Klakachilh kMoundsville, akgtum kachikin nema wi lakatsu kxkgalhtuchokgo Ohio, kxpakxtu Virginia Occidental. Kinkgalhtatikan xakwanitaw, kgalhtutu lakgkgawasan chu chatum tsumat, akit xlichatiy xakwanit, wa xlakata kinchikkan xʼanan tapaxuwan. Kinatlatnikan ni xkgalhanankgo chu lu skulujwa xwankgonit, xkapaxkikgo amakgapitsin; ni rico xakwanitaw pero xakkgalhiyaw tuku xakmaklakaskinaw. Xlakata kinatlani xtatayananin Jehová xwankgonit, liskujkgolh xlakata xkinkamasiyanikgon tuku wan Biblia akxni laktsujku xakwanitaw.

Pero akxni tlakg lankata kwa, nialh lu xaklakgati tuku xkimasiyanikgonit kinatlatni. Ni liwana xakkatsi komo xkimakgapaxuwalh akxni xaktlawalh tuku wan Biblia. Akit xaklakpuwan pi xlakata tlan xakpaxuwalh xaktlawalh tuku xaktlawaputulh. Wa xlakata nialh kkalh ktamakxtumit. Kintala xapuxku chu kintala tsumat nachuna tlawakgolh. Kinatlatnikan lakputsakgolh la nakinkamakgtayakgoyan pero komo nialh xakkgaxmataw ni kmakglhtinaw xtamakgtaykan.

Pero ni xakkatsi pi tuku xaklakpuwan pi xʼama kimakgapaxuwa, wi tuku xʼama kimasmanipasa. Akgtum kilhtamaku akxni kkitaspitli kʼescuela, chatum kiʼamigo kimalaknunilh cigarro chu kmakglhtilh. Uma kilhtamaku ktsukulh tlawa tuku nitlan, ktsukulh wa drogas, kuchu chu ktlawalh talakgxtumit xalimaxana. Chuna la titaxtulh kilhtamaku ktsukulh wa tlakg xalakgtliwakga drogas chu nialhla xakkamakgxtakga. Asta ktsukulh ksta drogas xlakata xakxokgolh tuku xaksmanipasanit.

Maski nialh xaklakapastakputun pi nitlan tuku xaktlawama, pero chuntiya xmin kkintalakapastakni pi nitlan tuku xaktlawama. Akit xaklakpuwan: «Nialhla tuku naktlawa». ¡Makglhuwa kiʼakstu xakwi xakmakgkatsi, chu lu xaklipuwan maski lhuwa tiku xakkataʼan kpaskua chu niku tlakgnankan! Xmin kilhtamaku xaklakapastaka pi kinatlatni lu tlan xlikatsikgo chu xkinkgalhskinkan tuku xlakata chuna klalh.

Akit xaklakpuwan pi nialhla tuku xaktlawalh pero ni putum chuna xlakpuwankgokan. Kkata 2000, kinatlatni kiwanikgolh pi xakkataʼalh ktamakxtumit xaʼakgtutu kilhtamaku xla xtatayananin Jehová. Maski ni xakamputun, kkataʼalh. Chu anta ktamakxtumit, na xʼankgonit chatiy kinatalan tiku na xtamakgatlikgonit.

Akxni anta xakwi, klakapastakli pi xtitaxtunita akgtum kata, na antiya xtatlawanit akgtum concierto xla rock. Tuku kakxilhli anta chalh kkinaku. Akxni kkilalh kconcierto kaniwa xʼanan basura chu lu xlikapuksan cigarro. Tiku anta xwilakgolh nitlan xlikatsikgo chu tatlakgni lu xmakgalipuwanan. Pero anta ktamakxtumit xakkatawi tiku xpaxuwakgo chu xatapaxuwan kimakgamakglhtinankgolh maski akglhuwata kata nitu xakkaʼakxilhnit. Anta ni xʼanan basura chu lu tlan tuku xlichuwinamaka. Akxni kakxilhli pi Biblia kinkamatlawiyan tuku tlan, tlawalh pi akstu xkinkgalhskinka tuku xlakata kmakgxtakgli (Isaías 48:17, 18).

Tunkun ktaspitpa kcongregación. Nachuna tlawakgolh kinatalan, xlakata na kamakgtayalh tuku akxilhkgolh kʼuma tamakxtumit. Kinkgalhtutukan kmakglhtinaw takgalhtawakga xalak Biblia.

Texto nema chalh kkinaku wa Santiago 4:8 niku wan: «Wa Dios nti nkatalakatsuwinitit, na nakatalakatsuwiniyan xla». Kkatsilh pi komo xaktalakatsuwiniputulh Dios, xtalakaskin xaklakgpalilh kilatamat. Na xtalakaskin xakmakgxtakgli cigarro, drogas chu kuchu (2 Corintios 7:1).

Kkamakgxtakgli tiku xakkatalalin chu wa kiʼamigos kkatlawalh tiku kakninanikgo Jehová. Lu kimakgtayalh kgolotsin xalak congregación tiku xkimakgalhtawakge. Xkintachuwinan kteléfono chu xkilakgan xlakata nakatsi la xkinkitaxtunima. Asta la uku wa kiʼamigo tiku lu tlan ktalalin.

Kprimavera xla kata 2001, ktamunulh chu na akxni tamunukgolh kintala kgawasa chu kintala tsumat chu xtatayana Jehová klitaxtuw. Lu paxuwakgolh kinatlatni chu kintala xataju, tiku ni makgxtakgli Dios, akxni kifamilia makxtum tsukukgolh kakninanikgo Jehová.

Pulana xaklakpuwan pi tuku wan Biblia lu nila tuku xkimatlawi, pero la uku klakpuwan pi lu makgtayanan. Biblia kimakgtayalh xlakata nialh xakwalh chu nialh xakstalh drogas chu chuna xaktlawalh tuku tlan kkachikin.

La uku kmakgtapakgsi akgtum kachikin nema wi xlikalanka katiyatni tiku makxtum kakninanikgo Jehová chu lu xlikana lapaxkikgo (Juan 13:34, 35). Anta ktekgsli chatum tiku lu lanka xtapalh kakxilha: kimpuskat Adrianne, tiku lu kpaxki chu lu kmaxki kakni. Kinchatiykan lu kpaxuwayaw xlakata akxtum kskujnimaw kiMalakatsukinakan.

La uku ni kaj wa kputsa tuku klakaskin, wata putum kilhtamaku klichuwinan Dios xlakata nakkamasiyani latamanin, la lu tlan kitaxtu akxni tlawakan tuku wan xTachuwin Dios. Uma taskujut lu kimakgapaxuwa. Tlan kwan pi Biblia lakgpalinit kilatamat. ¡Ktekgsli xaxlikana tapaxuwan!