Katalakatsuwini Dios

Akxni Dios tapatinan, nialh lakapastaka

¿XLIKANA uma? Tlan nawanaw pi xlikana. Jehová kawani kskujnin: «Naktapati tuku nitlan tlawalh, chu nialh naklakapastaka xtalakgalhin» (Jeremías 31:34). Chuna kinkawaniyan pi akxni tapati makglakgalhinanin tiku nialh tlawakgo talakgalhin, nialh lakapastaka xtalakgalhinkan. Pero, ¿wamputun pi tiku Malakatsukilh putum kakilhtamaku nila lakapastaka talakgalhin nema katapatinit latamanin? Xtachuwin palakachuwina Ezequiel kinkawaniyan tuku kilhchanima akxni wan pi Dios tapati chu nialh lakapastaka talakgalhin. (Kalikgalhtawakga Ezequiel 18:19-22.)

Jehová tlawalh pi palakachuwina Ezequiel xkawanilh tuku xʼama katlawani Judá chu Jerusalén. Xmakgxtakgkgonit xaxlikana takanajla chu lu xlachipakgo. Jehová xlichuwinanita pi babilonios xmalakgsputukgolh Jerusalén, pero na kawanilh pi: chatunu chatunu xʼamaka kamalakgaxokgekan chuna la xlamakgolh (versículos 19 chu 20).

¿Tuku xlalh komo wi tiku xtlawama tuku nitlan chu xlakgpalilh xtayat? Kʼversículo 21, Dios wa: «Komo tiku lixkajni likatsi, nalakgpali putum xtayat chu natlawa kilimapakgsin chu tuku xaʼakgstitum chuntiya nalatama. Ni katinilh». Chuna la akxilhaw Jehová xʼama «katapati» tiku xlakgpalilh xtayat chu xtiyalh xatlan tiji (Salmo 86:5, NM).

¿Chu talakgalhin nema xtlawanit? Kʼversículo 22 kinkawaniyan: «Putum xtalakgalhin nema tlawanit... nialh katilakapastaknika xlakata nalimalakgaxokgekan». ¿Tuku wamputun tachuwin «nialh katilakapastaknika»?

Chatum tiku kgalhtawakga xlakata takanajla wan pi kxahebreo tachuwin «lakapastakkan» ni kajwatiya wamputun lakapastakkan tuku tilalh, «wata na wamputun tlawakan tuku lakapastakkan: lakapastakkan chu tlawakan watiya wamputun». Wa xlakata, «lakapastakkan» na kilhchani «tlawakan». Wa xlakata Jehová nialh katilakapastakli xtalakgalhin tiku nialhtu tlawama talakgalhin nialhtu katitlawanilh, xlakata nialhtu katiliwanilh tuku titlawalh o namalakgaxokge xtalakgalhin. *

Lu tlan kinkamamakgkatsiniyan tuku wan kʼEzequiel 18:21 chu 22 limasiya la Jehová kinkatapatiyan. Komo Dios wi tiku tapati xtalakgalhin chu nialh tlawa nikxni lakapastaknipara. Wata xtachuna la kxchakgen makgxtakgcha (Isaías 38:17). Xapa kintalakgalhinkan chu nialh lakapastaka (Hechos 3:19).

Kimputumkan lakaskinaw xtalakgalhaman Dios, xlakata makglakgalhinanin akinin, chu makglhuwa tlawayaw tuku nitlan (Romanos 3:23). Pero Jehová lakaskin pi nakatsiyaw pi xla nakinkatapatiyan komo xlikana namakgxtakgaw tuku nitlan. Akxni tapatinan nialh lakapastaka, uma wamputun nialh kinkamalakapastakayan o nakinkamalakgaxokgeyan kintalakgalhinkan tuku titlawaw. ¡Lu tlan limakgkatsiyaw! ¿Lakgtalakatsuwiputuna uma Dios tiku lu xapaxkina?

Textos xalak Biblia nema tlan nalikgalhtawakgaya uma papaʼ:

◼ Ezequiel 6 asta 20

[Nota nema wi kpágina]