«Akxni natlawayatit mioracionkan, nawanatit: Kintlatikan»

¿Tuku lakapastaka akxni kgaxpata tachuwin tlat? ¿Chatum chixku tiku xapaxkina tiku lakaskin pi tlan katawi xfamilia o chatum tiku ni kuentajtlawa xfamilia chu asta max kawilini? Chuna namin kmintalakapastakni la xlikatsi mintlat.

JESÚS xlimaklakaskin tachuwin tlat akxni xtachuwinan Dios o akxni xlichuwinan. * Asta akxni xkamasiyani kstalaninanin la xtlawakgolh oración, kawanilh: «Akxni natlawayatit mioracionkan, nawanatit: kinTlatikan» (Lucas 11:2). ¿Chu la likatsi kintlatkan Jehová? Uma lu xlakaskinka nakatsiyaw, akxni tlakg liwana katsiyaw la likatsi kintlatkan, tlakg paxkiyaw.

Xlikana pi kaj wa Jesús tiku tlakg tlan nakinkawaniyan la likatsi kinTlatkan xalak akgapun. Xla putum kilhtamaku lu tlan talalinit Jehová. Wa xlakata tlan wa: «Tini lakgapasnit xaKam, wampi xman wa xaTlat; chu na tini chatum lakgapasnit xaTlat, wampi xman wa xaKam; chu xman wa  yama nalakgapasa wa nti xmasiyuniputulh xaKam» (Mateo 11:27). Wa xlakata, talakaskin nakgalhakgaxmataw xaKgawasa xlakata nalakgapasaw xaTlat.

¿Chu tuku kinkawaniyan Jesús xlakata Jehová? Jesús wa: «Lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliankgaIhin» (Juan 3:16). Uma tachuwin limasiya xtayat kinTlatkan nema tlakg kinkalimasiyaniyan: tapaxkit (1 Juan 4:8). Pulaklhuwa la kinkalimasiyaniyan tapaxkit: tlan kinkaʼakxilhan, kinkalakgkatsanan chu kinkalakgalhamanan, kinkamakgtayayan, kinkastakyawayan chu kinkamaxkiyan tuku maklakaskinaw.

Tlan kinkaʼakxilhan

Akxni natlatni kawanikgo xkamanankan akxni tlawakgo tuku tlan, kalimatliwakglhkgo chu tlan limakgkatsikgo. Kalakpuwanti la xlilhuwa paxuwalh Jesús akxni wa xTlat: «Wa yuma nkinKam nti luwa kpaxkiy, wanti luwa klimakgapaxuwakan» (Mateo 3:17). Jesús kinkawaniyan pi Jehová kinkapaxkiyan chu tlan kinkaʼakxilhan. Xla wan: «Wa nti nkimpaxkiy, na napaxkiy nkinTlat» (Juan 14:21). ¿Nixlikana pi kinkamatliwakglhan chu tlan kinkamamakgkatsiniyan uma? Pero, wi chatum tiku ni lakaskin pi kakinkapaxkin Jehová.

Satanás lakaskin kalakpuwaw pi Jehová ni xlakaskinka akxilha tuku tlawayaw. Kinkamalakpuwaniputunan pi ni kinkalakgchanan tlan nakinkaʼakxilhan Dios chu limaklakaskin tuku tuwa titaxtuyaw la takgolot, tajatat, chu akxni wi tuku nitlan kinkataxtuniyan o akxni kinkaʼakgskgawikanan. Kalichuwinaw Lucas, tiku xlakpuwan pi ni xlakgchan tlan xʼakxilhli Dios. Akxni aktsinajku xwanit, akxilhli akxni xnatlatni makgxtakgkgolh tuku xla Dios nema xmasiyanikgonit. Max tuwa mamakgkatsinilh xlakata tlan xtalalilh xTlat xalak akgapun. Nachuna, lu lakapala xsitsi chu xkatakgalhi taʼakglhuwit amakgapitsin. Pero xlakata ni litlakgwalh xpuskat chu makgtayalh tsinu tsinu tsukulh lakgpali xtayat chu «lu lanka xtapalh chu xtamaskiwin Dios» liʼakxilha xpuskat. Alistalh, Lucas akxilhli pi «nCristo Jesús, kichilh nkatuxawat lakimpi namakgaputaxtikgoy lakgalhinanin» (1 Timoteo 1:15). Lu paxuwa akxni lakapastaka pi Jehová paxki chu tlan akxilha.

Komo xlakpuwanti pi Jehová ni paxkiyan chu nikxni katimakgapaxuwa, kalakpuwanti tuku wan Romanos 8:31-39. Apóstol Pablo anta kinkawaniyan pi «ni mpala wa nkatuwaj tamalakatsukun, ntlan nakinkamalakapanuyan kxtapaxkit Dios wa ntu nkgalhiyaw xpalakata Cristo Jesús nkimPuchinakan». *

Kinkalakgkatsanan chu kinkalakgalhamanan

Kintlatkan xalak akgapun chatum Dios «xlitsatata xtalakgalhaman» chu akgatekgsa kintapatinkan (Lucas 1:78). Jesús limasiyalh xtalakgalhaman xTlat chuna la kalikatsinilh latamanin (Marcos 1:40-42; 6:30-34). Chu xaxlikana kstalaninanin Cristo na liskujkgo xlakata chuna natlawakgo la Jehová. Lu xlakaskinka akxilhkgo limapakgsin xalak Biblia niku wa «tlan nkalikatsinitit nchatunu amakgapitsin, nalalakgalhamanatit» (Efesios 4:32).

Kalakpuwaw tuku lanilh Felipe, akgtum kilhtamaku akxni xʼama skuja, lu tsukulh stipukatsan la kaj stipulhtukuka makgkatsilh. Tunkun linka khospital. Akxni akgtsayan hora titaxtulh makuchinanin wankgolh pi xachalanka kxnujut xtapulakxtitnit. Wanika pi kaj puxamakitsis minuto xkgalhi xlatamat chu nialhtu xlitaxtulh maski xchukuka.

Felipe xtaʼankgo makgapitsi xnatalan tiku na kstalaninanin Cristo xwankgonit. Chu  xlakata lu lakgalhamankgolh, linkgolh kʼatanu hospital niku tunkun tamaknuka kquirófano. Kgalhkgalhikgolh asta akxni chukukgoka, chu lu tlan kitaxtulh. Felipe lu paxtikatsini xlakata xnatalan lakgalhamankgolh. Pero na liwana katsi pi wa xTlat xalak akgapun tiku kamalakpuwanilh xnatalan chuna xtlawakgolh. Lakapastaka: «Kmakgkatsilh pi putum kilhtamaku xkintawi Dios, xkimatliwakglhma la chatum tlat xapaxkina». Chu Jehová limasiya xtalakgalhaman akxni kamalakpuwani kskujnin pi nachuna kalikatsikgolh.

Kinkamakgtayayan

Akxni chatum aktsu kgawasa makgkatsi pi wi tuku nalani, lakapala lakgan xtlat xlakata katsi pi nitu katilanilh komo anta natatawila xtlat. Jehová kamakgtaya xkamanan chu Jesús lu xlipawan xtamakgtay (Mateo 26:53; Juan 17:15). Akinin na tlan natekgsaw xtamakgtay kinTlatkan xalak akgapun. La uku, wa tlakg kuentajtlawa kintakanajlakan. Kinkakuentajtlawayan akxni kinkamaxkiyan putum tuku maklakaskinaw xlakata nitu nalaniyaw chu tuku natlawa pi nialh tlan natalalinaw. Jehová na kinkamaxkiyan xTachuwin, Biblia. Akxni kgaxmataw xtastakyaw nema min kBiblia xtachuna la xkinkawanin Jehová: «Wa uma tiji. Anta katlawantit» (Isaías 30:21).

Chatum kgawasa wanikan Tiago nema xkatatlakgnan akgtum grupo xla rock nema na anta xmakgtanumakgoh xnatalan, Fernando chu Rafael. Lu paxuwakgolh akxni katsikgolh pi xʼamakgo tlakgnankgo kʼakgtum auditorio nema lu xlakgapaskan kSão Paulo (Brasil). Xtasiya pi tlan xkakitaxtunilh. Pero, chatum tala kawanilh pi katalalinkan tiku ni linkgo xlatamatkan chuna la kstalaninanin Cristo nitlan xkakitaxtunilh (Proverbios 13:20). Anta kBiblia kilhtilh uma tuku kawanilh nema xla xʼakxilhnit pi chuna kitaxtu. Xlakata xtala xkatalalin tiku ni xkakninanikgo Jehová tlawalh talakgxtumit xalimaxana. Tiago chu xnatalan makgxtakgkgolh tatlakgni. La uku xkgalhtutukan tlakg lichuwinankgo Dios. Liwana katsikgo xlakata stalanikgolh xtastakyaw xtachuwin Dios kamakgtayalh xlakata nitu xlanilh xtakanajlakan.

Kinkastakyawayan

Chatum tlan tlat lilakgaputsa la nalikatsikgo xkamanankan akxni nastakkgo chu wa xlakata kastakyawa (Efesios 6:4). Tliwakga xtastakyaw pero ni lixkajni kalikatsini. Nachuna, min kilhtamaku kinTlatkan xalak akgapun akxilha pi talakaskin nakinkastakyawayan. Pero, ni lixkajni kinkalikatsiniyan,  putum kilhtamaku limasiya tapaxkit akxni kinkastakyawayan. Chuna la xTlat, Jesús nikxni kakilhnilh kstalaninanin, asta akxni lakgchalh kastakyawalh chu ni lakapala tlawakgolh tuku kawanika (Mateo 20:20-28; Lucas 22:24-30).

Kaʼakxilhwi tuku titaxtulh Ricardo, tiku akgatekgsli pi Jehová kstakyawanit xlakata paxki. Akgxtakgwililh xtlat akxni kajku akgtujun papaʼ xkgalhi. Akxni tsukulh staka xmaklakaskilh chatum tlat chu tsukulh tlawa tuku nitlan. Akxni katsilh pi xtlawama tuku Biblia wan pi nitlan, nitlan tsukulh mamakgkatsini xtalakapastakni. Wa xlakata, katachuwinalh lakgkgolotsin xalak congregación, chu xlakan lakatanks stakyawakgolh chu limasiyanikgolh tapaxkit, tastayaw nema maxkikgolh kilhtikgolh kBiblia. Maski makglhtinalh chu paxtikatsinilh tastakyaw, Ricardo chuntiya nitlan xlimakgkatsi tuku xtlawanit: lu xtasa, lhuwa tsisni ni klhtata chu lu lipuwa. Alistalh Hebreos 12:6 niku wan pi «nkimPuchinakan, wanti mpaxkiy, akgastakyaway» makgtayalh xlakata xʼakgatekgsli pi Jehová kstakyawanit xlakata xpaxki.

Kalakapastakwi pi akxni kinkastakyawakanan ni kajwatiya akxni kinkamalakgaxokgekanan. Biblia tamalakxtumi akxni kinkamasiyanikanan. Min kilhtamaku, kinTlatkan xalak akgapun kinkastakyawayan akxni masta talakaskin pi napatiyaw tsinu kilhtamaku xlakata tuku tlawaw. Pero Biblia wan pi kaj kinkamamakgatawakgeman, wamputun, kinkamasiyaniyan xlakata xaʼakgstitum nalinaw kintijikan (Hebreos 12:7, 11). Xlikana, Jehová lakaskin pi tlan kalatamaw chu wa xlakata kinkastakyawayan.

Kinkamaxkiyan tuku maklakaskinaw

Xatlan tlat kuenta tlawa nakamaxki tuku maklakaskin xfamilia chu Jehová nachuna tlawa. Jesús wa: «minTlatkan xalak kʼakgapun katsi pi putum uma maklakaskinatit» (Mateo 6:25-34). Nachuna, Jehová malaknu: «Ni lhtuj kaktimakgaxtakgni, na ni kaktimakgaxtakgni» (Hebreos 13:5).

Chatum puskat wanikan Nice katsilh pi xlikana uma tachuwin akxni xchixku makgatsankgalh xtaskujut. Xla aku xmakgxtakgnit xtaskujut niku lu tlan kxokgonikan xlakata tlakg lhuwa kilhtamaku xkatatawi chatiy xlaktsuman chu tlakg xlichuwinalh Dios. ¿Tuku xʼamakgo liwayankgo? Nice, skinilh xtamakgtay Jehová, chu lichali akxni xchixku alh tiya kxtaskujut tuku xla xwanit, xmalana maxkipa taskujut. Wa xlakata xchixku Nice nipara akgtum kilhtamaku makgatsankgalh xtaskujut chu xchatiykan paxtikatsinikgo Jehová. Liʼakxilhtit la umakgolh kinkamalakapastakayan pi Jehová kinkapaxkiyan chu putum kilhtamaku kinkamaxkiyan tuku maklakaskinaw.

Kapaxtikatsiniw xtapaxkit kinTlatkan

Nila wankgoyaw la xlilhuwa kinkapaxkiyan kinTlatkan. Xla tlan kinkaʼakxilhan, kinkalakgkatsanan chu kinkalakgalhamanan, kinkamakgtayayan, kinkastakyawayan chu kinkamaxkiyan tuku maklakaskinaw. ¿Nixlikana pi putum uma limasiya pi wa tlakg xatlan Tlat?

Pero ¿la napaxtikatsiniyaw xtapaxkit Jehová? Pulana, kiliskujatkan xlakata tlakg liwana nalakgapasaw chu nakatsiyaw tuku lakpuwanit natlawa (Juan 17:3). Na nalilatamayaw xtalakaskin (1 Juan 5:3). Na nalimasiyayaw tapaxkit chuna la kalikatsiniyaw amakgapitsin (1 Juan 4:11). Akxni chuna tlawayaw, limasiyayaw pi xlikana kinTlatkan akxilhaw Jehová chu lu xlakaskinka akxilhaw pi xkamanan akinin.

[Notas nema wilakgo kpágina]

[Tuku wan página 19]

Akxni tlakg liwana akgatekgsaw la likatsi kintlatkan Jehová, tlakg napaxkiyaw

[Tuku wan página 22]

Tlan nalimasiyaniyaw Jehová pi xlikana la kintlatkan akxilhaw chu lu xlakaskinka akxilhaw pi xkamanan akinin

[Dibujo chu recuadro xla 21]

PULAKLHUWA LA LIMASIYA JEHOVÁ PI PAXKINANAN

TLAN KINKAʼAKXILHAN

KINKALAKGKATSANAN CHU KINKALAKGALHAMANAN

KINKAMAKGTAYAYAN

KINKASTAKYAWAYAN

KINKAMAXKIYAN TUKU MAKLAKASKINAW