¿Lakapastaka akxni lakachilh miskgata? Max lu xchaxputuna. Pero, akxni chatum skgata xatatatla akxni lakachin, anan talipuwan xtachuna la titaxtukgolh Carlo chu Mia.

¿Kgalhiya chatum skgata tiku xatatatla? ¿Lakpuwanita komo tlan natayaniya? Komo chuna, ni kalakpuwanti pi nila: makgapitsi natlatni chuna la wix tayanikgonit taʼakglhuwit nema wix kgalhiya. Kalichuwinaw pulaktutu taʼakglhuwit nema titaxtukan chu la tlan namakgtayayan xtastakyaw Biblia.

Lhuwa natlatni lu lilipuwankgo akxni katsikgo pi kskgatakan nitlan lakachilh. Chatum tse xalak México wanikan Juliana wa: «Akxni makuchinanin kiwanikgolh  pi kinkgawasa Santiago xninit xakskitit, nila xakkanajla. Lu klilipuwa». Amakgapitsi makgkatsikgo la chatum tse xalak Italia wanikan Viviana, xla wan: «Akit kkgalhiputulh chatum skgata, maski xakkatsi pi tuwa nawan xlakata xaklina kata chu akxni lakachilh xkgalhi síndrome de Down. La uku, akxni kʼakxilha la patinan kinkgawasa klakpuwan pi kinkuenta xlakata tuku titaxtuma».

Uma lu nitlan limakgkatsikan chu max lakpuwana pi nila tuku tlawaya. Dios ni xlakaskin pi xtatatlaw (Génesis 1:27, 28). Nachuna kinkatlawan xlakata tuwa namakgkatsiyaw namakgamakglhtinanaw tuku ni wa kinkalimalakatsukin. Wix ni kgalhiya chatum skgata tiku ni xatatatla chu wa xlakata nitlan limakgkatsiya. Uma lin kilhtamaku xlakata nialh chuna namakgkatsiya chu tlan nalatapaya.

¿Tuku namakgtayayan komo makgkatsiya pi minkuenta xlakata chuna lakachilh minkgawasa? Kalakapastakti pi ni katsiyaw tuku xlakata chuna kinkamatitaxtiniyan kinatlatnikan, chu atanu tuku tlawa xatatatla nalakachin skgata. ¿Chu komo wa nalimawakaputuna tiku tamakgaxtokga? Ni chuna kalakapastakti. Tlakg tlan nalamakgtayayatit xlakata nakuentajtlawayatit tuku maklakaskin miskgatakan (Eclesiastés 4:9, 10).

MAX TLAN XTLAWA UMA: Kaputsananti xlakata xtajatat minkgawasa. Biblia wan: «Talakaskin liskgalala xlakata tlan nakgalhiya akgtum lu tlan familia, chu liwana nalakapastaka tuku natlawaya xlakata tliwakga natawila» (Proverbios 24:3, New Century Version).

Kakakgalhskinti makuchinanin chu kaputsa likgalhtawakga nema anan. Lakgapaskan akgtum tajatat tlan natamalakxtupiya la akxni aku katsinipat akgtum tachuwin: xapulana lu tuwa namakgkatsiya, pero alistalh liwana nakatsiniya.

Carlo chu Mia kgalhskinkgolh xmakuchinakan chu atanu tiku lakgapaskgo xlakata tajatat nema kgalhi xkgawasakan. Xlakan wankgo: «Uma kinkamakgtayan ni kajwatiya nakkatsiyaw tukuya taʼakglhuwit tatitaxtukan tiku kgalhi síndrome de Down wata na kkatsiw “tuku tlan tlawa” tiku kgalhi uma tajatat. Kʼakxilhwi pi kinkgawasakan na tlan xlatamalh la tiku ni tatatlakgo. Uma lu tlan klimakgkatsiw».

Max makglhtikgoyan militliwakga xlakata kuentaj tlawaya miskgata. Jenney, chatum tse xalak Nueva Zelanda wan: «Akxni kinkgawasa tekgsnika tajatat espina bífida (tiku nitlan xakgchalukut), lu xkimakgatlakgwan xlakata akglhuwa kata kkuentajtlawalh chu akxni xaktsuku tlawa kintaskujut xalak kchiki asta lu xaktasaputun».

Min kilhtamaku kiʼakstukan wilaw namakgkatsiyaw. Xkgawasa Ben, kgalhi distrofia muscular (tiku xlajwanan makgapitsi xmakni) chu síndrome de Asperger. Xla wan: «Lhuwa nila akgatekgskgo tuku tuwa ktitaxtumaw. Max namaklakaskinaw wi tiku natachuwinanaw, pero komo miʼamigos ni tatatlakgo xkamanankan nila nakawaniya la makgkatsiya».

MAX TLAN XTLAWA UMA: Kaskinti tamakgtay chu kamakglhtinanti akxni namaxkikana. Juliana wan: «Min kilhtamaku kinchixku chu akit kmaxananaw nakskinaw tamakgtay, pero kkatsininitaw pi maklakaskinaw tamakgtay. Akxni wi tiku kinkamakgtayayan ni kiʼakstukan kwilaw kmakgkatsiyaw». Akxni chatum miʼamigo o xalak mifamilia nawanikgoyan pi tatawilaputunkgo minkgawasa kʼakgtum reunión social o ktamakxtumit kamakgamakglhtinanti. Akgtum texto xalak Biblia wan: «Xaxlikana amigo xlenkgalhin paxkinan, chu litaxtu la chatum tala akxni anan talakgaputsit» (Proverbios 17:17).

Wix na kuentajkatlawa milatamat. Xtachuna la ambulancia talakaskin namujunikan gasolina xlakata chuntiya tlan nakalinkgo tatatlanin kpukuchin, nachuna militlawat, nawaya tuku namatliwakglhan, natlawaya ejercicio, chu najaxa xlakata chuntiya nakuentajtlawaya minkgawasa. Javier, tiku xkgawasa nila tlawan, kinkawaniyan: «Xlakata kinkgawasa nila tlawan, kkatsi pi talakaskin liwana nakwayan xlakata tlan naklin niku natalakaskin. Kintantun wa xtantun».

Pero ¿la nakuentajtlawaya milatamat? Makgapitsi lakkaxwilikgo tiku pulana nalakgchan nakuentajtlawa xkgawasakan: akxni xatse o xatlat jaxa o wi tuku tlawa achatum kuentajtlawa kgawasa. Max nialh natalakaskin pi wix natlawaya tuku ni lu xlakaskinka xlakata tlan kuentaj natlawaya milatamat. Mayuri tse xalak India, wan: «Namin kilhtamaku akxni nialh tuwa katimakgkatsi».

 Katachuwinanti chatum miʼamigo tiku lipawana. Ni kalakpuwanti pi maski ni tatatlakgo xkamankan nila katiʼakgatekgsnikgon. Na kalakapastakti pi tlan naskiniya Jehová pi kamakgtayan. Max nalakpuwana pi komo namakgtayayan natlawaya oración. Yazmin tiku kgalhi chatiy kamanan nema kgalhikgo fibrosis quística (tiku lijikswa xchujut), wan: «Min kilhtamaku lu tuwa kmakgkatsi asta nialh ktayani. Pero kskini Jehová pi kakimakgtayalh chu kakimatliwakglhli chu kmakgkatsi pi tlan chuntiya nakkakuentajtlawa kinkamanan» (Salmo 145:18).

Akxni wi tiku tatatla talakgpali tuku wakgo familia, niku ankgo chu max nialh lhuwa kilhtamaku katatawilakgo amakgapitsi xkamanankan. Chu kamanan makgkatsikgo pi nialh kakakuentajtlawamaka. Nachuna, natlatni tiku kuentajtlawakgo tiku tatatla asta nialh kuentatlawakgo xtamakgaxtokgatkan. Lionel chatum tlat xalak Liberia wan: «Min kilhtamaku kimpuskat kiwani pi wa tlakg kuentajtlawa kinkgawasakan chu na wan pi ni kpaxki. Lu nitlan klimakgkatsi chu lakgachunin nitlan la kkgalhti».

MAX TLAN XTLAWA UMA: Kakawani minkamanan pi kapaxkiya xchatunukan. ¿La natlawaya? Nakatatlawaya tuku lakgatikgo. Jenney wan: «Min kilhtamaku ktlawayaw tuku lu lakgati xapuxku kinkgawasa, kkanaw krestaurante niku lu lakgati an wayan».

Xlakata nitu naʼakgspula mintamakgaxtokgat kalatachuwinantit chu akxtum katlawatit oración. Aseem, chatum tlat xalak India tiku xkgawasa snokga un, kinkawaniyan: «Kimpuskat chu akit kkgalhiyaw akgtum hora akxni kchuwinanaw chu ktlawayaw oración, chu chuna ktlawayaw maski lu ktlakgwanitaw o lu ktaxlajwaninitaw. Tsisa akxni nina takikgo kinkamanankan akxtum klikgalhtawakgayaw akgtum versículo xalak Biblia». Amakgapitsi akxtum latachuwinankgo akxni nina lhtatakgo. Xlakata latachuwinanatit chu tlawayatit oración uma namatliwakglha mintamakgaxtokgatkan maski lu tuwa tuku titaxtupatit (Proverbios 15:22). Chuna la wan akgtum tamakgaxtokgat: «Kilhtamaku nema tlakg xatapaxuwan klakapastakaw wa pi akxtum ktayaniw tuku lu tuwa ktitaxtuw».

Biblia wan pi nialh makgas Dios namasputu putum tajatat chu tuku kamapatini latamanin (Apocalipsis [Revelación] 21:3, 4). Akxni nachin ama kilhtamaku «ni chatum lataman nawan: “Ktatatlay”» (Isaías 33:24). *

Kalakpuwanti pi tlan natayaniya. Carlo chu Mia wankgo: «Ni kataxlajwani akxni akxilha pi nitlan kitaxtuniman. Kaʼakxilhtit tuku tlan tlawa minkgawasa, chu naʼakxilha pi lhuwa tuku tlan tlawa».