¿Tiku kgaxmata oraciones?

KOMO wi tiku kgaxmata oraciones, xlikana max pi wa tiku kinkatlawan chu tiku tlawalh kiʼakskititkan. ¿Tiku putum katsi tuku lakpuwanaw? ¿Anan atanu tiku tlan nakgalhti xʼoracioneskan latamanin chu nakamaxki tuku lakaskinkgo? Wa xlakata tawila uma takgalhskinin: ¿pi tlan nakanajlayaw pi wi Malakatsukina?

Lhuwa tiku wankgo pi komo nakanajlakan pi wi tiku kinkatlawan lakataya tuku masiyakgo científicos. Pero tuku masiya Dios chu tuku wankgo científicos ni lalakataya.

◼ Kpuxamatum universidades xalak norteamérica, kakgalhskinka 1,646 makgahtawakgananin xla ciencia, kaj 550 tiku laksakkgolh niku xwan «Ni kkanajlani pi anan Dios».

Takatsi pi makgapitsi científicos kanajlakgo pi Dios lama.

Tuku likanajlayaw pi wi chatum Malakatsukina

Komo nitu naʼanan tuku nalikatsiyaw pi wi tiku kgaxmata kioracioneskan, ¿kilikanajlatkan pi wi tiku kgaxmata? Ni, nichuna xliwanat. Nitlan tapuwan akxni wi tiku lakpuwan pi ni talakaskin wi tuku nalikatsi pi lama tiku kanajlani. Biblia wan pi takanajla wamputun «wantu lipawanaw maski ni ukxilhmaw» (Hebreos 11:1, Hua Xasasti Talaccaxlan, 1999). Atanu Biblia wan pi takanajla wamputun «tuku litasiya pi wi maski ni taʼakxilha» (Biblia de Jerusalén latinoamericana). Kalakpuwanti uma: nila akxilhkan un, pero tasiya akxni matsuwi xatuwan kiwi wa likatsiyaw pi anan un. Nachuna, maski nila akxilhaw Dios, lhuwa tuku anan nema kinkamasiyaniyan pi lama.

 ¿Niku tlan natekgsaw tuku nalikatsiyaw pi lama? Kaniwa niku akxilhaw. Biblia wan: «Xlipaks nchiki, fuerzaj wi nti ntlawanit; wampi wa nti malakatsukulh xlipaks nkatuwaj, wa Dios» (Hebreos 3:4). ¿Ni xlikana pi chuna? Komo wix nalakpuwana xlakata putum kakilhtamaku anan, niku lakatsukulh latamat chu la xlituwa la tatlawanit kiʼakskititkan, wa tuku tlakg xatuwa nema anan kKatiyatni, max nalakpuwan pi wi tiku tlakg skgalalh nixawa latamanin. *

Pero tuku anan nila putum kinkamasiyaniyan xlakata Dios. Akxni akxilhaw tuku tlawanit xtachuna la akxni kgaxmataw pi wi tiku mima kxʼalakgaputu malakcha. Katsiyaw pi wi tiku talakatsuwima, pero ¿tiku? Nakatsiyaw tiku komo namalakiyaw. Xlakata nakatsiyaw tiku tlawanit putum tuku anan, talakaskin «namalakiyaw» malakcha.

¿Tuku ama malakcha? Wa Biblia. Kxpáginas tlan nalakgapasaw Dios. Chuna la pulakatunu kgantaxtu tuku xtawanit pi xʼama la litasiya pi Dios lama. * Uma libro na kinkamasiyaniyan la xtayat Dios chu masiya pi kgaxmata kioracioneskan xlakata wan la xkatalalin latamanin.

¿La likatsi “xKgaxmatna oración”?

Biblia wan pi “xKgaxmatna oracion” kgalhi tapuwan, chu tlan nalakgapasaw. Takatsi pi kaj wa tiku kgalhi tapuwan tlan kgaxmata chu akgatekgsa. Wa xlakata kinkamakgtayayan  uma tachuwin: «Wix kgaxpata oración, wakg tachixkuwitat xala kaniniwa, na[...]lakgminan» (Salmo 65:2). Xla kakgaxmatni tiku xlikana kanajlanikgo. Chu na kgalhi xtukuwani. Biblia wan: «Jehová makgat tawilanikgolh tiku lixkajni likatsikgo, pero kakgaxmatni tiku xaʼakgstitum lamakgolh» (Proverbios 15:29).

Jehová na makgkatsi. «Dios xapaxkina» chu «Dios tiku xapaxuwana» (2 Corintios 13:11; 1 Timoteo 1:11). Wa xlakata lu «katsanilh xnaku» akxni lu lhuwa tuku nitlan xtatlawama makgasata (Génesis 6:5, 6). Nachuna, ni xlikana tuku lakpuwankgo makgapitsi pi Dios kinkamapatiniyan, xlakata Biblia wan: «Makgat katawilanilh xaxlikana Dios xlakata natlaway tuku nitlan» (Job 34:10). Pero max wix akstu kgalhskinkana: «Komo Dios tiku Malakatsukina chu putum litliwakga kgalhi, ¿tuku xlakata ni masputu tapatin?».

Jehová kinkamaxkiyan talakaskin pi akinin nalaksakaw tuku natlawayaw kkilatamatkan, uma kinkamasiyaniyan pi lu tlan likatsi. ¿Ni xlikana pi paxtikatsiniyaw pi chuna xtayat? Pero lhuwa latamanin patinamakgolh chu kamakgapatinankgo amakgapitsi xlakata ni paxtikatsinikgo pi Dios kamaxkinit talakaskin nalaksakkgo tuku natlawakgo. Xlakata chuna lama, wi uma takgalhskinin nema lu xlakaskinka: ¿la namasputu Dios tapatin pero chuntiya nakamaxki talakaskin latamanin xakstukan nalaksakkgo tuku natlawakgo? Xtakgalhtin wi kʼartículo nema mima.

[Notas nema wilakgo kpágina]

[Recuadro xla página 5]

Xlakata tuku nitlan tlawamakgolh takanajla, ¿lakpuwana pi Dios nitu lama?

Lu nitlan, takanajla xkuenta pi lhuwa tiku nalakpuwankgo pi ni anan tiku kgaxmata oraciones. Asta latamanin tiku lu xkanajlakgo nialh kanajlakgo pi wi Dios xlakata akxilhkgo pi takanajla makgtanu akxni kamakgapekwankan latamanin, kʼguerra chu kalikgamanankan lakgskgatan.

¿Tuku xlakata tasiya pi takanajla kaj wili taʼakglhuwit? Xlakata latamanin tlawakgonit tuku nitlan kxtukuwani takanajla. Biblia xlichuwinanit pi makgapitsi xlimaklakaskinkgolh xtukuwani Cristo xlakata xtlawakgolh tuku nitlan. Apóstol Pablo kawanilh uma tachuwin tiku xpulalimakgolh congregación: «Na naʼanankgoy kmilakgstipankan makgapitsin nchixkuwin, na tanuj tamasiyun ntu ni talulokgtat nalichuwinankgoy, lakimpi namalakgaspityawakgoy limakgalhtawakgat» (Hechos 20:29, 30).

Dios ni tsinu akxilhputun tuku tlawakgonit ni xaxlikana takanajla. Wa xlakata, Biblia, xTachuwin Dios, kalimawaka pi wa makgankgolh «xkgalhnikan [...] xlipakskan wanti makgnikgokanit nkatiyatna» (Apocalipsis [Revelación] 18:24). Xlakata ni masiyakgolh tuku xaxlikana xlakata Dios, chu ni masiyakgolh pi lu xapaxkina, kalimawaka lanka talakgalhin (1 Juan 4:8).

Tiku katlawanikanit tuku nitlan kxtukuwani takanajla, Dios tiku kgaxmata oraciones kalakgalhaman. Xlakata lu kapaxki latamanin, nialh makgas xKgawasa nakamalakgaxokge ni xaxlikana takanajla xlakata ni xaʼakgstitum lamakgolh. Jesús wa: «Nakiwanikgoy akxni yama nkilhtamaku: “Tlati, Tlati, ¿tu ktiʼakgchuwinaw kmintukuwini [...]?”. Cha nchu nkit nakkgalhtikgoy: Niukxni kkalakgapasni. Kakintapanunitit xtlawananin wantu nitlan» (Mateo 7:22, 23).