Xaxlikana kstalaninanin Cristo chu tlan likatsikgo kxkachikinkan

¿TUKU pulaktiy tlakg tlawalh Jesús akxni lichuwinalh Dios? Xapulana, Jesús kamakgtayalh latamanin xlakata xlakgpalikgolh xlatamatkan chu ni lakgpalilh tuku xlakkaxwilikgonit latamanin xlakata política. Kalilakapastakwi tuku lichuwinalh akxni mastalh Takgalhchuwin xalak Sipi. Akxni Jesús nina xkawani kstalaninanin pi xlitaxtukgo matsat chu kxkgakganat kakilhtamaku, kawanilh tiku xkgaxmatnimakgolh pi «wantiku katsikgo pi lakaskinkgo tuku xla Dios» lu paxuwakgo. Chu ni kajwatiya tiku chuna likatsikgo, na «tiku ni lakapala sitsikgo», «tiku skulunku wi xnakujkan» chu «tiku ni matsukikgo taʼakglhuwit» (Mateo 5:1-11, NM). Jesús xlakaskin pi pulaktiy tuku xʼakgatekgskgolh kstalaninanin: pi xʼakxilhkgolh xlimapakgsin Dios xlakata tuku tlan chu tuku nitlan chu pi xliputum xnakujkan kskujnikgolh Dios.

Xlipulaktiy, Jesús kalakgalhamalh latamanin tiku xpatinamakgolh chu kamakgtayalh. Pero ni masputulh putum tapatin nema anan kkakilhtamaku (Mateo 20:30-34). Xlikana pi kamapaksalh tatatlanin, pero ni masputulh tajatat (Lucas 6:17-19). Na tlan kamamakgkatsilh tiku nitlan tuku xkatlawanikanit pero chuntiyaku lhuwa tuku nitlan tatlawa la uku. Asta kamawilh tiku xtsinksmakgolh pero chuntiya anan lhuwa tatsinkstat (Marcos 6:41-44).

Kakamakgtayaw latamanin chu tlan kakamamakgkatsiniw

¿Tuku xlakata Jesús kalakgpalinilh xlatamatkan latamanin chu tlan kamamakgkatsinilh? ¿Tuku xlakata ni lakgpalilh tuku xlakkaxwilikgonit latamanin chu ni masputulh putum tapatin nema anan? Xlakata xkatsi pi alistalh Jehová xʼama lakkaxwili akxni xtawi xTamapakgsin (Lucas 4:43; 8:1). Wa xlakata makgtum akxni kstalaninanin xlakaskinkgo pi xlimaxtulh tlakg kilhtamaku xlakata xkamapaksalh latamanin, Jesús wa: «Kaw antani lakatsu kachikin, lakimpi na nakmakgawaniy tachuwin anta; xampi wa yuma kliminit» (Marcos 1:32-38). Xlikana, maski Jesús na xkamakgtaya latamanin akxni xpatinamakgolh, tuku tlakg xlakaskinka xakxilha wa nalichuwinan chu namasiya xlakata Dios.

La uku xtatayananin Jehová tlawakgo chuna la Jesús, masiyakgo tuku wan Biblia. Na kamakgtayakgo xtalatamanin akxni katsikgo pi wi tiku maklakaskimakgolh xlakata nialh lhuwa napatinankgo. Pero na ni lakpuwankgo pi namasputukgo tuku nitlan chu tapatin nema anan kkakilhtamaku, xlakata liwana katsikgo pi kajwatiya xTamapakgsin Dios tlan namasputu (Mateo 6:10). Wata tlawakgo tuku matlanikgo chuna la Jesús: kamakgtayakgo latamanin nalakgpalikgo xlatamatkan chu ni lakgpalikgo tuku lakkaxwilikgonit latamanin xlakata política. Xlakata tlakg laklanka taʼakglhuwit nema anan ni lakatsuku kpolítica wata lakatsuku xlakata la linkgo xlatamatkan latamanin.

Lu tlan likatsikgo kxkachikinkan

Kstalaninanin Cristo kanajlakgo pi xlakata tlan kstalaninanin Cristo nalitaxtukgo na talakaskin tlan nalikatsikgo kxkachikinkan. Wa xlakata kakgalhakgaxmatkgo chu kamaxkikgo kakni mapakgsinanin, chu kxlikgalhtawakgakan chu akxni ankgo lichuwinankgo Dios na kawanikgo latamanin chuna natlawakgo. Pero akxni mapakgsinanin skinkgo nakamaxkikan tuku Dios  lakgchan, xTatayananin Jehová ni chuna tlawakgo. Wata wankgo «pulh wa nakkgalhakgaxmataw Dios, ni xawa nchixkuwin» (Hechos 5:29; Romanos 13:1-7).

Nachuna, ankgo akgatunu chiki xlakata nakamakgalhtawakgakgo latamanin chu ni matajinankgo. Xlakata tlawakgo uma taskujut kamakgtayakgonit lhuwa millón chu umakgolh lakgpalikgonit xlatamatkan. Akgatunu kata lhuwa miles tiku tanu tanu tiku xtatalakgxtumikgo makgxtakgkgonit uma nixatlan tayat, na makgxtakgkgonit nitlan talismanin la tiku kxkuli, xwa kuchu, drogas o tiku xkgamanankgo xlakata natlajakgo tumin. Putum la uku tlan likatsikgo kxkachikinkan niku lamakgolh, tlan linkgo xlatamatkan xlakata makgantaxtimakgolh tastakyaw nema masta Biblia.

Uma tamasiy xalak Biblia na kamatliwakglha familias. Pulana, tlawa pi tlan nalatalalinkgo familia, chu tlakg nalatachuwinankgo tiku tamakgaxtokgkgonit, natlatni tlakg natachuwinankgo xkamanan chu tlan nalatalalinkgo linatalan. Chu akxni tlan latalalinkgo chu ni kgalhikgo taʼakglhuwit tlawa pi kachikinin na tliwakga natawilakgo chu ni naʼanan taʼakglhuwit.

Xlakata likgalhtawakganitata umakgolh artículos, ¿tuku lakpuwana la uku? ¿Wan Biblia pi takanajla tlan namakgtanu kpolítica? Liwana akxilhwi pi ni. Pero maski chuna, talakaskin pi kstalaninanin Cristo tlan nalikatsikgo kxkachikinkan. ¿La natlawakgo? Nalitaxtukgo la matsat chu xkgakganat xalak kakilhtamaku chuna la mapakgsinalh Jesús.

Tiku makgantaxtikgo tuku limapakgsinalh Cristo tlan kakitaxtuni, nachuna xfamilias chu kachikinin niku wilakgolh. Komo wix katsiputuna xlakata la makgalhtawakganankgo xtatayananin Jehová chu ni matajinankgo, tlan nakaputsaya anta niku wix lapat. *

[Nota nema wi kpágina]

[Tuku wan página 7]

Jesús kamakgtayalh latamanin xlakata xlakgpalikgolh xlatamatkan chu ni lakgpaliputulh tuku xlakkaxwilikgonit xlakata política

[Tuku wan página 8]

Xtatayananin Jehová katsikgo pi xlakata tlan kstalaninanin Cristo nawankgo talakaskin tlan nalikatsikgo kxkachikinkan