakgtaya lu tlan xtawi xtamakgaxtokgat. Wa xlakata xla wanilh tiku xpakxi: «Kakiwili xtachuna la akgtum sello kminaku, xtachuna la akgtum sello kmimakxpan; xlakata tapaxkit lu tliwakga xtachuna klinin, akxni tiku lu skin napaxkikan xtachuna la akxni wi tiku niy. Lhkuyat xtachuna lanka klhkuyat xla Jehová [xlakata xla masta]. Lhuwa chuchut nila namamixi tapaxkit, chu kgalhtuchokgo nila xwatalin» (Cant. de Cant. 8:6, 7). Komo chatum kskujni Jehová lakapastakma pi natamakgaxtokga, ¿tuku xlakata nalakpuwan pi tlan maski kaj tsinu lapaxkikgo ni xtachuna la sulamita chu xkuentajtlawana borrego?
TUKU LAKSAKAW NEMA DIOS XLAKASKINKA AKXILHA
6, 7. ¿Tuku likatsiyaw pi Dios lu xlakaskinka akxilha akxni nalaksakaw tiku natatamakgaxtokgaw?
6 Akxni laksakaw tiku natatamakgaxtokgaw, Dios xlakaskinka akxilha. Xlakata kachikinin xalak Canaán Dios wa: «Ni nakatatlawaya talakkaxlan. Ni namaxkiya mintsumat xkgawasa, ni natatamakgaxtokga minkgawasa xtsumat. Xlakata xla natlawa pi minkgawasa nialh nakiskujnani, chu xlakan atanu dioses naskujnikgo; chu xtasitsi Jehová nakalakgminan, chu lakapala namalakgsputuyan» (Deu. 7:3, 4). Titaxtulh lhuwa siglos sacerdote Esdras wa: «Wixin tlawatit tuku ni tlan xlakata tatamakgaxtokgkgotit lakpuskatin tiku alakatanu xalanin, tlakg wilitit talakgalhin kʼIsrael» (Esd. 10:10). Chu apóstol Pablo katsokgnanilh xnatalan: «Wa mpuchuwa puskat wa xchixku mapakgsiy xlimakwa lama xchixku; wampi wa lapi xnilh xchixku, nialh anan nti mapakgsiy; katatawi nchu nti natatawilaputun, xman wa lapi kanajlaniy nkimPuchinakan [Jehová]» (1 Cor. 7:39).
7 Akxni chatum kskujni Jehová tiku tamununit tatamakgaxtokga tiku ni kanajlani Jehová, ni kgalhakgaxmatma Dios. Israelitas tiku xlamakgo kxkilhtamaku Esdras makgxtakgkgolh Dios xlakata «tatamakgaxtokg[kgolh] lakpuskatin tiku alakatanu xalanin», akinin lu xlakaskinka akxilhaw tuku wan xTachuwin Dios (Esd. 10:10; 2 Cor. 6:14, 15). Kstalanina Cristo tiku tatamakgaxtokga tiku ni skujni Jehová ni masta tlan liʼakxilhtit chu ni masiya pi xlakaskinka akxilha tamakgaxtokgat. Komo tiku tamununit chuna tlawa namakgatsankga tuku lakgaya kxkachikin Dios. Chu xtachuna xtlawalh uma oración: «Jehová, akit ni kgalhakgaxmatnitan, pero wix kakisikulunatlawa». Chu xkgalhkgalhiw pi xla xkinkasikulunatlawan.
KINTLATIKAN XALAK AKGAPUN TLAKG KATSI NI XAWA AKININ
8. Kawanti tuku xlakata kuenta kilitlawatkan tastakyaw xla tamakgaxtokgat nema masta Jehová.
8 Ingeniero tiku tlawa akgtum máquina liwana katsi la tamaklakaskin. Komo talakaskin namalakgnuparayaw tlan kinkawaniyan la natlawayaw. Pero ¿tuku xlalh komo ni kuenta xtlawaniw tuku xkinkawanin chu xtlawaw la akinin lakaskinaw? Max ni tlan tuku nakitaxtu, komo uma máquina skujli. Nachuna, xlakata xatapaxuwan natawila kintamakgaxtokgatkan talakaskin kuenta natlawayaw xtastakyaw Jehová, Tiku tlawalh tamakgaxtokgat.
9. ¿Tuku xlakata tlan wanaw pi Jehová katsi akxni wi tiku xakstu makgkatsikan chu tapaxuwan nema limin tamakgaxtokgat?
9 Jehová putum katsi xlakata tamakgaxtokgat chu latamanin. Wa tiku tlawalh pi xlatalakgxtumiputunkgolh xlakata xmakgantaxtikgolh uma limapakgsin: «Kakgalhitit kamanan chu kalhuwantit» (Gén. 1:28). Nachuna katsi akxni wi tiku xakstu majkatsikan xlakata akxni nina xtlawa xapulana puskat wa: «Nitlan xakstu nalatama chixku. Naktlawani xmakgtayana xlakata nalitakgatsi» (Gén. 2:18). Jehová na katsi tapaxuwan nema limin tamakgaxtokgat (kalikgalhtawakga Proverbios 5:15-18).
10. ¿Tuku xlilakapastakatkan tiku tamakgaxtokgkgonit akxni natalakgxtumikgo?
10 Xlakata talakgalhin nema kinkamatitaxtinin Adán, ni anan tamakgaxtokgat nema ni kgalhi taʼakglhuwit. Pero kskujni Jehová tiku tamakgaxtokga tlan lhuwa napaxuwa komo kuenta natlawa tastakyaw nema limin xTachuwin Dios. Kawiliw liʼakxilhtit, xtastakyaw Pablo xlakata talakgxtumit (kalikgalhtawakga 1 Corintios 7:1-5). Biblia ni wan pi talakgxtumit kaj xlakata nakgalhikan kamanan, na makgtayanan ktalakapastakni chu tlan natawilakgo tiku tamakgaxtokgkgonit. Pero Dios ni tlan akxilha talakgxtumit nema ni xlitatlawat. Kstalaninanin Cristo nalalakgalhamankgo chu nalapaxkikgo akxni natlawakgo uma. Chu ni natlawakgo tuku Jehová ni lakgati.
11. ¿Tuku tasikulunalin makgamakglhtinalh Rut xlakata tlawalh xtalakaskin Dios?
11 Talakaskin pi ktamakgaxtokgat kaʼanalh tapaxuwan chu ni taʼakglhuwit o nalilipuwankan. Kxchik chatum kstalanina Cristo talakaskin naʼanan tapaxuwan chu niku tlan namakgkatsikan. Kalilakapastakwi tuku lalh liwaka akgtutu mil kata, akxni Noemí chu xnapuwitin, o xnataskinan, Orpá chu Rut, xkgalhtutukan xninita xchixkukan, xʼamakgo tiji Moab nema an kJudá. Maski Noemí kawanilh chatiy laktsuman pi xtaspitkgolh xkachikinkan, Rut ni makgxtakgli chu wanilh «Jehová kasikulunatlawalh tuku tlawapat, chu Jehová xDios Israel kamaxkin chuna la xlilat, tiku tanita litatsekga» (Rut 1:9; 2:12). Chuna limasiyalh pi xlakaskinka xakxilha tamakgaxtokgat, chu tatamakgaxtokgli kgolotsin Boaz tiku lu tlan skujni Dios. Akxni nalakastakwanan kxasasti kakilhtamaku, Rut lu nalipaxuwa akxni nakatsi pi xfamilia Jesucristo litaxtulh (Mat. 1:1, 5, 6; Luc. 3:23, 32). ¡Lu lhuwa tasikulunalin makgamakglhtinalh xlakata tlawalh xtalakaskin Dios!
TLAN TASTAKYAW XLAKATA NAʼANAN TAPAXUWAN KTAMAKGAXTOKGAT
12. ¿Niku tlan natekgsaw xatlan tastakyaw xlakata tamakgaxtokgat?
12 Jehová, tiku tlawalh tamakgaxtokgat, kawani tiku tamakgaxtokgnit tuku maklakaskinkgo xlakata napaxuwakgo. Ni anan tiku tlakg katsi la Jehová. Biblia putum kilhtamaku wan tuku xaxlikana, wa xlakata tiku mastaputun laktlan tastakyaw xlakata uma talakaskin nakakilhti tuku wan uma libro. Akgtum liʼakxilhtit, Dios matsokgnanilh apóstol Pablo uma: «Chatunu wixin, chuna nkatlawalh, na kapaxkilh xpuskat, xtachuna mpala wa akstu paxkikan, chi nchu wa mpuskat, kamaxkilh nkakni xchixku» (Efe. 5:33). Kʼuma tastakyaw ni anan tuku chatum kstalanina Cristo ni naʼakgatekgsa, o namakgachakgxi. Pero tiku tamakgaxtokgkgonit nakgaxmatkgo uma. Chuna nala komo xchatiykan lu xlakaskinka akxilhkgo tamakgaxtokgat. *
13. ¿Tuku nala komo nalakatsalakan tastakyaw nema wi 1 Pedro 3:7?
13 Chixku tiku kstalanina Cristo lu napaxki xpuskat. Apóstol Pablo tsokgli: «Wixin xchixkukan lakchajan, wa lantla xlilat lakatitum natatawilakgoyatit, kamaxkikgotit nkakni mpi lakskalajwan xlakan, xampi wixin minchatuykan nkalakgchanan lipaxkatsinit xla xlipan latamat, na lakimpi ni tu nasokgaliy mioracionkan» (1 Ped. 3:7). Komo chixku lakatsala tastakyaw xalak Biblia, max Jehová ni katikgaxmatli xʼoración. Komo chuna nala max nataxlajwani xtakanajla tiku tamakgaxtokgkgonit, nakgalhikgo lhuwa taʼakglhuwit chu nitlan natawila xtamakgaxtokgatkan.
14. ¿Tuku tlan natlawa xatlan puskat kxfamilia?
14 Puskat tiku masta talakaskin napulalin xTachuwin Dios chu espíritu santo namakgtayanan pi xchik tlan natawila chu naʼanan tapaxuwan. Chixku tiku paxki Jehová na napaxki xpuskat chu namaxki tuku maklakaskin xtakanajla chu namakgtakgalha. Puskat makgkatsiputun pi paxkikan wa xlakata lakputsa tayat nema natlawa pi tlakg napaxki xchixku. Proverbios 14:1 wan: «Lu xaskgalala puskat liwana lakkaxwilima xchik, pero puskat nema ni liwana lakapastaknan xmakan lilakxtlawama xchik». Chatum puskat tiku skgalala, tlan likatsi makgtaya xlakata putum tuku natatlawa kxfamilia tlan nataxtu, lu napaxuwakan chu nalimasiya pi lu xlakaskinka akxilha tamakgaxtokgat.
15. ¿Tuku tastakyaw masta Efesios 5:22-25?
15 Tiku tamakgaxtokgkgonit limasiyakgo pi paxtikatsinikgo tamakgaxtokgat akxni tlan lalikatsini chuna la Jesús kalikatsini congregación (kalikgalhtawakga Efesios 5:22-25). Chu lhuwa tasikulunalin makgamakglhtinankgo akxni lu lapaxkikgo chu ni mastakgo talakaskin pi nalakxla xtamakgaxtokgatkan xlakata wi tiku lanka namakgkatsikan o xlakata wi tiku tlawa tuku ni xlitlawat tiku kstalaninanin Cristo la akxni ni nalatachuwinankgo.
NITI KALAKTLAWALH TAMAKGAXTOKGAT
16. ¿Tuku xlakata makgapitsi kstalaninanin Cristo ni tamakgaxtokgkgo?
16 Maski min kilhtamaku lhuwa latamanin lakpuwanankgo natamakgaxtokgo, makgapitsi kskujni Jehová ni tamakgaxtokgkgo xlakata ni tekgskgo tiku xlakan tlan naʼakxilhkgo chu nachuna Dios. Amakgapitsi ni tamakgaxtokgkgo, chu uma kamaxki talakaskin tlakg naskujnikgo Jehová. Xlikana tiku ni tamakgaxtokgkgo napaxuwakgo pero ni nalakatsalakgo tuku Dios wanit (Mat. 19:10-12; 1 Cor. 7:1, 6, 7, 17).
17. 1) ¿Tuku wa Jesús xlakata tamakgaxtokgat nema kuenta kilitlawatkan? 2) Komo chatum kstalanina Cristo tsuku lakgati tiku tamakgaxtokgnita ¿tuku talakaskin tunkun natlawa?
17 Komo tamakgaxtokgnitaw o ni, kimputumkan nalakapastakaw uma xtachuwin Jesús: «¿Tu [ni] alikgalhtawakgayatit ntani wan, mpi wa nti ntimalakatsukunalh kxkilhtsukut, chixku, chu xawa mpuskat ntitlawakgolh? Chu na waj: “Wa cha xpalakata, mpiwa nchixku nalimakgaxtakga xtlat, chu xtsi, nawa natatalakgxtumiy xpuskat, [...] akgtum liwa nawankgoy.” Chuna mpi nialh xchatuykan, [...] watiya akgtum liwa wankgonit. Chuna mpi wantu Dios makxtum tlawalh, ni kamapapitsilh nchixku» (Mat. 19:4-6). Lakgatikan chixku o puskat tiku tamakgaxtokgnita lanka talakgalhin (Deu. 5:21). Komo chatum kstalanina Cristo natsuku makgkatsi uma tuku nitlan, talakaskin tunkun nalakgmakgan uma ni tlan talakapastakni, maski ni tlan nalimakgkatsi xlakata uma nitlan talakapastakni kstakli kxnaku (Mat. 5:27-30). Lu xlakaskinka pi nalakgmakgan nitlan talakapastakni chu ni natlawa tuku matlawiputun xaʼakgskgawini xnaku (Jer. 17:9).
18. ¿La kiliʼakxilhatkan tamakgaxtokgat?
18 Lhuwa tiku ni lu lakgapaskgo Dios o tiku ni lakgapaskgo chu ni katsikgo pi tamakgaxtokgat lu xatlan xtamaskiwin Dios limasiyakgo pi paxtikatsinikgo. Akinin tiku makamastaninitaw kilatamatkan Jehová «Dios tiku xapaxuwana» (1 Tim. 1:11, NM). Wa xlakata, ¡akinin tlakg nalipaxuwayaw putum tamaskiwin nema xla masta chu nalimasiyayaw pi lu xlakaskinka akxilhaw tamakgaxtokgat!
[Nota nema wi kpágina]
^ párr. 12 Xlakata tlakg nakatsiya xlakata tamakgaxtokgat kaʼakxilhti capítulos 10 chu 11 xla libro «Katamakgxtakgtit kxtapaxkit Dios».
[Takgalhskinin]
[Tuku wan página 16]
Akgtum tlan tamakgaxtokgat malanki Jehová chu tlawa pi lu napaxuwakgo putum familia
[Dibujo xla página 15]
Rut limasiyalh pi lu xlakaskinka akxilhli tamakgaxtokgat
[Dibujo xla página 17]
¿Limasiyaya wix pi xlakaskinka akxilha tamakgaxtokgat nema Dios lakkaxwilinit?
