Revista nema likgalhtawakgapat tsukuka tlawakan julio kata 1879. Kilhtamaku talakgpalinit chu nachuna uma revista (kaʼakxilhti fotos nema wilakgolh talhman). Chuna la naʼakxilha, uma revista Makatsinina natsuku talakgpali.

Klhuwa países, lhuwa latamanin tlakg lakgatikgo putsakgo kʼInternet tuku katsiputunkgo. Kajwatiya napitanikgo ratón chu lhuwa tuku natekgskgo nema kaj kʼInternet anan. La uku, anan lhuwa libros, revistas, chu periódicos kʼInternet.

Xlakata latamanin lakgatikgo kgalhtawakgakgo kʼInternet, aku klakgpaliw kisitiojkan kʼInternet (jw.org/jw-tot) xlakata tlakg tlan natasiya chu tlakg ni tuwa namaklakaskinkan. Tiku natanu kʼuma sitio naʼakxilha pi liwaka akgtati ciento a puxamakaw tachuwin anan likgalhtawakga. Kʼuma papaʼ naʼakxilhkgo pi kʼuma sitio natsukukan wilikan makgapitsi artículos nema ximprimirlikan. *

Xlakata naktsukuyaw maxtuyaw artículos nema kaj kkisitiojkan natawila, Makatsinina nema makgpitsiyaw xkgalhi 32 páginas chu la uku kaj 16 páginas nakgalhi. La uku, revista Makatsinina tamatitaxtima k204 tachuwin; xlakata nialh lhuwa páginas limin, tlakg ni tuwa natamatitaxti klhuwa tachuwin.

Klakpuwanaw pi xlakata chuna tatlawama tlakg lhuwa latamanin nakalakgchan tamakatsin xalak Biblia nema nakamalakgtaxti. Chuntiya klakpuwanitaw nakmaxtuyaw uma lu stlan revista nema taʼimprimirli chu tuku taxtu kʼInternet, xlakata nakamakgtaya lhuwa tiku likgalhtawakgakgo Biblia chu tiku katsiputunkgo tuku xlikana masiya.

Tiku tlawakgonit