ABRIL kata 2006, lu tsukuka makatsininankan pi makgapitsi lakputsananin lichuwinankgolh akgtum xamakgan tatsokgni nema nina lhuwa kata xtekgskanit: nema wanikan Evangelio según Judas. Lhuwa putsananin wankgolh pi uma texto xʼama lakgpali la akxilhaw Judas, tiku stamakgalh Jesús; xʼamaw akgatekgsaw pi Judas lu tlan tuku tlawalh, wa tiku tlakg xlakgapasa xMakgalhtawakgena chu makamastalh xlakata chuna xwaninit Jesús.

¿Xaxlikana uma tatsokgni? Komo chuna, ¿lichuwinan tuku ni lakgapasaw xlakata Judas Iscariote, Jesucristo o xlakata xapulana kstalaninanin Cristo? ¿Pi nakinkamakgtayayan naʼakgatekgsaw tuku masiyalh Cristo?

Ni liwana takatsi la tekgska Evangelio según Judas. Ni tekgska chuna la tuku tekgskgo arqueólogos, wata kaj xalan tsukuka stakan kmercado niku anankgo tuku xalakgmakgan akxni ksputma kata 1970 chu xtsukuma 1980. Max wi tiku tekgsli kʼEgipto kkata 1978, kʼakgtum lhuku niku xmaknunankan. Akgtati xwanit pero kaj akgtum tekgska nema xlitakgatsi tatsokgni la akgtum códice (xtachuna la maktum libro) xtatsokgnit kcopto, chuna la xchuwinankgo egipcios xalakgmakgan.

Xlakata lhuwa siglos kaskakni niku xwi, akxni maxtuka kkalakgwan uma códice nema xlitatlawanit xuwa tsukulh taxtita. Kkata 1983, kgalhtutu putsananin akxilhkgolh, pero komo lu tapalaxla xwanit nila tamawakgolh. Titaxtukgolh kata chu uma tatsokgni chuntiya xlaklama xlakata nialhti kuentajtlawalh chu xlakata ni liwana xmakikanit. Kkata 2000, tamawalh chatum puskat xalak Suiza tiku xtamawa tuku xalakgmakgan, chu alistalh kamaxkilh putsananin xalak lakalhuwa kachikinin. Uma putsananin xtaskujkgo Fundación Mecenas de Arte Antiguo chu Sociedad National Geographic chu xkgalhikgo akgtum lu tuwa taskujut, xʼamakgo lakkaxtlawaparakgo tuku laktsu laktsu xlanit. Nachuna xlitakatsit xwanit tukuya kata tsokgka, xlitamatitaxtit xwanit kʼatanu tachuwin chu xlitakatsit tuku xlichuwinan.

Akxni liputsananika carbono 14, katsika pi uma tatsokgni tlawaka ksiglo III o IV akxni xminita Jesús. Pero alistalh, putsananin lakpuwankgolh  pi uma tatsokgni copto xla Evangelio según Judas xtiyakanit kʼakgtum tatsokgni griego xala makgasa. ¿Tukuya kata tsokgka xapulana chu tuku xlama ama kilhtamaku?

Xapulana akxni lichuwinankan Evangelio según Judas anta kxtatsokgni Ireneo, obispo xalak Lyon, tiku latamalh akxni ksputma siglo II. Kxtatsokgni Contra las herejías, Ireneo lichuwinan makgapitsi tiku xkatalatlawa: «Wankgo pi Judas, stamakgana, liwana xlakgapasa uma, xlakata kajwatiya kstalanina tiku xkgalhi “xaxlikana takatsin”, wa xlakata “stamakgalh”, chu xlakata tuku tlawalh malakgsputukanit putum tuku wi kKatiyatni chu kʼakgapun. Chuna masiyakgo akgtum tatsokgni nema xlakan tlawakgonit, nema mapakuwikgo xEvangelio Judas».

Ireneo xkatalatlawa tuku xmasiyakgo gnósticos, tiku xwankgo pi wa xkamasiyaninit Dios. Tachuwin gnosticismo kilhchanima tiku wankgo chuna la xlakan lakpuwankgo pi akgatekgskgo «xaxlikana» xlakata tuku masiyalh Cristo. Gnósticos xmasiyakgo tuku xtakilhtinit ktatsokgni nema atanu gnósticos xtlawakgonit, chu ksiglo II lhuwa xʼanankgo umakgolh tatsokgni.

Lhuwa evangelios gnósticos (chuna xkawanikan makgapitsi xtatsokgnikan) xwankgo pi apóstoles tiku tlakg lhuwa tuku xlakgayakgo nitlan akgatekgskgolh tuku Jesús kamasiyanilh chu pi wi atanu tuku kamasiyanilh Jesús nema kaj makgapitsi akgatekgskgolh. * Lhuwa gnósticos xlakpuwankgo pi tuku anan kkatiyatni wa akgtum pulachin nema tlawalh «dios malakatsukina» nema talichuwinan kAntiguo Testamento, tiku ni lu tliwakga xwanit chu xkatalatlawa tlakg lakgtliwakga dioses tiku xlakan xkanajlanikgo. Tiku xkgalhi uma xaxlikana takatsin tlan xakgatekgsa tuku ni takatsi chu tlan xlakgtaxtunilh xtiyatliwa.

Uma tuku xlakpuwankgo chuna litasiya kEvangelio según Judas, nema limatsukikan uma tachuwin: «Uma tuku ni xtakatsi, Jesús makatsinilh Judas Iscariote akxni tachuwinalh akgtum semana chu akgtutu kilhtamaku akxni nina xtlawakan Pascua».

¿Watiya uma códice nema lichuwinalh Ireneo, chu nema lhuwa siglos xtsankganit? Marvin Meyer, tiku pulana putsananilh chu matitaxtilh kʼatanu tachuwin uma tatsokgni, wan pi «tuku tsinu lichuwinalh Ireneo xtachuna tuku wan tatsokgni copto nema kgalhiyaw chu nema tapakuwi Evangelio según Judas».

Evangelio según Judas wan pi Jesús kalilitsin kstalaninanin xlakata ni akgatekgskgo tuku kawani. Xlakata kaj Judas tiku akgatekgsa xaxlikana xlakata Jesús, xla kaj xakstu malakgapasni «tuku ni takatsi xlakata tamapakgsin».

Xapulana putsananin tiku matitaxtikgolh kʼatanu tachuwin uma tatsokgni wa stalanikgolh tuku xwanit Ireneo xlakata uma evangelio. Xlakan matitaxtikgolh pi Jesús akxilha Judas la kstalanina tiku xakgatekgsli tuku ni xtakatsi chu xmakglhtinalh «tamapakgsin». Apóstoles xʼama putsakgo tiku xtawilalh xlakgxokgo Judas, pero xla xʼama wan «xlikgalhkututu espíritu». Jesús wanilh: «Wix tlakg lanka nawana nixawa xlakan. Xlakata wix nakimakamastaya naklakgtaxtuni kintiyatliwa».

Tiku putsananikgo xtakanajlakan xapulana kstalaninanin Cristo chu gnósticos, la Bart Ehrman chu Elaine Pagels, tiku na tsokgnanin nema tlakg kalakgapaskan, tunkun makatsininankgolh tuku xputsanankgonit chu tuku xlichuwinankgo xlakata Evangelio según Judas, chu nachuna xwankgo la tiku xapulana xmatitaxtikgonit  kʼatanu tachuwin. Pero alistalh, atanu putsananin, la April DeConick chu Birger Pearson, wankgolh pi wi tuku nitlan xʼakxilhkgo. Xlakan wankgolh pi, Sociedad National Geographic tunkun makatsininalh tuku xwan xamakgan tatsokgni kaj xlakata xapulana xwamputunkgo tiku xmakatsininankgolh. Chu nachuna, kamafirmarlinika xlakata nitu xlichuwinankgolh chu ni tlawakgolh tuku xlitlawatkan xwanit, ni putsananikgolh tatsokgni.

DeConick chu Pearson xchatunukan likgalhtawakgakgolh tatsokgni chu akxilhkgolh pi tuku tlakg xlakaskinka xwan códice nitlan la xmatitaxtikanit kʼatanu tachuwin. Tuku tsokgli DeConick wan pi Jesús mapakuwi Judas «xlikgalhkututu demonio», ni «xlikgalhkututu espíritu». * Nachuna lakatanks wani pi ni katimakglhtinalh «tamapakgsin». Xla ni xʼama makglhtinan tuku tlakg tlan ni xawa amakgapitsin kstalaninanin, wata xʼamaka malakgaxokgekan xlakata makgnilh Jesús. DeConick wan pi Evangelio según Judas wa tuku tlawakgolh gnósticos xlakata xkalikgalhkgamanankgolh putum apóstoles. Xaʼawatiya, DeConick chu Pearson, lakpuwankgo pi tatsokgni ni lichuwinan Judas la tiku tlawalh tuku lu tlan.

Maski akxilhkgo Judas la tiku tlawalh tuku lu tlan o la chatum demonio, ni chatum putsananin tiku likgalhtawakgakgonit uma tatsokgni lakpuwankgo pi tuku lichuwinan chuna lanit chu tlan kanajlakan. Bart Ehrman wan: «Uma evangelio ni Judas tsokgli, na ni wan anta pi wa tsokgli. [...] Uma evangelio ni tsokgli tiku xlakgapasa Judas chu xlama kxkilhtamaku [...]. Wa xlakata, ni kinkalitachuwinanan tuku ni katsiyaw xlakata tuku lalh akxni Jesús xlama kKatiyatni».

Evangelio según Judas akgtum tatsokgni gnóstico, max xalak siglo II nema pulana tsokgka kʼgriego. Maski watiya tatsokgni o ni nema lichuwinan Ireneo, chuntiya litalatlawamakgo putsananin. Tuku liwana katsiyaw wa pi Evangelio según Judas lakatanks masiya pi milh kilhtamaku akxni analh nixaxlikana kstalaninanin Cristo tiku tamaknukgolh xtamasiykan chu malakatsukikgolh nixaxlikana takanajla. Uma ni makglhti limapakgsin Biblia, kaj limasiya pi lu xlikana tuku xlichuwinankgonit apóstoles, la Pablo, tiku wa kHechos 20:29, 30: «Akxni nkanitta nawan, [...] kmilakgstipankan makgapitsin nchixkuwin, na tanuj tamasiyun ntu ni talulokgtat nalichuwinankgoy, lakimpi namalakgaspityawakgoy limakgalhtawakgat nastalanikgoy».