¿Tuku xlakata masta talakaskin naʼanan tapatin?

WILAKGOLH latamanin tiku tlawanikgo oración Dios, pero ni lu kanajlakgo komo lama. ¿Tuku xlakata chuna lakpuwankgo? Max xlakata akxilhkgo lhuwa tapatin kkakilhtamaku. ¿Milh kilhtamaku akstu kgalhskinka tuku xlakata masta talakaskin Dios naʼanan tapatin?

¿Kinkatlawan Dios xlakata makglakgalhinanin nawanaw chu napatinanaw? Komo chuna xkinkatlawan ni xkakninaniputuw. Kalakpuwaw uma: komo wix liwana akxilhpat akgtum xasasti putlaw chu xtekgsti pi wi tuku nitlan laninit, ¿xlakpuwanti pi lu chuna tlawaka? Ni chuna xlakpuwanti. Xlikana nalakpuwana pi wi tiku tlawanilh tuku nitlan.

Nachuna, tuku anan kkakilhtamaku talakkaxwilinit chu kaks malakawaninan la tatlawakgonit, pero na akxilhaw pi lu nitlan wi kakilhtamaku chu ni tatlawama tuku xaʼakgstitum. ¿Chuna xlakaskin kiMalakatsukinakan? Biblia masiya pi xapulana latamanin ni makglakgalhinanin xwankgonit pero alistalh tlawakgolh talakgalhin (Deuteronomio 32:4, 5). Pero maski chuna: Dios wanit pi nalakkaxtlawa tuku nitlan chu tiku nakgalhakgaxmatnikgo nialh makglakgalhinanin katiwankgolh. Pero ¿tuku xlakata ni tunkun lakkaxtlawa?

¿Tuku xlakata lu lhuwata kilhtamaku titaxtunit?

Xtakgalhtin uma takgalhskinin na kilhchanima, tiku lakgchan nakamapakgsi latamanin. Jehová wa xkamapakgsiputun chu ni xakstukan xtapakgsikgolh. Biblia wan:  «Ni lakgchan chatum chixku xakstu napulalin xtatukit» (Jeremías 10:23). Nitlan, pi Adán chu Eva lakgmakgankgolh xtamapakgsin Dios tuku tlawakgolh makglakgalhina katlawalh (1 Juan 3:4). Wa xlakata lakgalhinanin wankgolh, nitlan kakitaxtunilh chu nachuna xkamanan.

Lhuwata mil kata, Jehová kamaxkinit talakaskin xakstukan natapakgsikgo latamanin, pero litasiyanit pi nila tlan xakstukan tapakgsikgo. Putum mapakgsinanin kamakgapatinan latamanin. Ni masputukgo guerras, talakatsala limapakgsin, tuku nitlan la o tajatat.

¿La nalakkaxtlawa Dios tuku nitlan tatlawanit?

Biblia wan pi nialh makgas Dios nalimin xatlan kakilhtamaku (2 Pedro 3:13). Kajwatiya tiku nalimasiyakgo pi paxkikgo amakgapitsin chu Dios, anta nalatamakgo (Deuteronomio 30:15, 16, 19, 20).

Biblia na lichuwinan pi akxni «Dios natatlaway kuinta» latamanin, namasputu tapatin chu tiku mapatininankgo, uma kilhtamaku lakapala talakatsuwima (2 Pedro 3:7, Hua Xasasti Talaccaxlan, 1999). Alistalh Jesucristo, tiku Dios Mapakgsina tlawanit, nakamapakgsi latamanin tiku kgalhakgaxmatnankgo (Daniel 7:13, 14). ¿Tuku natlawa uma tamapakgsin? Biblia wan: «Pero ti laktlan[...], ixlakan nawan ama lilakgatit pulataman, xlakan ana snun lipaxaw natalatamaj» (Salmo 37:11).

Mapakgsina xalak akgapun Jesucristo, namasputu tajatat, takgolot chu linin nema milh xlakata ni kgalhakgaxmatkgolh Jehová, “tiku makilhtsukinit latamat” (Salmo 36:9). Jesús nakamapaksa putum tiku natatayakgo  xtamapakgsin. Namakgantaxti tuku lichuwinanit kBiblia:

◼ «Ni chatum lataman nawan: “Ktatatlay”.» (Isaías 33:24.)

◼ «Na paks naxakanikgo Dios xlakgpixtajatkan; na nialh katiʼanalh linin; [...] ntalipuwan, [...] ntatasa, chu [...] ntakatsanajwat; [...], wa ntu xʼanan xakgasiyaj, paks lakgsputli.» (Apocalipsis 21:4.)

Lu lipaxuwayaw pi Dios nialh makgas namasputu tapatin. Chu maski masta talakaskin kaʼanalh tapatin, liwana katsiyaw pi kgaxmata kioracioneskan.

Dios ni makgat kinkawilanin. Dios kgaxmata maski ni lhuwa tuku nawaniyaw akxni patinanaw chu lipuwanaw, lakaskin pi kachalh kilhtamaku akxni ni nalakpuwan pi nitu lama chu nasputa tapatin.