Biblia kalakgpalinilh xlatamatkan

¿TUKU mamakgxtakgalh kuchu chatum puskat xalak Filipinas chu tlakg tlan xtawilalh xfamilia? ¿Tuku makgtayalh chatum australiano tiku karateca xwanit chu xatlan kstalanina Cristo wa? Kalikgalhtawakga tuku wankgo.

«Ni kaj lakapala talakgpalikan» (CARMEN ALEGRE)

KATA AKXNI LAKACHILH: 1949

PAÍS: FILIPINAS

TUKU XTLAWA: XAKGOTNI XWANIT

LA XAKLAMA: Klakachilh kSan Fernando, nema tapakgsini Camarines Sur. Pero tlakg makgasata klatamanit kʼAntipolo (provincia de Rizal), kkasipijni wi uma kachikin, lhuwa anan kiwi chu kasakgatna. Akxni kkalh kʼAntipolo lu kakakswa xwanit; akxni xtsuku tsiswan kaj makgapitsin tiku xlamakgolh ktiji. La uku staknit uma kachikin.

Akxni aku xakchanit kʼAntipolo klakgapasli Benjamin, tiku ktatamakgaxtokgli. Lu tuwa kmakgkatsilh kintamakgaxtokgat nixawa la xaklakpuwan. Kuchu nialh xaklilakapastakputun kintaʼakglhuwit. Lu xaluku kwa chu kifamilia wa patikgolh. Ni xakmaxki kakni kinchixku chu akxni wi tuku xtlawa o kinkamanan lu xaklisitsi. Kifamilia lu nitlan xwi.

BIBLIA LAKGPALILH KILATAMAT: Editha, xtala kinchixku, xtatayana Jehová, kinkawanin pi xkinkalimakgalhtawakgekan Biblia. Chuna ktlawaw xlakata xaklakaskinaw pi tlan xtawi kifamiliajkan.

Akxni ktsukuw likgalhtawakgayaw Biblia lhuwa tuku lilakgatit kkatsiniw nema xaxlikana. Tuku wan Apocalipsis, o Revelación 21:4 lakgchalh kinaku. Lichuwinan tiku nalatamakgo kkatiyatni kParaíso kxTamapakgsin Dios, uma versículo wan pi «naxakanikgo Dios xlakgpixtajatkan; na nialh katiʼanalh linin; [...] ntalipuwan, [...] ntatasa, chu [...] ntakatsanajwat». Na lu xakkatatapakgsiputun tiku nakamaxkikan uma tasikulunalin.

Kakxilhli pi kililakgpalit xwanit kintayat chu kilatamat. Pero, xlakata nila lakapala talakgpalikan, makgapalalh xlakata xakmakgxtakgli kuchu. Tlan ktsukulh kalikatsini kinkamanan, chu ktsukulh makgtaya kinchixku xlakata napulalin familia.

Akxni Benjamin chu akit ktsukuw katatamakxtumiyaw xtatayananin Jehová lu klakgatiw. Xlakan ni tlawakgo apuestas chu ni kgotkgo. Ni laksakpaxkinankgo, putum kamaxkikgo kakni latamanin. Kkatsiw pi xaktekgsnitaw  xaxlikana takanajla (Juan 13:34, 35).

TUKU TLAN KINKITAXTUNINIT: Lu tlan tawi kifamilia. Benjamin chu akit lu kpaxuwayaw chu lu klakgatiyaw kkamasiyaniyaw xlakata Biblia amakgapitsin. Chatiy kilakgkgawasankan chu xlakpuskatinkan kgalhtawakgamakgolha, chu klakaskinaw pi xmilh kilhtamaku na kskujnikgolh Jehová. Ni anan atanu tlakg tlan latamat.

«Xaklakpuwan pi niti la xkintlaja» (MICHAEL BLUNSDEN)

KATA AKXNI LAKACHILH: 1967

PAÍS: AUSTRALIA

TUKU XTLAWA: KARATECA

LA XAKLAMA: Kstakli kxastlan kachikin Albury (Nueva Gales del Sur). Maski naʼanan tsinu tiku lixkajni likatsikgo chuna la amakgapitsi kachikin, tlan nawanaw pi ni lu lixkajni wi kachikin.

Chatiy kinatalan laktsuman chu kintala kgawasa chu akit tlan takgalhtawakga kkgalhiw. Maski kinatlatni lamakgxtakgkgolh akxni kiʼakgtujun xakkgalhi kinkamaxkikgon tuku xakmaklakaskinaw. Kimalakgachaka kxalakwan escuela niku taxokgo chu kintlat xlakaskin pi xaktlawalh negocios akxni xakmasputulh kintakgalhtawakga. Pero tlakg xaklakgati takgaman. Lu xakkatsini karate chu lu tlan xakmatlawani bicicleta. Wata ktsukulh makgkaxtlawa putlaw xlakata tlan tlakg xakkgamanalh.

Lu xaklipaxuwa xlakata lu tliwakga xakwanit. Tlan xaktlajalh tiku xaktalachipaputulh chu lakgachunin xakmakgkatsi pi niti la xkintlajalh. Tiku xkimasiyani karate xkatsi pi katiwa xaktalachipaputun wa xlakata kimasiyanilh pi uma nitlan chu lu mustsu xkinchipa. Putum kilhtamaku xkiwani pi lu xlakaskinka nakkgalhakgaxmatnan chu xalakatitum naklatama.

BIBLIA LAKGPALILH KILATAMAT: Akxni ktsukulh katsini xlakata Biblia, kkatsinilh pi Jehová ni akxilhputun tiku tlawani tuku nitlan achatum (Salmo 11:5). Akit xaklakpuwan pi karate lu tlan takgaman chu nitu xlanikan. Xaklakpuwan pi uma tastakyaw xtachuna xwanit xtastakyaw Biblia. Xtatayananin Jehová tiku xkimasiyanikgo ni kimakgxtakgkgolh. Nikxni kiwanikgolh pi xakmakgxtakgli karate. Kajwatiya xkilimakgalhtawakgekgo Biblia.

 Akxni tlakg xakkatsinitilha xlakata Biblia tlakg tlan xaktalalin Jehová chu talakgpalilh kintapuwan. Lu klakgatilh xliʼakxilhtit Jesús, xKgawasa Dios. Maski lu litliwakga xwanit nikxni katlawanilh tuku nitlan amakgapitsin. Chuna la wan Mateo 26:52, Jesús wa: «Xlipaks wa nti nkuchilu xlimakapawankgolh, na wa nkuchilu nalinikgoy». Uma tachuwin chalh kkinaku.

Akxni tlakg xakkatsini xlakata Jehová tlakg xakpaxki chu xakmaxki kakni. Lu lakgchalh kinaku akxni kkatsilh pi kiMalakatsukinakan tiku lu skgalala chu putum litliwakga kgalhi kililakgaputsa, o kililipuwan. Lakgachunin xakmakgatsankganani o nialhtu xakkatsiputun xlakata lu tuwa xakmakgkatsi. Pero akxni kkatsilh pi Jehová nikxni xkimakgxtakgli komo chuntiya xakliskujli, lu tlan kmakgkatsilh. Uma akgtum tamalaknun kimakgtayalh: «Akit Jehová kchipanit mimpakgstakat, akit kwaniyan: “Ni kapekwanti. Akit xlikana nakmakgtayayan”» (Isaías 41:13). Xlakata kkatsilh pi Jehová lu xkimpaxki ni xakama lakgmakgan.

Xakkatsi pi tuku tlakg tuwa xakmakgxtakgli wa karate. Na xakkatsi pi lu xakmakgapaxuwalh Jehová chu lu tlan xkinkintaxtunilh xakskujnanilh. Klakpuwan pi wa xtachuwin Jesús nema tlawalh pi xakskujnaniputulh Jehová nema wi kMateo 6:24, Hua Xasasti Talaccaxlan, 1999: «Ni pala chatum chixku tlan taskujkgoy chatuy malana». Kkatsilh pi nila xakskujnanilh Jehová chu chuntiya xakmakgatawakgalh karate, xlakata xakkatsi pi xmilh kilhtamaku tlakg xaklakgatilh karate. Kililaksakat xwanit: Jehová o karate.

Lu tuwa kmakgxtakgli karate. Ni xakkatsi tuku naklaksaka. Pulaktu, tlan xakmakgkatsi xlakata xakmakgapaxuwalh Jehová. Apulaktu xakmakgkatsi pi xaklakgmakgama kimakgalhtawakgena xla karate. Anta kʼartes marciales komo wi tiku makgxtakga uma, akxilhkan la komo tlawalh lanka talakgalhin. Makgapitsi wata akstu kamakgnikan xlakata ni natitaxtukgo uma lanka tamaxana.

Xakpekuan nakwani kimakgalhtawakgena pi xakama makgxtakga karate. Wa xlakata, nialh makgstum kkalh chu nialh kkatachuwinalh kincompañeros. Lu xaxkkatsi pi tuku xaktlawama lu tlan xwanit. Maski chuna, nitlan xaklimakgkatsi xlakata ni kkalitachuwinalh xasasti kintakanajla. Akxni chuna ktlawalh Kmakgkatsilh pi kmakgatsankgananilh Jehová. Lu nitlan xaklimakgkatsi. Akxni makgatunu xaktlawa kioración lhuwa xaktasa.

Max Jehová akxilhli tuku tlan kkinaku, xlakata tlawalh pi xkimakgtayakgolh natalan xalak congregación. ¡Lu kpaxtikatsinilh tamakgtay nema kimaxkikgolh natalan! Na lu kimakgtayalh akxni klikgalhtawakgalh xlakata David chu Bat-tseba. Maski David tlawalh laklanka talakgalhin, Jehová nialh kuentajtlawanilh xtalakgalhin akxni limasiyalh pi xlikana lakgpalilh xtayat. Akxni klakpuwa xlakata xlatamat David kimakgtayalh nialh naklilakgaputsa tuku nitlan xaktlawanit.

TUKU TLAN KINKITAXTUNINIT: Akxni nina xakkgalhtawakga Biblia, niti xaklilakgaputsa, o xaklilipuwan, kaj kiʼakstu xakpaxkikan. Pero xlakata kimakgtayalh Jehová chu kimpuskat tiku lu kpaxki, akgtujuna kata ktatamakgaxtokgnit la uku kkamakgtaya amakgapitsi chu nialh kaj kiʼakstu kkuentajtlawakan. Klipaxawayaw pi kkamakgtayanitaw amakgapitsi xlakata Biblia, makgapitsi tiku kkamakgatayanitaw lu tuwa tuku titaxtukgonit. Karate nila xkimaxkilh tapaxuwan nema kkgalhi la uku maski lhuwa tuku xaktlajalh, la uku lu klipaxuwa akxni kakxilha latamanin la kalakgpalini xlatamatkan xtapaxkit Jehová.

[Tuku wan página 14]

«Lu lakgchalh kinaku akxni kkatsilh pi kiMalakatsukinakan tiku lu skgalala chu putum litliwakga kgalhi kimpaxki»

 [Dibujo chu recuadro xla página 15]

«¡Paxtikatsinilh xlakata uma lu lakglilakgatit artículos!»

¿Lakgati experiencias nema aku likgalhtawakga? Krevista La Atalaya xla agosto kata 2008 titsukulh taxtu experiencias, liwakaya tipuxamakaw experiencias taxtunit chu la uku kaj pulaktiy akxilhwi. Serie nema wanikan «Biblia kalakgpalinilh xlatamatkan» lu lakgatikgo tiku likgalhtawakgakgo uma revista. ¿Tuku xlakata lu lakgatikgo?

Latamanin tiku lichuwinankgonit xlatamatkan, tanu tanu la stakkgonit. Akxni nina xlakgapaskgo Jehová Dios, makgapitsi lhuwa tuku xtlajakgonit pero xmakgkatsikgo pi wi tuku xkatsankgananikgo. Makgapitsi lu laklukujnu xwankgonit, xkgotkgo o xmaklakaskinkgo drogas lhuwa tuku nitlan xtitaxtumakgo. Makgapitsi stakkgolh kxkachikin Jehová, pero makgxtakgkgolh tsinu kilhtamaku xaxlikana takanajla. Putum uma experiencias limasiya pi tlan lakgpalikan kilatamatkan xlakata tlan natalalinaw Dios chu tlan kitaxtu komo chuna natlawayaw. ¿La kamakgtayanit tiku likgalhtawakgakgonit uma experiencias?

Chatum puskat lichuwinalh kʼakgtum artículo 1 xla febrero kata 2009, wa pi kamakgtayalh makgapitsi lakpuskatin tiku kpulachin xtanumakgolh.

◼ «Lhuwa lakpuskatin tiku tanumakgolh kpulachin akgatekgskgo tuku talichuwinan kʼuma artículos xlakata nachuna xlamakgolh. Fotografías niku tasiya la xwankgonit xapulana chu la tasiyakgo la uku lu makgtayanan. Chatiy lakpuskatin tiku kpulachin xtanumakgolh likgalhtawakgakgolh uma serie chu lakaskinkgolh nakalimakgalhtawakgekan Biblia.» (C. W.)

Tuku talichuwinan kʼuma artículos lu kamakgtayanit makgapitsi tiku likgalhtawakgakgo. Akgtum liʼakxilhtit krevista La Atalaya 1 xla abril kata 2011 talichuwinalh Guadalupe Villarreal, tiku xtatalakgxtumi xtachixku pero makgxtakgli xlakata naskujnani Jehová. Kaʼakxilhti tuku wan maktiy cartas nema malakgachakgoni tiku likgalhtawakgakgolh.

◼ «Lu kaks kimalakawani experiencias xla Guadalupe. Lu lilakgatit akxilhkan pi tapaxkit nema kgalhinikan Dios chu xTachuwin tlan kalakgpalini xlatamatkan latamanin.» (L. F.)

◼ «Pulana putum latamanin xakkalitachuwinamputun kintakanajla, asta tiku tatalakgxtumi xtachixku. Pero, nina makgas nialh xakkatachuwinan chu asta xakkatsalani. Uma artículo wa nema lu xaklakaskin, xlakata kimakgtayanit chuna nakkaʼakxilha la Jehová: la tiku na tlan naskujnanikgo.» (M. K.)

Atanu experiencia nema na lu kalakgchalh kxnakujkan tiku likgalhtawakgakgolh wa xla Victoria Tong, nema talichuwinalh kʼrevista 1 xla agosto kata 2011. Lu lilakgaputsa la stakli Victoria, wan pi lu tuwa makgkatsilh nakanajla pi Jehová xpaxki, chuna xmakgkatsi maski asta makgasata kskujnanima. Na lichuwinan tuku tsinu tsinu makgtayalh xlakata tlan natlawa xtapaxkit Jehová. Kaʼakxilhti tuku wankgolh makgapitsi tiku likgalhtawakgakgolh xlakata xlatamat.

◼ «Lu lakgchalh kinaku akxni klikgalhtawakgalh xlakata Victoria. Lu lhuwa tuku nitlan ktitaxtunit kkilatamat chu maski akglhuwata kata ktamununit putum kilhtamaku ktalatlawama talakapastakni nema kimaxlajwani. Tuku talichuwilh kxlatamat tlawa pi nakakxilhkan chuna la Jehová kiʼakxilha.» (M. M.)

◼ «Akxni kgawasaku xakwanit lu xakʼakxilha tiku nitu lhakganankgonit pero kmakgxtakgli. Lu nitlan, pero nina makgas amakgtum ktsukupa akxilha. Kputsalh xtamakgtay kgolotsin xalak congregación, chu tsinu tsinu kmakgxtakgma uma kintalismanin. Xlakan kiwanikgonit pi Jehová kimpaxki chu kilakgalhaman. Maski chuna, lakgachunin klakpuwan pi akit ni xlakaskinka chu Dios ni kimpaxki. Pero, tuku wa Victoria lu kimakgtayalh. La uku kkatsi pi akxni klakpuwan pi Jehová ni kintitapatilh, klakgmakgama xtamakamastan xKgawasa nema xkgalhni kililakgmaxtulh. Kchukuxtulh uma artículo xlakata naklikgalhtawakga chu klakpuwan uma akxni makgatanu min ni xatlan talakapastani. ¡Paxtikatsinilh xlakata uma lu tlan artículos!» (L. K.)