Tiku likgalhtawakgakgo katsiputunkgo

¿Tuku xlakata xtatayananin Jehová ankgo kʼakgatunu chiki?

▪ Anta kBiblia likgalhtawakgayaw pi Jesús kawanilh uma tachuwin kstalaninanin: «Kapitit, na kamasiyunikgotit xlipaks akgmakgat chixkuwin, [...] namasiyunikgoyatit mpi natlawakgoy xlipaks yuma ntu kkalimapakgsinitan» (Mateo 28:19, 20). Pero ¿putum kstalaninanin Cristo xlitlawatkan uma limapakgsin? Xapulana kstalaninanin Cristo chuna akgatekgskgolh. Wa xlakata apóstol Pedro wa: «[Jesús] na kintikalimapakgsin nakakgchuwinanikgoyaw [«putum», NM] ntachixkuwitat» (Hechos 10:42). Chu apóstol Pablo na tsokgli: «Pus ni lay atipatu ntu naktlaway; na kgoxuta nkit lapi ni xakliakgchuwinalh yuma xatlan tamakatsinin» (1 Corintios 9:16).

Ni kaj Pedro chu Pablo lichuwinankgolh Dios. Xapulana kstalaninanin Cristo xputumkan chuna xtlawakgo. Wa pulana xwilikgo kxlatamatkan (Hechos 5:28-32, 41, 42). La uku xtatayananin Jehová nachuna tlawakgo: lichuwinankgo «xtapakgsin akgapun» nema lichuwinalh Jesús (Mateo 10:7).

¿Tiku nakalinikan ama tamakatsinin? Putum latamanin. Jesús wa: «Nalichuwinanatit [...] nkimpalakata, [...] asta awatiya [niku kichan tiyat]» (Hechos 1:8). Nachuna wa pi akxni nina chin nawan xlisputni uma kakilhtamaku «na xapulh taliʼakgchuwinanit nawan xlikatlanka nkatuxawat yuma xatlan tamakatsinin xla tapakgsin» (Mateo 24:14). Xlakata xlinkgo uma talakapastakni, xapulana kstalaninanin Cristo ni kajwatiya xkatachuwinankgo tiku xkalakgapaskgo o tiku nitu xkgalhikgo xtakanajlakan. Wata kalinikgolh xtachuwin Dios putum latamanin (Colosenses 1:23; 1 Timoteo 2:3, 4). Nachuna tlawakgo xtatayananin Jehová. *

¿Tuku kamakgtaya tlakg nalichuwinankgo xTamapakgsin Dios? Jesús xkatsi la xtlawa xlakata lhuwa latamanin xkatsikgolh xtachuwin Dios, wa xlakata kamalakgachalh kstalaninanin klaklanka kachikinin, laktsu kachikinin chu kʼakgatunu chiki (Mateo 10:7, 11, 12). Akxni nilh chu lakastakwanalh Jesús, kstalaninanin chuntiya lichuwinankgolh Dios «kʼakgatunu chiki» (Hechos 5:42, Hua Xasasti Talaccaxlan, TXS, 1999). Chuna xtlawakgo la Cristo, xkatachuwinankgo niku lhuwa xʼanankgo latamanin chu niku xkatatanokglhkgo (Juan 4:7-26; 18:20; Hechos 17:17). Xtatayananin Jehová nachuna tlawakgo la uku.

Pero, Jesús wa pi lhuwa latamanin ni xʼamakgo kgaxmatkgo (Mateo 10:14; 24:37-39). Pero ¿kstalaninanin Cristo nialh xlichuwinankgolh xtachuwin Dios? Kalakpuwanti pi tachikilh tiyat chu wix makgtayanampat xlakata nakatekgskan tiku taʼakgtalatamakgonit. ¿Nialh xkaputsa amakgapitsin kaj xlakata ni lhuwa katekgskanit? Xlikana pi chuntiya xkaputsa. Xlikana chuntiya xmakgputsa maski kaj chatum tiku xlakgmaxtu. Nachuna, Jesús kalimapakgsilh kstalaninanin chuntiya xkaputsakgolh latamanin xlakata wijku tiku nakgaxmatkgo uma tamakatsinin (Mateo 10:23; 1 Timoteo 4:16). Akxni xtatayananin Jehová kaputsakgo latamanin kxchikkan limasiyakgo pi paxkikgo Dios chu xtalatamankan. Katsikgo pi nalakgmaxtukgo xlatamatkan latamanin komo nalakgapaskgo chu nakgaxmatkgo tuku wan Biblia (Mateo 22:37-39; 2 Tesalonicenses 1:8).

Revista nema chipanita limin uma tamakatsin. Komo tlakg katsiputuna tlan nakakgalhskina xtatayananin Jehová akxni nalakgankgoyan o tlan nakatsokgnaniya tiku tlawakgo uma revista.

[Nota nema wi kpágina]