¿Xkatsiyata?

¿Tuku xlakata xlilakgslamanankan betún kilhtamaku nema lichuwinan Biblia?

▪ Biblia wan pi tiku tlawakgolh torre xalak Babel «ladrillo chiwix litaxtulh, chu betún lilakgslamanankgolh» (Génesis 11:3).

Kpetróleo taxtuyacha betún. Anta kMesopotamia lhuwa anan, taxtu kkatiyatni chu xakstu palhan. Makgasata lu xmaklakaskinkan xlakata kslamanan. Chuna la wan maktum libro «lu tlan xlilakslamawilikan ladrillos nema xmakchakanit».

Krevista Archaeology taxtulh akgtum artículo xlakata kilaka kzigurat (pirámide escalonada) xala makgan kachikin Ur (Mesopotamia). Tiku tsokgli wan: «Niku klhkuyukan ladrillos tasiya niku xlakgswakgakan betún, chuna tsukuka limaklakaskinkan petróleo xalak sur xla Irak. Xwi kilhtamaku akxni uma petróleo xkamamakxtumi latamanin pero, la uku tlawa pi nitlan natawila política chu lachipat anta kʼIrak. Lhuwa mil kata makgapalakgonit chiki chu piso nema litatlawalh betún, makgtayanit xlakata nitu nakaʼakgspula piso chu ladrillos».

¿Tukuya kapsnat xtamaklakaskin makgasata akxni tsokgka Biblia?

▪ Lu chuna tlawayaw uma takgalhskinin akxni likgalhtawakgayaw tuku tsokgli apóstol Juan: «Maski lhuwa ntu kkgalhiy ntu xakkatsokgnin, ni kaj kkapsnat, na ni kaj tinta kkalixakgatliputunan» (2 Juan 12).

Tachuwin xagriego chartes, nema wamputun «kapsnat», kilhchanima kapsnat xla papiro. Papiro staka kchuchut chu xakiwi, kapsnat xtlawakan. ¿La xtlawakan? Maktum tatsokgni chuna wan: «Xmakgxwakgkan xakiwi nema max akgtutu metro xlilhman xchan, titsunin xkalakchukukan chu xlakgalhmawakakan: kgantum aktsa chu kgantum pakgotu xmamikan. Alistalh xlakxtakamikan xlakata kapsnat nawan chu awatiya xlakgaxakgakan xlakata slipinki xwa».

Arqueólogos tekgskgonit lhuwa papiros xalakgmakgan anta kʼEgipto chu lakatsu kmar Muerto. Makgapitsi papiros nema katekgskanit anta nema xlimin xtachuwin Dios, tsokgka akxni xlama Jesús o tlakg makgasata. Max cartas nema limin Biblia, la tuku malakgachakgolh apóstoles, kpapiro katsokgka.

[Tiku tapakgsini fotografía xla página 11]

Spectrumphotofile/​photographersdirect.com

© FLPA/​David Hosking/​age fotostock