Tlan talakatsuwinikan “xKgaxmatna oración”

LHUWA latamanin tiku wankgo pi kanajlanikgo Dios nila wankgo tuku kanajlakgo. Na nila wankgo tuku xlakata lhuwa takanajla tlawakgo tuku nitlan chu tuku xlakata Dios masta talakaskin naʼanan tapatin. Chuna, tlawanikgo oración tiku ni lakgapaskgo.

Pero, tlan talakatsuwinikan tiku “xKgaxmatna oración”. Kililakgapasatkan Dios xlakata nakanajlaniyaw, nema xlitlawat pi napaxkiyaw. Xaxlikana takanajla wi tuku makanajliyan (Hebreos 11:1). Komo wix nakatsiya xaxlikana xlakata Dios, tlan nalakgapasa chu natachuwinana la chatum mi amigo. Uku nalichuwinanaw makgapitsi latamanin tiku xtlawakgo oración maski ni lu xkanajlanikgo Dios.

◼ Patricia (tiku lichuwinaw kxapulana artículo). «Akgtum kilhtamaku xakkatawi kgalhkaw kiʼamigos chu tsukukgolh lichuwinankgo takanajla. Xakkawaninit pi kilalh kkinchik chatum xtatayana Jehová, pero akit ktsalalh xlakata ni xakkgaxmatputun tuku xlichuwinamakgolh kintlat, tiku ni xkanajlani Dios. Chatum kiʼamigo wa: “Max xlikana tuku wankgo xtatayananin Jehová”.

»Chatum kiʼamiga wa: “Kaw kxtamakxtumitkan xlakata nakatsiyaw komo xlikana tuku wankgo”. Chu kkaw. Maski ni lu xakkanajlayaw tuku xlichuwinankan, makgapitsi chuntiya xakkanaw xlakata lu tlan xlikatsikgo xtatayananin Jehová.

»Pero, akgtum domingo kkgaxmatli ktamakxtumit nema lakgpalilh kintapuwan. Talichuwinalh tuku xlakata patinankgo latamanin. Kkatsilh pi akxni tlawaka xapulana chixku ni xkgalhi talakgalhin pero akxni ni kgalhakgaxmatnalh, xkamanan na kgalhikgolh talakgalhin chu nikgolh. Na talichuwinalh pi Jesucristo nilh xlakata latamanin tlan xkgalhikgolh tuku makgatsankgalh xapulana chixku (Romanos 5:12, 18, 19). * Uma kilhtamaku kkakgatekgsli. Kkatsilh pi wi chatum Dios tiku kinkapaxkiyan. Chuntiya klikgalhtawakgalh Biblia chu aku kkatsilh pi tlan naktlawani oración Dios tiku xlikana lama.»

◼ Allan (nema na talichuwinalh kxapulana artículo). «Akgtum kilhtamaku xtatayananin Jehová minkgolh kkinchik, chu kimpuskat katamaknulh xlakata xkatsiputun la tlan latamanin putum kilhtamaku nalatamakgo kKatiyatni.  Ksitsilh, wa xlakata klilh kimpuskat kcocina chu kwanilh: “Ni kamasta talakaskin naʼakgskgawikgoyan. ¡Kaj taʼakgsanin!”.

»Kimpuskat kinkgalhtilh: “kakalakgpi chu kakamasiyani pi ni xlikana tuku wankgo”.

»Pero, nila kkalimasiyanilh pi ni xlikana tuku xwankgo. Chu xtatayananin Jehová lu tlan kilikatsinikgolh chu kimakgxtakgnikgolh libro nema lichuwinan komo latamanin lakatsukukgolh por evolución o por creación. Tuku klikgalhtawakgalh lu xlikana tuku xmasiya wa xlakata klakpuwa tlakg nakkatsini tuku xla Dios. Tsukukgolh kilimakgalhtawakgekgo Biblia xtatayananin Jehová chu kkatsilh pi tuku xmasiya Biblia ni tatalakxtumi tuku xaklakpuwan xlakata takanajla. Akxni tlakg xaklakgapasa Jehová tlakg xakkatsi tuku nakskini. Xakkatsi pi kililakgpalit xwanit makgapitsi kintayat wa xlakata kskinilh tamakgtay. Jehová kinkgalhtilh kkiʼoración.»

◼ Andrew (Inglaterra). «Maski nitu xlakgpali kintapuwan chu lu xaklakgati tuku xwankgo científicos, xakkanajla kʼevolución xlakata xwankgo pi xlikana tuku xmasiyakan. Xlakata lhuwa tuku nitlan lama kkakilhtamaku, ni xakkanajla pi wi chatum Dios.

 »Maski chuna, lakgachunin xaklakpuwan: “Komo wi tiku wi kʼakgapun xakkgalhskilh tuku xlakata klamaw chu tuku xlakata latamanin latlawani tuku nitlan chu xlakata guerras”. Akxni xakkgalhi taʼakglhuwit lakgachunin xaktlawa oración, pero ni xakkatsi tiku xaktlawanima.

»Ama kilhtamaku, kimpuskat maxkika tratado xla xtatayananin Jehová, wanikan ¿Podrá sobrevivir este mundo? Makglhuwa xaktlawa uma takgalhskinin. Tratado kimalakpuwanilh komo tlan xwa xaklakputsalh takgalhtin nema masta Biblia. Alistalh kkivacacioneskan kimaxkika libro La Biblia... ¿la Palabra de Dios, o palabra del hombre? Akxni kakxilhli pi Biblia na lichuwinan tuku wankgo científicos tlakg xakkatsiputun. Wa xlakata klakaskilh pi chatum xtatayana Jehová xkilimakgalhtawakgelh Biblia. Xlakata kkatsilh tuku natlawa Jehová tlawalh pi nakkatsi pi xlikana lama, tlan naktlawani oración chu kkatsi pi nakinkgaxmatni.»

◼ Janet (tiku makgastakka la protestante kLondres). «Xlakata takanajla ni xtlawakgo tuku xmasiyakgo chu tapatin nema anan tlawalh pi xakmakgxtakgli takanajla. Na kmakgxtakgli universidad. Xakkilhtli chu xaktlakga guitarra xlakata naktlaja tumin. Ama kilhtamaku klakgapasli Patrick. Limakgastakka takanajla católica, pero na nialh xkanajlani Dios chuna la akit.

»Anta xakwilaw kʼakgtum chiki niku nialhti xwi chu amakgapitsi lakgkgawasan tiku xmakgxtakgtayakgonit xtakgalhtawakgakan chu xlakgatikgo takanajla xalak oriente. Lakgachunin makgat tsisni xaktamakgxtakgaw xlakata xaklichuwinanaw tuku xlakata lamaw. Maski Patrick chu akit ni xakkanajlayaw pi wi Dios, xaklakpuwanaw pi xwi «litliwakga» nema xtlawanit putum tuku anan.

»Alistalh kkaw kxnorte Inglaterra xakputsamaw taskujut xla tatlakgni, anta lakachilh kinkgawasakan. Akgtum tsisni, aktsu kinkgawasa tatatlalh, chu ktsukulh tlawani oración chatum Dios tiku ni xakkanajlani. Alistalh, Patrick chu akit klamakgxtakgwi, chu akit klilh kinkgawasa. Ktlawapa oración chu kskilh tamakgtay komo max wi tiku xkinkgaxmatnima. Akit ni xakkatsi, pero Patrick na xtlawanit oración.

»Akxni ama kilhtamaku kakgotanun, chatiy xtatayananin Jehová lakgapaxialhnankgolh Patrick chu masiyanikgolh makgapitsi tastakyaw xalak Biblia. Kintachuwinalh kteléfono chu kinkgalhskilh komo xaklakaskin akxtum xkinkalimakgalhtawakgekgon Biblia xtatayananin Jehová. Kkatsiw pi kilitamakgaxtokgatkan xwanit komo xaklakaskinaw pi Dios tlan xkinkaʼakxilhni. Xlakata lu nitlan xakwilaw tuwa kmakgkatsilh.

»Lu xakʼatekgsputunaw tuku xtawanit kʼBiblia pi xʼama kgantaxtu, chu xakkatsiputunaw tuku xTamapakgsin Dios, chu tuku xlakata anan lhuwa tapatin. Kkatsiw pi Dios kinkapaxkiyan. Ktamakgaxtokgwi xlakata xaktlawaputunaw xtalakaskin. Xtastakyaw Dios kinkamakgtayanitan nakkalimakgastakaw kgalhtutu kinkamanankan. Liwana kkatsiyaw pi Jehová kgaxmatli kioracionkan.»

Kaʼakxilhti tuku lanit

Patricia, Allan, Andrew chu Janet, chu atanu lhuwa millones latamanin ni mastakgolh talakaskin xkaʼakgskgawimikgolh ni xaxlikana takanajla, wata xakstukan lakputsanankgolh tuku xlakata masta talakaskin Dios kaʼanalh tapatin. Xlakata lakputsanankgolh akgatekgskgolh tuku wan Biblia, la uku liwana katsikgo pi Jehová kgaxmata oraciones.

¿Katsiputuna tuku namasiyaniyan pi xlikana lama Dios? Xtatayananin Jehová xatapaxuwan namakgtayakgoyan xlakata nakatsiya xaxlikana xlakata “xKgaxmatna oración” chu natalakatsuwiniya (Salmo 65:2).

[Notas nema wi kpágina]

[Tuku wan página 10]

«Xlakata kkatsilh tuku natlawa Jehová tlawalh pi nakkatsi pi xlikana lama, tlan naktlawani oración chu kkatsi pi nakinkgaxmatni»

[Dibujo xla página 9]

Xaxlikana takanajla ni kaj xaʼakglakgwa, komo makglhtinamputunaw talakaskin nakatsiputunaw tuku xaxlikana xlakata Dios