¿Tuku xwa Jesús?

¿Pi tlan akxtum natawilakgo takanajla chu política? Lhuwa tiku xlikana kanajlanikgo Dios lakpuwankgo pi takanajla ni kaj tlan namakgtanu kpolítica, wata chuna xlitlawat xlakata namakgtayanan natalakkaxtlawa lhuwa taʼakglhuwit nema kgalhikgo latamanin. ¿Tuku lakpuwana wix? ¿Pi xlilat akxtum naskujkgo takanajla chu política?

WILAKGOLH tiku lakpuwankgo pi Jesucristo «tiku tlakg lichuwinankan ktakanajla». ¿Tuku lakpuwana wix pi xkgalhtinalh Jesús komo xkgalhskinkan komo tlan akxtum nalakgo takanajla chu política? ¿Xkatsiyata pi kgalhtinalh uma takgalhskinin akxni xlama kKatiyatni? Asta wa tuku lakapastaka chu limasiyalh xlakata tuku tlawalh. Kxtakgalhchuwin xalak Sipi nema lu lakgapaskan, mastalh makgapitsi tastakyaw nema nakinkamakgtayakgoyan nakatsiyaw la xlilhuwa namakgtanuyaw xlakata tuku tlawakgo kachikinin. Kalichuwinaw makgapitsi.

Namakgtanukgo kxlatamatkan amakgapitsin

Jesús wa la xliʼakxilhatkan kakilhtamaku kstalaninanin, akxni wa: «Wixin xamatsat xala katiyatna. Wa mpala pi wa matsat, xtamakgalh xlikgama, ¿tu nalimaskgokanankan? Nialh tu lilakan, wampi kaj[...] namakgankan nkilhtin nalaktayakgoy nchixkuwin. Wixin xkgakganat xala katuxawat. [...] Na chuna nama nkamakgaxkgakganalh mixkgakganatkan kxlakatin nchixkuwin lakimpi naukxilhkgoy wantu xatlan mintatlawkan, chu nalimaxkikgoy nkakni mintlatkan nti wi nkʼakgapun» (Mateo 5:13-16). ¿Tuku xlakata Jesús katamalakxtumilh matsat chu xkgakganat kstalaninanin?

Pulana, Jesús ni wa pi kstalaninanin nalitaxtukgo matsat chu xkgakganat kaj xlakata makgapitsi latamanin. Wata wa pi xlitaxtukgolh xmatsatkan putum latamanin chu xkamaxkgakgakgolh putum tiku xlakgapasputulh Dios. Uma limasiya pi Jesús ni xlakaskin pi kstalaninanin ni xtawilakgolh niku wilakgolh amakgapitsin.

¿La namakgtayanan matsat xlakata ni natalakgalhi liwat komo ni talakgwilhakan? ¿O la akgtum lámpara namaxkgakganan niku kapukswa komo ni anta wi? Wa xlakata Jesús nikxni kawanilh kstalaninanin pi xʼankgolh niku lakgamakgat chu xtlawakgolh xkachikinkan. Na ni kawanilh pi xtawikgolh niku kaj kakninanikan Dios. Xlakata matsat natlawa pi liwat ni natalakgalhi talakaskin natalakgwilhakan chu xkgakganat talakaskin natawila niku kapukswa. Nachuna kstalaninanin Cristo talakaskin pi akxtum natatawilakgo amakgapitsin xlakata tlan nakamakgtayakgo kxlatamatkan.

«Ni katuxawat ntapaksikgoy»

Umakgolh tuku wa Jesús tlawa pi makgapitsi kstalaninanin Cristo nalakpuwankgo la na akxilhkgo política. ¿Tuku xlakata? Xlakata akxni atsinu xtsankga namakgnikan Jesús, tlawalh akgtum oración xpalakata kstalaninanin chu wa uma tuku skinilh Dios: «Ni wa klipalakaskinkgoy mpala kaj namapanukgoya [o nakamaxtuya] nkatuxawat, wampi wata kaj kuintaj natlawakgoya, mpi nitu namakgspulikgo akgskgawini. Ni katuxawat ntapaksikgoy, lantla chu nkit, ni xala katuxawat» (Juan 17:15, 16). Pero ¿la xʼamakgolh kstalaninanin Cristo kamakgtayakgo kxlatamatkan amakgapitsin chu nachuna ni xmakgtanukgolh tuku xalak kakilhtamaku? Xlakata nakatsiyaw xtakgalhtin talakaskin pulana natekgsaw xtakgalhtin akgtutu takgalhskinin:

• ¿Tuku xlakpuwan Jesús xlakata política?

• ¿Tuku xlitlawatkan kstalaninanin Cristo la uku?

• ¿La kamakgtayakgo latamanin tuku masiyakgo kstalaninanin Cristo?