Tuku nakamakgtaya familias

Akxni chatum kgawasa lakpuwan pi ni xlikana tuku kanajlakgo xnatlatni

Akxni stakkgo kamanan, lhuwa na wa stalanikgo xtakanajlakan xtlatkan (2 Timoteo 3:14). Pero ni putum chuna tlawakgo. ¿Tuku natlawaya komo minkgawasa nialh liwana katsi komo xlikana tuku masiyani xlakata mintakanajla? Kaʼakxilhwi la tlawakgo xtatayananin Jehová.

«Nialh kkataʼamputum kxtakanajlakan kinatlatni. Klakpuwan pi ni anta kilianat.» (Cora, 18 kata kgalhi) *

WIX liwana katsiya pi mintakanajla masiya tuku xaxlikana xlakata Dios chu kanajlaya pi Biblia makgtayanan tlan nalipina milatamat. Wa xlakata namasiyaniputuna minkgawasa (Deuteronomio 6:6, 7). * Pero ¿komo akxni staktilhama nialh nalakgati tuku kanajlaya? ¿Tuku natlawaya komo nawaniyan pi ni xlikana tuku kanajlaya maski lu xlakgati akxni aktsinajku xwanit? (Gálatas 5:7.)

Komo chuna nala kminchik, ni kalakpuwanti pi ni liwana masiyani minkgawasa, chuna la naʼakxilhaw max wi atanu tuku lakgpalilh xtapuwan. Pero kalakapastakti pi chuna la nakgalhtiya minkgawasa natlawa pi natalakatsuwipara o natamakgatli ktakanajla. Kalakapastakti pi komo xafuerza nalipimputuna ni katitayani namakgatlajayan (Colosenses 3:21).

Akxni chuna kitaxtu, tlakg tlan chuna natlawayaw la wan apóstol Pablo: «Xlakskujni kimpuchinakan ni talakaskin natalatlawanan, wata putum tlan nakalikatsini, xatlan makgalhtawakgana nawan chu ni lakapala nasitsi» (2 Timoteo 2:24, La Palabra de Dios para Todos). ¿La nalimasiyaya pi wix xatlan «makgalhtawakgana», komo minkgawasa ni kanajla tuku wix kanajlaya?

Skgalala kawanti

Kaʼakxilhti tuku xlakata minkgawasa chuna lakpuwan. Kaʼakxilhwi tuku max chuna tlawa:

▪ ¿Max xakstu makgkatsikan xlakata ni kgalhi amigos kcongregación? «Xaklakaskin tiku kiʼamigo  xwa. Chu anta ktekgsli kʼescuela. Pero uma tlawalh pi akglhuwa kata nialh tliwakga xtawi kintakanajla. Tuku tlawalh pi nialh xakputsalh tuku xla Dios, wa tiku xakkatalalin. La uku lu nitlan klimakgkatsi.» (Leonor, tiku kgalhi 19 kata.)

▪ ¿Max lakpuwan pi ni liwana katsi tuku kanajla chu wa xlakata nila kgalhmakgtaya xtakanajla? «Kʼescuela lu tuwa xakmakgkatsi nakkalitachuwinan kincompañeros kintakanajla. Ni xaklakaskin pi tanu xkiʼakxilhkgolh chu “xakmalakatsalima”. Xlakata xkalakgmakgankan tiku tanu xlikatsikgo chu akit ni xaklakgati nachuna xkilikatsinikgolh.» (Ramón, tiku kgalhi 23 kata.)

▪ ¿Max pekuan komo ni namakgantaxti tuku xlitlawatkan kstalaninanin Cristo? «Akit kakxilha latamat nema ni kgalhi xlisputni la xakilhaklhuwa chiki chu aku ktsukuma tawaka. Lu kpekuan naktawaka wa xlakata klakpuwama nakmakgxtakga kintakanajla.» (Renee, tiku kgalhi 16 kata.)

Katachuwinanti

¿Chu minkgawasa? ¿Tukuya taʼakglhuwit titaxtuma? Kakgalhskinti xlakata tlan nakatsiya. Kuenta katlawa la nawaniya xlakata ni nalatalatlawayatit. Santiago 1:19 wan pi “liwana nakgaxmataw, ni lu lakapara nachuwinanaw chu ni lu lakapara nasitsiyaw”. Wa xlakata, kalimaxtuni kilhtamaku chu “lu lakatsuku kamasiyani” (2 Timoteo 4:2).

Akgtum liʼakxilhtit, komo minkgawasa ni amputun ktamakxtumit, kakgalhskinti tuku xlakata. Kaʼakxilhti uma, niku chatum tlat nitlan la kitaxtuni:

—Xkgawasa wan: nialh klakgati kan ktamakxtumit.

—Xatlat nitlan kgalhti: ¡¿Tuku xlakata wana pi ni lakgatiya?!

—Lu klakgachani kintlat.

—¿Wamputuna pi lilakgachanikan Dios? ¿Chuna lakpuwana? ¡Nila kkanajla tuku kiwanipat! Xlakata unu kilatawilaw napina ktamakxtumit maski lakgatiya o ni lakgatiya.

Anta kBiblia kawanikan natlatni pi kakalitachuwinankgolh Dios xkamanankan chu kamanan kawanikan pi kakgalhakgaxmatnankgolh (Efesios 6:1). ¿Lakaskina pi minkgawasa kaj xafuerza kaskujnilh Dios chu xafuerza naʼan ktamakxtumit? Xlikana pi wix lakaskina pi chuna natlawa xlakata xlakaskinka akxilha chu lakgati.

Chuna nakitaxtu komo nakatsiya tuku xlakata ni lakgati. Kaʼakxilhti tuku xlitlawat xwanit xatlat nema tachuwinalh xkgawasa.

—Xkgawasa wan: nialh klakgati kan ktamakxtumit.

—Xatlat liwana kgalhskini: ¿Tuku xlakata kinkgawasa?

—Lu klakgachani kintlat.

—Kakgatekgsa tuku kiwanipat xlakata lakgachanikan kaj natawilaya akgtum o akgtiy hora. ¿Tuku tlakg lilakgachipiniya?

—Nikkatsi. Max alakatanu niku kamputun.

—¿Nachuna kaʼakgspula mi amigos?

—¿Amigos? Akxni alh kiamikgo nialh tiku ktachuwinan. Putum paxuwakgokan pero akit ni. Niti kuenta kintlawani.

 Akxni xatlat maxki talakaskin xkgawasa pi kachuwinalh ni kajwatiya katsi la makgkatsi, pi xʼakstu makgkatsikan, wata na tlawa pi nalipawan xtlat. Uma natlawa pi alistalh xkgawasa nawani la makgkatsi (kaʼakxilhti recuadro «Ni lakapara kasitsi»).

Lhuwa lakgkgawasan alistalh akgatekgskgo pi komo ni namastakgo talakaskin pi nitu namachokgo la stakma xtakanajlakan, max alistalh tlan namakgkatsikgo chu nakatsikgo pi xlikana niku ankgo. Kalichuwinamparaw Ramón. Uma kgawasa xpekuan akxni xlakpuwan pi nakawani xcompañeros pi kstalanina Cristo xwanit. Pero, alistalh katsilh pi ni lu lipekua xwanit, maski xlilitsinkgolh amakgapitsin.

Xla wan: «akgtum kilhtamaku, chatum kgawasa kilikgalhkgamanalh xlakata kintakanajla. Lu kmaxanalh chu xaklakpuwan pi putum xkinkaʼakxilhmakgon. Pero klakgpalinilh tuku xkiwanima chu akit kkgalhskilh xlakata xtakanajla. ¡Nila xakmakanajla akxni kakxilhli pi xla tlakg pekualh! Kkatsilh pi lhuwa lakgkgawasan kgalhikgo xtakanajlakan pero ni akgatekgskgo. ¡Akit kkatsi tuku kkanajla! Wata xlakan xlipekuanatkan chu ni akit».

¿TLAN XTLAWA UMA? Kakgalhskinti minkgawasa la lakpuwan xlakata kstalanina Cristo wankan chu kakgaxpatti tuku nawaniyan. ¿Lakpuwan pi makgtaya? ¿Chu tukuya taʼakglhuwit nalikgalhi? ¿Tuku tlakg xlakaskinka akxilha taʼakglhuwit nema nalikgalhi o tuku tlan nakitaxtuni? ¿Tuku xlakata? (Marcos 10:29, 30.) Katsokgli tuku lakpuwan minkgawasa chu pulaktiy katlawalh: tanu nawili tuku likgalhi taʼakglhuwit chu atanu nawili tuku makgtaya. Akxni naʼakxilha tuku tsokgli, max xakstu naʼakxilha tukuya taʼakglhuwit kgalhi chu naputsa la nalakkaxtlawa.

Kamasiyani xakstu nalakapastaknan

Natlatni chu tiku katsikgo xlakata kamanan akxilhkgonit pi nichuna lakapastakkgo lakgkgawasan chu laktsu kamanan (1 Corintios 13:11). Tuku nakawaniya laktsu kamanan wa tlawakgo. Pero tiku tlakg laklankata xakstukan lakapastaknankgo. Akgtum liʼakxilhtit, max tiku aktsinajku tlan nawanikan pi wa Dios tiku tlawalh putum tuku anan (Génesis 1:1). Pero max chatum kgawasa tlakg nakatsiputun. Max xakstu nakgalhskinkan: «¿Tuku naklikatsi pi Dios xlikana lama? Komo Dios xapaxkina,  ¿tuku xlakata masta talakaskin kaʼanalh tuku nitlan? ¿Tuku xlakata Dios putum kilhtamaku wi?» (Salmo 90:2).

Max umakgolh takgalhskinin namalakpuwanikgoyan pi nitu stakma xtakanajla minkgawasa. Pero uma wamputun pi stakma xtakanajla, xlakata akxni tlawanikan uma takgalhskinin makgtaya xlakata tlakg nastaka xtakanajla (Hechos 17:2, 3).

Minkgawasa katsinima maklakaskin “xtalakapastakni” (Romanos 12:1, 2). Uma namakgtaya xlakata “naʼakgatakgsa xlititlanka, chu xlilhman, chu lantla xlipulhman, chu lantla xlitalhman” nixawa akxni aktsinajku xwanit (Efesios 3:18). La uku tlakg namakgtayaya kxtakanajla xlakata liwana nakatsi tuku kanajla (Proverbios 14:15; Hechos 17:11).

¿TLAN XTLAWA UMA? Kalitachuwinanti minkgawasa tuku lakpuwanatit pi ni tuwa. Tlan nawaniya pi kakgalhskinka: «¿Tuku kimakanajli pi wi Dios? ¿Tuku kimasiyani pi kinpaxki Dios? ¿Tuku xlakata kimakgtaya komo nakkgalhakgaxmata xlimapakgsin Dios?». Ni katamaknuniputu mintalakapastakni; wata, kamakgtaya xlakata xakstu nalakapastaknan. Chuna, tlakg ni tuwa namakgkatsi nakanajla.

Kamakgtaya xlakata liwana nakanajla

Anta kBiblia wan pi chatum kstalanina Cristo wanikan Timoteo xkatsi xlimapakgsin Dios lata akxni “skgataku” xwanit. Maski chuna Pablo wanilh: «Tliwakglh katapini yuma ntu nkatsininita, chu na luwa lakatanks kanajlanita» (2 Timoteo 3:14, 15). Max minkgawasa chuna la Timoteo, katsinilh tuku wan Biblia akxni aktsinajku xwanit. Pero la uku milimakgtayat xlakata xakstu nalakapastaka tuku kanajla.

Libro Lo que los jóvenes preguntan. Respuestas prácticas (volumen 1) wan: «Xlikana pi akxni minkgawasa katawilanku kminchik, tlan naskiniya pi na kamakgtlawalh tuku xla Dios. Pero ni kaj wa natlawa tuku nawaniya, wata xlipaxkit xMalakatsukina». Chuna, tlan namakgtayaya minkgawasa xlakata tliwakga natawila xtakanajla. Chu wa uma takanajla tuku namakgtaya xlakata nakakninani Dios chuna la masiyaninita (1 Pedro 5:9). *

[Notas nema wilakgo kpágina]

TAKGALHSKININ NEMA KINKAMALAKAPASTAKNIYAN

▪ ¿La kkgalhti kinkgawasa akxni kinkgalhskini xlakata kintakanajla?

▪ ¿La nakimakgtaya uma artículo xlakata aktanks nakkgalhti?

[Recuadro xla página 21]

¿Kaj kaʼakgskgawimikan?

Tuku nitlan lakpuwankgokan: Xtatayananin Jehová kamafuerzalinikgo xkamanankan, na xtatayananin Jehová nawankgo.

Tuku xaxlikana: Xtatayananin Jehová kamasiyanikgo napaxkikgo Dios xkamanankan chuna la wan Biblia (Efesios 6:4). Pero katsikgo pi akxni nastakkgo xakstukan nalaksakkgo tuku nakanajlakgo (Romanos 14:12; Gálatas 6:5).

[Recuadro/Dibujo xla página 22]

Ni lakapara kasitsi

Max akxni natachuwinana minkgawasa natalakaskin ni lakapara nasitsiya. Pero lu tlan kitaxtu komo chuna natlawaya, xlakata nawaniyan tuku makgkatsi. Chatum tsumat wan: «Akgtum tsisni kwanilh kintlat tuku nixkatsi, pi xakkgalhi kilitatawilat chu akgtum página kʼInternet niku xakkgalhi lhuwa amigos, chu na kwanilh pi xaktaxtuputun kkinchik. Pero ni para tsinu limasiyalh pi ksitsinit. Akit klakpuwan pi ni lu anankgo natlatni tiku ni lakapala sitsikgo akxni xtsumat wani pi makgasa talatsukma chatum kgawasa chu tsokgnani. La uku kkatsi pi putum tlan nakwani chu kkatsi pi xlikana nakimakgtaya».

[Recuadro/Dibujo xla página 23]

Talakaskin tiku nastakyawanan

Lakgachunin tlan kakitaxtuni kamanan akxni kamakgtaya tiku lina kata pero ni xalak xfamilia. ¿Lakgapasa tiku lu tliwakga wi xtakanajla chu tlan namakgtaya minkgawasa? ¿Tlan xputsa kilhtamaku xlakata tlan xtachuwinalh min kgawasa? ¿Tlan xputsa kilhtamaku xlakata tlan xtachuwinalh? Uma ni wamputun pi wix nialh katimakgtaya minkgawasa. Kalakapastakti Timoteo. Xlakata tlan xtalalin Pablo lu makgtayalh, chu Pablo na lu makgtayalh xlakata Timoteo xtalalin (Filipenses 2:20, 22). *

[Nota nema wi kpágina]